ሻጝጋይ ኮኦፕሬሽን

ሻጝጋይ ኮኦፕሬሽን ድርጅት (sco) ኤዥየት ማኽለኘ ኻግረንድ ጥቅልዘኩ

ኮኦፕሬሽንድ ቃወቁድ ቻይናስመ ሩሲየ ጛይ። ሕንድስመ ኢራንትም አቅቨው ድርጅት የጝ። ሳብጥድ ሊጘ ግርቅዝ ፃበው 24^ትረ አምሩ አኸቨይዝ ቈሽ ቤላሩስት ቈሸንድ ላጥም ኻግረን ፍራትዝ ላው አቐነውዙ ዓለመ ፃየጘ ሚሪሸኩ።

 ሻጝጋይ ኮፕሬሽንቱ ጝ ዓለመድ ዊርየው የጝ። ኤዥየት ዳኽንነይድ አፍሉ ዓለመ ፃቭኩ። ምዕራበንዙ ጥቕዘ ቓለነው በናቁ ኻግረንዙ አኽቨ የጝ። አውሮፓት ደይስ ሩሲያ ምኽለኘ ምስራቅቲስ ኢራን ኤዥየት ፖስፊክ ውቅያኖስዝጎቱ ቻይና ምዕራበንዙ ጭቓ እልል ፅበቁ ጥቕዘ ፋጥረቊ ኻግረን ጛይ። እን ጥቕዘድ አቐንድ ቃፅልጠ በናቁም። እኒን ጝንዙ ሰቭድ አክንወነውዝጎቱ ቆሽ ቻይናስመ ሩሲያቱት ቃወጥድ ቃውሰው እጀውም። ጝተ ኻግርት ዳኽንነይዝ ጅሉዘ ምዕራበን ጣቑዝጥጘም ባፅብፅጥጘም በናቁም።

 ሻንጋይ ኮፕሬሽን አባል ኻግረንድ “አይር አለምዙ ሥረት ተርጠ ጡሸኩ” የው ሊግዘው ዓለመ ፃየቁ ጛይ። ምዕራበንድ በርስጘው ወጀብዝ ትክብሸው አስለጘው ማግኔትዝ ዊትርሸው÷በንጛንድ ቓዝጘው ሽክትጛንድ ቁጘው ኻግር ዊንጠ ጡሻውም የው ችብረድ አትረው የጝ።

አቭርደቁ ምጝግስተንዙ ድርጅት(UN) አውሮፖት ለውንት(EU) ጂ-20(G20) አቫል ኻግረንዝመ ሰሜን አትላንቲክ ኒግርንዙ ድርጅት (NATO)አይነትነይዝ ምዕራበንዙ በንዝመ ዳኽንነይድ እርውዘናንስ ችብረቁ ድርጅተን ጛይ ይጝ አምቊ ሻንጋይት አባል ኻግረንድ።  እኒን ሥረትድ ሩዘው አይር አልም ቓልነ ጡሸኩ የው ችብረድ እድወ እኒስ ፍልቀጘ አምንሸኩ።

 አይር አልምቱ ሥረት ይሽተውድ አወየው አጡ? እማንስ አይር አልምት ሥረት ተረጡ መ?የውድ ግነ አፍሪክቊ ቈሽ እጝቅዝቅ ኻይሽተው አቐንድ ምዕራቨንዝ ቈሽ ዳጝጊፅሰው ኻሰቭ አቕ ችጝሸጘ ቲንትነጥ ልብስጘኩ። ሻንጋይት አባል ኻግረን ጛስ ጛይቱ ዲምቀንድ እፅወ እፅውሰነዊስ ከስጘ ዳኽንነይዝመ እፍርትዝ ከቨከቭሽተነው ላየ ኽየው ትኩርትዙ ነቁጠድ የጝ።

ቻይናቱ ፕሬዝደንት ዢ ጂንፒንግ ኪርጉዝታንትል “ቤልት ኤንድ ሮድ” የው ጝር አፅቨድ ቲግቭርደይ አረጘ አኸቨድ ኪርመው ግርየይዝ አርቒስርኩች። ዢ ስመ ፑቲንስ ጝተ ኻግረንድ ዊትርቅ እርጋቐቁ አጥጘ ጭቓ ኮሪዝ ላውድ ላየይዝ ችብርጠ ጊድ ጥነውድ ዳቕሰነው ቸልሸኩ። ምዕራቨንድ ነስጘውድቅ ማኽትነኩን የው ችብረድ አትርዝጝኩጙ። ካዛኪስታን አስታናትል ዲምቅሰው አኸቨድ ቱርክት ፕሬዝደንት ረሲፕ ታይፕ ኤርዶጋን 7 ኻግረንዝቁ ቃወጥጅቅ ዲምቅሰውም አቕኩ።

 ሩሲያ፣ ቻይና፣ አዘርባጃን፣ ፓኪስታን፣ ሞንጎሊያ ቤላሩስስመ ኳታርት ቃወጥጅቅ ሩሲየስመ ዩክሬንቱ ጣይንድ፣ እስራኤል ፍልስጤመንል ፃቭረው ዝምረድ ሶርየትል ፅበው ኽምዘድ የውም ኻምዘጥ ጓንጥ ሚሪሸቁድ ምኽርኽረይዝቊ አካለን ዊንጙ። ኤርዶጋን ቀጠነዙም አነ አልም አቅቩ ዲግ ነሰነው ቱርክት በን አቐጘ ደደደድስጝኩጙ።

ዚግቨተ ፡-ዘመኑ መለሰ

ሲን 30/2016 ዓ.ስ