ጒዝ አርማው እጅር አር አቒጝቀት አርመ የጝ  ኻቭዘውድ

አርመ የነት ፊዚጝቀ ቢቁለው ጒዝ ጨተድ ፊዘቊ ኽወጢዙ ኹረድ ሸማሸው፤ ኽወጥድ ዚጥጘ ዊንጘቊ አቑድ ዝየው፤ ኽወጥዙ ፁዘዝመ ኾይረዝ አልተነ አቐነውዝ ኽወጢል ቘጨ ችጝዘው ፃቀ ዊንም ቃነ ማነ የነት የጝ፡፡ አርመ ጝስረኒዝ ምላሰንዝ ኽወጢዙ ስርድ ኻንቕ ፃየነውዝ ኽወጥድ ቁወኩ፡፡ ላውላውድ  ቈሽ ፓራሳይቲዝጘድ ኽወጢል ላጥፍሸነውዝ ቢቁለው የጝ፡፡ ልክ ላቐጝጭረይዝጘድቅ፡፡ አርመ ቃዝየው ጝሊዝግዝቲዝ ምላሰንዝ እፍርዘቊ ፃጊተተ ገባንድ ዝቨሸንስ፤ ኮረዙ ሽከድ /ብርኸድ/ ሲመይስ ቃውስን ሸማሸነውዝ ኽወጥድ ኹስስዘውዝመ ቁወውም የጝ፡፡ ዚርወዙ ቺዝጝል ቢቁለው በቂለም አቕሽ አርመ የጝ፡፡

አርመ ጝዚረድ ንቒሰነውዝመ ጝፅበነውዙ እድምድ ሊጊሰነውዝ ንቕፀቊ መላንድ አሩሸነውዝ ቀለውዝ ንቕፀውዝመ ኮሪዝ አርምሽየውዜ ኽወጥድ ድሰው የጝ፡፡ ጒዝጨተድ አርም፣ ዃትኹት ኽወጥድ ታኽንኽንየውዜ ኽወጥዙ ጊቭርቲዝ ቲክየ /ሉጠ/ አርመድ ኻቭዘናንስ ጊድድሽተኩ የነት የጝ፡፡

አቓንስቅም ይና ጅውንጢል ቢቁለቁ ኽወጢል ቺተቺተቁ አርመዝቁ አይንታን ችጝሽጘኩ እንዳት ኮርድ ኻይን ብቑዝን ማለነው ቸልሽየውዜ ኽወጢስ ችጘናንስ ኻሊሸው ጊቭርትድ እዳዘኩ የነት የጝ፡፡ አርመ ጊግቨነ መለንድ ሊጘ ጒደነዝ የጝ አክኑሸውድ ላውላውድ ናንዝ ብቑዘነውዝ አርምሸቁ አጛንድ፤ ላውላውድ ቈሽ አንፀ አርመ/ቲ ፎርድ/ ይሽተው ኬሚካልድ አሩሸነውዝ ድሰነው ቸልሸኩ፡፡

ወይ ኽምረ ብሔረ እቅ ጭሰጭሰኒልም ኽወጢዙ ሊግዝቲዝመ ጊቭርቲል ጥቕዘ ችጝዘቁ ቺተቺተቊ አርመዝቊ አይንተን ፅበነውድ ዘስክርፊው አየውም፡፡ እንዳይ አርወይዝቊ አይንታንድ ድስናንስም ጒዝጝ ጨጥ ጝታ ጝነቊድ አቭርዘነውዝ፣ ኹራረዝም አነ ቺተቺተቊ ጓነዙ ሰባንድ አሩሸነውዝ ኮርድ ኻይን አርመነው ዲዝጝሸው ቲግቭር የጝ፡፡ ፃይነው ጊቭርትዙ ዚምኒዝ አርድ አርመዝ ኾሽቲጝቀት ቃውስን ማኽተናንስ ጒዝ ጨተይዙም አነ ሙየ ጒጢዙ ፍሉልወድ ውር ተከጘድ ሰቁጠ ወረደ 01 ቀቨሊል ችጝሸቁ ጒዝጝ ጨጥጅቅ ፃቭነው ዊንተድ ቲክንዊዝጘድ አንቭቭስነ በንኑን፡፡

አት አበበ ድንቁ ሰቊጠ ወረደ 01 /ወለሕ/ ቀበሊዙ ፅበተ ጒዝ ጨተ ጛይ፡፡ “ፈራዝን ጒዘነዊስ ደግምግመን አርመነዊል ትኩርት ፃቨነው በንዘኲ” የነውዝ የጝ ጝታ ቓለድ ነየነው ኪርምጘውድ፡፡ አርመ የነት ኽወጢዙ ኹረድ ዊስነም ከስጘ ኾይረ እስላንስ /ፋጥርሻንስ/ ሚቸር ይወው የጝ የቁ አጛንድ፤ እኔን እማንድ በውግ ይና አቅሊስ ኪርም አርቕሽተው እማን አቓንስቅ ኽወጥድ አርመይስ ናፀ ፃበናንስ ጝነቁ ደረጀዝ፣ ላው አኮዙ ዲርጅሽንዝመ ኹራረ ተከተከቁ ዲርጀ ዲርጅሽንጥድ አሩሸነውዝ አርመነው ኪርመቁ አቐነውድ የጝ ዊግትጘውድ፡፡

አት አበበ ፃየፃይሰነውዝም ክላስተርዝ ዊንም ጋብዝ ጋብ ተከተከው ግርየዝ ተከተከቁ ኽወጥ ጒዘነውድ አርመድ ተከተከው ኮርዝ አርመናንስ ቀሰው አገነ ፋጥረው አቐነውድ ጋልፅጝ “ተከተከው ጁነል ቺተቺተው ዚረ /ኽወጥ/ ፊዝናጙ ዊነው ኮሪዝ ላውድ ቃውስ አርም ላየድ እግርተነዊዝ ኽወጥድ አርመይዝም ከስጘ ቺተቺተቁ ኒቭሳንዝ ጠቃሽጠ ፃቫጙ ዊኑ” ይጝ ኩተገጠም /ክላስተርዝ/ ኹወጥድ ጒዘነውዙ አርወድ እኒስ ኪርመው አቐነውድ የጝ ጋልፅጘውድ፡፡

ላየ ቓለነየተድ አት ሙላት ሞገስ ይሽተቊ ጒዝ ጨተ አጛንድ ጛይም ፅብጘውድ ሰቊጠ ወረደ 01 ቀቨሊል የጝ፡፡ ቓለነየተድ አርምጘው ኮሪዝ ጅሙጘው አስጘይዝ ኪርምጝኩጙ “እንብላ ሳሩን፣ የእል ጠላቱን” የነውዝ የነት የጝ፡፡ ቓለነየተድ እንቸን እስጘሸን ቀለው እፃ አየውም ዲቈዲቊስረውድ፡፡ አውም እዘን ፃየው (ልብተው) ጒዝ ጨተይዝቅ ኽየው ምኽርዙ እፃ የጝ ዲቈዲቁስረውድ የቁ አጛንድ፤ አርመመ ቺዝጠ ፊተው አረይስ ቢዘ ቢቁለው አርመድም አቕሽ ኽወጢዙ ጊቭርትድ ቃፅቨነውዝ ጋብዝ ኽየው ችጘር ፃየው አቐነውድ የጝ ጋልፅጘውድ፡፡

ነንቱ ሰቲዝ ቃውስ ችጘው አርመድ ቓልጛጙ “አውተድ ቃውስን አርምና? አውቱድስ ቲክንዝና ይን ማኽርኽርሽናጙ ጓነዝ የጝ ሰራሸነውድ” የነውዝ ጝታ ሰቭዙ ባኽልድ ጋልፀቊ አጛንድ እን ፃይጘው አምረይዝም ስቅመዝመ ዚረወዙ ኽወጥድ አርመነው ኪርመቁ አቐነውድ የጝ ጋልፅጘውድ፡፡  አት ሙላት

አት ተፈራ ሃይማኖት ሰቊጠ ወረደ 01 ቀበሌ አርሽነይ ጣቭየዙ ዲቈተ ጛይ፡፡ 2016/17 ጊቭርትዙ ዚምኒዝ ኽወጥዝ ሺፍነናንስ ኻለይ ፃይጘውድ 9 ላዝ 99 ነቁጠ 5 ሄ/ር ዝቨ አቓንድ ጝታ ኻሊጘውድ እንቅትቅ ቺተቺተቊ ኽወጥዝ ሺፍንጘጘድ ጋልፅጝ፤ ነንቱ ሰቲዝ ኽወጥዝ ሺፍንሸው ዝቨድ እንቅትቅ ኮርድ ኻይጝ አርመነውዝ ቀሰው ጊቭርት ችጘናንስ ትኩርት ይውጝ ሰራሽጛጙ አቐነውድ ጋልፅጘኩ፡፡ አቓንስቅም “ጒዝጨተድ ነንቱ ሰቲዝ እፍርዘነዝ አርውሽ ፊዘቁ ኽወጥድ ቃውስን አሩሸነውዝ ጊቭርዝመ ጊቭርትድ ቈሽጠ ጡሸኩ” ይጝኩጙ፡፡

“ኹወጥ ፊትጘው 15ትረ ግርየይስ ኪርም 20ትረ ግርየይል አሽ አርምሽጥጘ ጡሸኩ” የቁድ አት ተፈራ ግርየ አቢት ዊንም አርድ አርመዝ ዀሽተት አርመነው ትርፍድ ዝላ አቕሽ ጚ አርወ ችጚሳው አቐጘ ጝታ እፃድ ዲቈዲቊስጝኩጙ፡፡

አት ታምሩ አብርሃ ሰቁጠ ወረደ አርሽነይ ጽ/ጝኒዝ ኽወጥ እፍርት ጓነዙ ቃወተ ጝታ ጋቢዝ ወረደይዝጘድ 24 ሽኽ ሄ/ር ዝቨ ኽወጥዝ ሺፍነናንስ ኻለይ ፃይሽተው አቐጘዝመ እኒስም ነን አጢስ 21 ሽኽ ሄ/ር ዝቨድ ቺተቺተቊ ኽወጥዝ ሺፍነቊ አቐነውድ ጋልፅጘኩ፡፡ እኒስም ቀሰው ፈን ችጘናንስ ኽወጥድ ኮርድ ኻይን አርመይስ ናፀ ፃቨነው በንዘው ገቨ አቓንስቅ “ወረደይዝ ስሪል ፅበቊ እንቅ ቀቨሊጢልቅ ፅበቊ ሙየ ጒጢዝ ጫረቱ ሰቭዙ ቸክሊስት አስልን ይወነውዝ ቲክንክናጙ ችጝሽነኩን” ይጝኩጙ፡፡

አት ታምሩ አርመ ጊግቨነ መለንድ ሊጘ አጘጘ ጋልፅጝ እንዳይም ናንዝ አርመነውዝመ አንፀ አርመ ኬሚካል ትንዘነውዝ አቓንድ፤ “አንፀ አርመ ትንዘነው ጋብዝ ጋብቱ ችግሰ ፃየው አቓንስቅ የነትም እንሰሲል ቺተዝም ቈሽ ለሊል ኽየው ቘጨ ችጝዘው አቓንስቅ ናንዝ አርመነው የጝ ማኽርሸውድ” ይጝኩጙ፡፡

“አርመ አርመነው ጊቭርድ 35 % ቈሽጠ ፃቨኩ” የቊድ አት ታምሩ “አርምሽየውዜ ዊንም ኮርድ ዲቈት አርምነቅ አቐውዜ ጝዝ ልክ ጊቭርት ቃፅቨው አቓንስቅ ጒዝጨተድ ጝ ፊዘቊ ኽወጢዝመ ጁነይዙ ባኽሪዝጘድቅ ጊምግማጙ “ፋጥርሸው ፅረፅርሽኒዝ ሲርዬ ክላስተርዝ ጒተውድም አነ ጝለ ጝለ ጒዘው ኽወድ ታኽንኽንጠ ጡሸኩ” የነውዝም ጝታ እፃድ ዲቈዲቊስጝኲጙ፡፡

ጒዝጨተይዙ አምሩ ሊቈድ ሊቈሽትጘውድ ጫረ ኮሪዝ የጝ፡፡ እን ኮሪዝም ጒዝጨ ተይዙ ጝኒዝ ላውድ ሊጘ አጨ ይጘው ኮር የጝ፡፡ ምላሰንድ ሲን ግንቭትዝ ኮረዝ ኾሽትየው፤ ኻምል ንኻሽዝ ዳርወዝ ጨቅሽየው (እስወዝ ጣይትየው)፤ ሚስኩርም ጥቅምትዝ አስኻቴዝ ጝጭር የው ጒዝጨተ ጝጝነቊድም አነ ኻግርሸንቱ ኹረዙ ወይትነይድ ደድስጠ ቸላውም፡፡ አቓንስቅም ጒዝጨተድ ጝፃየው አቅምድቅ አርውሽ ኽወጥድ አርመይስ ናፀ ፃቭነ ይና አስለ ክፍሊዙ እፃ የጝ፡፡

ንጉሱ ማሩ

ኻምል 30/2016