እምፕላ አጌራው ልግሱ እልውኒ ቼሜትጛው አጌር አቕዴስ ኩፓው ግብርሲያኽ:: ግብር አጌራው ልማትስ እሼማ አጌራ ፋታው ኢኮኖሚው አችስ ልቕልቒጝስ ካሌውስታ ጋያኪ አሜት ቺፋ ክርፂ ቺፅጝፂውሳ ችግሮ ጉሽፃውሳ ክልልካውሳ ባጀቱሳ ሜዴብጜ ክቺስጝስ አኹኪ ችግር ኽይጝስ ካሊፃው ግብር ፋይስታው ጊዝስስታ ዳድስ ኩፒⶓ ካላኒያኽ::
ዋሼንካኪ አጌርካውሳ ዴሶ ካንትናኒ ፅሊ ጊፁ እንፅኺዴስ ኽሳንቴ አቾ ታምባው ጊፁ ልቕልቐቲ ዌናሳኺስታ ፄውስታው ግብሮ ኬይጙ አሻሪስ ጛ ዝኩዋንቲ አጌራ ፋታው ኢኮኖሚው አችዳ አግስቴታ ባኔ ፊትጜካማጊ አኽⶓ ሚፂው /ጌቢው/ ቢሩ አሜት ቺፋ አቴምፃንኩ ሜፄትካዴስ ቼሜትጝፅጝ ካሊስቴ::
ጋያኪ ይቶፒያ ኮንኩ ሌጌስጝዳ አግስታንኩ አጌርካስ ግብር እምፕል ብሪው ስርታ ካንትስታዊያኽ:: ምክንያቲኪ እምፕል ብሪው ስረ እንፅኼ ቲሪፃኒ ልቕልቒⶓ ካላቲውስታጊ ይቶፒያኪላ ግብሮ ኩፒጛ ጋታ ዋሺኒኪ ልቕልቐቲዳ ቲሪጝ ይጉዋላ::
ናካ ስፍሪ ስፍራስ ችግራ ያኻማ ጅዋው ማዳባሪው ጄውጚ ወክትስ ግብር ኩፓውላ ወክትስ ጄውስታማ አንትጝስ ካላላ:: እዝብ ካሴው ሰር ልማቱ ካሲ ኪላ ኽይስትጝስ ካላላ::
ጋያኪ ናካ ይቶፒያው ኮንኪ ሴላም ቼሜትጜካያስኩ አጌርካዳ ዴሜካ ግብሮ ኬይⶓ ባይጝስታ እንዳራ ሻኽትኹ ንጝ “እንክርቲዳ እንኮኻ ዳጉሉ ቑንዚ ንጚያኽ”::
እስጜ ሼውናማስታ አጌራ ዝኪኹ ኢኮኖሚው፣ ማይቤራዊስታ ፖለቲካው ችግራኻዳ ፍያታ ዴሜካ አጌር አቕ ጚዴስ ማንዲስታውሳ ግብሮ ኬይጝስ አጌራዌ አላፍቶ ፊትጝጝ ቱስቴ::
ግብር ወክትስ ኩፓውላ ይጉዋኒ ዴሜካ አሬሳቻንቲ ፋያውሳ ግባቶ፣ ክንትፃንቴ ቱሰታውሳ ደሞዜ፣ እዝብ ፋያውሳ ስር ልማቱሳ ካሴ ዙርፅጝስ ቼጌርፄ::
አጌራው ቹዋ ኢኮኖሚው ልቕልቕፃንቲ ሞተር ያኹኽሳ ግብር ኬይⶓስስታ ኩፕፅⶓሳ ቴግባሮ እንግርግራ ጐሴሳው ሜሌ ሚፃማጊ ግብር ኬይⶓ ባይጝ አጌራው አላፍትዴስ ቡኪጚያኽ:: እስጜ ሼው ንጝስኪላ ሊሊትጙንኩ ስቤብካስ ግብሮ ኬያኑውላ ይጉጝኪላ ምንግስቱ ካሲስታንትዴስ ፍሻላኽ:: እን አኽጝስ ምንግስትኪላ አጌራውሳ ግብሮ ወክትስ ኩፕፅጝዳ ዝኩኹሳ እንፃኽስትጜ ይስጝፃማ ሲፍጝ ቱስቴ::
ኬያቲንኩዳኪላ አቑኻኽ ታቑኻኽ ያኻውላ እጉስታ እጉ ቴርትስ ሚፄ ኩፕፅጝስ አጌራው ኬምፕዳ ቲሪጝ ቱስቴ:: እዝብኪላ ጚዴስ ማንዲስታውሳ ግብሮ ኬይጝስ አጌራዌ አላፍቶ ፊትጜስ!