ቀሰቊ እሴተን ወየዝ ቲምንሻቁም

ወይሽማን ኢትዮጵየት ብየ አቕጝ ሻቘ ላዝ ንየ እምተንዝ ዛጉዌቱ ስርወ ምጝግስት ሲርይጝ ቃውጛንድ፤ ቅዱስም አደረም አቕጝ የጝ።

ጝታ ጭሰጭሰንዙ ስረትድ ላጢዝ ቺት የውድ እቀኽቭሪዙ ኻይማኖቱም አነ ባኽሉ እሴትድ ኻይስን ቃፅልሰነውድ የጝ።እንም ኢትዮጵየት ሲጘዝ ሊግዘው ዚምን ቅምጛንስ ቸልስኲ።

ይና ንጭቱ ዲቭየይዙ ሚርየድ ይና አቅለ እሴተንድ አወሽን ዚልቀትነይዝ ቃፅልሰነው ቸልሸኲ? ነን አጋልዘው ፃውተይዙ ችግሰድስ አወሽን ችብሰነው ቸልሰኲ የዊዝ ጅሉዘ ሳቁጠ ኻትመ ጽበጥ ቺተቺተቊ እቀ ኽቭርዙ አድላኒጅቅ ፃቭነው ዊንተድ አንቭቭስነ ቀኑን።

“ይና አቅል ወይሽማኒዝመ አደርጢዝ ማኽሊል ፃቭሽታጙ ዊነው ጭሰጭሰኒዙ ስረቲዝመ ባኽሉ እሴትድ ዊነዊል ዊሰነው ጡሸኲ”የቁድ ሳቁጠ ኻትመዙ ፅበተ አቐቊ አት አደራጀው ቀለመ ወርቅ ጛይ።

ዛጉዌቱ ስርወ ምጝግስትድ ጝ ቅምኒስ እግርገ ሰለሞንቊዝ አደርነይድ ከሰከሳንድ ይኩኖ አምላክስመ ነአኩተ ለአብስ ቲስመምን ፃቭጝ ዊነነውድ  አት አደራጀው ጉይጘኵ።

እን ቲስመምኒስ ማኽሊል ወይሽምነይድ ጸናቐጘ ፅባንስ ፃቭሽት ወይሽማን ጛቕመት ጛቕመ ቅምጛንስ፣ አደረድ እቓረው ዊርቀዙ ሽኻኒልም እቓርጛንስመ አደረይዙ ለዊዝ ጎይጛንስም ፃቭሽት ሰለሞናኒዙ ቅመነ ዚምን አሰነይል አሽ ዊነጘድ አት አደራጀው ጋልፅጘኲ።

ወይሽመን ዲጉ ስረትዝ ስልጣን ከሰከሰነውዙ ተከ ጛይ። እቀ ኽቭሪዙ  እሴትድ ኻይጝ ኽዝቭ ማኽሊል ማኽርሽ፣ቓለዝመ እሩዘነ፣ ሚርየ እንዝጘም እክሰ ይውሽተው ቃውንዙ ስረት ጉይጥ ጛይ።

“እን ስረትድ ቃፅልሰነው ጋቢዝ ቢተ ፅበነዊዝ ላውድ ላውዴንት ጣልፍን ማለናንስ ፃቭሽተው ገቨድ ነን እትለው ፃውተይዙ ችግሰድ እትልጠጘድ ፃቭኲ “ይጛንድ አት አደራጀው ጋልፅጘኵ።

ነን አጋልዘው ፃውተይዙ ችግሰይዝ ክንድጝ ፊሰነውዝ ይና አቅለ እሴተንድ ቲክነ ጡሸው አቐነውድ የጝ አት አደራጀው ጉይጘውድ።

“ወይሽማነ አደርጥ ቺተቺተቊ ኻይማኖቱዝመ ባኽልቁ በለኒዝ ላውድ ላየድ ጥቕዛየጘ ለውርሽጘው ኰር ኽዝቩዝመ ኻይማኖቱ በለኒዝ ዊኑ”የቊድ ቈሽ ሳቁጠ ኻትመዙ ፅበተ አቐቊ ሃይማኖትዙ አይር መላከ ገነት መኮነን ኃይሉ   ጛይ።

ቀሰው ጭሰጭሰንድ ሺርሽረቊ ገባንድም እሩድጝጠጘድ ፃቭሽተው ጊዝም ዊነጘድ ጉየቁድ መላከ ገነት መኮነን ኃይሉ፤ ነን ነን ቓልሽተቊ ችግሰንጥድ ኪብረኪብርሻቅ የነውዝ፣ምኽርኽረዝ አምነቅ የነውዝ፣ደረጀ አርቓቅ የነውዝ …ተረቊ አቐነውድ ጉይጘኲ።

ተግ ጨቨቅ ፅበቁ አደርጢዝ፣ ኻይማኖት ቃወጢዝ፣ አቅሊዝ፣ ኵየንጣኒዝ፣ ሙየ ጉይጢዝ እንዝጘም ጥቅለ እቀ ኽቭር ማኽሊል ፅበው ዲምቅሽንድ ቀሰው ኪብረኪብርሽንዝመ እሴትድ ኻየነው ጡሸው አቐጘም መላከ ገነት መኮነን ጋልፅጘኲ።

ይና ኻግርስ ላው አቐው ዲግ ፃቨነው ቸልሰቁ ዲዝጝተንድ ሊጊሰነው ጡሸው አቐጘ ጉየቊድ መላከ ገነት መኮነን ነንም አሽ እን ሺርሽርሸው እሴትድ ኵነነውዝ ዲጊዝጎ ዋጥረነው ቸልሸው ሰቭ ሰራሽትጠ ጡሸው አቐነውድም ልብስጘኲ።

መላከ ብርሃን ነብዩ ልዑል ዳዊት ደብረ ብርሃን ቅዱስ ገብርኤል ምከንዙ ጭሰጭሰተ ጛይ።

“ወይሽማነ ኰሪዝ ዊትቊ አቅል ኻግርት ብጭቕ ላ እምተንዝ ዲግዝ ቃውጝኩጙ። ጝታ ቃውንዙ ጥቨቭድም ላውንት፣ ቀንት፣ እሴተንድ ኪብርዘነዊል ሲርየ ፃቨው  አቐነዊዝ የጝ” ይጘኲ።

ነንቱ ኰሪዝ ዚምኑ ክንድጝድ ሊግዛጙ፤ ሳይንስ ዝመ ቴክኖሎጂ። ፈራቓጙ ተረው ጨቨቅ ቈጝቈዝመ ዚረዝ አድልድለነውድ ጉየቊድ መላከ ብርሃን ቃውሰቊ ይና አቅሊዙ ቃወነ ጥቨቭድ ጅውነ፣ ዚረዝመ ቈጝቈዝ ቺዘቺዛቊ ዊነነውድ ጋልፅጘኲ።

እጅር እጅር አቐነዊዝ ምላሰን እማንዝመ ዲግዝ ኻግርዝ ሺከ አቐነው ጚ ኢምሽንዝ ጎርትጝ ዚረዝ፣ ብሔርዝ፣ ቈጝቈዝመ ቀለምዝ ቺትየቊ አቐነውድ ጉየቁድ መላከ ብርሃን እን ቃውሰው ስረትድ ቃፅልስናን ነን አጋልዘው ቀውሲዝ እክሰ አጠ ቸለው አቐጘም ዊግትጘኲ።

“እሴተንድ ድዝጛጙ የጝ የነው ቸልነኩን፤ ምላሰንድም ስⶓነው፣ማጥለነው፣እጅር ሺወል ቅወነው ይና ጅውነይል ክንሸው ቲግቭር አየውም። እኒን በደ ባኽል የጝ”የቊድ ሳቁጠ ክንሰጥ ክንድጝ ኮሌጅ ክንሰተ አቐቊ አይናለም አበበ ጛይ።

ክንሰተ አይናለም እኒንት ቓሊሰውድ ማኽረው፣ዛሽተው፣ክንሰው፣ጭቓ ቲግቭርድ ዊግዘው እጀው አቐነውድ የጝ ጋልፅጘውድ።

“ቃውስ እጅር ኹር ጝቕመት፣ጝጝነቊድ፣ጝግፅድ ፣ጝእምንትድ ኪብርዛንድ ላውንትዝመ ቀንት ፋጥርሸኵ። እንዝ ሲርየ የጝ ኻግርዙ ቀንት ፋጥርሸውድ ይጛንድ ክንሰተድ ጋልፅጝኩጙ።

“ቃውሰቁ ይና አቅለ እሴተንድ በደ ባኽለንዝ ስጙርሽጛጙ ኪብረኪብርሸነው፣ ቺግርሸዊዝ አድለነው እጝቅ ኽዝን እምጥጘይዝቅ አቭርደነውድ እዳቓጙ  ዚረዝ፣ ኻይማኖትዝ፣ ብሔርዝ ገጫሽን ፈራኲ። እን ቲግቭሪልም ውላቕጝ ፖለቲኩ ትርፍ ችጘቁድ ቀለውዝ ቓልሽተቁ አየቁም” የነውዝ ክንሰተድ ደድስጘኲ።

እን ኻቨረ ቲግቭርድ ፈራቓጙ ፊረነውድ ቈሽ ነን ፅብነው ኻግርሸንት አቕንቲል ችጝሽነጘድ ፃቨነውድ ጉየቊድ ክንሰተድ፤ አቅለ እሴተንድ ኪብርዘነውዝ ኻግሩ ዲግድ ነሰነው ቸልሸው አቐጘ ጉይጘኲ።

ጥቅለዝ ጝ አውነይድ በር በደ ባኽልዝመ ደድሽትየቁ ገረዱ ሚዝረኒዝ ትኒተቁ ገባኒዝ ውሸቭለድ ኻሚተነዊዝ ቋጥቭሽጠጘዝመ ጭቅተይዝመ ቀተ ሚዝረድ ቺዝጝጠጘድ ክንሰተ አበበ ኻስቭዝጝኩጙ።

ሺርሽርሸቁ እሴተንድ ዊሰናንስ ደይ ደደው ቓለይዝ ፍን ዊግሸነውዝ፣ ማኽርኽርሸነውዝ፣ አምንሽተነውዝ እንዝጘም መርግዝም አነ እድምዝ ኽየቁድ ኪብርዘነውዝ ዊሰነው ቸልሸጘ ጉይጝ ኻግር የነት ኽዝቭ አቓንድ ቃል ኪዳን ኻየነውዝ ኻግርሸንቱ ላውንትድ አትርዝነ ጡሸው አቐጘም ክንሰተ አበበ ኻስቭዝጝኩጙ።

“እሴተንድ ኻይሽቲጘውዜ ሊቈ እጀው ኒየረዝጘ ጉግል እዳቐነው የጝ፤ የቊድ ክንሰተ አበበ እን ዚምኒል አሽ ይና አቅልድ ላውንትዝ አወሽጝ ይናግል ችጝዝጘው ጥቨቭድ ዋጥር ይን ቓለነው ጡሸኩም” ይጝኩጙ።

ኪሮስ ወ/ተንሳይ   ጥቁምት 30/2017