38ትረ አፍሪከት አቭርት ቃወጥዙ ጉባኤል ችጝሸቊ አብንድ ኢትዮጵየትል ፅይጝ ዊንጘው ዊንተድ ኻትጝ ተርጘው ኻግሪዝጎ ዋጥርጝኩጙ፡፡ አብን ለምርን አቭንውዘናንስ ኲርዘው ሲጘ፣ እሴትዝመ ባኽል ፅይረየን ኢትዮጵየ እቻቐው ጝር አቅሚዝ እንቅ አቅቨ እፍርትዙ ጒደነዝ ፃጝራንስ ዲግ ተሚሰኵ፡፡ አፍሪከት ኮሚሽን ሊቀ መንበር አጛንስ እን ሚቈይዝ ማርፅሽተቊድ ጅቡቲዙ ቢዘ ኻለይ ሚኒስትር ማህሙድ ዓሊ የሱፍ “አፍሪከት ዓልም አቅቨ ደረጀዝ ጥውሸው ስፍረድ ችጚሰናንስ ሰራሽነኩን” ይጝኩጙ፡፡
አፍሪከት አቭርት ሲርሽንዝ አውማው አፍሪከት ኻግረኒስ ንዬዝ ፅይር ዊንደው እኩሰድ፣ ኢትዮጵየም ዓልም አቅቨ ደረጀዝ ፅይተ ጥውሸው ስፍረድ ኪፍ የው አጠ ጥውሸው አቓንስ ዲግ ሲፍንዘነው ግድን አጠ ጥውሸኩ፡፡ አፍሪከት አቭርት ሚቈይዝ ዊግሽን ፃቨቊድ በርባዶስትወ ጥቅለተ ሚኒስትር ሚያ አሞር ሞትሌይ፣ ዓድዋቱ ድሊስን ሚንፍስድ ሲርጝ አዲስ አበበትል ጝታ ችጝሸነውድ ሲትፍሸጢል ዊነው ወይሰድ ሚርሸው አየውም፡፡ ኢትዮጵየቱ ሽሹድንዝ ኮሌኒያሊስተንዙ ለው ቅምኒስ ናፀ ፊሰው አድዋቱ ድሊስንድ “ዊርጠ ተረው ጣልያንቱ ቅመተይል ፊሰው ተግረድ እቻቐቊ ጝጭል ኽዝቨኒል ወኒ ከምሰው ዊነነውድ ጋልፅጝኩጙ፡፡ አፍሪከት ላው ፃቨነውዙ ተሚሰነይድም ቃልጥፍን ጥወነው ተሚሰው አቐነውድ ኻስቭዝጝኩጙ፡፡
ኢትዮጵየ አፍሪከት አቭርድንዙ እማን አቕንዝ ኪፍልደው መስዋትነይድ ኪብርሽ ዚልቀውድ አቭርድንዙ አይነተ ሰራሸነ ጝንድ ጝግርማ ሞገሲጅቅ ማኽል አዲስ አቨቨትል ችብረነውድ ጭቑ አየውም፡፡ ንጭቱ 52 እምተኒስ በውግ ይና አቅልድ ዊንዝጘው አፍሪከዙ አቭርት ዚምኒዝቊ ቃወጥድ ዲዝጝሸው ኻስቭንዙ እትለይስ ፍጝ በዊዝጎ ተግርስጛንድ ጭቑ የጝ፡፡
ኢትዮጵየ ኹለንዙ ለምርምረ አቒዝ ዲቊር እን ኹሪዙ ናኒል ጥውረይ ኻግር ጚ፡፡ እኒን ኹርድ ዲቈቊ ኹለኒስ ችጝሸው ኲርዘው ቲግቭርድ አትርዝን ቃጽልሰነው ሲጙ ጝዲቊትነይ የጝ፡፡ አፍሪከት ላው ፃመዙ ስሪል አኽቭረይ ኻግር ብሔርዝ፣ እምንትዝመ ቺተቺተቊ ምላሰንጥዝ አድልድልሽጝ ላው ገጫሽኒስ ላዬ ገጫሽኒዝጎ ጥወነውዙ አምልድ ችብርጠ ጥውሸኩ፡፡ ኢትዮጲቊድ ለወንትዝ ችብርጝ አፍሪክቊዝ ቲርፈው ኲርዘው ቲግቭር ሰራሽጛንድ ጚ ጛስ ጛይ ጎርትጛንድ አየውም፡፡ አፍሪከቱ ዲግዝመ ፃውተዙ ኻለይድ እኒዝጘም ዓልም አቅቨ ደረጀዝ ወይሽተተ አረዊዝ ጅልውዘ ፈራቐው አቭላይተ ፃቭሽት ውሳኒ ዲቊሽታንድ ኢትዮጵየቱ ኻለይድም እን አቒዝ ጥቅልሸው አቐኩ፡፡ ዲግ እጀው ኻግር ጝ ፅብንድ አምንሰተ አየውምነ ቸልሸው ምፅነይዝቅ እቻቐው ኻግሪዝ እርጋቕን ዊናንስ ቸልሰቊ ኻለየንል ልቕረ ፃቨነው ተሚሰኵ፡፡ ኻግሬቱ ጅልውዘይዝ ፅበው ገውትንዝ ጭንቅትድ እፍሪትዝጎ ላውጠነው ተሚሰኩ፡፡ ዚልቅትነይዝ ድኽቲስ ፈነው እን ኹሊዙ አይነተ ቲግቭር አጠ ጥውሸኩ፡፡ አድዋቱ ድሊስንድ ኻስቭሸዊዝ ቑጠ ኲርዘው አጠ ቸለውድ ላጥ ሰበኒዝም ደግመነው ቸልናንድ የጝ፡፡
ወንድሙ ቸኮለ
ለካቲት 15/2017
