ደን የነት ፍጥርዝ ቢቍለቍ ወይም እጅር ናንዝ ቲክልሸቍ ዘፋንዝመ ዘፋንዙ ዓምል ፃየቍ አውማው እፅዋታንድቅ ጥቅልዘው ቃል የጝ።
ደንዙ ጝችጝሽንድ እጅር ናንዝ ቲክልሽ እፍርደውዝመ ፍርጥዝ ቢቍለው ይሽተው አቓንድ፣ ጛውትነይዝ ቈሽ እቀ ኽቭርዙ ደን፣ጛልቍዙ ደን፣ገረዱ ደንዝመ ምጝግስትዙ ደን ይሽተነውዝ አርቕሽተኩ።
ደን ፅበነው ፃየው አርወድ ቀለውዝ ቓልሽተው አየውም። ጭቅቱ አየው ጒደነዝ ችጝሸው አርወድ አልምቱ አየር ንቭርትድ እርውድጠ ፃቨነውዝ በራኽነይድ እዳዘኩ፣ በራኸ አቐነዊጅቅ ፃየፃይሽትጝ ተርጥጘ ቸለቍ ኽርጥድ እዳዘኩ፣ ጝንዝቍዝም አነ ድርዝቍ እንሰስዝ ኹረዙ ችጝሸነ አቐኩ፤ ጥቅለዝ ንቕፀ ሩሔዝ(ብዝሃ ህይወት)ዙ ፅብንድ እርውደው አጠ ፃቨኩ።
ደኒስ ጭቅተዝ ችጝሸው አርወድ ቈሽ ኻይል ግርቭዘናንስ፣ቈዘናንስ፣ኢንዱስትሪዙ ጥር ጎዘዝ፣ አልተነዝመ ዊርየው አየር ችጘናንስ ቸልሰኩ።
ድር ማፅርሸነውድ ጅውነይል ችጝዘው ጥቕዘድ ቓልናንድ ቈሽ ዝቨዙ ማጥማጥደነው፣ ብጥዙ ሺርሽርሸነው፣ ብጭቕ ሩሄዙ ፃጀ ድዘነው፣ዝቨ አቒዙዝመ ዝቨ ዲግዙ አቑ ቃፅቨነው የቍድ ዳቕሽተጥ ጛይ።
እንዳይ ድር ድዘነውጅቅ ፃየፃይሽትጝ ተረቍ ችግስጥድ ቃፅቨናንስመ ድር ፅበነዊዝ ችጚሰቍ አርውጥድ አትርዘናንስ ኢትዮጵየ አልቛዘ ደፈዙ ፕሮግራም ቃርፅር አምረ ጨቨቅ ንቕፀቍ ፍለን ጛልቍ እቅዙ ዝቨል፣ምጝግስትቍ ፓርካኒል፣ ኽዝቭዝቍ ቅብረጥዝመ ገረድጥዝ ሊሚሸቍ ስፍልል ፍለን ቲክልሽጥጘዝመ ታኽንኽነዝ ሊግዝጥጘ ሚሪ እቑርድር ሰቭትራጙ ችጝሸች።
ወይ ኽምረ ብሄረ እቅ ጭሰጭሰንድም ማጥማጥደው ጅውነድ ዊስን አልቛዘዝ ሺፍነናንስ ፍጥሩ ፃጀ ታኽንኽነዙ ሰቪስ ኪርም አልቛዘ ደፈዙ ሰቪል አሽ ቺተቺተቁ ሰባን ሰራሻጙ ችጝሸኩ። አቓንስቅም ጋዝ ጊቭለ ወረደድ ጎነ ፃቨነውዝ ብሄረ እቅ ጭሰጭሰንድ 2016/17 አምረ ስቑርቲዝ ቲክልሸቍ ፍለንድ ቈሽ ጥቅለዝ ፍለንድ ታኽንኽነነውዙ ዲዝጝትድ ውር ተከኩ የውድ አንቭቭስነ ቀኑን።
አት ጌጡ ጣሰው ጋዝጊቭለ ወረደ 01 ቀቨሊዙ ፅበተ ጛይ። ጝታቅሊስ ወሽጛንድ ጅውነድ ድርዝ ሺፍንሸው ዊነጘዝመ ቺተቺተቍ ኽርጥዝመ እጅር ኹር ማፅረነዊዝ ድዛጙ ተረው አቐነውድ ዊግትጝ እኔን አቐነዊዝ ደግምግመዝ ኽረ አጋልዘነዊስም ከስጘዝ እስወ ሊቫንድም አቕሽ አቑ ችብሰው እጀው አቓንስቅ ብጥድ ጂዝ ዲቍ ፊራጙ አቓንስቅ እንዝ ጥላድ ቈሽ ጅውነድ ዊነው ድሪዝጎ ዊሰነው የጝ።” አቓንስቅም ይንም ፍላን ቲክለነዊስ ኪርም ሊግዝጝ ጝታውር ቸልጥጙዊል አሽ ታኽንኽነነው ይና ዲቍትነይ አቓንስቅ ይና ችጘርድ ፍናጙ የጝ” ይጝኩጙ።
አት ጌጡ ፃየፃይሰነውዝም” እፈረዝመ ዘፍዝ ሊግዝጡዊል አሽ ኽየው ታኽንኽነ በንጘኩ” የቍ አጛንድ ቲክልሸቍ ፍለንድ ሊግዝጝ አርወ ይወነው ኪርምጥጙዊል አሽ እንሰስዝ ኾሽታይጘጘዝመ ኮረ ምላሰንዝ ኻራይጘጘድ እቀ ኽቭርድ አድልድልሽ አቑ ዚሰነውዝ፣ፃቀ ሺፍናንድ ፃቀድ አርመነውዝ ቺተው ታኽንኽነ ፃቭጛጙ አቐነዊዝ ቀሰው ሉጠ ቓለነውድ የጝ ጋልፅጘውድ።
ላየ ቓለ ነየተድ አት ሲሳይ ደርበው ይሽተቍ አጛንድ ጝታይም ጝታ ፅብንድ ጋዝጊቭለ ወረደ 01 ቀበሊል የጝ። ፍል ቲክልን ሊጊሰነው አውስም ባልፀውዝ በው ቃውሰዝ አርወውድ ጅውነይዙ እቀ ኽቭርድ አቐነውድ ጋልፅጝ ኽየው እጥን፣ እውነ ግልወ ይጝቀት ቲክልሸቍ ፍለንድ ታኽንኽናጙ ችጝሽነኩን የቍ አጛንድ ” ድርዙ አርወድ ልብተናንስ እክል ፊሪጝቀት ይና በዊል ፅበውድ ቄተ ዲቭርድ ቓለነው ጡሸኩ” ይጘኩ። አቓንስቅም ቲክልሸቍ ፍለንድ ታኽንኽንጥጘ ቸለቍ ውሸብል ቀቨሌል ዲርጅሽጝ ታኽንኽንጛጙ አጘጘዝመ ኩኑ ቅሽጝ ኲችዝ ኻየው ኻየተም ቃፅረቊ አቐነውድ የጝ ጋልፅጘውድ።
አት ዘውዱ አታላይ ጋዝጊቭለ ወረደ 01ቀቨሊዙ አርሽነይ ጣቭየይዝ ፍጥሩ ፃጀ እፍርት ሙየ ጉሬ ጝታጋቢዝ እን አምረይዝ 34ሽኽዝ 4ላዝ 26 ፍለን 13 ነቁጠ 77 ሄክታር ዝቨል ቲክልሸቍ አቐነውድ ዳቕስጝ “ነን አጢስ ፃቭሽተው ፍለንዙ እግዝኒዝመ 24 ሽኽዝ 2ላዝ 11 ችግኛን ፃድቀቁ አቐነውድ ደድስንኩኑን ” የቍ አጛንድ፣ ጝታ ጅውነድ ዚልቀትነይዝ አርወ ይውጠ ቸለውድ ፍጥሩ ፃጀድ ጡሸውዝ አሩሸነው ቸልሻንድ ጭቑ አቐነውድም የጝ ጋልፅጘውድ።
ሙየ ጉርየድ ፃየፃይሰነውዝም ጝታ ቀቨሌዙ እቀ ኽቭርድ ፍል ቲክለነውዝመ ታኽንኽነነውዙ ዲዝጝትድ ቈሻጙ ተረነውድ ጋልፅጝ ” ነን አጢስ እግዘዝ ችጝሸቍ ፍለንድ ፃይን ዚልቀናንስ 2ላዝ 33 ውሸብል ዲርጅዘነውዝ አቑ ዚስጛጙ ታኽንኽንጥጘ ፃቭናጙ ችጝሽነኩን” ይጝኩጙ።
አት አስፋው ታፈረ ወይ ኽምረ ብሄረ እቅ ጭሰጭሰን አርሽነይ ቃወነይዝ ፍጥሩ ፃጀ አርወ አሩሽንዝመ ሊሚስን ጓነ ቃወተ ጝታ ጋቢዝ ፍለን ቲክለነውዙ ሰቭድ ድርዝ አቐቍ ዘፈን፣ ኹረዝ አቐቍዝመ ገይፀዝ አቐቍ ይሽትጝ ሻቘ ሚልክዝ ቲክልሸቍ አቐነውድ ጋልፅጝ፣ ቲክልሸቍ ፍለንዙ እግዘድም 4 ነቁጠ 5 ሚሊየንዝ ንየ ፍለን፣ 2ሽኽዝ 7ላዝ 16 ሄክታር ዝቨል ቲክልሸቍ አጘጘዝመ “እንዳጊስም ነን አጢስ ለወትረ ጅልወዝ ፃቭሽተ እግዘጥዝ 3 ሚሊዮን 4 ላዝ 60 ሽኽዝ 8 ላ 25 (76•3%)አጥጘ ፍለን ፃድቀቁ አቐነውድ ደድስንኩኑን” የነውዝ ጋልፅጘኩ።
ውርም እኳን ነን አጢስ ፃድቀቁ ፍለንዙ እግዘድ ቀሰው አቕሽም ነን ፅበቁድቅ ፃይን ዚልቀናንስ እቀ ኽቭሪዙ ኽየው ታኽንኽነ በንዘኩ የቍድ አት አስፋው “ተረውድ እየ አቓንስቅ፣ ፍለንድም ኻርጥጘ ቸልጘዊዝመ እንሰስዝ ኾሽጥጘ ቸልጘውድ ነንትግርገ አቓንስቅ ሙየ ጒጢስ ኪርም እቀ ኽቭሪል አሽ አትረው ታኽንኽነ ፃቨነው በንዘኩ” የቍ አጛንድ፣ቺተዝም ቈልቍ ወረድጥድ ትኩርት ይውጝ ሰራሽጥጘ ጡሸጘድም ኻስቭዝጝኩጙ።
ጝን ግረዝመ ዋርብ ደይል ቲክልሸቍ ኹረዝ አግልግለቍዝመ ገይፀዝ አቐቁ ተክላኒዝም ቺተው ታኽንኽነ ፃቨነውዝ፤ ጅውነይዙ እቀ ኽቭርድ እፅዋተኒስ ችጝሸው ፃጀይስ አሩሸተ አነ ይና አስለ ክፍሊዙ እፃ የጝ።
ንጉሱ ማሩ
ታኽሰስ 15/2017
