አክሱም ፅዮን

ዘውዴ በካሉ

ይቶፒያ ሚንችካ አቓ ግብርካስታ ፍትሬትኩ ማኼትካ አግስታንቲ አጌራኽ:: ሊሊትጙንኩ ትቬቭኩ እንፅኽካ ትቬቭ ዌናሱ ታፍስ ጊቢስትካማ ካንትጝስ ዴኔክፅካስታ ታሪክስ ክምንትዴስ ክምንትሾ ፌያፌይጛንኩ ማኼትካ አግስታና:: ፍትሬትስ አግስቱንኩ ማኼትካ ቱሪስቱ ጉስፃ ያኼካማ ቱሪስቶ ጐቤንጝስ ጉሳንኩ፣ ግንቢኒ ጊቢቱኽዴስ ጃላ ዴኔክፃንኩ ስፍርካ ዝኩና:: እኒጛ ማኼትካኪላ ዴሴስታንኩስታ ዳሴስታቲንኩ ማኼትካ እስትካማ ታሪክስ እንኩርስታና::

ናካስታ ስልታኒ ሚንቻያሱ ጊዝዳ ኽታዌን ትቬቬንካ አቕ አክሱሙሳ አውልቶ፣ ላሊበላውሳ ብሽታኖ፣ ጀጐሎሳ ግንቦስታ ፄጌርጙንኩ ታሪክኩ ማኼትካዋ እንፃኽስትካ:: አጌራኻዳ ዝኩንኩ ማኼትካ ሚንችካ ያኹኒኪላ ባይሉስታ አይማኖቱ ማኼትካ ክቻዴስ አንቤብፅጝስ ፋኑኽ አክሱም ፅዮኑሳ ታሪኮኽ::

ይቶፒያው ታሪክዳ ሊሊቴ ስፍሬ እሚንኩ ታሪክኩ ስፍርካዴስ እምፕልስታ ኽታዊኒ ሊጊሲሚ ታሪክ ዝኩት አክሱም ኬቴማኽ:: ሊሊትጙንኩ ፅናትኩ ፁፍካዴስስታ ታሪክዴስ እርዳትስትንኹስታጊ አክሱም ኬቴም ሲዚ ሻይ ድሚ ዝኩት ኬቴማኽ:: አክሱም ይቶፒያው ታሪክትስታ አይማኖትቲ ቹዋ ኬቴማ ታኹስ ድባን ካሜንስትጝዴስ ፋና 2ሻይ አሜታ አሌም ድሜ ቺፍፂት አኽⶓ ታሪክ እርዳትፄ::

አክሱም ቤተ ክህነትስታ ቤተ ምንግስትቲ ቹዋ ኬቴማ አኽጝዴስ ድምክና ታቦተ ፅዮንቲ ሜንቤራ አኽጝ ኬቴማውሳ ፍንቶ ሌጌፃ::

አክሱም ሰሜን ይቶፒያው ቤንዳ ትግራይ ክልልዳ አግስቴት ኬቴማኽ:: አክሱም ይቶፒያስኪ ያኻ ይቶፒያውያንካስ ክብር አኽⶓ ሜፃፍዳ ፃፊስትኹዴስስታ ካልስ ዙሚስትኹዴስ ጃላ ዙራሙሪዳ አግሰታንኩ ታሪክኩ ማኼትካ ጌሌፃና::

አክሱም ናውሳ ስሙሳ ኽዮ ፅናትዳ ጌሌፃኒስ ድባን ካሜንስትጝዴስ ፍኖ ላጛ ሻይ አሜትዴስ ፍና  እሺኹስታ ኩሽስ ጄርጄራ አኹኪ ኖህስ ጄርጄሪ ያኹኽ አክሱሙ አቒ ቲሪትጝፁት ኬቴማ አኽጝስ ጛውስ ስምስ ኬቴማውሳ ስሞ አክሱም ንካማ ስሞ ፍሽⶓ እርዳትፃና:: እንጚሊ እምትጝፅካማ “አክሱም” ናው ካል ላጛ ኮንኪዴስ አግስቱኽ ካል ያኹስ “አኩ” ንጝ አውጚው ኮንኪስ “አኹ” ንጝ ያኹስ “ሱም” ንጝ ዴሜካ ሴሙ ኮንኪስ “ሹም” ንጝያኽ::

አክሱምዳ አግስታንኩ ማኼትካ ክቻዴስ ሙሴው ታቡቱ ቺፅጝፂ፣ እምፕል ካርጝዴስ ፋላፋልስትካማ ሊሊቲ ሊሊቲ ማሊፊስ ጊቢስቱንኩ 30 ሜትርዴስ ጃላ ሌጌሴምት ዝኩኹስታ 2ሻይ አሜትዴስ ጃላ ድሚ ዝኩኽ ማኺቲ፣ እምናና በረድዴስ ጊቢስትኹ ስልዳ፣ ኽታዊኒ ኮንኪስ ንጝኪ ሳብጚው ኮንኪስ፣ ግዙ ኮንኪስስታ ግሪኩ ኮንኪስ ካርጝዳ ፃፊስቱንኩ ፁፍካ፣ አክሱሙ አውልት፣ ንጉስ ኢዛናው አውልትስታ ፄጌርጙንኩ ማኼትካ አግስታና:: ሊሊትጙንኩ ንባርካ ቶኬማኑውስታጊ አከሱሙ ምንግስትስታ አክሱም ኬቴም ሹኻንቲ ሊኽ ዝቤን ቤናዳ አሌምዳ አግስታንኩ ሴዛ ምንግስታትካዴስ ሮምዴስ፣ ፈረንሳይዴስስታ ቻይናዴስ ሲፋማ ሴዛንቲ ይሴን ምንግስት እሺኾ:: ናኪኒ ጊዝዳኪላ ትቬቬንካው ታፍስ ጊቢስቱንኩ ኽሳንትካ ኽሳንትካ አውልትካ፣ ነገግስታትካው ሜካብር፣ ንግስት ሳባው ኽምቢ ዙማ፣ ከዳማዊ ምኒልክ እስራኤልዴስ ያጉኽ ፅዮን ማርያሙ ፅላት፣ ክዱስ ያሬድ ዜሚስታ እሊኩኪላ አግስታና::

ይቶፒያ ኦርቶዶክስ ብሽታና ኪቢርፄኩ ማሪያምኩ ባልካዴስ  እምፕል ፂዮን ማሪያሙ ባል ያኹስ ባል ኬቤርስታውኪላ ዳር 21 ጌርክስያኽ:: ኦርቶዶክስ ብሽታና ታቦተ ፅዮን እንፃኽስቲኩስታ ታአምርካዋ አምናንትካስ ሜፃፍ ክዱስ ስራ ፄውጝስ ክንትፂ ባሎኪላ ቱስቲስ ኪበርፂ:: ሊከ ነቢያት ሙሴ ደብረ ሲናዳ 40 ጌርኮስታ 40 ኻሮ ፁሙኑዴስስታ ፄሌቱኒዴስ ፋሌንጋ 10 ትዕዛዝካ ፃፊስቱኑሳ ታቦተ ፅዮኑሳ ፅላቶ ድባኑ ታፍዴስ ቻቤልኾ:: ታቦተ ፅዮን ናው ስምኪላ እይስትኹ ፅዮን እስቴታ እቑስቴት ኬቴማው ስምስያኽ:: “ፅዮን” ንጝ ዲግኹ፣  ሊክስትኹ፣ ሜቴንስትኹ ናውሳ ኽዮ እዬ:: ክቡር ዳዊትኪላ ፂዮኖ ናቕፃ ፄዋማ ሚንችካ ፅላትካሊ አኹኪ ባላንጋሪክላ ሴብትጛማ ዊፄ:: ፂዮን እስቴት ኽሳንታ ዳዊትቲ ኬቴማ ታኹስ ቤዴልስቱንኩስስታ ሺንኪስቱንኩሳ እንቲታኪ ክችክቼ ፍርዶ አቱንኩ አቕ ውላጊ ክችክቼ ፍርዶ አግፅጝስ ኩፕ ንካማ ሴኔቤታንቲ ኬቴማ እሺቲኾ:: እንጚዳ ፂዮን ኬቴምዳ ሙሴ ድባንዴስ  ቻቤሉት ፅላታ  እሽቲት አኽጝስ አቕ ችግሮ ድኹዌካማ ኽዮ አግፃንኩ አኽጝስ ታቦተ ፅዮን እስታማ ስም እይስትኾ::

ነቢያትካው አሊኪ  ሙሴስ ድባን ታቦተ ፅዮኑሳ ዝኩፄ ድንኩዋኖ ጊቢታታ አዜዝኾ:: ታቦተ ፅዮን ድባኖ አምናንኩሳ እጐስታ ትዛዞ ኬቤርፃንኩስ ውላስጊ ይሙኑሳ፣ ሼው ታክስሳውሳጊ ፌፄምታት አኽⶓ ሜፃፍ ክዱስ እርዳትፄ::

እስራኤላዊያንካ እጐስታ ትዛዞ ኬቤርፃኒ ድባን ታቦተ ፅዮንዳ ቻማ እዝቦ እርዳታሺኹ አኽጝስ ፅላትሊ አኹኪ በላንጋሪሊ ሴብትጜካማ ዊፃሺና:: እንዳ ዝቤንዳ ኤሊ እስታው እምፕል ኪሲ እሺኾ:: አን አቒዳ አፍኒንስታ ፊንሀስ እስታንኩ ላጛ ጄርካ እሺና:: እኒ ላጛጊ ጄርካ ታብሊውሳ ኩስጜ ቻቤላላ ንካማ ድባን ፌኬዳቲውስ ድፄ ቴግባሮ አኹኪ ቤዴሎ እንፃኽስቱና:: ድባንኪላ ጛጂዴስ ፄጌ ጌጌዋማ እርዳትⶓ ባይኾ:: ድባኑ ፄጊ ጌፌፍስታኒ አፍኒንዳስታ ፊንሀስዳ ፍልስቴማዊያንካ ባላንጋርቱና:: እስራኤላዊያንካ ኤሊ ይሪሊ ያኼካማ ታቦተ ፅዮኖ ኻስካማ ዎሬምዳ ፍልስቴምሾ ዜሜቱና:: ዎሬሞ ጄሜርካማ ሴብትጜካማ ሚንችካ አቕ ክሩና:: ዎሬምዳኪላ አፍኒንስ ፊንሀን ክሩና:: ታቦተ ፅዮንኪላ ኤሌፍላዊያንካውዳ ታፍዳ ታኹኻ:: ወሬምዴስ ይጉኽ እምፕል አቒ ኤሊስ ካሳማ ታቦተ ፂዮን ኪሚስትⶓስታ ላጛጊ ጄርካ ክርⶓ ድኹኻ::

ኤሎፋላውያንካ ታበተ ፅዮኖ ካፅካማ ጛጂ አምናኑ ዳጐን እስታው ታኦቱ ስርዳ እንክሩና:: ታቦተፅዮን ዳጐኖ ድርቤውጄታ ዳጐንዳ አምፕዳ ታኻታ አግፁና:: ታቦተ ፅዮን ኤሎፍላዊያንካዳ እንታኮውሳ ተአምሮ እንፃኽስቴታጊ ፍልስቴምዳ ላጚቲ አርፋሳ እጂቴ:: ኤሎፍላዊያንካ ታቦተ ፅዮኖ አጌርሾ ዙርፅጝስ ሳንዱክስ ወርኮ ፄዌካማ አጌርሾ ዙርፅና:: እስራኤላዊያንካ ታቦተ ፅዮን አጌርሾ ዙርⶓ እንኮኽካማ ዴስቲስ ቻቤልካማ አሚናዳብኾ ሚፁና:: እንጚዳኪላ 20 አሜታ እጂቲኾ:: ንጉስ ዳዊትኪላ ታቦተ ፅዮን ኬቴምሾ ቱⶓ እንኩዋኻማ ዙፋንዴስ ጆማ ምስጋኒስ ቻቤልኾ:: ታቦተ ፅዮን ንጉስ ሰለሞኑሳ ዝቤ ኖኺስታ ድንኮንዳ እጂቲኒዴስ ፋሌንጋ ንጉስ ሰለሞን ጊቢቱኽዳ ቤተ መክደስዳ ቲይኾ::

አክሱም ፅዮን ማርያሙ ብሽታን አባላምቲ ጊዝስ ክስታንቱሳ እምኔቶ ይቶፒያሾ ያጉኽ አቡነ ሰላማው ዝቤንዳ ጊቢስቲት አኽጝ ዲብስስቴ:: አቡነ ሰላማው ዝቤንዳ ጊቢስትኹ አክሱም ፅዮኑ ብሽታን ዮዲት ጉዲቱ ክምዳ ፌሬስታ:: እንዴስ ፋሌንጋ አፄ ሃይለስላሲው ዝቤንዳ  ዴሜካ ናካ ዝኩኽ አክሱም ፅዮን ብሽታን /ህንፃ ቤተክርስቲያን/ ጊቢስትኹ አኽⶓ ታሪክኩ ፁፍካ እርዳትፃና::

ድባን ካሜንስትጝዴስ እምፕል ሻይ አሜት አለሞ ይቶፒያዳ ኔጌስቱት ሳባ ንጉስ ሰለሞኑሳ ትቬቮ እንኮኽጝዴስ እልስ ካንትⶓ ፋቱኻ:: አንዴስ ፋሌንጋ  እምፕል ታምሪን እስታው ግፂኒ እየሩሳለምሾ ካሳማጊ ካንትኹሳ ንጉስ ሰለሞኑሳ ትቬቮ ድኹዋኒ ካንትጝስ እየሩሳሌምሾ እንዝጜ ፄውቱኻ:: ንግስት ሳባ ፅዮኑ ታቡትስስታ ንጉስ ሰለሞንስ ስቶቴ እይትኾ:: እየሩሳሌምዳ እጂቲስ ንጉስ ሰለሞንዴስ ምኒልኮ ካሜንትኾ:: ከዳማዊ ምኒልክ ሌጌሳማ 12 አሜቶ ዋኻኒ ታቦተ ፅዮንስስታ ታብሊስ ንጉስ ሰለሞንስ ቹዋዴስ እይስትኹሳ ስቶቴ ኻሳማ  እየሩሳሌምሾ ካስኾ:: ከዳማዊ ምኒልክኪላ እየሩሳለምዴስ ይቶፒያሾ ዙሩስ ታቦተ ፅዮኖ ኽሳማ ይንቱኾ::

እንዴስ ፋሌንጋ ታቦተ ፅዮን አክሱም ፅዮንዳ ዳር 21 ጌርክስ ኬቤርስትⶓ ጄሜርኾ::

አክሱም ፅዮኑ ክብሩ ባል ዳር 21 ጌርክስ ኬቤርስቱስ ይቶፒያ ኦርቶዶክስ ብሽታና ብሩኽ አኺኒ ኬቤርፂ:: እንስ ጌርክስ ፅዮን ማርያሙሳ ባሎ ኬቤርፅጝስስታ ስፍሪዴስ ድቕሮ /በረከቶ/ አግፅጝስ ሚንችካ አቕ አክሱም ፅዮንሾ ሚንቺትስ እንዜጛና:: አሜትዴስ አሜቶ ዴክስ ታምብካማ ምስጋኔ ዲግስጛ፣ ሰላሞ ይምጛስታ ሼውስ እንጉስታኑሳ ድባንስስታ ፅዮንስ ድኹጛ ክርስትኒውሳ እምኔቶ ሲፋንትካ አክሱም ፅዮኑሳ አብጂሌ እንቓስጝስ ዳር 21 ጌርኮ እንጉስ ማንዳና::

አክሱም ፅዮኑሳ ባሎ ኬቤርፅጝስ አጌራኻዴስኪ ያኻ ባርኾቼዴስ ይንታንኩ አቕ ልቓ ጋቲንኩዌኽ:: ዳር አረፊ ቱታ ጄሜርካማ እምኔትኩ ታብል፣ ክስታንቱሳ እምኔቶ ሲፍንትካ ውላጊ አክሱም ፅዮኑሳ አብጂሌ እንቓስጝስ እንጉስ ማንዳና::

ሊካውንትካው ዜሚ፣ ፅናፅሉሰታ ከብሩ ድምፅ፣ ድባንስ ታምፃኑ ምስጋኒስታ ይም ባል ብሩኹኽ አኺኒስ ኬብርስታታስታ እምፕልታቕ ስፍሪሾ ካስጝስ እንጉስታንታ ፄዌ::