አየር ንቭርትዙ ልውጠ፣ ኩረ፣ ኽር፣ ዝቨዙ ኻድይንዝመ ባጠነውድ ቈሽ ንቕፀቊ ፍጥርቊ ኻደግጥ ይና ዓልምሸንስ ፈተነ አቕጝኩጙ፡፡ ዳቕሽተቊ ፍጥርዝቊ ኻደግጥድ ኢትዮጵየትል ዊትቊ ጣቅ እምተንዝ እጝጐ ዲዝጝሽየው አቕንትዝ አጋልድጛጙ እጅርዙ ሩሔል፣ እንሰስል፣ ኽወጥዝመ ሲርየ እፍርታኒል ቘጨ ችጝዛጙ ችጝሸኩ፡፡
ዲቊስነው አምረይዝም ኻግርዝጘድም አነ ክልልዝጘድ አጉረው ፍጥሩ ኻደገ አጋልዝ ዲቊ እኩ፡፡ ፋጥርሸው ኻደገይዝም ንቕፀው ሩሔዝመ ጥፍት ድዘነውድ ብሔሩ ኻደገ ማኽትንዝመ ኹረዙ ወይትነይድ ፊሰው ሚዝረድ ቓሊሰኩ፡፡
ብላ ክልሊልም ሰሜን ሸዋ፣ ወይ ኽምረስመ ሰሜን ጐንደር ዞናኒል ቺተቺተቊ ፍጥርቊ ኻደግጥ አጋልዝጝ ንቕፀው ሩሔዝመ ፃጀል ድስን ችጝዝኩ፡፡
እኔንትም ቲክን ወይ ኽምረ ብሔረ እቅ ጭሰጭሰን ድሃነ ወረደ አርሽነይ ፅፈሽ ጝንድ አሚኮ ኽምጣጘ አስለ ክፍሊጅቅ ፃቨው ዊንተይዝ ወረደድ ዲቈው ጫረይዝ ንቕፀው ድዘር ችጘነውድ የጝ ጋልፅጘውድ፡፡
ዲቈተድ አት ዘነበ ማሞ ይጘጘድ ወረደ ስሪል ችጝሸቊ 31 ቀቨሊጢስ 28 ቀቨሊጥድ አጉረው ፍጥሩ ኻደገ አቭኑዘቊ አቐነውድ ጋልፅጝ “ፋጥርሸው ኻደገይዝ ሚንወዝቊ ካናለኒል፣ ኽወጥዝቊ ቻፅጚል፣ እንሰስዝመ እጅርዙ ሩሔል፣ ቈሸዝም ቺተቺተቊ ሲርየ እፍርተንዝመ ችብረጥል ቘጨ ችጝኩ” የቊ አጛንድ ፋጥርሸው ኻደገይዝም 94 ሽኽ እቅል ቘጨ ችጘነውድ የጝ ጋልፅጘውድ፡፡
አት ዘነበ ማሞ ፃየፃይሰነውዝም “14 ሽኽዝ 1 ላዝ 74.5 ሄክታር ዝቨል ችጘው ኩረዙዝመ ዝቨዙ ኻድይንዝ ችጝዘው ቘጨይዝ 120 ሽኽዝ 6 ላዝ 33 ኩንታልዝ ንየ ጊቭርት ብንኩኑን” የቊ አጛንድ እኔንም አቐነዊዝ 5 ሽኽዝ 3 ላ እቅዝ ንየ ጝታ ኪውድ ማልጝ ስድት ፊረቊ አቐነውድ የጝ ዊግትጘውድ፡፡
ወረደይል ፋይረቊ ሲርየ እፍርታንድ ዊስን ፃግነናንስ 1 ላዝ 82 ሚሊዮንዝ 2 ላዝ 54 ሽኽ ቊርሽዝ ንየ በንዘኩ የቊድ አት ዘነበ ነን አጢስ “ዋልማ 1.5 ሚሊዮን ኩንታል ዚረዙ ከቨ ፃቨው አቓንድ፤ ብሔረ እቅ ጭሰጭሰኒዙ ኻደገ ማኽተነዝመ ኹረዙ ወይትነይድ ቈሽ 2 ላ ኩንታል ብኻርመይል ከቭኩ” የቊ አጛንድ ፋጥርሸው ችግሰይዝ ልክ ቓልሽታንድ ፃቭሽተው ከቨድ ሳስየው አቓንስቅ ሚሪሸቊ አካለንድ ከቭጥጘድ ዋቕርነኩን ይጝኩጙ፡፡
ወይ ኽምረ ብሔረ እቅ ጭሰጭሰን ኻደገ ማኽተነዝመ ኹረዙ ወይትነይ ዲቈተ አት ምሕረት መላኩ ይጘጘድ ጝታ ችብረድ ኻደገ አጋልዘነዊስ በውግ ቺዝን ማኽተነውዙ ሰቭ ሰቭተነውዝመ ምጝግስትዙ ፕሮግራሚዝ ሴፍትኔትዝ አቅቭሸቊ ዊግኒዙ ኹረዙ ወይትነይድ ደድሰነውዙ እፃ ፃይ ፍልውልወው አቐነውድ ጋልፅጝ ወይትጘድ ዲቈው ጫረይዝ “44 እቅዙ ሩሔ ኩረዝመ ተከተከቊ ገባንዝ ድዘው አቓንድ 7 ላዝ 31 እንሰስም ኩረዝ ፊርጝኩጙ፤ 51 ችብረጥም ፋይረቊ አቐነውድ ፅንኸዝ ደድስንኩኑን” የቊ አጛንድ ቺተዝም ዚረዝ ሺፍንሸው 1 ላዝ 20 ሽኽዝ 6 ላዝ 38 ሄክታር ዝቨል ፊተው ኽወይስ 49 ሄክታር ዝቨ አርወስ ቢዘ ፃቨነውድ ቈሽ ችግሰድ ወሰው አጠ ፃቭኩ የነውዝ ጋልፅጝኩጙ፡፡
ፍጥሩ ኻደገዝ አጉረው ቘጨ ችጘቊድ ድሃነ ወረደ፣ ጋዝጊብለ ወረደዝመ ፃግብጂ ወረደድ በው ቃውሰዝ እቑርሸቊ ጛይ የቊድ አት ምህረት “ሚንወዝቊ ካናለንድ ግነ እጝቅ ወረድጢልቅ የጝ ቘጨ ችጝዘውድ” ይጝ እንዳይ ፋይረቊ ሲርየ እፍርታንድ ዊስን ችበችብሰናንስመ ብሔረ እቅ ጭሰጭሰኒዙ አይነተ ጭሰጭሰተድ ቃወው ግቭረ ኻይል ፅርሽ ነን አጢስ ገነ ፅንኸ ፃቭጛጙ አቐነውድ የጝ ጋልፅጘውድ፡፡
“ሰራሽትጛጙ ሲጘቊ ሲርየ እፍርታንድቅ ላው ጫረዙ እስወዝ ብንኩኑን” የቊድ አት ምህረት ምጝግስትም አነ ቀሰው ፃቨጥ ድርጅታን ዊስን ችበችብሰነውዙ ሰቪል ትኩርት ፃቭጛንስም ጭጝን አልስጝኩጙ፡፡
ኽደር 30/2017
ኽደር 30/2017
