እርጋቐው አቕንትዝ ዲግዝ ናን ይውነ

ቃውስ ያንድ ቺተቺተቍ ኻትምጥዝ፣ ዲቈቁ ሸወጪዝመ ባህርዳር ኻትመል ኵርዘውዝመ ኻስቭዘው አቕንቲዝ ጅልውዘ አኸበን ፃጝሽትጝኩጙ። ብላ ክልል አቒል ፃጝሽተው ጣይትንዙ ጐነዝመ እክሰይዝ ጅልውዘ ቺተቺተቊ ድመን ወይሽትጝኩጙ።

ምጝግስትዝመ ከምሸቍ ኻይለንድ ጐርሰቊ ገቭድ እክሰ ችጝጛንስ ሊጘ ዊግነንድ እርጋቐው ጕደነዝ ዊገዊግሽጥጘ ጡሸኩ። ብላ ክልሊል ፃጝሽታጙ ፅበው ጣይትኒዝ ጭቅተዝ ጣይትኒል ሲትፍሸቊስ ቢዘ ላጥ ዊግነኒልም ሩሔዙ ድዘርዝመ ጥደቲል አውግረው ቖጨ ቲክንዝኩ። ላው ዓምረይስ ንዬ ዲግ በውድ ብላ ክልል ኽዝቭዙ መከረድ አቢታንስ ስረት ፅየው ዊገዊግሽን ተሚሠኩ።

ምጝግስት ፅይ ፅበው ችግሰንጥድ ጡሸውዝ ቓለነውዝ እክሰዝ ከቨቁ ኻሰቨን ፅይ አልትጠ ጡሸኩ። ምጝግስትጅቅ ጣይትንብዘቊ ኻይለንድም ጝዝ ቑጠ ጝታ ኻሰቭድ አልስጛን ቀሰው የጝ። አውግረው ችግሰ አቒል ፅበው ኽዝቭድ ጭቅተዝም አቑ ጝታ ደርግቨቁዝ ምላሠን ጝኻሰቭድ ድምሽትጠ ጡሸኩ።

ምንግሥት ፋጥርሸው ችግሰይዝ ጅልውዘ ዊገዊግሸናንስ በንት ፅየነውድ ደግምግመዝ አርቒሠነውድ አስክዝሽተኩ። አቕሽም ግነ ሊግዘው ፃጝት ፃቨነውዝ ዲግ ተራንስ እኩሠ ፃቫን አምነ አምንሽን ፋጥረነው ቸለኩ።አውም ኻቐነው ቸልሻው ጣይትኒዝ ልየይዝጘ ፃዬፃይሽታጙ ችጘውድ እንቅ ኹጠ ፃቨነው ተሚሳውም። ጣይትን ኰርዝ ንቕፀቊ ዊግነንዝመ ኻግርዝ አውግረው መከረዝመ ችግሰዝ አጋልሽትጛንድ፣ ጣይትኒስ ቲርፍዘቊ ዊግነን ፅበነውድ ቺተቺተቊ ኰርጢዝ ፍራትዝ ቓልሽትኩ። ቺተቺተቊ እገረ ጋፀኒዝ ምላሠን ጊንዝቭ አኽቨቍዝመ ”ቢረ እኹሩ” የው ሚዝረዝ ኻግር እርጋቓይረጘ ፃቨነውዝ ኪብረቊድ ንቕፀቊ ጛይ። ከምሸቊ ኻይለን ዲግ አቐው አቭላይተዝጐ ተርጛንስ ምጝግስት ተምዝት ፅየነውድ ባህርዳርትል ፃጝሽተው ዲግዙ ኮንፈረንስ ኪርምሰነይል ወይሽትኩ።

አውማው ጣይትኒዙ አቢተነድ ምኽርኽረዝመ አቭላይተ አቐነዊዝ ሊጘ ዊግነንድ ዲግዝ እርወ ኻስቭጝ እርወ ሠራሽጛን ኻግርም አቕች ኽዝቭድ አርውሸተ አቐኩ። እንዝም ማጥን ብላ ክልሊዝ ዚልቅትነይ ፅየው ዲግዝ ይሽታንድ ክልሊዝቊ ችጘር ጕጥ አካላኒስ ቈሸዝ ኻግሬትል ችጝሸቊ ኻግሬቱ ኻለይድ ድውሰኩ የቊ ዊግነንድ እክሠይዝ ከቨው ኻሰቭ እክሰነውዝ ድምሽትጘው አገነድ ይውሽትጥጘ ጡሸኩ። ኢትዮጵየት አቒል እጝቅ ጅውንጢል ጣይትንም ይሽቱ ገጫሽን ቃዝየውዝ ችብርጥጘ ጡሸኩ። ዜገንዙ ሲርዩ ሚቭተንድ እጝቅ እቻጥጘ ቸለውድ ጣይትን ችብራንድ የጝ። ጣይትን አቒዝ ዜገንዙ ፍልውልወነውዝመ ጊቭርትድ አርየል ችጝጠ ፃቨነው ቸልሻውም። ቺዝጝድ፣  ኒግርንድ፣ ኢንቨስትመንትዝመ ክንድጝዝ እኒዝጘም ላጥ ሰቭዝቊ ፍልውልወንጥድ ፃጝሽትጠ ቸለውድ ዲግ ፅባንድ የጝ።

ዲግ እጀው አቕንትዝ ኢኮነሚዙ አቕንትድ እርውዘነው አየውም ኻስቨነው ቸልሻውም። አዊንም እፍርትዙ ኻለይድ ድሰው ጣይትን ፅባጙ እርውድጠ ቸላውም። ቃርሽንዝመ ጣይትንዝ ምላሰን አጥጘ ቸለቊ ተሚሳቊ ገበንድ እግልሰነውዝ ኻግርዙ አቕንትዝ ላብጠቱ እትለ ፃይሰቊ ምክርኽረንል ትኩርት ፃቨነው ተሚሰኩ። ብላ ክልልዙ ችግሰድ አቢታንስ እርጋቐው ዊገዊግሽንዝ አገነ ይወነው ተሚሠኩ።

ወንድሙ ቸኮለ

ሲን 30/2016 ዓ.ስ