ኢትዮጵየ ደጝትዝመ እክሰዙ ስረቲል ቺተቺተቍ ቺዝስንዝቍ ሪፎርም ሰባን ሰራሽራጙ ችጝሸች ኻግርዝጘድ ደጝትዝመ እክሰዙ ስረቲል ኪርምሸው ሪፎርምዙ ሰቭድ ጎነ ፃቨነውዝ ክልል አቅቨ ደጝትዝመ እክሰዙ አግልግለይል እጝቅትቅ አቅቨው ልውጠዙ ሰባን አክኑሽጛጙ ችጝሽጘኩ።
ብላ ክልሊዙ ጥቅለተ ደጝት ጝንድ እክሰዙ ስረትድ ቺዝሰናንስ፣ ደጝትዙ ሰቭድም ሳልጠው ፃቨናንስ ፃየቍ ማርፅጢስ ጨቅንዙ (ሙግትዙ) እክሰነ መላኒስ ላው አቐው ሽሚርነይዙ ደጝት ወረጝትነይዝመ ፋፅምፅመይዝ ጅሉዘ ዚርፊዝቍ ምኹራንድ አቭኑዛጙ ምኽርኽረ ፃቫጙ ችጝሸኩ።
ፋጥርሸው ምኽርኽረዙ መድረኪል ችጝሸቍድ አልም አቅቨ ሽሚርነይዙ ደጝት ሙየ ጉሬዝመ ሚርምርሸተድ ልዩ ታምሩ፣ ሽሚርነይዙ ደጝት ወረጝትነይዝመ ጥቅለ ኻግራንዙ ዲዝጝትድ ቓሊሰው ፅንኸድ አልስጘው ኮሪዝ ሳልጥነቍ ኻግራንድ ጛልቍ እቅል፣ኻግር አቒልም አነ ግፅ ኻግራንጅቅ ፋጥርሸቍ ችግስጥድ ሳልጥነው ሽሚርነይዙ ደጝትዝ እክሰቍ አቐነውድ ጋልፅጝ”ኢትዮጵየ ሽሚርነይዙ ደጝት ፖሊሲ ዝመ ኽግዝቍ ማቀፋንድ ፣የውም ተረቲዝ ትኩርትዝቍ ሚርይጥ እቑርድር ሰራሽተ ጡሸች” ይጝኩጙ።
ፅንኸድ አልሰቍድ ልዩ ታምሩ” ኻግርዝጘድ ዚርፊል ብጭቕ ሰራሽቲየቍ ገባን እኩጙ” የቍ አጛንድ፣ ብላ ክልሊዙ ጥቅለተ ደጝት ጝንድ ገቨይዝ ትኩርት ይወነውዝ ቺተቺተቍ ደጝትዝመ እክሰዝቍ ችብረጥጅቅ ሽሚርነይዙ ደጝትዝ ጅሉዘ ሰራሸነውድ ኻግርሸን ዚርፍድ ፈራዘናንስ ፃይረው ኻለይዝ ኽየው ጥወር የጝ ይጘኩ።
ሽሚርነይዙ ደጝትድ ኢትዮጵየትል፣ ቺተዝም ብላ ክልሊል ቲግቭሩ ፃቨናንስ ትኩርት ይውጝ ሰራሽጛጙ ችጝሸቍድ ብላ ክልሊዙ ጥቅለተ ፍርድ ጝን ፕሬዝዳንትድ አት አለም አንተ አግደው፣ “ብላ ክልሊዙ ጥቅለተ ደጝት ጝንድ ኢትዮጵየት ሽሚርነይዙ ደጝቲዝ ማኸል ፃቨናንስ ፃይሽተው ኻለይዝ ኽየው አቅም ፋጥርጠ ቸለው፣ ሽሚርነይዙ ደጝቲዝ ስልጠነዙ ማኸል ፃቨናንስ ኻልይን ሰራሽናጙ ችጝሽነኩን” የነውዝ የጝ ጋልፅጘውድ።
ኢትዮጵየት ሽሚርነይዙ ደጝት ማኸል ፃቨናንስ ንቕፀቍ ሚቸቍ አቕንት እኩጙ የቍድ አት አለም አንተ “ዲቭረው ሽሚርነይዙ ስረትዝመ ኻይማኖት አቅልዙ ዲዝጝት፣ እደረት ጎውተው ኽዝቭ ፅበነ ኻግር አራንስቅ” ሽሚርነይዙ ደጝትድ ሚቸው አጥ ቸልሰቍ ኽግዝቍ ማቀፋንድ አስለነውዝ ሽሚርነይዙ ደጝትድ አትርዘነውዙ ሰቭድ ክልሊስ ኪርም ሳ ወረደይዝቍ ችብረጢል አሽ ትኩርትዝ ሰራሽታንስ ሚርየ ጊመነውድ የጝ ጋልፅጘውድ።
ሽሚርነይዙ ደጝት በንዝቲዝመ ጝተረነ ሲጘይጅቅ ፃየፃይሰነውዝ ቓለ ነየቍድ ቈሽ ወይ ኽምረ ብሄረ እቅ ጭሰጭሰን አጉረው ደጝት ጝንዙ ፕሬዝዳንት አት ጌታነህ ጥጋቡ ጝታ ጋቢዝ” ሽሚርነይዙ ደጝትድ ጝተርንድ እጅር ኹር ላብጠ ፅበነው ኪርመው ጊዚጅቅ ፃየፃይሽተው ሊግዘው እድም እጊሰው የጝ” የቍ አጛንድ፣ እጅር ዲግዝ ፅባንስ፣ ጅውነይል ኽምዘዝመ ግርቭዙ(ኻይልዙ) ጥቕዘ ፃቫየጘድ የውም እክሱነይ ፃየው ፅብን ፅባንስ ጝቕምቱ ፈን እኩሰው የጝ ይጘኩ።
“ወይትጘድ ነስን ቓልናንድ ቺተን ፋጥርሻንድ ደጝት ጝንዝጎ ተርን እክሰነዊስ ኻግር ሽሚርዝ እክሰነውዙ ዲዝጝትድ አጉረው የጝ”የቍድ አት ጌታነህ ደጝት ጝንዝ ይውሽተው እክሰድ ላውድ ለጣቐተ፣ ላየድ ለጣሸተ ፃቨው አቓንስቅ ዚልቁነይዝ ዲግ ፋጥርጠ ቸላውም የቍ አጛንድ ሽሚርነይ ግነ አምነአምንሽጝ ፍጘው አቓንስቅ ዚልቁነይ ፃየው ዲግ ሲፍንዘው አቐነውድ የጝ ዊግትጘውድ።
ሽሚርነይዙ ደጝት ጛልቍ እቅዙ ፅብንድም አነ ኻግርዙ ዲግድ ሊሚሰናንስ ፃየው አርወድ ቀለውዝ ቓልሽታውም የቍ ፕሬዚዳንትድ “ደጝት ጝንጢል ጥቅልሸው መዝገቭዙ ንቕፀድ ቃፅቨነውዝ ሳልጠውዝመ ዊርየው አግልግለ ይወናንስም ቸልሰኩ”አቓንስቅም ክልልድ እቑረው ዚምኑ ሽሚርነይዙ ሰቪዝ ትኩርት ይውን ሰራሸነው ዊነው አቅለው ቸለቸልሽንዙዝመ ኪብረኪብርሽንዙ እሴትድም አትርዘው ገቨ አቐነውድ የጝ ጋልፅጘውድ።
ላየ ቓለ ነየተድ አት ዘነበ አለምሰገድ ወይ ኽምረ ብሄረ እቅ ጭሰጭሰን አብርገሌ ወረደ እክሰ ፅፈሽ ጝንዙ ዲቈተድ ነይጘው ቓለይዝ “ሸሚርነይዙ ደጝትድ ወንጀልዙ ኽግ 1996 ዓ.ስ ፈውኽጊል አንቀጽ 616ይል እቑርሸጘድ ሽሚርነይዝ እኪርጥጘ ቸለቍ ወንጀላንድ ዛን፣ ሽጙ ጨቀነው፣ ኻዲየኻዲሸነው ተከተከቍ ሽሚርነይዝ እኪርጥጘ ቸለቍ አጘጘዝመ፤ ቁወነውዙ፣ ኻይልዝ ዲፍረነውዝመ ምጝግስትቍ ወንጀላንድ ግነ ሽሚርነይዝ ዲቭሽትጥጘ ቸላቁም ” የቍ አጛንድ ችግሰድ ሽሚርነይዝ እክሰነው ፃየው አርወድ ጋልፅጘው አቕንቲዝ ቈሽ፣ላውድ ወንጀል ፋፅመው እጅርድ እፁሻየጘዝመ ቓፃሻየጘ ፃቨኩ፣ ሊጘትረድ ቢድልሸው አካልድ ጝቘጨይዝ አርቕሽትን ችጝ ከስሽትጠ ፃቨኩ፣ ሻቘትረድ እቀ ኽቭሪዝመ ጅውነድ ወንጀሊስ ናፀ አጠ ፃቨኩ፣ ሲዘትረዝ ቈሽ ደጝት ጝንጢዙ እክሰዙ ስረትድ ቀልዘው አቓንስቅ ከቭሽትጠ ጡሸው አቐነውድ የጝ ጋልፅጘውድ።
ወረደይዝጘድም ብረ ቀረቍ እቂስ ኪርም ቀለው ቃሪል አሽ ፅበቍ ችግስጥድ እክሰነው ጋብዝ ሽሚርነይዙ ደጝትድ ኽየው እኩሰ ፃየው አቐነውድ ጋልፀቍድ አት ዘነበ” አምር ዊስን ሽሚርዝ አርቅሸነው እዳቓው ገቨይዝ ደጝት ጝኒዝጎ ዋጥርጥረነውድ እዳዘው አቓንስቅ ኻግር ሽመቅልዙ ሰቪዝ ኽየው ክቭር ይውነ ጡሸኩ” የቍ አጛንድ ወረደይዙ እክሰ ፅፈሽ ጝንድም ላጥ ሚሪሸቍ አካላኒጅቅ አቐነውዝ ክልሊስ ኪርም ትኩርት ይውሽተው ሽሚርነይዙ ደጝትድ አትርዘናንስ ሰራሸው አቐነውድ የጝ ዊግትጘውድ።
ዲግ ይናናኒል የጝ ፅበውድ። ይና ናኒስ ጭልቓንድ ቈሽ ይና ጁነይል ፅበቍ ኻግር ሽመቅልዝ የጝ እሩደውድ። አቓንስቅም ሽሚርነይዙ ደጝቲዝ ኽየው ቓለ ይወነውዝ ይና ዲግድ ኻይነ ይና አስለ ክፍሊዙ እፃ የጝ።
ንጉሱ ማሩ
ታኽሰስ 15/2017
