ሻደይ ኒቭረዉ ባኽልድ ሊቂጝቀ ኪብርሽጠ ጥዉሸኩ ይሽቱ

ቺተቺተው ስፍረይል ቺተው ጭጝሽንዝ ጭጝሸው ሻደይቱ በልድ ንኻሽ አርፈይዙ ግቨሪዝ ወይት ጁነይዝመ ጝግፂል እብለውትዝ ኪብርሸኩ ። እኔን እዘን ዊትር እል መራቐው በልድ ወይት ምከንጣንድ ፣ ጒደንጢዝመ ሚንድራንድ ቺተው ገይፀዝ እብለዉዛጙ ተረው አምሩ በል የጝ ። በልድ ውርም እኳን ጝጎንድ ኻይማኖቱ ፃየ ፃየው አቕሽም ነን ነን ግነ ባኽሉ አክኑሽንድ ትኩርት ችጛጙ ተርኩ ።

በልድ አውልም አልሚል እጀው ኢትዮጲቍዙ በል ፤ ኢትዮጵየቲስም ወይ ኽምረስመ ጝር ጅሉዘይል ፅበቍ ግፅ ዞናኒል ኪብርሸው አቐነውድ ቲክን ዩኒስኮዝ ደምደምሻቍ ቅርሰንዝ ሚዝግቨው ሰነዲል  ሚዝግቫንስ ብሔረ እቅ ጭሰጭሰንድ በጀት ገሪ ቺተው ቓለ ዩ ሰራሸነው ኪርመት 17 እምታንዝ ንየ እጊስኩ ።

በልድ ኺጠነዝ አክኑሸውድ ቺተቺተው እድምዙ ክልሊል  ፅበቍ እቍኒዝ አቐነውድ ቲክን ወይት ስሪል ፅበቍ እጝቅ ወረጥድ በሊል ውርም ስረነ ቈሺጝቀት ቓሊስጥጘ ቸለቍ ሻደይ ትቝርድ  ማርፀነውዝመ ጝታይም በሊዝ አቐው አውማው ገይፀ መይፀድቅ አስለነው በሊዙ ቃውሰተ ቲግቭር የጝ አቐውድ።

እን አምረይዝም ጣይተኒዝ ምላሰን ቓፅቕፅ ዊነው ሻደይቱ በልድ እብለውትዝ ኪብርዘናንስ ብሔረ እቅ ጭሰጭሰኒዝመ ጝስሪል ችጝሸቍ ወረጥድ ቃውሰ አስልሽን ፃቭጛጙ አቐነውድ የጝ ቲግቭርድ ኒየትነይዝ ቃወቍ ሰቭዙ ዲቈጥድ ዊግትጘውድ ።

አት ካሳው አለፈ ዝቛለ ወረደ ባኽል ዝመ ቱሪዝም ፅፈሽ ጝንዙ ዲቈተ ነይጘው ቓለይዝ ሻደይቱ በል ኪብረ ኪብርዝንድ ዚምን ችብሲጝቀት ኹሪስ ኹርዝጎ ለምረለምርንዝ ተረው ሲጙ በል አቐነውድ ዳቕስጝ ፣ እን አምረይዝም  ” ጝንቭረ ባኽሉ ፃየድ ኻይሰናንስ ሳ ዲቭራኒስ ኪርም ብሔረ እቅ ጭሰጭሰኒል አሽ እብለውትዝ ኪብራንስ 4 ላ ሽኽዝ ኒየ ቍርሽ ወረደ ጭሰጭሰን ምኽር ጝንድ ፊቅዱዝ ቹተቺተቍ ሰባን ኪርምንኩኑን ” ይጝኩጙ ።

” ሻደይ ድልቅተነ በል ጭቑ አየውም ፣ ኽየው አውንትነይዙም ጋልሽተነ የጝ” የቁድ አት ካሳው በልድ ኪብርሻንድ አርቲፊሻል ገይፀ መይፀዝመ ዋርደዙ አክኑሽን ዲቍ ዲቍ እስላጙ አቓንስቅ እኔንት እሩዘነውዝ ዊነው ፤ ንቭረ ባኽልድ ጉልምዝን ፊሰነውዝ ተረቍ አብንድ ሰቍጠስ ዲቍጝ ወረጢል ፤ወረጢስም ፍጝ ቀቨሊጢዝመ ዲቭራኒል አሽ ፊርጝ ቓልጘው በል አጠ የጝ ሰራሽነ ጡሸውድ “የነውዝም ዊግትጝኩጙ ።

አት ጣምቶ ገላስ ወይ ኽምረ ብሔረ እቅ ጭሰጭሰን ባኽል ቱሪዝም ቃወነይዝ ባኽል እሴታን ኢንዱስትሪ እፍርት ጓነዙ ቃወተዝመ ቃወነይዙ ደርግቭሸተ ዲቈተ ጝታ ጋቢዝ “ሻደይቱ በልኪብርዝንድ ጁነይል ፋጥርሽ ዊነው ጣይትኒዝ ምላሰን ቀቨቀቭሽተው ጒደነዝ ኪብራጙ ተረው አቕሽም ዲቆዉ አምረይዝ ግነ ላው ቀሰው ዲዝጘ ቓልሽትኩ “ይጘኩ ።                                           “ሻደይ ብሔረ እቅ ጭሰጭሰኒስም ከስጘዝ ወረጢል ኪብርዝጥጘ ፃቨነውድ ባኽልድ ወነ እቀ ኽቭር ማኽሊል ፍራትዝ ኪብርዘናንስ ቸልሰው የጝ” የቍ አጛንድ እን አምረይዝም ወይቱ አውልም ጁነይል ቺተው አቕንትዝ እብለውትዝ ኪብርሻንስ ወረጢዝ እፃ ዲቈዲቍስን ፣ ወረጥድም በጀት ሚድቭጝ ፍሉሉጛጙ የጝ ችጝሽጘውድ “ይጝኩጙ ።

ሻደይት ኪብርሽታንድ ጋብዝ ጋብ ዘስክርሽትጥጘ ጡሻየቍ ቲግቭራን  ጽብጘጘድ ጋልፀቁ አት ጣምቶ ገላስ ” በልድ ኪብርዘነዊዝ ውር ቲርፍዝኑን የውድ ጊምግምናጙ ፣ ይና ባኽልድ ጝፃየድ ሊቂጝቀ አልሚዝ አርቒሰነውዝ ሻደይት ኽምጠ ፃጀ ፃቭን ዩኒስኮል ሚዝግቭስነ ጡሸኩ ” የቍ አጛንድ እን አምረይዝም በልድ ቺት የው አቕንትዝ እብለው ኪብርጠ ማጥን ብሔረ እቅ ጭሰጭሰንድም አነ ምኽር ጝንድ ባኽል ለውርድንድ ከቨነውዝ ላብጠ ሰራሽጥጘድም ዋቕርጝኩጙ ።

በልድ ኪብርዝጛንድ ኻስቭሽም አነ አጋልዝ ኽምዘ ፋጥርሻየጘድ ወይት ኽዝቭድ ፃውተዙ ኻይል ጋቢል አጠ ጡሸንትጘ ኻስቭዘቍድ ቈሽ ሰቍጠ ኻትመ ጭሰጭሰን ፓሊስ ጽ/ጝንዝ ወንጀል ማኽተነ ዲቈተድ ኢንስፔክተር መላሽ ደባሽ አጛንድ  በልድ ወይቱ ጁነይል አውልም ኪብርሸው አቕሽም ሰቍጠ ኻትመይል ቈሽ ንቕፀቍ አብን ብሔረ እቅ ጭሰጭሰኒስም አነ ብሔረ እቅ ጪሰጭሰኒስ ቢዘተረቍ አጛንስቅ ኽርተ ጝንጢስ ኪርም አውማው እጅርድቅ ዲግ ኻይሽታንስ ሰራሽጠ ጡሸኩ ። ምላሰንድም “ወይቱ ጁነድ ሻደይቲስ ከስጘዝ ዲግ ኪብርዘነው ጋብዝም  ፃየው ዲዝጝትድ ላው ባኽልዝጘ ቓልሽተው የጝ ” ይጝኩጙ ።

ሻደይት አምረ ተሩዝ ላው ሸወጭዝ ጅምን ዲቍሰነው አቒጝቀት በሊስ ውር ቲርፍዝኑን? ውርስ እርውዝነ ጡሸኩ ? የቍ ነቍጣንድ ጊምግመነውዝ ሻደይ ዓልም አቅቨ መድረኪል ጉልምድ እስልጠ ማጥን አውማው እኹርሸተድም አነ ሚሪሸው አካልድቅ ጥቭርቭረ ፃቭጠጘድም  ኻስቭዝጝኩጙ ።

ንጉሱ ማሩ

ኻምል 30/2016