እልዙ ሰወ ገርድን

እልዙ ሰወ ገርድን ንቕፀቊ ኢትዮጲቍስ ቓለነውዙ ችግሰ ጎን አቐጘ ትኽነ ሚኒስቴር ፊሰው ሚዝረድ ቓሊሰኲ። ቓለነውዙ ችግሰ ፃየቊ 1 ነቁጠ 5 ሚሊዮን ዜገን አቒስ 6 ሽኽ አቐቊድ ጝታ እሊዙ ቲነድ ብጘውድ እልዙ ሰወ ገርድንዝ የጝ።

እልዙ ሰወ ገርድን (የአይን ሞራ ግርዶሽ) አዊንም እድምዙ ክልሊል እትለው አቕሽም፤ ንቕፀውዝ ጝታ እድምድ ትክቨነዊጅቅ ፃየፃይሽት ተረው ችግሰ የጝ። እንቅም እጅር የነው ቸልሸው አቕንትዝ ቓለድ ዊሰው ኽክምነዙ ፃጘዝ እልዙ ሰወ ገርድን (የዓይን ሞራ ግርዶሽ) ቀድን ኻክመነውዝ ቓድጠ ቸለው የጝ።

ንጭቱ ይነ ዲቭየይዝ ወይ ኽምረ ብሔረ እቅ ጭሰጭሰን ተፈራ ሀኃይሉ ሚጉርሰነ ሆስፒታሊል እልዙ ቀድን ኽክምነዙ ኦፊሰር አቐቍ አት ኃ/ስላሴ ዘሪሁንጅቅ እልዙ ሰወ ገርድን ወረጘ አቐጘዝመ ኽክምነይዝ ጅሉዘ ስልክዝ ፃቭነው  ዊንተድ አንቭቭስነ ቀኑን።

ኽምጠ ዊከ፦ ክጊዝድ ፊቅድር ኽምጠ ዊከቱ አቭን አቐነዊዝ ሚዜንዘኩን።

አት ኃ/ስላሴ፦ ያንም ይፃቀው ሙየይዙ ግዴተድ ፍጨጘድ ፃቭርናንስቅ ሚዜንዘኩን።

ኽምጠ ዊከ፦እልዙ ሰወ ገርድን ወረጘ የጝ?

አት ኃ/ስላሴ፦ እልዙ ሰወ ገርድን እልዙ መነፅር ድምነ የጝ። እኒን እልዙ ድምነ ቲነዙ ፃርኸ ሌንስ አቒዝጎ ጥዋየጘ ዝመ ሬቲናይል ትኩርት ፃቫየጘ ጊግቨኲ። ሬቲና ቲነዙ ትኩርት ዊትረው እልዙ ሺፍነተ አቓንድ እሊዝ እግርገ ችጝሸኲ። እን ችግሰድ እትለውድ እልዙ መነፅር አቒል ላውላው ፕሮቲነን ጝታ ቅርፅድ ላውጠነውዝመ ሚርየድ (ርዕይ) ቀስጛንድ የጝ።

ንቕፀው ኰርዝ እልዙ ሰወ ገርድን እትለውድ ሲገረ ጥይሰነውዝ፣ ስኳርዙ ፅውዘ፣ ስቴሮይድ ዝመ ላጥ ጥልቕ ንቕፀውዝ አሩሸነው፣ አልትራቫዮሌት ፃሪየ፣ ልኻን፣ ፃሪየዙ ኽክምነ፣ እሊዙ ክፍሊል ቘጨ ችጛንድ ዊንም ጊንትዝ የጝ። እል አቒል ፅበቁ ፋይበርዝመ ፕሮቲነንድ ጊግቭሸነው ኪርምጘኲ፤ እንዝም ምላሰን ቓለድ ጭገግ ዊንም ድምነ አቐኲ።

እልዙ ሰወ ገርድን ቃውሰቍ ተገኒዝ ችግሰ አቓቅ ይጠ ቸለኲ። ድምንድነይ ሌንሲዙ ክፍልድ ጭቑ ቘይዝጠ ቸለኲ፤ አቓንስቅም ቓለናንስ ቺግርዘኲ። ዊተ ብርኸ ሬቲና አቒል  ጥዋንድ ቓለናንስ ችግሰኲ። እልዙ ቓለድም ጭገግዝመ ብዥተ ፋጥረኲ። እልዙ ሰወ ገርድን ላው እሊዝ ላዊዝጎ ከረከራውም፤አነጚ ንቕፀቁድ ሊጘ እልጣንድቅ እልዙ ሰወዝ ፃይሽጘኲ።

ኽምጠ ዊከ፦እልዙ ሰወ ገርድንዙ አይንተን እኩጙመ?

አት ኃ/ስላሴ፦ ቺተቺተቊ እልዙ ሰወ ገርድን አይንተን እኩጙ። ጛይም፦ ኢንቱሜሰንት ካታራክት፣ ኮርቲካል ካታራክት፣ እግርገቱ እጥን ካታራክት፣ ኑክሌርዙ ካታራክት፣ ሮዝቴ ካታራክት ዝመ ሲቅዘው እልዙ ሰወ ገርድን ይሽትጘኲ።

ኽምጠ ዊከ፦ ፅውዘይዙ ቺተ ምልክተንድ ውርውር ጛይ?

ኃ/ስላሴ፦ ኩነት ቓለነ በነው፣ ብዥተዙ ቓለ፣ብርኸዙ ወይሰ ቈሸነው፣ቀለም ድዘጘ ቓለነው፣ ሊጘ ፃቭን ቓሊሰነው፣ እልዙ መነፅርዝ ዊንም ዲምቅሸነ ሌንሰን ቓለነውዙ ችግሰዝመ ተከተከቁድ ጛይ።

ኽምጠ ዊከ፦ እልዙ ሰወ ገርድንዝመ ላጥ እልዙ ችግሰንጥድ ማኽተናንስ እቀ ኽቭሪዝ ወረጘ ኻይሽታን?

ኃ/ስላሴ፦ አውም እጅር ጝ እልጣንድ አምረዝ ሊጙን ምርመረ ፃቨነውዝ ደድስጠ ጡሸኲ። እንም አቕ እሊል ቺተው ልውጠ ዊንም ቕጅወ ወይሰውዜ የነትም ንየይል ጋልፅሽተቁ ምልክተኒዝመ እልዙ ቕጅወዝመ አውር ሲረሲረ አጋልዛን ቃዚን ጣቂል ችጝሸው ትኽነ ጣቭየይል ማኽርዘነው ተሚሰኲ።

ኽምጠ ዊከ፦ ኽይጠጘዝ አዊን እድሚል አሽ  ፅበቁድ ጠቃዘኲ?

ኃ/ስላሴ፦60 እምትዝ ንየ አቐቊ እቅ እልዙ ሰወ ገርድንዝ አጋልሽተነው አገነድ ንየስ የው የጝ። ዚረዝም ተርጠ ቸለኲ።

ኽምጠ ዊከ፦ እልዙ ሰወ ገርድን ችግሰንጥድ ውር ውር ጛይ?

ኃ/ስላሴ፦ ላው ላው እልዙ ሰወ ገርድን ችግሰንጥድ እልዙትክቨ ቈሸነው፣ይዝትዝመ እቁሰነው፣አለርጂየን፣ኮርኒያዙ አቕርንዝመ ተከተከቁ ችግሰንጥዝ አጋልዝጠ ቸለኲ።

ኽምጠ ዊከ፦ እልዙ ፅውዘዝ አጋልሽታየጘ ቃውሰ ጥንቅቀድ ወረጘ የጝ?

ኃይለ ስላሴ፦ መደቨኘ  እልዙ ምርመረ፣ ጥይሰነው ችብሰነው፣ ላጥ ትኽነዝቁ ችግሰንጥድ እግዝግዘነው፣ አትክልትዝመ ፍረምረዝ ፃጅተው ማፅንፅንሸው ኹረ ዀነው፣ ኰረዙ መንፅር አሩሸነው፣ አልኮል ዝየነዊስ ቋጥቭሸነው፣ ዊትርቅ ጋፅድ ዊርየው አቑዝ ዊንም ኬሚካል ንቕፅየው ሳሙነዝ እቓረነው ተሚሰኲ።

ኽምጠ ዊከ፡- ኽክምነድ አወየው አቕንትዝ የጝ አክኑሸውድ?

ኃ/ስላሴ፦ እልዙ ሰወ ገርድን ጥላዝ ዊንም ጠብተዝ ኻክምሽጠ ቸላውም። ጝሉ ኽክምነድም እሩደው ቀድን ኻክመነውዝ ጭቑ የጝ። phacoemulsification አልትራሳውንድዙ ሞገደንድ አሩሸነውዝ ሌንስድ ኪለናንስመ ቀቨቀቭሽተቁድ ድሰናንስ ከቨው ቀድን ኽክምነዙ መለ የጝ።

ድምነዙ  ሌንስዙ ክፍልድ ካፕሱላርዝ ቢዘ ቀድን ኽክምነ ኰሪዝ  ኮርኒው አቒል ፅበው ኽየው ባጠዝ ድዘኲ። ቀድን ኽክምነይዝ እግርገ ፍጥሩ ሌንስድ ቲክየው እጅር ሰራሸው እልዙ መንፅር ሌንስ ቲኪየነው ስረት የጝ።

ኽምጠ ዊከ፦ እልዙ ሰወ ገርድን ኽክምነ ቓደነውዙ አገነድ ውር ቑጠ የጝ?

ኃ/ስላሴ፦እልዙ ሰወ ገርድን ቀድን ኽክምነ እቀጘ አምንሰውዝመ አጉረውዝ እሩደው የጝ፤ አነጚ ኢንፌክሽን፣ ብር ቅብረነው፣ ሬቲና ሊቀነውዝመ ላጥ ኻደገን አጋልዝጛን እኳን ቓዳቅ የነውዙ አገነድ 1%ዝ ሳ የጝ። እንዝም ሲርየ ኽክምነድ ፊሰቁ እቅድ ላው ግርየዝ ኽክምነድ አስጝ ጝታጝን ፊረነው ቸልጘኲ።

ኽምጠ ዊከ፦ ቀድን ኽክምነዝ እግርገ ፅውዘድ ሊጘት እትልጠ ቸለኩመ?

ኃ/ስላሴ፦ እልዙ ሰወ ገርድን ቀድን ኽክምነ ፃቭሽተት እግርገ ሊጘት ዋጥርጠ ቸላውም፤አነጚ ላው ላው እቅድ እግርገቱ ካፕሱላር ኦፓሲፊሽን (ፒሲኦ)ይሽተው ፅውዘ እትልጠ ቸለኩ። እኒንም ተከተከው ሌዘርዙ ፃጘዝ ቀለውዝ ኻክምሽጠ ቸለኲ።

ኽምጠ ዊከ፦ እልዙ ሰወ ገርድን ቀድን ኽክምነይል ውር አይንት ሌንሰን አርወል ግሪጘኲ?

ኃ/ስላሴ፦ ሞኖፎካል፣ መልቲ ፎካል ዝመ ቶሪክ ኢንትሮኩላር ሌንሰን (IOLs) እልዙ ሰወ ገርድን ቀድን ኽክምነ ኰሪዝ አርወል ግርየቊድ ጛይ።

ኽምጠ ዊከ፦ ነንትል አሽ ክታ ሆስፒታሊል እልዙ ኽክምነ ፊሰቊስ ውርቑጥጘድ እሩደው ኽክምነ ችጝጝኩጙ?

ኃ/ስላሴ፦85 ላይስ ንየ ጝታ ቓለድ ዋጥርጝኩጙ።

ኽምጠ ዊከ፦ ነይረው ሚዝረይዝ እቀጘ ሚዜንዘኩን።

ኃ/ስላሴ፦ያንም አቭኑስርኑዝ ሚዜንዘኩን

ኪሮስ ወ/ተንሳይ

ለካቲት 15/2017