አሜሪካቱ ፕሬዝዳንት ዶናልድ ትራምፕ ስመ ዩክሬንቱ ጝታ መቸድ ቮሎድሚር ዘለንስኪ ፃቭጘውዝመ ቲስመምን እጀው አሽተው ምኽር ኽረድ ጀርመንስመ አውሮፓት አቭርድን አቫል ኻግራንድ ዩክሬንት ጋቢል ችብረነውድ ቓሊስጛጙ የጝ። “ዩክሬን ጀርመን ስመ አውሮፓት ኻግራኒዝ እምንት ጭስተ ጡሸኩ፤ ዩክሬንት ዜጋኒዝ ንየ ዲግ በነው እጀውም” የነውዝ ጀርመንቱ ቻንስለር ኦላፍ ሾልስ ዊግትጝኩጙ። አውሮፓቱ አቭርድን ኮሚሽን ፕሬዝዳንት ኡርሱላ ቮን ዴር ሌዬን እንዝጘም ቲክነተ ፕሬዝዳንት ካጃ ካላስ ዩክሬንስ ጝታ ከቨድ ጋልፀነውዝ “ይን አውሮፕቍድ ተረው ፈተነድ ላውንትዝ አቕን ዲቍነ ጡሸኩ” የነውዝም ዊግትጝኩጙ:: ቤልጄምቱ፣ ኔዘርላንድ፣ ስዊድን፣ አየርላንድ፣ ሉቲንያ፣ እንዝጘም ላትቪያቱ ቢዘ ኻለይ ሚኒስቴራንድ ዩክሬንት ጋቢል ችብረቍ አጘጘዝመ ዩክሬን ሹሹድረውድ ጥቅለ አውሮፕቍዝ የጝ የነውዝም ጋልፅጝኩጙ። ሻቘ እምት ፊሰው ሩስያስመ ዩክሬንቱ ጣይተኒዝ አይነተ ዩክሬንቱ ከቨተ ዊንደይሸን አሜሪካ፣ ዶናልድ ትራምፕ ስልጣንዝጎ ተረነውድ ቲክን ጝር ኻሰቭድ ላውጠነውድ አውሮፓት ኻግራንድ አንክርስኩ። ቺተዝም ቈሽ ዶናልድ ትራምፕ፣ ዩክሬንቱ ፕሬዝዳንትድ ቮሎድሚር ዘለንስኪት “ዲግዝ አስልሽራንድ ዋጥርድር ለው” የነውዝ ዊግተነውድ አውሮፓት ኻግራንድ ፕሬዘዳንቲዙ ዊግሽንድ ቃውምሽጝኩጙ::
ንጉሱ ማሩ
ለካቲት 30/2017
