አመራርካው ስልታኒ አይጚኔ ችግሮ ኽያይ ኻሲ?

ታደለ አጋጄ

አጌር አቡቑ አችስ ሊሊትጙንኩ ስልታኒኩ ማይኬልካዳ እይስትኹ ስልታኒ አመራርካ እምፕሎ አይኔቶ ካንቴ እሜንታ ፄውኽ አኽጝ ጌሌፅስትኾ።

ባርዳር ስልታኒው ማይኬልዳ ምንግስቱ እንፅኺኩ አላፍካስ አጌርታ እይስትኹ ስልታኒ አሌድስታ። ስልታኒኪላ አመራርካ እምፕል አይኔቶ አጌራዊ ካንቴ እሜንታ ፄውጝዴስ ድምክና ጉሳኑሳ እዝቦ ካሌቕትዳ ስራ ፄዌካማ  ጉስጝስ ካላንታ እርዳታዊያኽ እስታ:: ኬፍቴንካስታ ክቻክቺኩ አመራርካውሳ አክሞ ሌጌፅጝስ እዝብ ካሴኩ ካስካስ ክችክቼ ዙርሜ እያንታ ካሊፃው አኽⶓ ስልታኒዳ አሴቴፍጙንኩ አዊ ብሄረሰቡ ቺፅጝፂው አመራርካ ዙሜካ::

ብሄረሰቡ ቺፅጝፂው አመራርካዴስ ስልታኒዳ አግስትኹ አቶ ስሜነህ ፈለከ ስልታኒ አመራርካ ጊዝ ካሴውሳ ካሌቕቶ  እሚካማ እዝቦ ጉሳንታ ካሊፅጝዴስ ድምክና አጌርታ እምስትኹሳ እክዶ ሳኪትጝፅጝስ  ቴክኖሎጄ  ቴኬምስትካማ ጉሳንታ እርዳታዊያኽ ንካ::

አመራርካ እዝቦ ጉስጝስ ውላ አቡቕ ካሌቕቶ እሚጝስ ፋይፃንቲ አኽⶓ ዙሙንኩ አቶ ስሜነህ አጌራውሳ  እምፕልቶ ሌጌፅጝስ ስልታኒ ፋይፃቲኽ አኽⶓ እርዳትፅካ:: ይንታው ዝቤንሊ ካይጝስስታ እንዜጝጝስ ካሊፃውሳ ስልታኔ ካፅጝ ግዴቲ አኽⶓ ጌሌፅካ::

ስልታኒ ዙራሙሪ ቺፋ ኬሴትስታንኩ ችግርካዋ ኽይጝስ፣  እዝቦስታ  አጌሮ ቴኬማውሳ ልማቶስታ ልግስኔ አሬኽፅጝስ እዝብሊ ዲግጛማስታ  ኩስጝጛማ እንፃኽስትጝስ ቴኬማዊያኽ ኑንኩ አቶ ስሜነህ ወታትካሊስታ አጌር ሹማጌልካሊ ኩስጜ ፄውጝስ  ቴኬማውሳስታ ቴኬማቲውሳ ዲቦ ጎሌልጝ  አመራርካዴስ ማንዲስታው አኽⶓ አቕፄካ::

እጂንኩ ካስካ እምቢት ንካማ ዙርሜ አግፃኑላ ይጉጝ ናካ ብቲ ብታዳ  ጋቻ ፌቴርስታማጊያኽ አኽⶓ ጌሌፁንኩ አቶ ስሜነህ እን ልቕልቕቲ እምፕልታቕስ  ቴኬማቲው አኽⶓ ዲብስካ:: ምንግስት እዝቡ ካስካዋ ዙርፅጝስ  አች ቺፋ አኬዳማ እንፃኽስታማጊ አኽⶓ ጌሌፅካ::

እሊው አዊ ብሄረሰቡ ቺፅጝፂዴስ ስልታኒዳ አግስቱንኩ አቶ ገበየሁ አልማው ስልታኒ እያው ትክም አጌርታ ብልፅግኒ ፓርቲ ሳኪትጝፅስ ታክስኹሳ እክዶ ውና ፄውጝስስታ ምንግስቱ እንፅኺኩ አላፍካውሳ አክሞ ሌጌፅጝስ ስልታኒ ፋይፃንቲ አኽⶓ ዙሜካ:: ስልታኒው ቹዋ ግብኪላ  እምስቱንኩሳ  እክድካዋ ሳኪትጝፅስታ  እምፕልቶ ይስጝፅጝ ቴኬማው አኽⶓ ምልኻትካ ::

“ጋቻ ፌቴርስታቲው አጌር እላኽ” ኑንኩ አቶ ገበየሁ  ጋቻ ኽይጝስ አች ቺፋ ዝኩንኩ አመራርካ እዝብሊ ቱትጝጝ፣ኩስጝጝ፣ችግር ዋኒ ኽይስታው? አይ ኽያው? ዋትጜ ኽይስታው? ናውዳ እምፕልታቕሊ ቱትጚ ፋይፃው አኽⶓ ቶኬምካ::

ናኪኒ ወክትዳ ካንትስታው ዲብ ክችክቺ ጋቲው አኽⶓ ቶኬምካማ  ሌጌስጝስ ኩፂ ቴኬማው እምፕልት ይቢቺ አኽⶓ ዙሜካ::

እምፕላ አኽጝ ዳማዴስኪ ጃላ ጉላሊ እላቲው አኽⶓ አሌሙ ታሪክዴስ ካንትጝስ ካሊስቴ ኑንኩ አቶ ገበየሁ እምፕልታቕሊ ቱትጝጝስ  ምንግስትኪ ያኻ ፓርቲ እሚኩሳ እክድካዋ ሳኪትጝፅጝስ ካሊፃው አኽⶓ ዙሜካ::

ምንግስት እዝባ ጋቲታ ይቢቺ ችግሮ ኽያማ ሳኪትጝፅኹ  ዲብ እላቲው አኽⶓ ዙሙንኩ አቶ ገበየሁ “ጋቻ ኽይ አኻላኽ” ንካ:: “ካስካ ዙርሜ አግፃቲንታ ፄዌ::እዝብኩ ካስካዋ ጚው ካሲታስታ እዝብስ ኮራኮርስትኹስታ ፄውጝስ ጋቻሾ ሚፃንኩ አካልካዋ ጎሌልጝስ እዝብ ቴቤቤርጝጝ ቱስቴኽ” ኑኑ::

እዝብ ምንግስቶ ቹኒትጝስታ አብርታ ቴቤቤርጝ ዝኮ ኑንኩ ስልታኒኩ አሴቴፍጛንትካ ቱስታ ጋቲታ አሱ ንቫራሳ ባይፃንኩ ፅንፌንካ አይልካ ካላካልጝጝስ፤ ችግርካ ዝኩኒውላ ምንግስቱ ኬምፕዳ ያኽጝስ ኽይስታታ ፄውጝ ፋይፄ ንካ::

ይቶፒያው እዝብ አሰቴዌልጝስ፣ ዲቦ ክችክቺስ ካንትጝጝስስታ ቱስታው ዳድስ እንዜጝጝስ ልማቶኪ ያኻ ፋያውሳ ዲቦ ሳኪትጝፅጝስ ካሊስቴ ንካ ::

“እዝብ ኩስጚዳ አግስትጝስ  እዝቡሳ  እምፕልቶ ይስጝፃውሳ ዲቦ ጉሽጝ ቱስቴ::ጎሌልጝፃውሳ አሳቦ ጉሻንኩ አካልካዋ ዴሜካ ውላጊ ቴቤቤርጚስ ቡንክትጝጝስ አመራሩ ኬምፕዳ ያኽጝ ዝኮ” ናኒስ ታክስፅካ ስልታኒኩ አሴቴፍጛንትካ::

“እድዴስ አብትሾ”ናው ቹዋ እንፅኼንትስ እይስትኹ ምንግስቱ እንፅኺው አላፍካው ስልታኒ ትክምቲ 30/2016 ም.አሜትዴስ ጄሜራማ ዳር 12/2016 ም.አሜቶኺስታ ካስጙስ እጄማ አሌድስታ።

ቲክሊልጝፂ ቴርትዳ አማኻሪ ክልሉ ቺፅጝፂ ጛራ አረጋ ከበደ፣ትክትሊ ቺፅጝፂ ጛራ አብዱ ሁሴን ፣ዲሞክራሲው ቴርቱ ግንባቲው ሚኒስትር መለስ አለሙዋ ዴሜካማ ፌዴራልኩስታ ክልልኩ ኬፍቴንካ እንፅኺኩ አላፍካ አግስቴካ።

አማኻሪ ክልሉ ቺፅጝፂ ጛራ አረጋ ከበደ ቲክሊልጝፂ ቴርትዳ ፌያፌይጝፁኑ እንፅኼንትስ ስልታኒው አላሚ አይጚኔ  ችግሮ ኽይጝስስታ ዝኩንኩሳ አብትካዋ ቴኬምስትጝስ ይቶፒያዋ ኽሳንታ ፄውጝሲያኽ ንካ።

ስልታኒዴስ አግስትኹ ካሌቕትስ አጌራ ኪስጝስስታ ሌጌፅጝስ ቲጊጝ ቱስቴኪላ ንካ።ጎሌልጝጚ እዝቦስታ አጌሮ  ዋይሜ ኬይፃው አኽⶓ ጌሌፅካ።አጌራ ሌጌፅጝስ ዜኔግጝ ቱስታቲው አኽⶓኪላ ቶኬምካ።

አጌራ ሌጌፅጝስ እምፕልቶ ይስጝፅጝ ቱስታው አኽⶓኪላ ዙሜካ።እምፕልታቖ ኢኮኖሚስስታ እሊኩ ሜስክካስ ታምትጝፅጝ ቱስቴ ንካ።

ሴሌቴናንትካ ሴላምስ ሴሌቴናንታ ፄውንኩ ፄትቲኩ አይልካስስታ ጉድ ሌንጌዶ ቻቤልጝጜ ፄውንኩስ ውላስ ምስጋኔ ዲግስካ።