ፍጥሩ ፃጀድ ታኽንኽነነው አየር ንቭርትዙ ልውጠዝመ ብጥ ሺርሽርሸነውድ እዳዘነዊስም ቢዘ አርሽነይዙ ሰቪዝ ፈን ነሰናንስ ፃየው እኩሰድ አጉረው የጝ። አውየንም አቕንትዝ ኢኮኖሚ ሊግዝሽም አቕሽ ብዝሃ ህይወት (ንቕፀ ሩሔድ) ኻይሰነውዙ ሰቭድ አትረው አቕየውዜ ሊግዝት ዊንጠ ቸላውም። አውማው እጅርድቅ ፍጥሩ ፃጀድ ታኽንኽነነውዝመ ሊምደነውዝ ጝፅብንዙ መለድ እሩዘነው ቸለኩ። ምላሰንድም ፋጥርሸው ፅብንዙ ችግሰድ ዚልቀትነይዝ እኪርጠ ቸለውድ ጊቭርትዙ እጅጝትዝ ምላሰንዝ ይና ኻግርሸንትል አጋልደው ችግሰድ ጝሚዘንድ ኻይጠ ቸለውድ አልቛዘዝቍ ፃጅድ ጡሸውዝ ታኽንኽንን ኢኮኖሚዝጎ ላውጠነው ቸልሻንድ የጝ።
ኢትዮጵየ ንቕፀው ፍጥሩ ፃጀ ፃይረይ ኻግር አርሽም፣ ፃጀድ ኢኮኖሚዝጎ ላውጠነው ጋብዝ ግነ ቢተ ፅባንስቅ ዚርፊስ በንሽተው አርወድ ችጚጝቀት ፅበች። ኻግርዝጘድ ፋጥርሸው ችግሰይስ ፈናንስ ፃይነው ፃጀድ ታኽንኽነነውዝ አርወል ግሪሰነው ቸልናንድ የጝ ይሽት አምንሽትም፣ አምረ ጨቨቅ ፍጥሩ ፃጀ ሊሚሰነውዙ ሰቭድ ዝምረዝ ሰራሽታጙ ችጝሸኩ።
ደኒስ ችጝሸው ኢኮኖሚዙ ፃጀድ ፅንኸዝመ ምርምረ ፃቨነውዝ አሩሸነው ቸልሸውዜ፣ ኢትዮጵየ አውማው ዚርፊዝቅ ሊግዝት አቭኑዝተ ቸልደይ ኻግር አቐነውድ የጝ ዚርፊዝ ፅንኸ ፃቨቍ ሙየ ጒጥድ ጋልፅጘውድ።
ዊገድ ግነ ፍጥርት ጋፅ ዀው ጚ፣ ጡሸውዝ ታኽንኽነው እጅርድ ዊቱ የጝ።ፍጥርዙ ፃጀድ ቃፅልጠ ማጥን፣ ፍጥሩ ፃጀይስ አርውሽረው ኮሪስ አርውሽረዊስ ሊጘ ናንዝ ባልፀውዝ ዊስ ቲክየነው ቸልሽሽ የጝ ዚልቀትነይዝ ፍጥር አርወ ነይተ ቸልደውድ ።
ቺተዝም ቈሽ ወይ ኽምረታት ተከቍ አውማው ጝታ ፅብንድቅ እንሰስ ፍርዘነውዝመ ጒዘነዊል ሲርየ ፃቨቍ ጅውንጥድ ፍጥርት አጉረው ደረጀዝ ታኽንኽነነው ቸሊጘውዜ ጝታ ድዘርድ ጝታቕም ፋጥርጙ የነት የጝ። እኔን ችጝሰይስ ፈናንስ ፍጥሩ ፃጀ ሊሚሰነውዙ ሰቭድ አምረ ጨቨቅ ጥር ግቨሪስ ኪርም ለካቲት ግቨሪል አሽ ዝምረዝ ሰራሽታጙ ተርም፣ ቺዘው ፈን ቓሊሰቍ ወረድጥድ ግነ ዊትቍ ጛይ። እንዳይ ቺዘው ፋፅምፅመ ፃየቍዝመ ቀሰው ልውጠ ቓሊሰቍ ይሽተቍ ወረጢስ ቈሽ ጋዝጊቭለ ወረደድ ላውድ የጝ።
ወረደድ ፍጥሩ ፃጀ ኻይን ሰቭድ አትርዝን ሰራሸነውዝ ጅውነይዙ እፍርትድ ዋጥርጠ ፃቨነውዝ ልውጠ ቓሊሳጙ አቐነዊዝ እቀ ኽቭርድ ነንቱ ሰቲዝ ፍጥሩ ፃጀ ታኽንኽንን ሰቭድ ይው የጝ የው አክንዋጙ አቐነውድ የጝ ዊግትጘውድ።
አት ቸኮለ ረታ ጋዝጊብለ ወረደ 02 ቀቨሌዙ ፅበተ ነይጘው ቓለይዝ ” ቅብረጥድ ጡሸውዝ እፍርዘነውዝመ ኻየነው አርወድ ፈራቐው አቐነውድ ልብትንኩኑን” የቍ አጛንድ
ቅብረጥድ እንዝ በውግ ሰራሽተው ሰቪዝ ይውጘቍ አርውጢስ ሚንወዙ ሰቭዝ አቐቍ ዋርብድ ጣዝጝ ኩጙ፣ እኔንትም ቲክን ደንዝመ ፍረምረንዝ ቲክለነውዝ አሩሸተ አቐነው ቸልሽኩ፣ ለል ለልዘነውዝ፣ እንሰስ ጥቅሰነውዝመ ደኒስ ችጝሸው አውማው አርወይስቅ አሩሸተ አቐነው ቸለቍ አቐነውድ የጝ ዊግትጘውድ።
አት ቸኮለ ፃየፃይሰነውዝም “ፍጥሩ ፃጀ እፍርዘነውዙ ሰቭድ ሰራሽጥን ይሽትን ሰራሽነው አቒጝቀት፣ አርወድ ልብትን ይናቕምቱ በንዝ ሰራሽነው አጠ የጝ ጡሸውድ ” የቍ አጛንድ እን አምረይዝም ሰቭድ እውነ ግልወድቅ ፍ ሰራሻጙ አቐጘዝመ፣ ሰራሸነዊስም ከስጘዝ እንሰስዝም አነ ላጥ ፍጥሩ ፃጀድ ቘይዘቍ ገባኒዝ ሸርሻየጘድ (ሳቕርሻየጘድ) ጡሸውዝ ሊሚደቍ አቐነውድ የጝ ጋልፅጘውድ።
ላየ ቓለ ነየተድ አት ካሳው በለጠ ይሽተቍ 02 ቀቨሌዙ ፅበተ አጛንድ ” ማጥማጥደው ዝቨ ይናቑሪዝ ዊርሳይንም የው ቃወ ቃልዝ ሰቭድ ዝምረዝ ኪርምንኩኑን” የቍ አጛንድ እን ሰቭድ አርወውድ ጝታቕመስ አቐነውድ ልብትጝ፣ጝታሉ ቺዝጚል ፃቭጘው ታኽንኽነይዝጘድቅ ጝታ ላብጠቱ ዝቨይልም ፍጥሩ ፃጀድ ጂዚት አቢታየጘዝመ ቘይሸው ዝቨድ ቓድጠ ማጥን ትኩርትዝ ሰራሽጛጙ አቐነውድ የጝ ዊግትጘውድ።
አት ሐፍቱ እሸቴ ጋዝጊብለ ወረደ አርሽነይ ፅፈሽ ጝንዙ ዲቈተ ጝታ ጋቢዝ ፍጥሩ ፃጀ እፍርዘነውዝመ ታኽንኽነነውዙ ሰቭድ ጝታ ወረደይዝጘድ አምረይስ አምረ ዲዝጝሻጙ ተር፣ ነንቱ ሰቲዝ ማጥማጥድጝ ዊነቍ ስፍልድ አልቘዘዝ ሺፍንሽጝ፣ ኢዝጝ ዊነቍ ዋርብድም አቑ ጣዝጝ፣ እቀ ኽቭሪዝ አግልግለ ይወነው ኪርምጛንስቅ እቀ ኽቭርድ ፍጥሩ ፃጀ እፍርዘነውዙ ሰቭድ እምጥጘዝ ሰራሻጙ ችጝሸጘድ ጋልፅጝ “እን አምረይዝም 43 ቅብረጥል፣ 41 ሽኽ ሄክታር ዝቨ 21 ቀበሊጥል ሰራሸናንስ ኻለይ ፃይሽት እንቅት ሰቭል ድወነው ቸልንኩኑን ” የቍ አጛንድ ሰቭድም ለካቲት 15/2017 ዓ.ስ አሰናንስ የጝ ኻሊሽት ሰራሽታጙ ፅበውድ ይጘኩ።
”ላውላው ምላሰንጥዝ ለካቲት 15 ግርየይል አሽ አስየቍ ቀቨሊጥ ፅብጝሽ፣ እንዝጘም ጥቅለ እግዝግዘ ፃቭሽታንድ ዊርተዙ ችግሰል ችጝሸቍ ሰባን ፅብጝሽ ለካቲት 21/2017 ዓ.ስ አሽ ሰራሽነቅ አነኩን” የቍ ዲቈተድ፣ ፍጥሩ ፃጀ እፍርዘነውዙ ሰቭድ ዝምረዝ ቅብረጥል ሰራሽተው ሰቭድ የጝ አስነውድ እጚ፣ ጛሉ ቺዝጝድ እፍርዘነውዝመ ሰራሽተውድ ታኽንኽነነው ላው ኮርዝ ሰራሽት ችብረው አየው አቓንስቅ አምረድቅ ጝታይም ቲክንክንጛጙ ጒዝ ጨተድም ጝትኩርትድ ፍጥርት ኻየነውድ ፃቭ ዚልቀትነይዝ አሩሸተ አቐናንስ ሰራሸቍ አቐነውድ የጝ ጋልፅጘውድ።
ፋጥርሸው ኽርድም አነ፣ ቺተቺተቊ ምላሰንጥዝ አጋልደቍ ፍጥርቍ ኻደግጥድ ማኽተነው ቸልሸውድ ጝርቕም ፍጥርት ታኽንኽነነውዝ የጝ። ዲቍስነው አምረይዝ ፋጥርሸው ዝቨዙ ኻዲንዝመ ቀቨቀቭሽትንድ ፋጥርሸውድ፣ ፍጥርት ጡሸውዝ ታኽንኽናቅ የነዊዝ አቐነውድ አምንሽ ጨው እማን የጝ። አቓንስቅም ይና ጅውነድ ታኽንኽነነውዝ፣ ፍጥሩ ፃጀ እፍርዘነውዙ ሰቭድም ተክዘናንስ አቒጝቀት እማንዝ ሰራሸነውዝ ይና ችግሰድ ይናቕም እክስነ ይና አስለ ክፍሊዙ እፃ የጝ።
ንጉሱ ማሩ
ለካቲት 15/2017
