2016 ም.አሜት ችኹ ባኩ ፍካዱ አግልገሎትስ 45 ሚሊዮን እምፕልታቖ ቴኬምስታንታ ፄውጝስ እንፃኽስታማጊ አኽጝ ጌለፅስትኾ::
ይቶፒያ ሌጌስቱት አጌራ ታኻታስታ ውላጊ እምፕልታቕ ባኩ ፋዩ አግልግሎቱ እንፅኺዳ አሴሜርጜካማ አጌሮ ቴኬማንታስታ አጌላጌላንታ ትክትሊ ትክላይ ሚንስትር ተመስገን ትሩነህ እቑዌ ዲግስካ::
ንጙዊኒ ባኩ ፋዩ አግልግሎትስ 45 ሚሊዮንዴስ ጃላ እምፕልታቖ ቴኬምስታንትካ ፄውጝስ እንፃኽስትካማጊ አኽጝ ጌሌፅስታ:: 2016 ም.አሜት ችኹ አርፊው ባኩ ፋዩ አግልግሎቱ ሜርሃ ግብር አጌር አቡቑ አችስ ጄሜርስታ:: 2016 ም.አሜትዳ አጌር አቡቑ ችኹ አርፊው ባኩ አግልግሎቱ ልቕልቕቲው ሜንድሬኽዳ ባኩስታ እምፕልታ እንፃኽስትጝ ይቶፒያው ኬፍቲስ ናው ጉሳንቲ እንፅኼንትስ ሰላሙ፣ ክንቲው፣ ስራስሪውስታ ማይቤራዊ ጉዳይካው ሚኒስቴር ሜስሪ ጝንካ ቴርሳኑ ችኹ አርፊው ባኩ ፍዩ አግልግሎቲው ልቕልቕቲው ሜንድሬኽዳ ኢፊድሪ ትክትሊ ትክላይ ሚንስትር ተመስገን ትሩነህ አግስቴካ::
ባኩ ፋዩ አግልግሎቲ ይጋሬ እሴቶ ይስጝፅናውያኽ ኑንኩ ትክትሊ ትክላይ ሚንስትር ባኩ ፋዩሳ አግልግሎቴ ባይለ ፄውጝስስታ ትክሞ እርዳትስትጝስ ካሊፃው ረኪክ አውጆ ምንግስትስ ቴርስⶓ ጌሌፅካ::
ባኩ ፋዮ አግልግሎቲ ቻስ ፄውስታው ኢንቨስትመንቲያኽ ኑንኩ ትክትሊ ትክላይ ሚኒስትር አጌሮ ማሊጝስ ቴኬማው ዳድ አኽⶓኪላ ጌሌፅካ:: እንቲታኪ ህብር ብሄራዊ እምፕልቶ ይስጝፅናው እንፅኺ አኽⶓኪላ ዙማካ::
ትክትሊ ትክላይ ሚንስትር ተመስገን ትሩነህ ይቶፒያ ኬፍኒትስታ ሌጌስቱት አጌራ ታኻታ ካንትጝስ እንጉስታውስታ ፋይ ዝኩኽ አቒ ፋዮ ባያማ ባኩ ፋዮ አግልግሎትዳ አሴቴፍጝጝ ቱስታው አኽⶓ ጌለፅካ:: ባኩ ፋዩ አግልግሎቲ አጌራው ትክላሊ አብትስ እያውሳ ይኮኖሚያዊስታ ማይቤራዊ ትክሞ ቱስቲስ ሊኪጝስስታ ቴግባርዳ እሽፅጝስ አግልግሎት ጉስስታውሳ እጎ ቴርስጝ ፋይፃው አኽጝስ ምንግስት ብሄራዊ ባኩ ፋዩ አግልግሎቲስ ረኪክ ፖሊሴ ቴርስⶓኪላ ጌለፅካ::
ኹንስታ ስራስሪው ማይቤራዊ ጉዳይካው ሚንስትር ዶክተር ኤርጐጌ ተስፋዬ ማይቤራዊስታ ይኮኖሚያዊ ዜርፍካዳ ታምቦጊ ፊትጛማጊ አግስታው ባኩ ፋዩ አግልግሎቲ ውላዋ አቡቓው ስታ ዋይሚስታ ፄዋው አኽⶓ ጌሌፅካ:: ዝኩኽሳ አቒውሳስታ አክኺውሳ አክሞ ቴኬምስታማ ፃምርፅጝስ አብቶ ቤኬንጝ ዝኩዋቲታስታ እንፅኺው ካቢትጚ ዝኩዋቲታ ችኹ አርፊዳ ባኩ ፋዮ አግልግሎቱሳ እንፅኼ ዋይሚስታ ያኹኽ ዳድስ ካስጝፅጝስስታ ቴቤቤርጝፅስ ቤዴራማ አቕስቱኹሳ ባኩ ፋዩሳ አግልግሎቴ ሲፋማ እንፅኼ ዋይሚስታ ፄውጝስ አጌር አቡቑ አችስ ኾትካ አቺትጜካማ ይንትጝ እሊኩስ ወተትካዋስታ ኹኖአችትጝፃማ እሊውሳ እክዶ ፍሽጝስ ሳኪትጙኽሳ እንፅኼ እንፃኽስትጝስ ቴኬማው አኽⶓኪላ ኹንስታ ስራስሪው ማይቤራዊ ጉዳይካው ሚንስትር ዙሜካ::
ባኩ ፋዩ አግልግሎት ኹሉ ቺፋሱ እንፅኺ አኽጝስ ቼሜትጙኽሳስታ ዊዳፊ ሰላሞ ዝኩፃ አጌራዋ ፌቴርጝስ አግልግሎቴ ቴኬምስትጝ ቱስታው አኽⶓ ሰላሙ ሚንስትር ብናልፍ አንዱአለም ጌሌፅካ:: ውላውጊ አይት ኬቤርስቱት ያኻማ ውላዋጊ እምፕላ ፄዋው ይፒያዊ አኽጝያኽ ኑንኩ ሰላሙ ሚኒስትር አርቤንቶስታ ጄግንቶ ጊምቢናውስታ እምፕልቶ ይስጝፅናው አኽጝ ቱስታው አኽⶓ ጌሌፅካ:: ሰላም ውላውጊ ዲቡ ሰር አኽⶓ ጉሹንኩ ሰላሙ ሚንስትር ችኹ ወክትዳ ካስጝፁኑሳ ባኩ ፋዩሳ አግልግሎቴ ሳኪትጙኽ ዳድስ አኮሜችጝስ ባኩ እምፕልታቕ ክቻዳ እሳንጛታ ፄውኹ አኽⶓ ጌሌፅካ::
ክንቲው ሚንስትር ፕሮፌሰር ብርሃኑ ነጋ ንጙዊኒ ችኹ አረፊዳ 20 ሻይ ያኻንኩ ዩኒቨርስቲኩ ክንታንትካ ባኩ ፋዩ ቴግባርዳ አሴማርጛንኩ አኽⶓ ጌሌፅካ:: ባኩ ፋዩ አግልግሎት አጌር አቕቱ ግዴቲ አኽⶓኪላ ዙሜካ:: ባኩ ፋዩ አግልግሎት ጌርክ ቺፋ እንፃኽስታኑ እንፅኺ ያኻውላስ ማዲቢኒ ያኹኽ ሳትስ እንፃኽስትጝስ አሜቻውሳ ጊዞ ቴርስጝ ፋይፄኪላ ንካ:: 2016 ም.አሜቱ ችኹ ወክትዳ ባኩ ፋዩ አግልግሎትዳ 34 ሚሊዮንዴስ ጃላ ያኻንኩ እምፕልታቕ 14 ዜርፍስ አሴሜርጜካማ ባኩ ፋዩሳ አግልግሎቴ እንፃኽስታንኩ አኽⶓ ጌሌፅካ:: እንጚ አግልግሎትዳኪላ 26 ሚሊዮንስ ጌማትስታውሳ አግልግሎቴ እይጝስ አኬድስትጝኪላ ጌሌፅስታ::
ዘውዴ በካሉ