ጣቅ ኮሪስ እንጎ ምጝግስት ጋብዝ አይር እትለዝመ ኻስቭን ቓሊሰቊ ቺተቺተቊ ኻሰቨን ወይሽትጛጙ የጝ፡፡ ታትነቲስ ቃጥ ንጭስመ አምርትል ትኩርት ፃቨነዊል ኻስቭዘቊ አጥጘ ጡሸኩ ይሽታጙ የጝ፡፡ ምጝግስት ሪፎርሚዝ ምላሰን ሩዘቊ ንቕፀቊ ኻለየንድ ዚርዝርኩ፡፡ ኢትዮጲቊድ ምፅነ ፃጀዝ፣ ገረዱዝመ ፖለቲኩ ኻለየንዝ ጥወጥውሽትጛንድ ኽዝቪዝ ፅብንዙ ሊግዝትድ አርወው አቐነውድ ዊገዊግሰው አየውም፡፡
ኢትዮጵየቱ ጽብንዙ አቐንቲዝ፣ ዲግዝመ ዳኽንነይዝ ጅልውዘ ንቕፀቊ ዋቕረጥ ጒሽጘኩ፡፡ ኢትዮጵየ ፍጥሩ ፃጀዝ ቀቫሽረቊ ንቕፀቊ ቀሰቊ ገበንድ አርውሽር ሊግዘነው ቸልደውድ ጥወጥውሽትንል ሲርዬ ፃቨው አምንሰው ዲግ ዊናንድ የጝ፡፡ ዲግ ዊናንስ ግነ እንቅም ዊግነንድ አውማዊስቅ ንዬ ኻግርት ቃውሰነው ጥውሸኩ፡፡ ኻግር ቃውስናንድ ግርቭ አቒጝቀስ ዲግ አቐው ዊገ ዊግሽን ቃውሰኩ፡፡
ጥቅለተ ሚኒስትር ዓብይ አህመድ (ዶ/ር) ጥቅምት 21 ግሬ 2017 ዓ.ስ ኽዝቭዝቊ ደርግቭሸጥ ምኽር ጝን አቫለኒስ ጒሸቊ ዋቕርጢዝ ዊሰዝመ አቭራኽርኽዘነ ይውጛንድ ዲግዙ ተሚስነይድ አይንተዝ ጒይጝኩጙ፡፡ “ዲግ ተሚሰዊዝ ቑጠ ደድሰነው ቸልሽየውዜ ኻስቭሸው ሊግዝትድ ችጝሻውም” ይጝኩጙ፡፡ ብላ ክልልዝም አቑ ኦሮሚየ ክልል አቒል ፅበቊ ከምሸዙ ሽሹድን ፃጚሰቊ ኻይለኒጅቅ ዊገዊግሽን ፅበነውድም ዳቕስጝኩጙ፡፡
ምጝግስት ኻግርዝመ ኽዝቭዙ ዲቊትነይ ፅየው ኽየው ችብረ አቐነዊዝ ፈራቐው እትለዝ ቓለነው ጥውሸኩ ይጝኩጙ፡፡ ጥቅለተ ሚኒስትርድ ይጘዊዝጘድም ከምሸቊጅቅ ሽክትንዝ ፅበነው እቀጘዝ ፅገወው ገቭ የጝ፡፡ ዲግ ድዘነዊዝ አይንተ ቖይሸጥ አቐቊድ ገጫሽን ጅውነይል ፅበቊ ዊርየቊ ዊግነንድ አቐነውድ አርቕሽተኩ፡፡
አውም ኻቐተ አቓው ጣይትኒዝ ኻግርዝመ ኽዝቭ ቖይሽጘኩ ጚ ውርም ዓይንት አርወ ችጝሻውም፡፡ እንዝ ማጥን ምጝግስት ዲግ ሲፍናንስ ሊግዘው እክልት ጒዥትነ፡፡ ጥቅለተ ሚኒስትርድ “ ኻግሪዝጘ ቺተቺተቊ ችብረጥዝመ ዚርፈኒል ሪፎርም ሰራሽናጙ ዊንንኩኑን፡፡ እን አምረይስ ኪርም ኻግሪዝጘ ሊግዝነው ጊዝ የጝ፡፡ ንቕፀቊ ፈንጥ ኻይሽትጘኩ፡፡ ተረው ኰርድ ቈሽ ኪውሸነውዙ ጊዝ አቐኩ” ይጝኩጙ፡፡ እኒን ኻለይድ ረደውድ ዲግ ፈራቓንድ የጝ፡፡ ምጝግስትዙ እፍርትዙ ኻለይድ ኽዝቭዙ ለምርትነይ ችጝ ሩድጠ ቸለውድ እቻቐው ኻግሪዝ ፅበው ኢትዮጵየቱ ኽዝቭድ ጅውነይስ ኪርም ፌደራል አጢስ ሲትፍሽንድ ንቕፀው አቓንድ የጝ፡፡ ይናቕመነስ ይናቕም ድዘድዝንዝ ምላሰን አቐቊ ገጫሽንድ ችብርጛንድ፣ እማን የጝ ኢትዮጵየ ነን ፅብረው ጥማይስ ፍር ጎነው ኪርመች፡፡
ኢትዮጵየ ምነነ ፅይረይ ኻግር አራንስ ቸልሰቊ ንቕፀቊ ማርፀንጥ እኩጙ፡፡ እንዛይ ማርፀንጥድ ኻግርዝመ ኽዝቭዝ ቺዘው አርወ ችጚሰነው ቸልሸውድ እንቅም ዊግነንድ ቲስመምዘው ላው አቐው ዓለመ ዊናንድ የጝ፡፡ ኻግር ፀናተ ቸልደውዝመ ጝር ፅብንድ አምንሰተ አቐውድ ጝር ቑርት ማኽሊል ኪብረ ኪብርሽንዝመ ድመድምሽትንዝ ዊንጠ ፃቨው አቕንት ፋጥርሻንድ የጝ፡፡
ነንትወ ኢትዮጵየቱ ችግሰድ ዲቈቁ ሲጘዝቊ ቢሰቀይስ ዊትርሸው አቕሽም፣ እን ዚምኒዝ ቓሊሽተቊ ተሚሰተ አቕየቊ ገበንድ አውግረው እኩሰ ፅየቊ አቐነውድ ሚረነው ጥውሻውም፡፡ ዲግ አቐው ዲምቅሽኒስ ቃጥ ጎርትኒዝጎ ትክቨቊ ገበንድ ለወንትዝ ችብሰናንስ ቸልሰው ጥወጥውሽትን ዊንጠ ጥውሸኩ፡፡ ምላሰንድም ኢትዮጵየት ከሰውድ ላብጠቱ ዓለመ አቐነውድ ልብተነው ጥውሸኩ!፡፡
ወንድሙ ቸኮለ ኽደር 15/2017
