ሰላምስ ታፎ ቤቴርንስ

እምፕል አጌርዳ ጋቻስታ ዎሬም ፈቴርስትጝስ ካላው ኾትካ አግልግሎቴ ይⶓ አታኒ፣ ፍትህ ዳንጉዊትጛኒ፣ እግ ኬቤርስታውላ ይጉዋኒ ምንግስቱ ቻቤልስታንትስታ ፌፄምጚ አክሞ አታኒ አኽጝ ግልፅያኽ::

ጋቻስታ ዎሬማኻዳ አግስቴት እንአጌራ ናካኪላ ልማቶ፣ ልግስኔስ ዝኩዊኔ ካንትኹስ እዝብካ ዙሚⶓ አቴካ:: እምፕልታቕ ፋማ ቱⶓ፣ እሼማ ቺⶓስታ አኬድካማ እንፃኽስትጝስ አምንጝፃው ሰላሙ አኺኒ ድሳ:: ቹኽ ቺፋ ዳድ ልምታ፣ አቒ ክሬኾ፣ ዎሬም ጁኾ ናው አብን ሚንቻ:: ዴክስ ቺፂ ናማ ኹርፂ ድሳ:: ቑንዳስቲኒ አኪምጝና ታምፃማ አኪምስትጝስ ካሊስታያ:: ክንታንትካ ክንቴ ኬውጝፄካ::

ዶንጌቱንኩ አይልካ እዝብስስታ አጌራስ ናኒስ እንጁክ ንካማ ኩስጝጚስ ዳዶ እሚካያ:: ቶኬስጜ ቲሪፅጝስ ውንቲኔ ኩስጜስታ ፋዬ ካንፅፅካያ:: ውላውላዳ ልኻ፣ አን ይቢቼኽ ዊፃኻ፣ ድፃኻ፣ ዴምሴሳኻ ናንቲ ሚንቻ::

እን ዳድ ይጋሪውሳ ዊፃንቶ ፌቴራላኽ:: ዊዳፌ ሰላሞ ቼሜትጝፃላኽ:: ዊዳፊ ሰላሞ ይንታው ፖለቲካው ውሳኒ ዝኩዋኒ፣ ውንቲኒ ኩስጚስታ ፍትህ ክብሮ አግፃኒ ይቢቺያኽ:: ዋሺኒኪ አሌምዳ ጋቻስታ ዎሬም እምቢት ናማ ቶኬስጜ ቲሪፅጝዳ ታምብስታማ ኩስጚስ ኽይ እይስታውላ ይጉኒጊ ዱንቲኒስታ ላኼን ዝኩኽ ታሪክ ሜዜጌብስቴ:: አጌራ እድዳ እቲ:: እዝብካዳ ዝኩዊኒው ክብርናቲ ሲፋታ ያኼ::

ውላጊ ዎጌንካ እምቢት ንካማ ውንቲኔስታ ክችክቼ ኩስጜ ፄውጝስ ሰላም ይንታታ እንፃኽስትጝ ማንዲስቴ:: ሰላም ኩስጝጚስ፣ ዙሚትጝጚስ፣ ዳራዳርጚስስት እዝቡካ ካሴ ዙርፅጝስ፣ እርክ ጌዋታ ፄውጝስ ይቢቺያኽ::

እን አጌራዳ ፌይንኩ ሹኻ አሜትካኻዳ ሊኽ ሻይስ ቼፍስታው ይወት ድሳ:: አጌራው አብት ድሳ:: ናካኪላ እን ድፃንቲስታ ቱስታ ጋቲው ጋቻስታ ዎሬም ኽሳውሳ አብቶ ንብሬቶስታ ይወቶ ድፃማጊያኽ:: እንስ ሲፉኒጊ እሊኩ አጌርካዴስ ቹኒትናውስታ ካንትናው ድኪ ዲብጊ ታምቤ:: እን ችግር እሳናማጊ ካስጝዴስ ፍና ሰላምስ ታፎ ቤቴርጝ ውላዴስ ማንዲስቴ::