አቢታየጘድ ሊሚድና

ታዝቱ  እቀ ተስር ኪዝድ  ኤሌክትሪክዙ ኻይል ግርቭዘናንስ ኻሊሽት ሰራሽት አግልግለ ይወነው ኪርመውድ 2000 ዓ.ስ የጝ። ኪዝድ ኤሌክትሪክ ግርቭዘነዊስ ከስጘዝ ፈራቐው ኻዘዙ ፃጀ ችጝሸነ አቕኩ። ክልሊዝቍ ኻዘ ሙየ ጒጥዝ ፃቭሽተው ፅንኸይዝ 18ዝ ንየ ኻዘዝቍ ዚረዝመ አጉረው ኻዘዙ ምፅነ ፅበነውድ ደድሽትኩ።  ታዝቱ ኪዚል ኻዘ ፃውረነው ኪርምሸውድ 2003 ዓ.ስ የጝ። ኻዘ ፃውረነውዝ አሩሸጥ ወረጥድ ብላ ክልሊስ ጠለምት ወረደ፣አቭርገሌ ወረደ፣ስሃለ ሰየምት ወረደዝመ ዝቛለ ወረደ አጛንድ፤ ፅልየ ክልሊስ ቈሽ እጭለ ወረደድ ፈራቐውዝ አሩሸተ ወረደ የጝ።  7000 ፅጉየቍ ውሸብልዝ ኻዘ ፃጀ እፍርት ዚርፊዝ ሰቭዙ አገነ ፋጥርሽኩ።

እኔን ፃጀድ አምረ ጨቨቅ ንቕፀቍ ውሸብልዝ ሰቭዙ አገነ ፋጥራጙ አቐነውድ ንየይል ጋልፅሽተው እግዘይስ ልብተነው ቸልሸኩ። እን አምረይዝም ኻዘ ፃውረነውዙ ሰቭድ ጥቅምት አሰነይስ ኪርም ኪርምሸው አቓንድ አርወድ ዚልቅትነይ ፃየው አጠ ማጥን ጡሸውዝ አሩሸነው በንዘው አቐነውድ የጝ ውሸብሊዝመ ሰቭዝቍ ዲቈጥድ ዊግትጘውድ።

ውሸብለ ገብረ ኪሮስ ጎበዜ ዝቛለ ወረደ አድስጊ ቀቨሌዙ ፅበተ ነይጘው ቓለይዝ ታዝቱ ዊርቨድ ጝታ አቅልድ ቅም ፍጭር ፍርዝጝ፣ ዲበዝ ቺተቺተቍ ኽወጥ እፍርዝጝ አሩሽጝ ሲጘው አቐነውድ ዳቕስጝ፣ ነንቱ ሰቲዝ ቈሽ “ዝቨድ አቑዝ ሺፍንሹዝ ቅም ፍጭሪዝ ቢዘ አኑን ይን ኻዝንሽም ላየ አርወ ፃይ የጝ ተረውድ” የቍ አጛንድ ኻዘዙ ፃጀድ ጁነይዙ ውሸብለይዝ ፃጀዙ ፍልፍለ አቐነውድም የጝ ጋልፅጘውድ።

ውሸብል ቺተቺተቍ ገረድጥዝ ፅርሸነውዝ ኻዘ ፃውርጝ ፃጀ ጒጥ አቕጛጙ አቐነውድ ዊግተቍድ ውሸብለ ገብረ ኪሮስ” ይቕምትጘድቅ አኮ እርፍ ጭቑ ሰራጭ ምሽረ ኻትመይል 90 ሽኽዝ ዝቨ ጅቭ ጝን ተሰነዊስ ከስጘዝ፣ 90 ሽኽዝ ንየ ጊንዝቭ ፊስ ቅም ፍጭርም ጅቭኩን” የቍ አጛንድ ንቕፀቍ ውሸብል ሞተር ጀልቨይል አሽ ጅቨቍ ፅበነውድ የጝ ዊግትጘውድ።

አት መስፍን በላይ ዝቛለ ወረደ እንሰስዝመ ኻዘ ፃጀ እፍርት ፅፈሽ ጝንዙ ዲቈተ ይጘጘድ ጝታ ፅፈሽ ጝንድ ጝንዝቍም አጝነ ድርዝቊ፤ ዝቨዝቁም አጝነ አቑዝቍ እንሰሰድ ታኽንኽነነውዝመ ሊሚሽጥጘ ፃቨነውዙ ዲቍትነይ ፃይ ሰራሸው አቐነውድ ዳቕስጝ” ታዝ ችጝሸው ኻዘድም ጡሽት ፃየው ጒደነዝ አርወል ግርያንስ ላጥም ሚሪሸቍ ችብረጥጅቅ አቕን ሰራሽናጙ ችጝሽነኩን”ይጘኩ።

“ኻዘዙ ፃጀድ ጅውነይል ችጝሸቍ ንቕፀቍ ውሸብልዙ ፅብንድ ላውጠነው ቸለው የጝ ” የቍድ አት መስፍን ኻዘ ፃውረነው ስረቲል ግነ ቺተቺተቊ ችግሰጥ እስልጛጙ የጝ የቍ አጛንድ፣ ቺተዝም ኽጉ አየቍ ኻዘ ፃውረጥድ አርውሽጘው መረቭድ አፀው አቐነዊዝመ በንሽታው ኬሚካልዝ ናኽርሸው አቐነውድ ኻዘ ፃጀይል ቘጨ ችጝዛጙ አቓንስቅ ኻዘዙ ጊቭርትድ አምረይስ አምረ ቃፅቫጙ ተርጠ ፃቭኩ ይጘኩ።

እኔን ችግሰድ ቃፅቨናንስ ውሸብል ዲርጅሽጝ ሰራሽጛንስ 8 ላዝ ንየ ውሸብል ቺዘነውዝ ሰቭዝጎ ጡጥጘ ፃቨነው ቸልንኩኑን የቍድ አት መስፍን “10 አጥጘ ሴክተራን ላውንትዝ አቕን ግቭረ ኻይል ችብሰነውዝ ኪዚል ሰራሽተው ሰቭድ እግዝግዝናጙ ችጝሽነኩን” ይጘኩ።

ወይ ኽምረ ብሔረ እቅ ጭሰጭሰኒዝ ኻዙ ፃጀዝመ እንሰስ ቃወነይዙ ዲቈተድ አት ሲሳይ አያሌው ነይጘው ኻሰቪዝ ብሔረ እቅ ጭሰጭሰንድ ንቕፀው እንሰስ ፃጀ ፃየው አቐነውድ ጋልፅጝ “ታዝቱ ኪዚል ችጝሸው ኻዘድ ቈሽ  ይና ብሔረ እቅ ጭሰጭሰኒዝ በው ቃውሰዝ ዳቕሽተተ ፃጀ አቓጙ ተርኩ” የነውዝ ጋልፅጘኩ።

ባህርዳር ዩኒቨርስቲ ዝመ ዓልምቱ ባንክ ላውንትዝ አቐነውዝ ፅቃ እምትዝ በውግ ፃቭጘው ፅንኸይዝ”ታዝቱ ኪዚል 18 አይንት ኻዘዙ ዚረ ፅበነዊዝመ አምረይዝ 10 ሽኽ ቶኒል አሽ ኻዘዙ ስየ ጊቭርዘነው ቸልሸጘድ ደድስጝኩጙ” የቍድ አት ሲሳይ 3 ሽኽዝ 7 ላዝ ንየ ውሸብል ነንቱ ሰቲዝ ዲርጅሽጝ አሩሸጥ አቐነውድ የጝ ዊግትጘውድ።

“አውማው ፃጀ ጡሽን ፃየው ጒደነዝ አሩሸነው ቸልሽየውዜ አቢተው የጝ” የቍድ አት ሲሳይ እቀ ኽቭርድ አርወድ ጙ አቐነውድ ልብት ኽጉ አየው ጒደነዝ ኻዘ ፃውረቍድ እግዝግዝጠ ጡሸጘድም ኻስቭዝጝኩጙ።

ኻዘ ኾነው ትኽነዝ ይወው አርወድ አራሰው የጝ።አውየንም እድምዙ ክልሊል ችጝሸው እጅር ኻዘ ኹጠጘድም ማኽርሸው የጝ። አቓንስቅም አእምሮዙ እፍርትድ ሊጊሰናንስ ኻዘ ኾነው። ቲርፈውድም አርየ ፊስን ቅየነው። አቢታየጘድም ታኽንኽነነው አውማዊስቅ ኻይሽተው ቲግቭር አጠ ጡሸኩ ይና አስለ ክፍሊዙ እፃ የጝ።

ንጉሱ ማሩ

ኽደር 30/2017