ኢትዮጵየ 86 ብሔር ብሔረ እቅዝ ንዬ ጽብጘይ ሉአላዊ ኻግር ጚ። ጝር ኽዝቫንድ ጝታ አቒል ብጭቕ ዲዝጝት፣ ኻሰቭ፣ ባኽል፣ ቈንቈ፣ ሠራሽንዙ ግሪ፣ ጽበጽብንዙ ቸልት፣ ጭሰጭሰንዙ ፣ ደጝትዙ፣ ኻይማኖቱ ስረት ጒይጥ ጛይ። እንዛይ ጋልጽሽትን ጒርየሸን ኢትዮጵየ ጝር ኽዝቭድ 130 ሚሊዮንስ ንየ እጊተው የጝ።
እንዛይ ኽዝቫንድ ጝታ ጻለትድ ለውንትዝ ጅግንትዝ ማኽትጝ ዓልምስ ኲርዘው ቲግቭር ፋጽምጝኲጙ። ላው ላው ጅውንጢል ችግሰዝመ ኽር አጋልዳንድ ቈሽ ጭጘጭጝሽጝ ከቨከቭሽተነውዙ እሴት ቲክልጝኲጙ።
ኢትዮጲቍድ ጝታጅግንትድ ኽየው፣ ከቨከቭሽትንድም ዚምናንዝ ጸናቐው አቕሽም ጝር ጻለተንድ ግነ ኽርይጝ ጨቍ አየቍምና ዚምናንዝ አቒትቍ ባንድጥድ አሩሸነውዝ ላውድ ላዘይጅቅ ቃርስጛጙ ዚምናንዝ ንጭ አሽ ዚልቅጝኲጙ። እንዚምናንዝ ስትራቴጂ ፈጣሽ ሠራሽተው ሴረይስ (ቅጥረይስ) ፈነድ ቈሽ ኽይጠ ኢትዮጲቍዙ እዘን ፈራቐው ልብትንዝመ ጭቕትዝ ናን ይዋይነቅም የው ለውንትድ የጝ።
ኢትዮጲቍ እንዛይ ቀሰቍ ጝታዲዝጝታንድ ላጢዝ ከሰከሰናንስ ኢትዮጲየስ ማጽናው ገቨድ ቈሽ ለውንትዝ ቓቭዝን ማለናንስ ብሔር ብሔረ እቅዙ ግርየድ ዓምረ ጨቨቅ ኽደር 29 ኪብርዘች። ነንቱ ዓምረይዝም 19ትረ ብሔር ብሔረ እቅዙ ግርየድ አርባ ምንጭ ኻትመይል ኪብርዝርኲች።
እንበልድ ትርዒት ቓሊሰነውዙ መድረኽ አቒንቀ ላው አቐው ፖለቲካል ኢኮኖሚው ገረደ ፋጥረናንስ ቸልሰው በል አጠ ጡሸኲ። ኢትዮጲቍ ጻይጘው ጻጀዝመ ይውንድ ለውንትዝ አሩሸነው ቸልጘውዜ ኻግርየት ሊግዘቍ ኻግራኒል ገሪሽራንስ ቸልሰው አቐጘ ችብር ይጝ ልብጥጘ ጡሸው ግርየ አጠ ጡሸኲ። በልድ ኪብርዝን አቢተው አቒንቀ ቀሰቍ ዲዝጝታንድ ጅውነ ጨቨቅ ቲግቭርዝጘው ሰቭ ፊሰነ መድረክ አቕ እጊጠ ጡሸኲ።
ብሔር ብሔረ እቅዙ ግርየድ ኢትዮጵየት ፊትነቍ ጻለተንዙ ሰባን፣ ዲግዙ ብሽትንዝመ ኢኮኖሚዙ አርጋቓቅ የነው ችግሰጢዙ ፍልፍለድ ወረጘ የጝ? የነውዝ ችግሰይስ ፈነ ግሪ እቍርጘው መድረክ አጠ ጡሸኲ። ኢትዮጲቍዙ ብጭቕነይዝ ጋልጽሽተቍ ባኽላንድ፣ ቓልሽተቍ ትርዒታንድም ቱሪስት ዊትረቍ፣ ኢኮኖሚዝቍ ፍልፍለ መድረክ አቓንስ ሠራሸነው ጡሸኲ።
በልድ መድረክ እብለውዘነ ፣ ፖለቲከኝጥዝ ጝታኻለይዝ ከቭሰነ መድረክ ጻቭን ቓለነዊስ ዊንም አሩሸነዊስ ፊሰነውዝ ኢትዮጲቍዙ እዘኒል በንሽተው አጠ ጡሸኲ። ኢትዮጲቍ ዓምረ ጨቨቅ ግርየድ አውን ተራን የነውዝ፣ አይር ጝታዲዝጝትድ ፣ ሲጘድ፣ ልውጥድ፣ ባኽልዙ ጋልጽሽትንድ፣ እቑመቱ በሊስ ክንድጝ ላውጥዉጥሽጘው ገቨድ ቓሊስጛንስ ቸልሰው መድረክ አጠ ጡሸኲ።
ግርማ ተጫነ
ኽደር 30/2017 ዓ.ስ
