ባኽልዙ ማጥልን ዊናየጘድ ትኩርት ፃቭሽትነ

ዩኒስኮ ቅርሰንድ ሚዝግቨውድ ኻግረን አውሮፕቊዙ እግዝግዝኒዝጘ 1972 ዓምረ ስቑርትዝ ደመደምሸቊ ቅርሰን ኻየናንስ እኒዝጘም አውሮፕቊዙ እግዝግዝኒዝጘ 2003 ዓምረ ስቑርትዝ ቆሽ ደመደምሻቊ ቅርሰንድ ኻየናንስ ፈረንሳይትወ አይንተ ኻትመ ፓሪስ ትል ፊርምጘው ቲስመምንድ ሲርዬ ፃቨነውዝ የጝ፡፡ ባኽል ላው እቀ ኽብሪዙ እንቅ አቕንትድ የነትም ሚንፍሱ፣ ጎዘመዘ፣ አእምሮዝመ ወይሰዙ ገቨድ ዊንም አምልድ ጋልፀኩ ይሽት እቑርሽኩ፡፡

ዩኒስኮ ጥበብድ፣ ፅብንዙ መለድ፣ እጅርነይዙ ሚቭትድ፣ እሴተንዙ ስረትድ፣ዊገዝመ እምንትድ ጥቅልዝ ፅየኩ፡፡ ባኽል ጛልቊ እቅድም አቑ እቀ ኽቭርድ ቃርፀኩ፡፡ ላብጠቱ እሴትዝመ ለወንትዙ አቐንትድ ጉልምዘኩ፡፡ ጣይትን፣ ሽወዝመ አየር ንብርትዙ ልውጠድ እኒዝጘም ቴክኖሎጂዙ ሊግዝትድ ፃቨው ጥቕዘድ ምላሰንል ድወነውዝ ዩኒስኮ እቀ ኽቭርዙ ባኽልድ ኻየነውዙ ተሚስነይድ ንየስ ሸነውዝ ሚርዬ እቑር ሰራሻጙ የጝ፡፡

ዩኔስኮ ባኽልዝቊ ጋልፀንጥድ፣ ሲጝቊ ስፍለንድ፣ ፋጥርንዝቊ ሰበን፣ ጥበብዙ ፋጥርንዝመ ላጥ ገበንድ ፅንኸል ሲርዬ ፃቭ ደመደምሻቊ ቅርሰንዝ ሚዝግበነውዝመ አርቕት ይወነውዙ ግድን ፅይኩ፡፡ እን ሰቭድ ሲርዬ ፃቭም ዓልም አቅቨ ተግዝ ንቕፀቊ ቅርሰን  ሚዝግቨነዊስ ዲቊ አምረ ጨቨቅ በጀት ገርየነውዝ ከቨ ችጝጥጘ ፃቨነውዙ ሰቭ ሰራሻጙ ችጝሸኩ፡፡

አፍሪከ ተግዝ 54 አቐቁ ባኽልዝቊ ጋልፀንጥ ሚዝግቭሸቊ አቓንድ እንዛይ ቅርሰንድ ደመደምሻቊ ይሽትጝ አምረ ጨቨቅ አክንውሸው አቐንቲል እፃሸጥዝመ ቱሪስተን ችጝሽጛጙ ንቕፀው ጥወር ድውስጛጙ የጝ፡፡ ኢትዮጵየ ተግዝም ደመደምሻቊ ቅርሰንም አቑ ደመደምሸቊ ቅርሰን ሚዝግቭሸቊ አቓንድ ዩኒስኮቱ አቫል ኻግረኒስ ጊንዝቭ ገሪሻጙ ይውሽተኵ፡፡

ደመደምሻቊ ቅርሰንዝ ምላሰን ሻደይዙ በልድ ሚዝግቨናንስ 2012 ዓምረ ስቑርትዝ ዩኒስኮዝ አልተው አቓንድ ተሚሰቊ ሰነደንድ አልትጝ ንቕፀው ሰቭ ኪርምሽ ዊነው አቓንድ አጋልዝ ፋጥርሸው ሰሜንቱ ጣይትኒዝ ምላሰን ኪርምሽ ዊነው ሰቭድ እንቅ ችብር እዳጠጘድ አኩ፡፡ ውርም እኰ ሻደይዙ በልድ አምረ ጨቨቅ እብለውትዝ ኪብርዘናንስ ፃቭሽተው አስልሽትድ ቀሰው አቕሽም ዩኒስኮቱ አካላንድ ጅውነይል አጢስ ተርጝ ቓልጥጘ ፃቨነውዙ ዲዝጝትድ ሳስ የው የጝ፡፡

ሻደይ ይና አውትነይዙ ጋልፀነዝመ “እቁንዙ ናፅነይዙ” በል አቕ ኪበርሽጠ ፃቨነው ጋቢዝ 2002 ዓምረ ስቑርቲስ ኪርም እብለውትዝ ኪብርሻንስ ጝታ እኩሰድ ፃቨቊ እቀ ኽቭርዝቊ ክፍለን ፅብጘዊዝጘድቅ ደይል ችብርን ቓለነውዝመ ባኽልዙ ማጥልን ፃቨናንስ ልቕረ ፃቨቊ ዊግነን ፅበነውድም ልብትንኩኑን፡፡ ላው ባኽል ላው ጅውነይዙ ጋልፅሽተነ አቐነው ኪርማንድ “ያንም እኩን” የነውዙ ጭቓ አምል ይና ኻግርትል እትላጙ አቕሽም እኒን ጭቓ አምልድ ድዛንስ ባኽሊዙ ወነ አቐው ኽዝቭድ አትር ጝባኽልድ አርቒስጠ ጡሸኩ፡፡ አቕየውዜ ላጥ ገበኒል ቓልነዊዝጘድ ኪርምነቅድ ይን አቕን ችብርን እዳቓይነጘ ልብተነው ተሚሰኩ፡፡

እን አምረይዝ ፃጝሽተው ሻደይቱ በልድ ኪብርዝን ዲቈነው ጭቑ አቒንቀስ ዩኒስኮዝ ሚዝግቭሽጠ ማጥን ልቕረ ፃቨነዊስ ዲቊ ምፅነ ፃጀ ነስጠ ቸለው አቕንቲዝ ጅልውዘ ኻስቭን ሰራሸነውም ተሚሰኩ፡፡ ቺተቺተቊ ይና ሲጝቊ ስፍልድ አርቒሰነውዝ ቈሺተተ ጥወር ችጝነው አቕንቲዝ ጅልውዘ ሚርየ ይውን ሰራሸነው ተሚሰኩ፡፡ ሻደይቱ ጋልፅሽተነ እኒዝጘም ዩኒስኮዝ ሚዝግቭሸናንስ ተሚሰቊ ሊኬንጥድ ጭቅተዝ ልብትን አርውሸነውዝ ተሚሰው ሰነድድ እቻዝን ችጝሸነው አስለተ ኮሚቴስም አቑ አውማው እቀ ኽቭሪስ ኻይሽተው ቲግቭር አነ፡፡