“ዝቤናዌ ዝኩዊኔ ዝኩኔይ ኻሲ?” አሬሳቻንትካ

ንግስቴ ተስፋ
ጌፄሩ ኮሪደር ልማት አሬሳቻንትካው ዝኩዊኒውሳ ሴሎ ዝቤናዋ ፄውጝስ አሬሳቻንትካው ይኮኖሚ ሌጌሳታ ኬፍቲኒ ፍሺ ዝኩኽያኽ እስትኾ፡፡
ጌፄሩ ኮሪደር ልማት ጌፄሩሳ ሙሬ ዋኽትጙኽ ስሩ ልማትሊ ታምትጝፅጝስ ልማቶ እሳንጝፁጙ ሴሊያኽ፡፡ እን ልማቱ ሴልኪላ ዳዶ ኤሌክትሪክ አይሎ ፅንኩት ዝቒው አኹውሳ ዲግስጜ ክንቲ ጝናሳስታ ቲኑ ኾትካውሳ ታምብስታንቶ ክችክቺስ ግቢታማ ታምብስታንታ ፄውጝስ ጌፄሩ እምፕልታቕ ኬሽኹሳ ዝኩዊኔ ዝኩዋንታ ፄውጙሳ አላሜ እሜ፡፡ ኮሪደር ልማት እምፕልታቑ ውላቱዊ ልግስሊኪላ እምትጙኽያኽ፡፡
ይቶፕያዳ ሚንች ቼፍ ዝኩኽ እዝብ ዝኩዊኔ ፄውኽ ጌፄርዳ አኽጝሊ እምትጛማ አጌር አቑሳ ዝኩዊኒውሳ ሴሎ ኬሽጝፅጝስስታ አጌራውሳ ልግሶ ቼሜትጝፅጝስ ኬቴምዳ ግቢስታውሻው ኮሪደር ልማት ዳላቲው አኽጝስ ኬቴምካዳ ካንትስትኹሳ ይስጝፃውሳ ኪሴ ጌፄርዳኪላ ቴግባርዳ እሽፅጝ ፋይፃንቲ ያኻ፡፡
እንሳ ንቫሮ ቴርስንኹሳ ጊዞ ኺስታ ይቶፒያዳ አግስታንኩ 68 ኬቴምካዳ ኮሪደር ልማት ቴግባርዳ እሼማጊያኽ፡፡ አኽጝስኪላ ኮሪደር ልማት ኬቴምካዳ ይቪቺዳ ያኻውላ ጌፄሩ ዙራሙሪዳኪላ 2017 ጉንቤት አርፊው አሊዲሾዳ ጌፄሩ ኮሪደር ልማቱ አካላ ያኹኽሳ ሞዴሎ ሙሬ ፌቴርጙሳ ቴግባሮ ትክላይ ሚኒስትር አቢይ አህመድ (ዶ/ር) ጄሜርፅጝ ታክስስታዊያኽ፡፡
ኬሽኹሳ ዝኩዊኔ ፋያ ጌፄርዴስ ኬቴምሾ ፄውስታውሳ ፍልሴቶ ኔኬትጝስ ሜቴቴንጙኽ ልግስኒ ውላጊ ዙራሙሪዳ ዝኩዋታ ፄውጝስ ጌፄሩ ኮሪደር ልማት ቴግባርዳ እሺጝ ቲኪስታቲው ትክም ዝኩኹያኽ፡፡
አማኻሪ ክልልዳ ጌፄሩ ኮሪደር ልማት ቤዴራማ ጄሜርስቱክ ዙራሙርካ ዝኩና፡፡ ናሲ አርፊ 2018 ም/አሜታዳ ዴሜካ አዊ ብሄረሰቡ ቺፅጝፂ ፋግቲ ለኮማ ወረዳ ኔቼላ ኬቤሊዳ ጌፄሩ ኮሪደር ልማቱ ጂሚርፂ ስሩ ካርጝ እንኩርስታ፡፡ ኬቤሊኩ ዝኩዋንትካስኪላ ዝኩዊኒውሳ ቴስፌ ኻሳማ ይንታ፡፡
ልማቱ ቴኬምስታንትካ ያኻና እስቱንኩዴስ አሬሳቻንታ እማዬ ጋሺ አግስታና፡፡ ፅንኩት ዝቒው አኹውሳ ችግሮ ዴሜካማ ዳድስታ ኤሌክትሪክ አይል እንቲታኪ ቲኑ ኾት ዲጊዳ እላ አኽጝስ ችግራኻዳ እጂⶓ እንክርፄካ፡፡ እንፃኽስታኑ እንፅኺ ባይላዊስታ ይኮኖሚውሳ ኪሴ ካንትፃቲው አኽጝስ ሲኪኪኒውሳ ወክቶ ፌይፅካማጊ አግስታና፡፡ አሜሬቱኑሳ ምርቶ ሜቴቴንጙኽ ዋይሚስ ጌቤልዳ ዋይጝስ ካላቲኑሳ ዝቤኖ ፌይፅካ። ኤሌክትሪኩ አይል ዲጊዳ እላቲው አኽጝስ ኬሌብስ ያኻውሳ አሬ ናካኪላ ኽታዋስታ ካርጙ ውፍቺስ ታፍስ ፍቻንኑሳ ወክቶ ፌይፅካማጊያኽ።
“ኹናጃስጊ ጌርክ ፋስኩስ እኖጂ ኩፅኒ ልላኽዴስስታ እንግራ ይጉዊ እንፃኽስትጚዴስ ፍናያ” ናንኩ ዊዛሩ እማዬ ጋሺ ዝቤናዊ ሙሪ ግቢስትጝስ ሚንች ቴስፊ ዝኩክ አኽⶓ ምቲስ እንክርፄካ። ጌፄርኩ ኹንዳ ዝኩኽሳ እንፅኺውሳ ቻኒስቶኪላ ሳሴርፅጝስ ቴኬሜ ንካማ አምኔካ።
ሊሊትጙኽ ጉዳይዳ ኬቴማ ካሳኒ ቴሌቭጂንስ ካንታሺኑ ጌፄሩ ኮሪደሩ ልማት ጛው ዙራሙሪዳ ቴግባርዳ እሺጝ ክምንቱ ቴስፊ አኽⶓኪላ ጉሽካ። ዝቤናዌ ዝኩዊኔ ዝኩጝስ እንጉስ ማንዲትጛንኩ አኽⶓኪላ እንክርፄካ።
አሬሳቻንቲ አዳነ ተኮላ ዝኩዋኑ ፋግቲ ለኮማ ኔቼላ ኬቤሊ ጌፄሩ ዙራሙሪዳ ዝኩዊኔ ዊፅጝስ ኻራ ጌርካ እንፃኽስቲኒስጉ እሌታ እርባቲዴስ ኩፅኒ ፊⶓ ካሌካያ። ምክንያቶ ጌሌፃኒስኪላ “እንፃኽስትናውስታ ዝኩናው ሚንች ዳድስ እንግራይጉዊ አኽጝስያኽ” ናና።
ፅኻራዋ እሩብፃኒ እጚስታ ሼሬሬንት እንኩርፃላ ና፤ ክምካዋ እሩብፅጝስ ዴሜካ ፃይኑ ብቲ ልቓ አኽጝስ ክምካውሳ ኬሌቦ አቲጝስ እንፅኼ ሳኪትጝፅጝስ ካሌካያስኩ አኽⶓ ታክሳና። እንጚጊ ችግር እምትጛማ ኬሽኹሳ ዝኩዊኔ ዝኩጝስ ታክሲኒስጉ እክዶ ሳኪትጝስ ኩፅኒ ቼጌርስታሺንኩ አኽⶓ ዲብስካ።
አሬሳቻንቲ አዳነ ናኑውስታጊ ልማቱ እንፅኺስ ቴኬምስታንታ ያኼካማ ኬሻንቴ ዝኩዊኔ ዝኩጝስ አግፁኑ እድልስ ዴስቴንካ አኽⶓ ሼውፅካ። እንዴስ ቤዴራ ባይላዊ ዳድስ ሞኬርካማ ሳኪትጛላ ንኹሳ እንፅኼ ዝቤንፅጝስ ይኮኖሚስ ኪስስትጝስ እክዶ እሚⶓ ድኹዌካ።
ፋግቲ ለኮማ ወረዳው ቹዋ ቺፅጝፃንቲ ታገል እጅጉ ጌፃሩ ኮሪደር ልማቱ እንፅኺ ወረዳታ ጄሜርስትጝ እንፅኼ እንካናንቲ ወረዳው እዝብ ዝቤናዊ ሴልስ ዝኩዊኔ ዝኩዋታ ፄውጝዴስ ፌይኹስ ይኮኖሚውሳ ልግስኔ ሜዜጌብፅጝስ ካላውሳ ቴስፌ ውና ፄውጙ እርምጂ ጄሜርስትⶓ ጌሌፅካ። ወረዳታኪላ ዋሺኒኪ ልማቱ እንፅኺስ እዝብ ቴኬምስታታ ኩርፄንትስ እንፃኽስስታው አኽⶓ ሼውፅካ። ልማቱ እንፅኺኪላ እምስትኹ ወክትስስታ እክድስ አሌድስስታታ ሲፍጜ ፄዋንኩ አኽⶓ አቕፄካ።
አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ጛሾስ ኔቼላ ኬቤሊው እዝብ ሰላሞ ኬቤርፃማ ልማቱ ቴኬምስታንታ አኽጝስ ካሊጝ እሊኩ ዙራሙርካስጊ ምሳላ አኽⶓ አቕፄካ።
ፋግቲ ለኮማ ወረዳዳ አግስታንኩ 26 ኬቤልካዴስ እምፕል ያኹኽ ኔቼላ ኬቤሊዳ ጌፄሩ ኮሪደር ልማቱ እንፅኺ እይስትጝ ውላስጊ ዴሱ ጉሽፂ ያኻማ አሬሳቻንትካውሳ ዝኩዊኔ ኬሽጝፅጝ ማንዲስታው አኽⶓ ካንትፂታ ጉሽካ።
ብሄረሰቡ ቺፅጝፂውሳ ሰላሞ ኬቤርፃማ እዝቦ ልማቱ ቴኬምስታንታ ፄውጝስኪላ ኩርፄንቶስ እንፃኽስስታማጊ አኽⶓ ቹዋ ቺፅጝፃንቲ ጌሌፅካ። ጂሚርፂ ምልኻት እንኩርስትኹሳ ጌፄሩ ኮሪደር ልማቱሳ እንፅኼኪላ ወክትስ አሌድጝስ ይሴን ሲፍጚ ፄውስቴ ንካ። እዝብኪላ ሰላሞ ኬቤርፃማጊ ልማቱ ቴኬምስታንታ አኽጝስ ምንግስቱ ኬምፕዳ ቲሪጝ ፋይፃንቲ አኽⶓ ሼውፅካ።
ወክትስ ፋግቲ ለኮማ ወረዳ ኔቼላ ኬቤሊዳ አግስቴካማ ጌፃሩ ኮሪደር ልማቱሳ ጂሚርፄ ስሩሳ ካርⶓ እንኩሩንኩ ይቶፒያው ብሄራዊ ባንኩ አላፊ እዮብ ተካልኝ (ዶ/ር) አገው ምድር ሰላሙ ምሳሊ ኬቤቤርጛማስታ እጎ ኬቤርፃማ ዝኩጝስ አቕስትኹ አዝቡ አግፅፂ አኽጝታጊ ምንግስትኪላ እዝቦ ቴኬማውሳ ፕሮጄክቶ ጄሜርፅⶓ ጌሌፅካ።
ምንግስት ውላቱዌ ኪሴ ካስጝፅጝስ ፄዋው ልቕልቕቲዳ ብሄረሰቡ ቺፅጝፂውሳ እዝቦ ቴኬማውሳ ኮሪደር ልማቱሳ እንፅኼ ጄሜርⶓ ጉሽካ። እንጚስኪላ ይቶፒያ ብሄራዊ ባንክ ኔቼላ ኬቤሊዳ አቾ ማንዱኽሳ፣ ምሳላ ያኻውስታ አሬሳቻንትካውሳ ዝኩዊኔ ኬሽጝፃው ኮሪደር ልማቱ እንፅኺስ ዳላውሳ ባጄቶ ሜዴብⶓ አቕፄካ። ልቓ አርፍካዳ እንፅኺኪላ አሌድስታታ ዳብዚ እንኩርስትⶓ ቼሜትጝፄካ።
ትክላሊስ ጌፄሩ ኮሪደር ልማቱ እንፅኺ ይቶፒያዳ ሊሊቲ ትኩት እይስትኹስታ እሳንጛማጊ ዝኩኽ እስካዊ ፕሮግራም አኽጝታጊ ማእከላዊ ይቶፒያዳ አማኻሪ ክልል፣ ኦሮሚያዳስታ እሊኩዳጊ አሳንስ እንፃኽስስታማጊ ዝኩኽ ቴስፊዌና እክድያኽ።