ኢትዮጵዩነይ ላውንትነይድ ቅጥራው ቀቭረዝ ቀቭርሸው የጝ፡፡

ይና ኻግርትል ዲሞክራሲዙ ስረት ፋጥርሻንስ ዲሞክራሲዝቊ ችብረጥዝመ ድርጅታን ፋጥረነውዝ አትርዘነው በንዘኩ፡፡ ዲቭረው ዲሞክራሲዝመ ኻስቭንዙ ባኽልድ ጉልምዘነው ላይ ኻግርቱ ሊግዝትዝ በንዘቊ ሲርይቊ ገባኒስ በው ቃውሰጥ ጛይ፡፡

ዲቭረው ዲሞክራሲዙ ስረት ኲነቊ ንቕፀቊ ኻግረንዙ ዲዝጝትድ ቓልናንድ ጉጛጙ ሊቭጛጙ ፋጥረነው ቸልጘጘድ የጝ ቓሊሰውድ፡፡

ዲሞክራሲዙ ስረት ላው እቀ ኽቭር አቒል ስር በርሰኩ ይሽጠ ቸለውድ እቀ ኽቭርድ ቃውሸቊ ገርይቊ ቃውሸንጢል ላው አይንት ቓለዝመ እምንት ፃያንድ የጝ፡፡ እኔን ይሽታንድ እድወ እጝቅ እቀ ኽቭርድቅ ላው አይንት ቓለዝመ እምንት ፃየኩ የነት አቒጝቀት ሲርይቊ ይሽተቊዝመ አይነተ አይነተ ቃውሸንጢል ቲስመምን ፃየኩ የነት የጝ፡፡ ኻይማኖትዝ፣ ቈንቈዝመ ፖለቲከዝ ቺተን ፋጥርሸነው እዳቓው ገቨ የጝ፡፡ ዲሞክራሲ ፅበነውድ እድወ እንዳይ ቺተንጥድ ፅብጘጘ አቕጝ ኻግሩ ላወንት ፋጥርናንስ ቸልሰው ገቨ አቐነውድ የጝ ድቑሽተውድ፡፡

ዲቭረው ዲሞክራሲ ፃየቊ ኻግራኒልም አቕሽ ቺተቺተው ቓለዝመ ፖለቲኩ እምንት ፃየቊ እቀ ኽቭረን ፅበነውድ አርቕሽተው የጝ፡፡ ላብጠቱ ኻግሩ ቓለዝመ ኻስቨ ኻስቭን /ናሽናል ኮንሰንስ/ ፋጥርሹ ይሽተውድ እጝቅ ዜገድቅ ኻግርቊ ቃውሸንጢል ላው አቐው ችብረ ፃየኩ አቒጝቀት ንቕፀው ዜገድ ፃጝዘው ችብረድ ቲክነነውዝ ዊትቊዙ ቓለድ ኪብርዘነው ቸልሻንድ የጝ፡፡ “በኢትዮጵያ የዲሞክራሲ ስርዓት ግንባታ ጉዳዩች” የው መጽሔትል ኢትዮጵየቱ ምጝግስት ኮሙኒኬሽንድ ጋልፀጘድ ዲሞክራሲዙ እቀ ኽቭር አቒል ፋጥርሸው ላብጠቱ ጥወጥውሽትንድ ዲሞክራሲል ሲሪሽጠ ጡሸኩ የኩ፡፡ ዜገንዙ ሚቭትድ ኪብርዘነው፣ ኽግዙ ንየትነይድ ደድሰነው፣ ዜግጥዙ ሚቭትዝመ አርወይዝ ዲጉዝመ ኽጉ አቐው ጒደነዝ ሊሚሰነው ጡሸጘድም ኻስቭዘኩ፡፡

ኢትዮጵየም ንቕፀቊ ብሔር ብሔረ እቅ ችጝሸነ ኻግር አቐነዊዝጘድ ኽቭረ ብሔሩ ላውንትድ አትርዝጠ ቸለው ፌዴራሊዝም ስረትድ ቲክነነው ግድ አቐነውድ አምነነውዝ ኽጋኒስቅ ንየ አቐው ጝር ኽገ ምጝግስቲዝ አንቀጽ 39ዝ ዲንግግር ዝርዝር ፋፅምፅመድ እቑርድርኩች፡፡ እኔንትም ቲክን አምረ ጨቨቅ ኽገ ምጝግስት ፃድቀው ግሬድ ሲርየ ፃቨነውዝ ኢትዮጵየት ብሔር ብሔረ እቅድ ላው ኻትመ ማርፅጝ፤ ላው ፃመል አኽቭሽጝ፤ ጝታ ባኽልዝመ ጥቅለ ጝታ ፅበፅብንዙ አቕንትድ ሚሪሸውዝ ዲዝጝት ላውጥውጥሽጘኩ፡፡ እኔን አቐነውድ ኢትዮጵይቁድ ጛስጛይ ኪብረኪብርሽጛንስመ አርቕሽትጛንስ ውር ቀሰው አገነ ፋጥረጘዝመ ላውድ ላየድ አርቐነውዝ ከቨከቭሽተናንስመ ላብጠቱወ ኻግርሸንት ላብጠ ታኽንኽነናንስ ውር እኩሰኩ የውድ አገነድ ችጝጝ በሊል ሲትፍሸቊ ዊግኒዝመ ኽግዝቊ ሙየ ጒጥድ ነይጘው ቓለድ ቲክነዊዝጘድ አልስነኩን፡፡

ዊዝር ማርታ ደባሽ ወይ ኽምረ ብሔረ እቅ ጭሰጭሰን ጋዝጊቭለ ወረደ አስከተመ ኻትመዙ ፅበተ ነይጘው ቓለይዝ “አምረ ጨቨቅ ኽደር 29 ግሬ ኪብርዝነው በልድ ይና ባኽልድ ቓሊስን፤ ይናፅኒዙ ባኽልድም ቓልን ላውንትዝ ግሬነውድ ኢትዮጵይቁድ ይናስ ይናይ አርቐ አርቕሽትነ ቸልሰው የጝ” የነውዝ ዊግትጘኩ፡፡

ውሸብለ ወንድሙ ሞገስ ሰቊጠ ኻትመዙ ፅበተ የጝ፡፡ ብሔር ብሔረ እቅዙ በልድ ኪብርዘናንስ ደግምግመዝ አገነድ ችጘው ዊነጘድ ጋልፅ “በልድ ይና ላውንትነይዙ ቓሊሰነ አቓንስቅ ግሬድ ኪብርዝን ግሬነዊስም ከስጘዝ ኢትዮጵየቱ ላውንትድ አትርዘቊ ገባንድ ጉልምዘናንስ አገነ ፋጥረው የጝ” የነውዝ ጋልፀኩ፡፡

“ብሔር ብሔረ እቅዙ በልድ ኪብረው ኮሪዝ ይናይታ ባኽልድ ቓሊሰነዊስም ከስጘ ላውድ ላየድ ቀንጠጘዝመ ኪብርዝጠጘድ ፃቨው የጝ” የቊድ ውሸብለ ወንድሙ እኔን ኪብረ ኪብርሽንድ ግነ አምረይስ ላው ግሬዝ ጭቑ ኪብርዘነው አቒጝቀ አምረይስ ኪርም አምረይል አሽ ዚልቀው አጠ ጡሸኩ የነውዝም ዊግትጘኩ፡፡

አት ማርቆስ ማሞ ወይ ኽምረ ብሔረ እቅ ጭሰጭሰን እክሰ ቃወነይዙ ዲቈተ  ጝታ ጋቢዝ ብሔር ብሔረ እቅዙ ሚቭቲጅቅ ፃየፃይሽተውዝ እቑርሸው ኽገ ምጝግስቱ አንቀፅድ ዲሞክራሲው ጭቑ አቒጝቀት እጅርነይዙ ሚቭቲጅቅ ጭቅተዝ ፃየፃይሽተው አቐነውድ ጋልፅጝ “እጅርነይዝቊ ሚቭታንድ ቈሽ ቀለውዝ ሳቕርሽጥጘ ቸላቊ ፀናቐቊ (አትረቊ) ኽጋን ጛይ” የነውዝ ጋልፅጘኩ፡፡

“አውም ኢትዮጵየቱ ብሔር ብሔረ እቅ ጝቅመነት ጭሰጭሰነውዙ እቻቐው ሚቭት ፃየው አቐነውድ ኽግዝ እቑርሸው የጝ” የቁድ አት ማርቆስ ላውድ ላየይዙ ባኽልዝመ አውትነይዝ ኪብርዘነው ኻግሩ ላውንትነይድ ኪብርዝነቊ ገባኒዝ ላብጠ ችብረነው ቈሽ አውማው ብሔር ብሔረ እቅዘ ኻይሽተው ቲግቭር የጝ ይጘኩ፡፡

ብሔር ብሔረ እቅዙ በልድ ኪብርሻንድም ብሔሩ ላውንትነይዝመ ጥወጥውሽትንድ ባልፀውዝ አትርዘናንስ ኻሊሽት ኪብርሸው በል አቐነውድም አት ማርቆስ ፃየፃይስጝ ጋልፅጝኩጙ፡፡

ኢትዮጵየ ንጭ ፋጥርሺረይም፡፡ ኽዝቫንድም ሲጘቊ ጛይ፡፡ እን ንቕፀቊ ዚምናኒዝ ላውንትድ አትርዝጝ ፅበነው ቸልጘውድም ጝታቕመነት ኻይስጝ ላጢዙድም ኪብርዝጝ ፅበነውዝ የጝ ኻግርቱ ላውንትድ ኻይስጝ ሲጘውድ፡፡ አቓንስቅም ላውድ ላየድ ጭቓ እልዝ ቓለነዊስ ፈነውዝ፣ ቺዘቺዘቊስ ላው ፃቨቊድ አትርዘነውዝ ብሔሩ ላውንትድ አትርዝነ ይና አስለ ክፍሊዙ እፃ የጝ፡፡

ንጉሱ ማሩ

ኽደር 30/2017 ዓ.ስ