ጫረቱ ቀሰው ጻቨነው ሰቭ ጡሸውዝ ሰራሽታጙ አቐጘ ጋልፅሽቱ።

ወይ ኽምረ ብሔረ እቅ ጭሰጭሰንዝ አቨርገሌ ወረደይል 13 ሰቭዝቁ አይንተንዝ ሊጘ ሚሊዮን ቊርሽ ፊሰው ሰቭ ሰራሽተው አቐጘ ጋልፅሽትኩ።

ሥነ  እዘንዙ ሙየ ጉርየድ  አማኑኤል ካትሪ  ያንትጘድ ”  ይና ዓልምትል ውርም አይንት ቃውሰተ አቕንት ይውሽቲንቀ  ጝቕመ ቀሰው አቐው ገቨድ ላው ጭቚ የጝ ፣ ጘጝም ቀሰው ጻቨነው የጝ” የነውዝ ጝታ ኻሰቭድ ጋልፅጝኲⶔ።

ቀሰው ጻቨነው (ጭሩነይ) ቀሰው ጻቭሽተተይዙ ችግሰድ ቓቭዘነውዝ   እምጥጘድ ላብጠቱ  ፃቨነውድ  ቓሊሰተ የጝ።   ውርም እንኳ ኢትዮጲቊዝ  ቀሰው ጻቨነው አይር ገቨ አቓቕ ይሽም ቀሰው ጻቨነውዝ አምነው ዜገ  ዊንጠ ጻቨነው ቈሽ ኽየው ሰቭ  የጝ።

ኻግር አቅቨ ተግዝ ቀሰው ጻቭንዙ  እግልግለድ ባኽል ጻቨው ዜገ ዊንጠ ማጥን ቸልሰቊ ሰበን  ሰራሽተነው ኪርምሸት ዊንኲ።  2016 ዓ.ስዙ  ጫረ ኰሪዝ ቀሰው ጻቭንዙ እግልግለ ሰቭዝ 34 ሚሊዮን ውሸብል ሲትፍሸተ ጻቨው  ፍልውልወ  ሳብጢዝ ኪርምሰነ አጽቨ ጻጝሽትኲ።  ሰቭድም  “ቀሰው ጻቨነው ኢትዮጵየስ”  የው ቃወ  ኻሰቭዝ   ኪርምሽኩ።

ዊዝር እግዜሩ ደስታ አቨርገሌ ወረደ 01 ቀቨሌ ፅበተ ጚ። ጝታጝንድ ጣይትኒዝ ኰር ፋይረነውድ ጉይጝ ትኽነ በቊ አቐነዊስ ሲዘ ንየ እፈር ሊጊሰቊ አቐነውድ ዊግተች።

ትኽኒ ሲጝቀ ሽላ ቅየነውዝ ጝርቕመት ጭሰጭስራጙ ዊንድረጘ ዋርዝረይ ዊዝር እግዜሩ ትኽነ ብረት እግርገ ጝንድ ጣግነነውመ ቺዝጠ ናኒስ ምጀይዝጐ እኳን  እጅጘነውድ የጝ ዊግትረውድ።

“ቀሰው ፃቨጥ ውሸብል እቁንዝመ መልቁ ኻለይ ገረዱ ጽፈሽ ጝንጅቅ አቐነውዝ 50 አይር  ቆርቆሮዝ ሊጘ ክፍል  አይርስጝ(አድሰው) ነይጝኩጙ። ኰረዝመ ኪበዝ ጣይጣጙ ዊነርድ ቓዝጝኩጙ።  እነየው ቀሰው ፃቨጥ ውሸብልድ እደረ በርክነ” ይራንድም ጋልፅርኩች።

“ቀሰው ፃቨነው ጛቕመስ አእምሮዙ ጠራቕን ነየኩ። ቀሰው ፃቭንዙ ሰቭ እጅር ትክቭክቩዝ አይንቀት እዘን ፊቅደውድ ፃቨነው የጝ” የነውዝ ቀሰው ፃቨተ ውሸብለ ሸገ መኮነን ጋልፀኩ።

“ውሸብለድ ጅውነይል እቀ ኽቭሪዝ ማኽሊል ከቨ በነቊዝ እንዝ ሚቅ ፃቫጙ ዊናንትጘድቅ ቸለዊዝቅ ይፃምጢጅቅ ከቨ ፃቨኩን። እንዝም ጭቕጘ እምጥጘኩንም” የውኩ።

አቭርገሌ   ወረደ ውሸብል ዝመ  ስፓርት ጽፈሽ ጝንዙ ዲቈተ አቐቊ አት ህድሬ ወልዴ   2015 ዓ.ስዙ ቀሰው ጻቭንዙ እግልግለይዝ  ዲግዙ ጁውነ አቐቚ ሲዘ ቀበሊጥል ሰቭድ ጥውሸውዝ ሰራሽተው አቐጘድ ዊግትጘኩ። ሰቪዝም 8ላዝ 50 ውሸብል ሲትፍሸነው ቸልጘጘ ቀሰው ፃቭንዙ ሰቪዝ 3 ሽኽ ፍለን ውሸብሊዝ ቲክልሽጘጘ፣ አቅም እጀቊ እቅዙ ጝን ኲንሽጘ የጝ ጋልፅጘውድ፡፡

2016 ዓ.ስዙ ጫረዙ ሰቪዝ 1 ሽኽዝ 5 ላ ውሸብል ሲትፍዘናንስ ኻለይ ጻይሽተው አቓንድ፤ እንጎይስ ቃውሰ አስልሽትዙ ሰቭ ሰራሽታⶔ አቐነውድ ዊግትጝኲⶔ ።

ዓምረይዝም 4 ሽኽዝ 5 ላ ፍለን ቲክለናንስ ኻለይ ጻይሽትኲ ፤ ቺተቺተቊ ሰበንዝ ጻይሽተቊ ውሸብሊዝ ሥነ እዘንዙ ስልጠነ ይወነው ፤ አቅም እጀቊ እቅዙ ጝንድ ተሰነው ዝመ ላጥ ኽዝቭድ አሩወቊ ሰበን ሰራሽተቊ አቐነውድ ጉይጝኲⶔ።

ሰራሽተው እግልግለይዝም 2 ሚሊየን ምጝግስትዙ በጀት ቓዘናንስ ኻለይ ጻይሽተነውድም ጋልፅጝኲⶔ።

ብሔረ እቅ ጭሰጭሰኒዙ ውሸብል ዝመ ስፓርት ቃወነ ዲቈተ አት አብዱራህማን መኮንን ጝታ ጋቢዝ 2016 ዓ.ስዙ ቀሰው ጻቭንዙ  እግልግለ ቃውሰ አስልሽትዙ ሰቭድ  ኻትሸነውድ ዊግትጝኲⶔ ።

ዲቆው ዓምረይዝም 1 ላዝ 12 ቀበሊጥል ቀሰው ጻቭንዙ ሰቭ ሰራሽት 5 ነቊጠ 5 ሚሊየን ቊርሽ ምጝግስትዙ በጀትድ ቓዘነዊስ ከስጘ 20 ጝንጥ ተሰነውዝ አቅም እጀቊ እቅዝ ይወነውዙ ሰቭ ሰራሽተነውድም አጅስጝኲⶔ።

2015 ዓ.ስ ቀሰው ጻቭን እግልግለዙ ሰቭድ ብሔረ እቅ ጭሰጭሰኒዝጘድ 13 ዓይንት ሰበን ሰራሽተጘኩ። ፍልውልወይዝም ቺዝየው ፋፅምፅመ ቓሊሰቊድ ቺዘነው ቸልሸጘም ጋልፅጘኩ።

ሰቊጠ ኻትመ ጭሰጭሰን 1ትረ ፋንድ፣ ሰቊጠ ወረደ 2ትረ እንዝጘም ድሃነ ወረደ ቈሽ 3 ትረ ተግ ጻየነውዝ  ቺዘው ሰብ ሰራሽጝ ዊንጘጘ ዲቈተድ አጂስጘኲ።

2016 ዓ.ስዙ ቀሰው ጻቭን እግልግለዙ ሰቭድ 90 ጝንጥ ብሔረ እቅ ጭሰጭሰኒዙ ቀበሌኒል ሰራሽተው አቐንድ ሰቪዝም 82 ሽኽዝ ንየ ውሸበል  ሲትፍሸቊ አቐነውድ የጝ አት አብዱራህማን ጋልፅጘውድ፡፡   ቀሰው ጻቭንዙ ሰቪዝም  2 ላዝ 26 ሽኽ እቀ ኽቭርዙ ክፍለን  አሩሽተ ጻቨው አቐጘም ጉይጝኲⶔ።

ቺተዝም ኽሪዝ አጋልሽተቊ እቀ ኽቭርዙ ክፍለኒዝ ቺተው ከቨ ጻቨነው ፤ ዲግ ዝመ ዳኽንነይዙ ሰቭ ፤አልቛዘ ደፈዙ ሰቭ ፤ ብር ይወነው ፤ ጨቅሸቊ ጉገንድ  ጻግነነው ፤  አትርዘነ ክንድጝ ይወነው ፤ እንዝጘም አቅም እጀቊ እቅዙ ጝንድ ጻግነነው ዝመ ቺዝጝዙ ሰቭ ከቨነው፤ እርወነ ቲግቭረን አቕጘጘም  ዳቕስጝኲⶔ።

“ቀሰው ጻቭን እግልግለዙ ሰቭድ ይና እጝቅቱ ሰቭ አቐነዊዝ  እንዝሚቅ ሰራሽተው ሰቪስ ንየ ሰራሸነውዝ ኽዝቭድ አግልግለነው ይና እጝቅቱ ሰቭ አጠ  ጥውሸኲ” የነውዝም አት አብዱራህማን ጭጝን አልስጝኲⶔ።

ብላ ክልልዝጘድም 2016 ጫረቱ ቀሰው ጻቭንትዙ እግልግለዝ 8 ሚሊየን ክልልዝቊ ውሸብል ቀሰው ጻቭንትዙ ሰቭዝ ውላይሰናንስ ኻለይ ጻየነውድ ክልሊዙ ውሸብል ዝመ ስፓርት ቢሮይስ ችጝነው ሚዝረድ ሚርየኲ።

ዚግቨተ፡- ኪሮስ ወ/ተንሳይ

ሲን 30/2016 ዓ.ስ