ሼው ፅንታው ዱንትጝ

ዘውዴ በካሉ

እምፕላ አጌራው ልማትስስታ ልግስኒስ ሰላም ዋሺኒኪ ዲብዴስ ጃላ ኽሳንቲያኽ:: ሴላም እምፕላ አጌራው ልማትስስታ ዲሞክራሲው ቴርትስ ዝኩኽ ታምብ ኽሳንቲያኽ:: ሰላም ዋይሚስ አኹኪ ብርስ ሊኪስታላ አኹኪ ጌማትስታላኽ:: ጛርት አቕ ቻሱሳ እክዶ ሳኪትጝፅጝዴስ ጄሜራማ አጌሮኺስታ ሴላም አቱኒጊ ዋሺኔኪ አይኔቶ ግቦ ሳኪትጝፅጝስ ካሊስታላኽ:: ሰላም ይንትጝስ ዋኽስ ዋኾ ጋቻዴስ ፊጝ ንጝ ያኻውሌስ ፌቴርስትኹሳ ጋቻዋስታ አሳብስ ቱትጜ አቲⶓ ኩስጝጚስስታ ካሊትጝጚስ ኽይጝ ንጝያኽ:: አጌርታ ናማኪ አማኻሪ ክልልታ ፌቴርስትኹ ሰላሙ ችግር ሜንችካ ማይቤራዊ፣ ይኮኖማያዊስታ ፖለቲካዊ ችግርካዋ ታምፃማጊ ሴኔቤታ:: እን ሰላም አቲጝ ሜንችካ ዙራሙርካዳ ሚዲቢኒ እንፅኺ ኬውጛ፣ ሜንችካ ስርኩ ልማትካኪላ ዎዴምካ፣ አቑ ይወት ድሳ፣ አቕ ጛው ዙራሙሪዴስ ፌኔኬልጜካ፣ ሚዲቢኒ ክንቲዴስ ኽሳንቲ ክንቲውሳ ኾቶኺስታ ዝኩኽ ክንቲው ቴርት ኬውጛ፣ ሜንችካ አቑ አንኮሊዳኪላ ሼው ፅንታውሳ ጉዳቶ  ታምፃ:: ፌቴርስትኹ ጋቻስ ክንቲው ዜርፍስ 3 ትኩሚ 2 ሚሊዮንዴስ ጃላ ያኻንኩ ክንታንትካ ክንቲው ጊቢቲዴስ ሴጋ ያኻንታ ጉሽፃ ያኻ:: ክንቲው ኬውጝጝ ታምፁኩ ጉዳትካዴስ እምፕል ሼው ፅንታው ጉዳትያኽ:: ናካስ አንቤብፅጝስ ፋንኹኪላ አማኻሪ ክልልዳ ናማኪ ብሄረሰብ ቺፅጝፂዳ ፌቴርስትኹ ጋቻው ምክንያቲስ ክንትጝ ክንትፅጙ ቴርት ቲሪጝ አኹኪ ኬውጝጝ ክንታንትካው አንኩዋሊዳ ታምፅኹሳ ቻኒስቶስታ ሼው-ፅንታውሳ ዱንትⶓ ካንትኹስ ክንታንቲሊስታ ሼው ፅንታው ክንትፃንቲሊ ፄውኑኽሳ እጂጜኽ:: ስሞ ጌሌፅⶓ ፋያያሱ አዊ ብሄረሰቡ ቺፅጝፂ ፋግቲ ለኮማ ወረዳ ችጎሊ ክንቲጝናሱ ክንታንቲ ፌቴርስትኹ ጋቻስ ክንትጝ ክንትፅጙ ካስት ቲሪጝ ሼውፅንታዳ ቻንስቶ ታምፅⶓ ድኹዋ:: ክንታንትካ ክንትጝ ክንትፅጙ ካስት ቲሪⶓ ጉሽፃ ፄዋማ ክንቲዳ ፌይፃሺኑሳ ጊዞ ያኻያሱ አኹኪ ድፄ ቴግባሮ እንፃኽስታኑ ስፍሪዳ ፌይፅካማጊ አኽⶓ ክንታንቲ ድኹዋ:: ክንታንትካ ክንቲዴስ ይጐ እሊው አላሚ እሼያስኩ አኽጝስ አንኮሊ እንፅኼ አታኒ አልኮላኻዳ  አኹኪ ዝቓኻዳ እሼንታ፣ ድፄ ቴግባሮ እንፃኽስታንታ፣ አጌሮ ባይፅካማ ሴዴድስታንታስታ አኬድካያሱ እንፅኺዳ እሼንታ ያኽስታማጊ አኽⶓኪላ እንክርፃ::

ክንታንቲ ጌሌፅኹስታጊ ክንታንትካ ክንቲው ጊቢቲዴስ ሴጋ ያኻማ እጂጝ ጝን አቕዳኪ ዙራሙሪዳኪ፣ አጌርዳኪ ቻኒስትያኽ፣ ክንታንትካ ችኹ ወክትዳ ክንቲ ልምታማ ሜስኬሩምዳ ብስስትምባ እንጉስ ማንዳኑ ክንቲ ሴላሙ ችግርስ ሜንቾ አርፌ ልምትጝ ክንታንትካ ቴስፌ ኬዋንታ ፄውⶓኪላ ክንታንቲ ድኹዋ:: ቤዴራ ሚዲቢኒዴስ ዩኒቨርስቲዴስ ኮሌጆኺስታ ክንታንኩ ክንታንትካ ክንቴ ኬውጝፄካማ ጝንዳ እንጅኩጝስ አንኮሊውሳ ፉሬ አታንኩ አኽⶓኪላ ክንታንቲ ዙማ::

ክንቲ ልምትጝ  ክንታንትካ ቴስፌ ኬውካማ ዳዴኽሾ፣ ድኪ ሱስሾ፣ አቒውሳ ይወቶ ድፅጝሾስታ ንብሬቶ ዜሬፍጝሾ ቱዋንታ ጉሽጝፃው አኽⶓ ክንታንቲ ድኹዋ:: አጌር ሴላማ ያኻማ ክንታንትካኪ ያኻ ክንትፃንትካ ክንትጝ ክንትፅጙሳ ቴርቶ ጄሜሩኒጊ ክንታንትካኪ ያኻ ክንትፃንትካዳ ታምብኹ ሼው ፅንታው ዱንትጝ አኹኪ ሼው ፅንታው ቻኒስት ዙርጝስ ካላው አኽⶓኪላ ዙማ:: እን አጌራታጊ ፌቴርስትኹ ጋቻዴስ ሴላምሾ ዙርጝስ፣ ኬውጛማ እሺኹ ክንቲ ጄሜራታ፣ አቒው ይወትኪ ያኻ ንብሬት ድሳቲታ ታምብዌን አካልካኪ ያኻ አጌር ሹማጌልካ እንቲታኪ እምኔትኩ ታብልካ ዊዳፌ ሰላሞ ዙርፃማ ቲሪትጝፅጝስ ታምቦጊ ፊትጛንታ ክንታንቲ ካሴ::

ክንታንትካ ፊቴ ጊዞ ክንቲስ እርዳታንኩሳ ሜፃፍካዋስታ ፌይኹ አሜትዳ ክንቱንኩሳ ዴብታርካዋ ዙርካማ አንቤብጝስታ ጊምቢጝ ፋይፃው አኽⶓ ክንታንቲ ዲብሳማ ናኪኒ ሰላሙ አኺኒ አንኮሌ አሬቤሻ ችኹኒኪላ ክንታንትካ ቴስፌ ኬዋቲንታኪላ ዱኹዋ::

አዊ ብሄረሰብ ቺፅጝፂዳ እንጃቢሪ  ክንትፃንትካው ክንቲው ኮሌጅዳ ሼው ፅንታው ክንትፃንቲስታ እንጃቢሪ ዩኒቨርስቲዳ አድርቱ ባይሪ-ፅንታው /developmental physchology/ ሹኻንቲ ዲግሪው ክንታንቲ ያኹንኩ አቶ ወርኩ ገበየሁ አጌርታ ናማኪ ክልልታ ፌትርስትኹ ሰላም አቲጝ አቑዳ ሼው ፅንታዳ ቻኒስቶ ታምፃው አኽⶓ ዙሜካ:: ክንታንትካ ክንቲው ጊቢቲዴስ ሴጋ አኽጝ ሼው ፅንታስ ጉዲስታንታስታ ባይሪውሳ ኪሴ ካንትፃንታ ጉሽፂ አኽⶓኪላ ጌሌፅካ:: አጌርታ ፌትርስትኹ ጋቻ ይጉዋማ ጝን አቕዳ ጋቻ ፌቴርስቱኒ አቕዳ ሜንች አንኮሊው ቤዴል ታምባው አኽⶓ ጉሽካማ አቕዳ አንኮሊው አኹኪ ሼው ፅንታው ቤዴል ታምባኒ ፅኹሮ አቲጝ፣ ማቔችጝ፣ ሼውስ ታክሳማ እልስ ካንታማ እሼያሱሳ ስፍሬ ሴዴድስትጝ፣ አቖ ኬቤርፅⶓ ባይጝስታ ፄጌርጙንኩ ባይሪኩ ኪስካ ካንትስታንኩ አኽⶓ አቶ ወርኩ ጌሌፅካ::

“እንፅኼ ኽይኹ አንኮሊ ድኪ እንፅኺው ስፍራ ያኼ” ኑንኩ አቶ ወርኩ ጋቻ ባይሪውሳ ኪሴ ያጋው አኽጝስ አንኮሊ እንፅኼ አታኒ ችንኬቱ አሊ ያኻው አኽⶓ ጌሌፅካ:: ክንታንቲ ክንቴ ባያማ ጝንዳ እንጅኩዋኒ አንኮሊውሳ ፉሬ አቲጝ ካንትስታው ያኹኒኪላ ፋይፃንቲው አኹኪ ቴኬማቲው ስፍሪሾ ካስጝዴስ ጛጛርትጛስኪ፣ ጝን አቕስኪ ዙራሙሪስኪ አጌራስኪ ቴኬማውሳ እንፅኼ እንፃኽስትጝ ክንታንትካዴስ ማንዲስታው ቴግባር አኽⶓ ዲብስካ:: አጌር ሰላም ያኻማ ክንትጝ  ክንትፅጙ ቴርትኪ ያኻ ሚዲቢኒ እንፅኺ ጄሜራኒ እንፅኺስስታ ክንቲስ እርዳታንኩ ቴግባርካዋ አኮሜችጝ ቱስታው አኽⶓኪላ እርዳትፅካ::

አቒ ፌቴርስትኹ እርዳትጝጚስ፣ ቴቤቤርጚስ፣ ኪቢቢርጚስ፣ እንካንጛማ ዝኩጝስ ያኹኒኪላ አቒ ፌትርስትኹሳ አላሜ ባያማ ጋቻሾ ቱጝስ ሚንች አቒው ይዎትስታ ንብሬት ድሳማጊ አኽⶓ አቶ ወርኩ ጌሌፅካ:: አጌርዳኪ ያኻ ጛርት አቕዳ ጋቻ ፌቴርስታኒ ኩስጝጚስስታ ካሊትጚስ ጋቻዋ ኽይጝስ ካሊስታው አኽⶓኪላ ድኹዌካ አቶ ወርኩ::

ሰላም ቼሜትጛታ፣ ክንታንትካ አንኮሊውሳ ፉሬ አግፃንታስታ ፌቴርስትኹ ሰላሙ ችግርስ አሬቤሽስታቲንታ ክንትፃንቲ ምሳላ አኽጝ ቱስታው አኽⶓ አቶ ወርኩ ዙሜካ:: ክንታንትካዳ ታምብኹ ሼውፅንታሱ ቻኒስት ክንታንትካዳኪላ ታምባው አኽⶓ ጉሽካማ እን ችግሩ ጊዝ ፌያማ ቻ እስካዊ ጌርክ፣ ሰላሙ ጌርክ ይንታው አኽጝስ ቴስፌ ኬውጝ ፋይፃቲው አኽⶓ ጌሌፅካ:: ክንትፃንትካ አቕትስኪ ያኻ ድሚስ ክንታንትካዴስ ኽሳንኩ አኽጝስ እንሳ ወክቶ ፌይጝ ቱስታው አኽⶓኪላ አቶ ወርኩ ዙሜካ:: “ችግርዴስ ፋሌንጋ ዴስቲስታ ሰላም፤ ልኻኽዴስ ፋሌንጋ ብርሃን ዝኩኽስታጊ እንሳ ሰላሙሳ ችግር ፌይጝስ እምፕልትጝ ፋይፄ” ኑንኩ አቶ ወርኩ አጌራው ሰላም ቼሜትጛማ ውላጊ አጌር አቕ ስጋትዴስ ፋማ ልማትሾ ቱዋታ ማቤር አቕኪ ያኻ ትኩታኩ አካልካ ታምቦጊ ፊትጝጛንታኪላ እንፅኼንቶ ፌያፌይጝፅካ::

ክንትፃንትካዴስኪ ያኻ ክንታንትካዴስ ሚንች ዲብ ማንዲስታው አኽⶓ  ጌሌፁንኩ አቶ ወርኩ ውላዴስጊ ማንዲስታው ጋቻዋ ባስጝፃንኩሳ ቴግባርካዋ እንፃኽስትⶓ ባይጝ፣ ዲብስⶓ ባይጝ፣ ድፄ ቴግባሮ ታክስⶓ ባይጝስ ሰላሞ አግጝ ቱስታው አኽⶓ እርዳትፅካ:: ሰላም አቑዳ አንኮላኻዳ ዝኩⶓኪላ ዲብስካማ አቒ ጌርክ ቺፋሱ ቴግባራኻዳ ሰላሞ ታክሱኒ፣ ዲብሱኒስታ እንፃኽስቱኒ ጝን አቕ፣ ወሌን፣ ዙራሙሪ፣ ክልል ናማኪ አጌር ሰላምስ ቼ ናኒስ አቶ ወርኩ ዙሜካ:: ሰላምኪ ዎሬምኪ ዝኩኹ አቑዳ ታፍዳኽ ኑንኩ አቶ ወርኩ ክንታንትካስ ምስላ ያኻው እምፕልታቕያኽ ንካ::

አንኮሊ ዝኩኽ አቒ እምፕሎ አሊሜ አሜማ ግቦ ታምፅጝስ አኬዳማ ልቕልቕ ንጝ ዝኩኽ አኽⶓ ዲብስካ:: ክንታንትካዳ ሼው ፅንታው ዱንትጝ ታምባቲታ ጝን አቕ ቴስፌ እይጝ ቱስታው አኽⶓኪላ ጌሌፅካ::

ቤዴራ ሚዲቢኒዴስ ኽሳንትካ ክንቲኩ ኾትካዋኺስታ ዝኩንኩ ክንታንትካ ፄትቲው ችግርስ ክንቲ ልምስትጝስ ጝን አቕሊ ዝኩኽሳ ታምትጜ ይስጝፅጝ ቱስቴ ንካ:: ክንታንትካኩ ቹዋ ታብል ሰላሞ  ሴቤክጝ፣ ችግርስ ኽዮ ፋይጝ ፋይፄ ኑንኩ አቶ ወርኩ ሰላም ቼሜትጛማ ክንቲው ኾትዴስ ጄሜራማ ሚዲቢኒ እንፅኺ ጄሜራታ ውላጊ ታምቦ ፊትጝጝ ፋይፃው አኽⶓ ዲብስካ::

ሰላም ዙራማ አጌር አቕ ኬቤቤርጚስስታ እንካንስ ዝኮንታ ውላጊ አቕ ካሌቕትስ አድርትጝ፣ ይዎቱ ካሌቕትዳ እምፕል አቒ ጚጛራስ አቕጝስታ ጛጛራሊ አስሜምጝጝ እሊኩ አቕሊ አስሜምጛማ ዝኩጝስታ ችግርስ ኽዮ ፋይጝስታ ክችክቼ ውሳኔ ወሴንጝ ዝኮኒ ሰላሞ ቼሜትጝፅጝስ ሳሴር  አኽⶓ ጌሌፅካ:: ዋሺኒኪ አቒ ይዎቱሳ ካሌቕቶ ቱስቲስ ቴግባርዳ እሽፁኒጊ ሰላም እኑዳ ታፍዳ አኽጝስ ሰላምስ ዜቦ ቲሬንታኪላ  ካሲካ::