ኩስጝጚ ሰላምስ

ታደለ አጋጄ

ሰላም እንፃኽስታማ ኪስስትጝስ፣ ካሜናማ ሌጌፅጝስ፣ ሰላምስ ፋማ ሰላማ ቱጝስ፣ ዜራማ አሜሬትጝስ፣ ትክላሊስ አቒያሱ እሌት ቺፋሱሳ ልቕልቕቴ አኮሜችጝስ ሰላሙ ዋይሚ ፊኹናው አይርዴስ እንፃቲውሳ ስፍሬ እሚ::

ሰላሙሳ እንዳርቶ እርዳትስትጝስ ጋቺትጚስታ ዎሬም ዝኩጝ ይቢቺ ያኺትያስ አቕዳ ቱትጜ አቲጝስታ ፄጌርጙንኩ ችግርካ ፌቴርስትጝስ እምፕልታቑ ዝኩዊኒዳ ችግሮ ታምፄ::

አቕስቱንኩ ፍልስፍኒኩ ምሁራንካ ጌሌፃኑውስታ ሴላም አቑ ዝኩዊኒዳ  እንፅኼ እንፃኽስትጝስ፣ ፋዮ ዋኽትጝፅካማ ዴስቴንካ ያኼካማ እንኪሊ ዝኩጝስ ሰላም ፋይፃንቲ አኽⶓ ጉሻና:: ሊሊትጙንኩ ታሪክኩ አኼንካ ሰላሙሳ አኺኒ ማይቤራዊ ኢኮኖሚውስታ ፖላቲካው አኺኒዳ ታምፃዉሳ ችግሮ ካንትጝ ፋይፄ::

እምፕልካ እምፕልካ ፍልስፍኒው ምሁራንካ ጌሌፃኑ ዴሜካ “ሴላም ዴስቲ አግፅጚያኽ” ናና:: “ዴስቴ አግፅጝ ዴሜካ ሴላማ ጋቲታ አኻላ:: ሰላም ጋቲታ ዴስቴ አግፅጝስ ይጉዋማ ዝኩጝስ ካሊስታቲው እንዉ ግብ ዴስቲያኽ” ናኑሳ ካንቴ እሜና:: “ፖለቲካው ግብኪላ ሰላምያኽ:: ምክንያትኪ ሰላሞ ውላ ፋያው አኽጝስያኽ” ናኑሳ ካንቴ እሜና::

አይማኖትኩ ታብልስታ ፍልስፍኒኩ ዉማይቴንካዋጊ አሴሜምጝፃው ዲብ ሰላሙ ፋይፃንትዳ ያኹኒውላ ፖለቲካውሳ አላሜ ሳኪትጝፅጝስ ዴሜካ ፖለቲካኩ አቕ ሰላሞ አቲሳኑ አኺኒ ካንትስቴ::

ሰላሞ ፋይፃንቲያኽ እኑስ ሰላምስ ፋይፃንኩሳ ዲብካዋ ዜኔግጝ ቱስታላኽ:: ሚንቾ ጊዞ ፖለቲካኩ አቕ ሰላሞ እሊኩ ዲብካዴስ ጎሌልካማ ዙማና ::ያኼስጉ ሰላሞ ፍቼው አቒ ኩፂ እላኽ:: ሰላም ድሳው አቕ ሰላሞ አቲስጝስ ፋይጝስ ያኺትየስ ዙራሙሪ ዝኩዊኒው አኺኒዳ ሰላሞ አቲስንኩ ዲብካ ዝኩዋኒያኽ:: ዲጊ ጊዝዴስ ናቴ አማኻሪ ክልልዳ ፌቴርስትኹ ሰላሙስታ ፄትቲው ችግርኪላ ክልሉ ኢኮኖሚው፣ ማይቤራዊውስታ ፖላቲካው ጉዳይካዳ ሚንችካ ጉዳትካዋስታ ቤዴልካዋ ታምፃ:: አዊ ብሄረሰቡ ቺፅጝፂ ሊሊትጙንኩ ወረድካዳ ኬሴትስትኹ ሰላሙ ችግር ኬሴትስታማ እምፕልታቕስ እሌትቺፋሱሳ ዝኩዊኔ ጉዲጝዴስ ፌያማ  አቑ ይዎትጊ ድሳ::

ኬቴምካዳ ሊሊትጙንኩ ጊዝካስ ሰላሞ አቲሳንኩ አይልካ ሰላሙሳስታ ፄትቲውሳ ችግሮ ፌቴርጝ ሞኬርስታ:: ያኼስጉ እምፕልታቑስታ ፄትቲው አይልካው ቲቢቢርጚስ ኬቴምካው ሰላም ማንዲስታማ እጄ::

ዲጊስ እንጃቢሪ ኮምኒኬሽን ታምፅኹ ንባር ቶኬማዉስታ  ኬቴምዴስ ፊትጙንኩ ሊሊትጙንኩ እምፕልታቕኩ ቤንካ ሰላሙ ጉዳይዳ ኩስጜ ፄዌካ:: ኩስጝጚው ሜድሬኽዳ ዎታትካ፣ አጌር ሹማጌልካ፣ አይማኖትኩ ታብልስ ፄትቲኩ አመራርካ አሴቴፍጜካ::

ኩስጝጚዳ አሴቴፍጙንኩ ክቻዴስ ቹዋ ሳጅን አይቸው እያሱ አግስቴ:: ዎሌን ኬቤልካዳስታ ወረድካዳ ኬሴትስትኹ ሰላሙ ችግር እንጃቢሪ ኬቴምዳ ኬሴትስታቲታ ውላ እምፕልታቕ ፄትቲኩ አይልካሊ ቴቤቤርጜካማ ማንዲጝስታ ሰላሞ ካንታውሳ ዙሚትጝጝ ፋይፃዉ አኽⶓ ቹዋ ሳጅን አይቸው ዙሜካ:: እሊኩ ዙራሙርካዳ ኬሴትስትኹሳ ሰላሙሳ ችግሮ አጌር ሹማጌልካ  ሰላም ይንታታ ፄውጝ ቱስቴ ንካ::

ሰላሙ ችግርስ ፌኔኬልጜካማ ኬቴማሾ ይንቱንኩሳ እምፕልታቖ እርዳትጝ ቱስቴኪላኽ ኑኑ::

ኩስጝጚዳ አሴቴፍጙንኩዴስ እሊው ዎታት ሃዋርያው ነብዩኽ::ዎታት ሃዋርያዉ እንጃቢሪ ኬቴም ሰላም ያኹኒዉላ  እንዴስ ጃላ ሰላምስ እንፃኽስትጝ ቱስቴ ንካ::

“አጌሮ ፌሬስፅጝስ ሚንች አብን ዙሚስቴ:: ብሄርስ፣ ኮንኪስስታ  አይማኖትስ ቤንጝፄካማጊ አቕ ሴላምስ ፌካማ ሰላምስ ቱዋቲኑ አኺኒ ፌቴርስታ:: እንታኮውሳ አኺኔ ቲሪፅጝስ  ቻስ ኬሻንቲ አሳብ ያኻውሳ ዲቦ እሚጝስ ዙሚትጝጝስስታ ኩስጝጝ ቱስቴ” ንካ::

ዎታት ሃዋርያው ጚሊ እንፃኽስታንኩ ሚንችካ ዎትትካ ዝኩⶓ ቶኬማማ ዎታትካውሳ ሊሊትጙኹሳ ካንቴ ካሊትጝጚስ ዝኩጝ ፋይፃንቲ አኽⶓ ዙማ::

“ሴላሙስታ ፄትቲው ችግሩ ምክኒያቲስ   ዴዴኽካስታ ዜሬፋንትካ አይልካዋ  እግስ ዲግሳንታ ፄውጝስ እንፃኽስትካማጊ አኽⶓ እርዳትፃ:: ሊሊትጙኹ ዳድስ ዙሚስታውሳ ዲቦ ዎታትካ ቲሪጝ ንጝስ ታክስጝ፣ ዙሚስታው ዲብ ውንማ ጋቲዊ? ንጝስ  ቼሜትጝፅጝ፣ ጉዳጋቲው አብንዴስ ፌካማ   ቻስ አጌሮ ቴኬማውሳ ዲቦ  እንፃኽስትጝጃጊ ይዎቶ አታኑ ስፍሪዳ አግስትጝ ቱስታላኽ “ኑስ ዎታትካስ እንፅኼንቶ ፌያፌይጝፃ::

እንጃቢሪ ኬቴምዳ ፄውስትኹ ኩስጝጚዳ አይማኖትኩ ታብልዴስ አግስቱንኩ ባህረ ትበባት ሀይለ እየሱስ ገረም ሰላሞ ይንታው እምፕልትስ ፆሌትስስታ ጄርካዋ ክንትፅጝስ አኽጝስ አይማኖትኩ ኾትካዳጊ ሰላም ካንታውሳ ክንቴ እይጝ ቱስታው አኽⶓ እርዳትፅካ::

አይማኖትኩ ታብል ብሽታንሾ ይንታንኩሳ እምፕልታቖ ኩስጝፅጝስታ ክንትፅጝስ ቴኬማውሳ ዲቦ እሜንታ ፄውጝስ ታምቦጊ ፊትጛንኩ አኽⶓ ጌሌፅካ:: ዎታትካ ዴሜካ አይማኖት ታብልዴስ እይስታውስ እንፅኼንቶ /ክንቴ   ዲቦ እርዳትስትጝስ ቹዋ ታብሎ ኬቤርፅጝስ አይማኖትኩ ታብሉሳ ኩስጝጜ ቻቤልጝ ቱስታው አኽⶓኪላ ዙሜካ::

እንጃቢሪ ኬቴሙ ቤዴራንቲ ትክትሊ ከንቲባ ግዛቸው አተና  ጛሾስ ኬቴምኩ ዝኩዋንትካ ፄትቲኩ አይልካሊ እምፕልትስ እንፃኽስትጝ ቱስታው አኽⶓ ጌሌፅካ::

ፄትቲውሳ አይሎ ስካዊስ አቺትጝፃማ እንፅኺሾ ሚፅጝስ ናካሱ ወክትዳ ኬቴምዳ ሰላም ዝኩዋታ ፄውስታኽ ንካ:: ዊዳፊ ሰላም ይንታታ ዴሜካ እዝብ ፄትቲው አይልሊስታ ምንግስትሊ እምፕልታ እንፃኽስትጝ ፋይፃው አኽⶓ ቶኬምካ::

ዲጊ ጊዝስ ሚኒሻ ይስጙኹ ዳድስ አቺትጝፅጝስ እንፅኺሾ ሚፅጝስ ሚንችካ እጋፍካዋ እሚጝስ ካሊⶓኪላ አቶ ግዛቸው እርዳትፅካ:: ሚሊሻዋ ስካዊስ ይስጝፄካማ አቺትጝፅጝስ አጌትስቱንኩ አቖ ባይፅጝስ ካሊⶓኪላ ቶኬምካ::

ፌቴርስትኹ ወክታዊ ፄትቲውሳ ችግሮ አሴቴዌላማ ኩስጝጝ ፋይፃው አኽⶓ ዙሙንኩ ዴሜካ አዊ ብሄረሰቡ ቺፅጝፂ ኬቴምስታ ስር ልማት አላፊ አቶ አይተነው ታዴኽ::

ጉድካ ዎትትካ ዝኩኑውስታጊ ልቓ ዎታታካ ዴሜካ ጊዙ እንኮኽስትስ ችግሮ ፌቴርካማጊያኽ ኑንኩ አቶ አይተናው ጉዳ ጋቲው ጋቻስ ሚንችካ ቴኬማንትካ እሴትካ ሺሽርስትጝስታ እኑስ እኖ ኩትጝጝስ አብቶስታ ንብሬቶ አቲስኹ አኽⶓኪላ እርዳትፅካ::

“ልማት ሰላሚያኽ:: አቕ እንፅኺሾ ቱዋኒ ቴኬማቲው አብንዴስ ፋና:: አኽጝስኪ ሰላምኪ ያኻ ልማት ፋይፃንቲያኽ:: እኖጂኪላ ሰላሞኪ ያኻ ልማቶ አግጝስ ዞኑሳ ሜዋክሮ ይስጝፃማ እንፅኺሾ ሚፅጝስ እንፃኽስትናናጊያኽ” ንካ አቶ አይተናው::

እንጃቢሪ ኬቴምዳ ሰላሙስታ ፄትቲው አኺኒዳ ምንግስትኩ እንፃኽስታንትካሊ ኩስጝጚው ሜድሬኽ ካስጙኽ ያኹስ ምንግስትኩ እንፃኽስታንትካኪላ ኬቴማውሳ ዊዳፊ ሰላሞ ቼሜትጝፅጝስ ታምቦጊ ፊትጛንኩ አኽⶓ ዙሜካ::

አዊ ብሄረሰቡ ቺፅጝፂው ትክትሊ ቺፅጝፃንቲ አቶ በላይነህ የኔሰው ፌቴርስትኹ ፄትቲው ችግር አቑ ክርጝስታ ውዴሜቶ ታምብኹ አኽⶓ ጉሽጝስ ጄሜርስትኹ ቡንክትጚው ሴል አማኻሪው ክልሉ እዝቡሳ ካሴ ዙርፃው ያኻውላስ ንብሬት ዎዴማታ ፄዋው አኽጝስ ችግሮ ኩስጝጚስስታ ሴላምስ ኽይጝ ቱስታው አኽⶓ እርዳትፅካ::

“እጉሳ ሴግቴንቶ ሴፌንፅጝስ ምንግስት ትኩትስ እንፃኽስታማጊያኽ” ኑንኩ አቶ በላይነህ ዊዳፊ ሰላም ቼሜትጛታ ምንግስትኩ እንፃኽስታንትካ ሚዲቢኔ እንፅኼ ካስጝፃንታስታ ምንግስቱ ኬምፕዳ ያኻንታ እቑዌ ዲግስካ::