ባኽለንዝመ እሴተን አትርዘው በል

ኢፌዴሪዙ ፌዴሬሽን ምኽር ጝን መዝየ 21/ 1998 ዓ.ስ ፃጝዘው ሻቘትረ ሰቭዙ ዚምን ለወትረ አምረ ሊጘትረ መደቨኘ አኸቨይስ ዜገንዝመ (ጓነንዙ (group right) እጅሩዝመ ዲሞክራሱ ሚቭተንድ ኪብርዘናንስ ወዝ አቐው ኽግ ፃድቁ።

እን ኽግድ ኢፌዴሪ ኽገ ምጝግስትዝ ፃድቀዘውድ ኽደር 29 ኢትዮጵየቱ ብሔረን፣ ብሔረ እቅዝመ ኽዝቨን ግርየ የው ሽጙዝ አምረ ጨቨቅ ቺተቺተቊ አስለንጥዝ ኪብርሻንስ ውሳኒ ዲቈዲቁስኲ።

ብሔረን፣ ብሔረ እቅዝመ ኽዝቨንዙ በልድ ኪብርሸውድ ዚምነንዝ ዊነው እርውነይ፣ ዲሞክራሲዝመ እክሱነይዙ ዋቕረንጥድ ጥውሸው ዋቕረዝመ ዚልቀው ወይትነይ ችጘው ጊዝም የጝ።

በልድ ብሔረን፣ ብሔረ እቅዝመ ኽዝቨንዙ ቀሰቍ ጝታ እሴተንድ ጉልምዘው የጝ። ኻግሩ ኻለየኒዝ ጅሉዘ ሲልፍሽጛንስ ኽገ ምጝግስቱዝመ ዴሞክራሲዩ እሴተንድ ኻይሽትጝ ኹርዝ ኹር ከሰናንስ ቸልስኲ።

ዜገን ኻግሩ ቓለዝመ  ብሔሩ ጥወጥውሽትን ጉልምስጛንስ ንየስ የው ኻግሩ አርወ ፃየው የጝ። አውነይ፣ ቈጝቈ፣ ባኽል፣ ተከተከ… ቺተን ፃየቊ ኢትዮጲቊ ጛቕመት ካኽተዝ እትልጘው፣ ጛስ ጛይ አርቐ አርቕሽትጘው ዝመ ላብጠትቊ ኻለየንድ ፃጅስጘው በልም የጝ።

እንዝ ሲርየ ኪርመነዙ በልድ ኽደር 29/1999ዐ/ስዝ “ኽገ ምጝግስቱ ቃል ኪዳን ይና አቭርድንዙ ጋልፅሽተነ የጝ” የው ቃወ ቃልዝ አዲስ አቨቫ ኻትመይል ኪብርሸነውዝ ኪርምሽኲ። ፃይነው አምረይዝ ኪብርሸው19ትረ ብሔር ብሔረ እቅዝመ ኽዝቨንዙ በልድ ደቡብ ኢትዮጵየ አርባ ምንጭ ኻትመ አቭኑሰናንስ አስልሽርኩች።

ንጭቱ ይነ ዲቬይዙ  ሚርየዝ ብሔር ብሔረ እቅዝመ ኽዝቨንዙ በልድ ላብጠቱ እሴተንድ ውር ተክጘጘ አንቭቭስነ ቀኑን።

ውሸብለ ጌታወይ ሚሰው ሻደይ ባኽል ጓነ አቫል የጝ። “ብሔር ብሔረ እቅዝመ ኽዝቨንዙ ግርየ ባኽልዙ ልውጥውጠ ፃቭነው፤ ቺተን አቒል  ላውንትድ ካኽተ ፃቭን እብለውትዝ ኪብርዝነው በል  የጝ”የነውዝ ጋልፀኲ።

ኹረ፣ ዝየነ፣ ጅመ፣ ዚቭን፣ ሲረሲርን፣ ፅቭቀዙ ተስር፣ አሩሸነ ጎዘመዘን ተከተከ ወይት ደርግቨው አቕንትዝ ጋልፀነው ቸልሸጘ ጉየውድ ውሸብለ ጌታወይ

ኢትዮጵየትል ብሔር ብሔረ እቅዝመ ኽዝቨንዙ በልድ፣ ቈንቈዝመ ባኽልዙ ንቕፅነይድም ፈራዘው አቐጘ የጝ ጋልፀውድ፡፡

ንየይል ጋልፅሽታንትጘ ኢትዮጲቁ አቭርትዝመ  ላውንትዝ እብለውዝጘው እርወነ አጉረው ላብጠቱ እሴትድ ኢትዮጲውነይ የጝ፡፡ አንክርሰው ንቕፅነይዝ ገይፀው ቺተው ካኽተ ፃየው ኢትዮጲዩ አውነይ ጉልምዘው ቀሰቁ እሴተን ኲንሽጝ ዊነቁ ኢትዮጲዩነይ አትረው ቀቭረዝ ፃየፃይሸቁ አቐነውድ የጝ ቓሊሰውድ፡፡

“በልድ እንቅም ብሔር ብሔረ እቅዝመ ኽዝቨን ላውንትዝ ዲምቅሽጘው በልም የጝ፡፡ ብሔር ብሔረ እቅ ጝታ ባኽልድ አጉረውዝ አልምስ  አርቐ አርቒስጘው ቱሪዝምዙ ችጘነም አቓጙ ቢዘትቊ ቱሪስተንድ ዊትረነው ቸልኲ”ይረየን ቈሽ ሻደይ ባኽል ጓነዙ አቫል አረይ ዊዝር አስናቁ ማሞ ጚ።

ኽደር 29 ኪብርሸው ብሔርብሔረ እቅዝመ ኽዝቨንዙ በልድ ኢትዮጵየት አንክርሰናንስ ቸልሰው፣ላውድ ላዊስ ቀሰቊ ባኽሉ እሴተንድ ፊሰው መድረኽም አቐጘ የጝ ዊዝር አስናቁ ዋርዝረውድ።

“ይን ወይት አምባሳደረን አቐነዊዝጘ ወይት ቱበ ባኽለንድ አርቐ አርቒሰናንስ ልቕረ ፃቭንኩኑን፤ ወይት ኽዝቪል ዊነው አየው ቓለድም ጭቅ ሸነው ቸልንኩኑን። ተረቲዝ ቈሽ ቓልሽትየቊ አንክርሰቁ አይጥ ባኽለንድ አርቐ አርቒሰነውዝ ቱሪዝምዙ ችጘነ ፃቨናንስ ልቕርድነኩን”የነውዝም ዊዝር አስናቁ ጋልፀች።

ኢትዮጲቁ ቺተቺተው ዝቨዙ ጋፅል ፅብጝሽም ጝታ ስነ እዘንድ ግነ ላው ፃቨውድ ኻግርዙ ቀንትዝመ ጝታ አቅለ እሴተንድ ኪብርዘቁ አቐነውድ የጝ። ዚረዝ፣ ቈጝቈዝ፣ ባኽልዝ፣ እምንትዝመ ተከተከቊ ቺተንጢስ ትክቨትክቭሻቁም። ላውድ ላዊስ ፃየው ቀንቲዝመ ኪብረኪብርሽኒስ ምላሰን የጝ።

“ወይቱ ባኽል፣ ቈጝቈ፣ ሲረሲርን፣ ገይፀመይፀ፣ ጅመዝመ ዚቭን፣ ፅቭቀዙ ተስር፣ አሩሸነ ጎዘመዘን፣ ኹረዝቁ አይንተንድ እንዝጘም አቭን አቭኑሰነውዙ ስረቲዝመ ባኽሉ ጊቭርተንድ እንቅ ኢትዮጲቁ ችጝሽጘው መድረኺል ቓሊሰነው ቸልንኩኑን፤ አነጚ እዳቐው ገቨ ግነ እኲ” ይረይሸን ቈሽ ሻደይ ባኽል ጓነዙ አቫል አረይ ውሸብለ አፀደ መንግስቱ ጚ።

ብሔር ብሔረ እቅዝመ ኽዝቨንዙ መድረኺል ፈራቐውዝ ንቕፀቊ ቱበ ባኽለንድ አርቐ አርቒሰናንስ አገነ ፃየው የጝ ይረየን ውሸብለ አፀደ ፤  ፊርነቅድ ሻቘ ደርግቭሸጥ ጭቑ  አቐነዊዝ እንቅትቅ ቓሊሰናንስ ቸልሰው ጊዝ ችጛቁ አቐነውድ ደድሰች።

“ላጥ ብሔር ብሔረ እቅዝመ ኽዝቨኒስ ንቕፀው ዲዝጝት ችጝነው ኰር የጝ። አወሽን ተረቲስ ይና ባኽልድ አርቐ አርቒስነቅ አነጘም ክንድጝ ፊስንኩኑን። እንዝ ሚቅ ዊነው ቢተድ ሚሪሸቁ አካላኒጅቅ ዊግሸነውዝ ነይሽትነይ ጊዝሸንስ አወሽን ይና ባኽልዝመ እሴተንድ አርቒስነቅ አነጘ ቀሰው አስልሽን ፃቭናጙ የጝ” የነውዝ ጝር ኻሰቭድ ቢንስርኩች።

አኽቭሽጝ፣ ከቨከቭሽተነውዝመ ዲግዝ ፅበነው ቸልጘውድም ላብጠትቁ እሴተንዙ እፅወእፁሽንድ አትረው አቐነዊዝ የጝ። እንም ጝታ ኻግር ቀንትዙ ወይሰድ ጋልፀነዝም አድወትጘዝመ ላጥም ቢዘትቊ ፃለተንድ ማኽተነውዝ ፃቭጘው ሽሹደንድ ጋልፅሽተነዝ ጉይሸቁ ጛይ።

“ብሔር ብሔረ እቅዙ በል ወይትጘድ ላጢዝ ስጙርሸው ባኽል፣ እሴትዝመ ቈጝቈድ እንዝጘም አውነይድ ደድሰው በል የጝ” የቍድ ወይ ኽምረ ብሔረ እቅ ጭሰጭሰን ባኽልዝመ ቱሪዝም ቃወነ ዲቈተ አቐቊ አት እዮብ ዘውዴ ጛይ።

ፃይነው አምረይዝም ኻግሩ ጥወጥውሽትን ብሔሩ ላውንትዝ የው ቃወ ቃልዝ አርባምንጭ ኻትመል  ኪብርሸው ብሔር ብሔረ እቅዝመ ኽዝቨኒዙ በሊል ወይቱ ቱበ ባኽልድ ቀሰው ፃቭጝ አርቐአርቒሰቁ አምባሳደረን ማርሽተነውድም ዲቈተድ ጋልፅጝኩጙ።

ኻግርጘ ወይቱ ባኽለንድ አርቕሽትጛጙ ተርጘውድ እን በሊዝ ሲርየ አቐነውድ ጉየቁድ አት እዮብ እኒስ ዲቈውዝ ይነ እሴተኒዝመ ቱበ ባኽለንድ አልምስ አርቐ አርቒሰናንስ ጎግል ፃቭሽትጝ ችጝሽጛን፤ ኻግር ቢዘስመ ኻግር አቒትቊ ሙህረኒጅቅ ፎቶ፣ ቪድዮዝመ ፅንኸዙ ፅፈሸን  ፃንሽጛንስ ሰራሽታጙ አቐነውድ ጋልፅጝኩጙ።

ኢትዮጲቁ ላብጠቱ እሴተን ጉልምስጛጙ እንዝጘም ኪብርሽጛጙ ፊርጛንድ ቈሽ ዚልቀው ዲግዝመ እርጋቕን ፋጥረው አቐጘ  ጣርጥርሳውም፡፡ እሴተን ዲግዝመ ኻግር ኲነናንስ ቀሰው ጉግ ብዘቁ ጛይ። እንዛይ እሴተንድ ሺርሽርሻይጘ ኻየነውዝ ቱሪዝምዙ ችጘነ ፃቨነዊስ ከስጘ ተረው ኹሪል ችጝጥጘጘድ ፃቭነ ይነ ዲቭየይዙ እፃ የጝ። ዲግ አጥን።

– ኽደር 15/2016 ዓ.ስ

ኪሮስ ወ/ተንሳይ