አዳሙ ሽባባው
ዋኽ ስምስ ጁድ ቪክቶር ዊልያም ቤሊንግሃም እስቴ።እንግሊዝ አጌርዳኽ ካሜንስትኹ። ልኩ ኩታው እንክሪ ጚስ እይስትኹ ኽሳንቲ ትቤብያኽ።ጌና 16 አሚቲ ጄሜራማ ኽሳንትካሊ፤አቕስቱንኩ ክሌብካሊ እንክራ።ናኪኒ ዎክትስ ላሊጋኩ ክሌብካዴስ ሪያል ማድሪዶ ጎሌላማ ማድሪድዳ እንክራውሼ። እንግሊዙ ብሄራዊ ኬችስኪላ 22 ቼፍ ዝኩኽሳ ቲሸርቶ ሴያማ ክችዳ እንክራንኩ እንክራንትካስ እይስታውሳ አላፍቶ ቴርስ ፊትጛውሻው እንክራንቲያኽ ጁድ። ሪያል ማድሪድዳ ዴሜካ ዚነዲን ዚዳን ሴያማ እንክራሺኹ ቼፍ 5 ቲሸርት እይስታ። ጁድ ቪክቶር ዊልያም ቤሊንግሃም 1ሜትርስታ 86 ሴንቲ ሜትር ሌጌሴምት ዝክኹ እንክራንቲያኽ።እምንኹ አሜትስ ጀርመኑ ክሌብዴስ ሪያል ማድሪድሾ ዜዌዌጛ።
20 አሜትስ ውላ እንክርጝስ እንጉስታኑ ማድሪድሾ ታምብኹ ጁድ ቤሊንግሃም ልኩታው እንክሪዳ ኽሳንትካዋ ቴቤቤርጝፃማ ኬፍ ንኹሳ እንፅኼ አኮሜቻውሼ። ጁድ ቤሊንግሃም ውታኺዳ እያውሳ አግልግሎቶ ካንትኹስ ልኩ ኩታውሳ ትያትሮ እንክራውሳ ፄጌራዊያኽ። እንክራንቲ ጎሎ ቼፍፄ።አፄብካ ቼፍፃንታ እርዳቴ።ኬቾ ቴቬቬርጝፄ። ክችቲኒ ዳዱ ሞተር ጁድ ቢሊንግሃን በርኒግሃም ክሌብዴስ ስንቲያ ቨርናቦዋ ኺስታ አኮሜቻውሻው ልኩ ኩታው ልቕልቕቲስ ሚንችካዋ ጌሬምፃ።ሚንችካ ጛው ፄውጝስ ብስቔ ጉንችርቕፃንታ ፄዋ።
ጌና ላጜታ አሜቲ ዝኩዋስኩስ ይሴን እንክራንቲ አኽⶓ ጝን አቕስስታ ዙራሙሪኩ አቕስ ካንትፃማጊ ሌጌሱኽ ጁድ እንፃኺትዴስ ጉሽፃማ ካንትፃሺኹ ልቕቕልቕቲስ ሚንችካ ልኩ ኩታሳ እንካናትካስታ ልኩ ኩታዋ ካሌቕት ዝኩክ አቕኪላ “አቕስትኹ ልኩ ኩታው እንክራንቲ ያኻዊያኽ” ናኒስ እይኑ ካንቲ ጚው ልቓ ጊዙ ታሪክዳ ፃፊስታ። ሌጌሳታምቢ ልኩ ኩታሳ ድሚዴስ ፍና እርዳትስትኹ አኽⶓ ካንትኹ እንግሊዙ በርኒግሃም ክሌብኪላ ድሚ ታምባውሌስ 18 አሜትዴስ ኩክራ ዝክኹ ኬችዳ ቱዋማ እንክርጝስ ፌሬምፃ። በርኒግሃም ክሌብስኪላ ሊሊቴ አግልግሎቴ እያ።18 አሜትዴስ ኩክራሱሳ ዋንቼ ጉሻታኪላ እርዳታ።
ቤሊንግሃም እምፕል አሜቱ በርኒግሃሙ እጂጚዴስ ፋሌንጋ 23 አሜትዴስ ኩክራ ብሄራዊ ኬችዳ አሌቔትጛማ እንክራታ ፄውስታ።አንዴስ ፋሌንጋ ዴሜካ ጚውሳ ልቕልቕቴ ውታኺዴስ ካንቱንኩ አውሮፓው ክሌብካ ጛው ዝቤን ቼፍጚታጊ 2018 ምሬት አሜትዳ ሌጌሳታምቤ ፌሬምፅጝስ እንክራንትካዋ ማላማላንኩ ውማይቴኖ እንግሊዝ አጌርሾ እንፃኹና። እንጚ ውላ እንግሊዝ አጌርኩ እዝብካዋ ዙሚትጝፃ፡፡ ማላማላንትካዋ እንፃኹንኩ ኽሳንትካ ክሌብካ ጛው ፄውጝስ ፃሩና።
አፄብካዴስ ቤዴራማ ሊሊቴ ካሌቕቶ ካንትፅኹ ቤሊንግሃም ሚንችካ ክሌብካስ ፋይስቱኒውላ ጚስስታ ይንታው ዝቤኑ ኽሳንትካ ክሌብካውሳ እንክሬ ጀርመኑ ቦርስያ ዶርንትመንዳ ላኹ ናማ ጄሜራ። ዶርትመንድ ጌና 17 አሜቴ እንክራንቴ 30 ሚሊዮን ዩሮ ፍሺስ ዜዌዌርጝፃ። 17 አሚቲ አሌሙ ታሪክዳ ክብሪ ዋይሚስ ፌሬማንቲ ያኻ። እንጚ ጊዝዳ በርኒግሃሞ ባይፃማ ዶርትሙንድሾ እንዝጜ ፄውኻ። በርኒግሃም ዴሜክ እንካንስቲስታ ኩሚቺ እንክራንቲ ጁድ ዶርትሙንድሾ ካሱኒውላ ጚ ሴያማ እንክራሺኹ 22 ቼፍ ዌናሳ ቲሸርቶ ክብርስ እንኩራማ ጜዋ ኬቤርፃ።ሌጌሳታምብካ ጜዋ ካንትካማ ጚጛስታ ያኻንታስታ ጁትጛንታ ካሊፃውሳ እንፅኼ እንፃኽስታ።
ቤሊንግሃም ጀርመኖ ታምቡታኪላ ክሌብኩ አመራርካዴስስታ ዴጌፋንትካዴስ ብሩኽ ቻቤልጚ ፄውስታይጝ ታክስስታው ዲቢያኽ። እንክሬ ጄሜርኹ ጊዝዳኪላ ቦርስያ ድርትመንዱ ዴጌፋንትካ ጚ እንክራው ጊዝዳ ምቲስ እንክሬ አሌዳኒስ እጂካ። ፋያኑሳ ዋይሜኪላ አግፄካ። ጋያኪ ምሹ ማለያስ ሺሽስታንኩ ዴጌፋንትካስታ ክሌብ 2020 ጀርመኑሳ ዋንቼ ጉሻንታ ጁድ ቢሊንግሃም እንፃኽስቱኽ እንፅኺ ሳሴር ጋቲዊያኽ።
ቦርስያ ዶርትሙንድዳ ታክስስትኹ ጊዝዴስ ቤዴራማ ኬቹ ሊሊቲ ሺሽፂ ያኻሺኹ ጁድ እንግሊዝ አጌሩ ሌጌሳ ታምቢ ጀርመንዳ ዝኩዋስኩስ ቡንደስሊጋዳ ኬፍናማ ካንትስታ። ክዴስ ኬሻው እንክራንቲ እላኬያኽ እስታ። አሜቱ ኬቤርስትኹ እንክራንቲውሳ ክብሮ ሼሌምስታ። ኽሳንትካዋ ፍንዳ ያኻማ ጉሳ። ሚንቾ ታሪኮ ጌና እንፃኽስታው አኽⶓ ካንትፃ። አንዴስ ፋሌንጋ ዴሜካ ሌጌሳታምብካዋ ዳሊፃማጊ ክብሪ ጌንዜብስ ዋያው ቦርስያ ዶርትሙንድ እንሳ ብብሬ እንክራንቴ ላሊጋው አቕስቱኽ ክሌብ ሪያል ማድሪድስ ፌይፃማ እያ።
እምንኹ አሜቱ ዚዊዊርጚው ጌቤልዳ ይሴኖ ቴሳትፎ ፄውኽ ሪያል ማድሪድኪላ 103 ሚሊዮን ዶላሮ ፍሻ ፄዋማ እንክራንቴ ጚው ክሌብ ፄውጝስ ካላ። ላሊጋው አባላምቲ እጂጚዳኪላ ዶርትሙንድዳ ካንትፃሺኹ ልቕልቕቲዴስ ጃላ ጚውሳ አክሞ ካንትፃ። 13 እንክሪዳ ሴሌፍስታማ ጌሬምፃው አኺኒስ 13 ጎሎ ቼፍፃ። እምንኹ እስካዊ ልኺትጚው ዝቤንዳ ሳውድ አረቢያው ክሌብሾ ካስኹ ካሪም ቤንዜማው ቲኪስታንቲ አኽጝስ ካላ።ቤንዜማ ክሌቦ ባይፅጝስ ቼኔክስታሺንኩ ሎስብላንካው ዴጌፋንትካስስታ አመራርካስ ቤሊንግሃም ማድሪድሾ ታምብጝ ኽሳንቴ ፉሬ እያ። ሊሊት ቲኪስታንቲ ያኻማ አግስታ። እንዴስ ድምክናኪላ ማድሪድዳ እድሚ ሺንካማጊ ምንጊስታ ኩታዋ ክምባብልፅⶓ ቼጌርስቱንኩ ቶኒ ክሩዝስስታ እሊኩ እንክራንትካስጊ አግልግሎቴ እያው ይሴን እንክራንቴ ያኻማ አግስታ።ጛጂሶ ሲኪኪኒዴስ ፋንታ ፄዋ። ላሊጋው ታክሲል ያኹኻ።
ስፔን ላሊጋዴስ ቡንደስሊጋዋ ኺስታ እንክሩኽ እንክራንቲስ ማድሪድ አሜቻቲዊያኽ እስቱኑኪላ ጚኩፅኒ እምቢታማ ዴስጝጛ። ዚነዲኒ ዚዳን ሴያማ እንክራሺኹ ቼፍ አንኮ ስፍሪ ይዝኩዊያ አኽኩ አክምዴስ ጃላኽ እስቱኒኪላ ቤሊንግሃማ ሳንቲያጎበርናቮዳ እምቢታማ ኬፍ ንኹሳ ዳሊቶ ካንትፃ።ዚዳኑሳ ታሪኮ ካቫዊያኽ እስታማኪላ ጋሚስታ። ልቓ ጊዝዳ ጌሬምፃውሳ ዳሊቶ ካንትፅኹ ቤሊንግሃም ስፔኑ ላሊጋዳ አኹኪ ኤልክላሲኮው እንክሪዳ አባላምቲ ጊዝስ ሴሌፍስታማ ጎሎ ቼፍፃ። እንጊዝዳ ክሌብ ዊፃንቲ አኽጝስ ዴጌፋንትካስ ዊፅጙ ዴስቲው ምልኻት ያኻማ ካንትስታ።
እንግሊዝ ብሄራዊ ኬቹ ሴሌቴንፃንትስ ቢዲሪ ጎሌልስታንቲ ያኹኽ ቤሊንግሃም አሌሙ ዋንቺው እንክሪዳ አጌሮ ዋኬላማ ጎሎ ቼፍፅጝ ታክስስቴ። እስጜዋ ሲፍካማ እንክሪ አሌድስትጝዴስ ፋሌንጋ አሌምኩ ኽሳንትካ ኽሳንትካ ክሌብካ ፌሬምፅጝስ ዱባሺኑ እንክራንቲያኽ ጁድ ቤሊንግሃም። ማንቺስተር ሲቲስታ ሊቨርፑል ፌሬምፅጝስ ፃሩኒውላ ቤሊንግሃሙ ጉላሊ ሪያል ማርድሾ ያኻ።
ሚንቾ ጎሎ ቼፍፅኹ ታሪክዌና እንክራንቲው ቼፍ አንኮስታ አዴር እይስትኹ 20 አሚቲ ቤሊንግሃም፤ ማድሪዱ ልቓ አርፋሱ እጂጚዳ እንክሪው ቴክኒክስ፣ እንክሬ አንቤብጙ ሴልስስታ ዳሊትስ፣ኬች ፋያውሳ ዋይሜስቴ ብላቶ ካንትፅጝስ አርቴ እፃውሳ ዋይሜ ሜዜጌብፃውሼ።