ቻሳ ታክስኹ ጐቤዝ

ታደለ አጋጄ

ሊሊትጙንኩ አጌራኩ ኬፍቴንካ ክንቲኩ ኾትካዴስ አሜት ቺፋ ዳቔርስትካማ ፋንኩ ዎታትካ እንፅኼ አቲጙ ምክኒያቲስ እንፅኻ ጋቲታ ሚንቾ ጊዞ ፌይፃና:: ምንግስቱ እንፅኺዳ ቱጝስ እንፅኺ ፋያ እምፕል ስፍሪዴስ እሊው ስፍሪሾ ካሳና:: ያኼስጉ አጌራኻዳ ሊሊትጙንኩ ጊዝካስ ኬሴትስታንኩ ሰላሙስታ ፄትቲው ችግርስ ሚንችካ ዎትትካ እንፅኻ ጋቲታ ዝኩዋና:: እሊውሾስ  ዴሜካ ምንግስቱሳ እንፅኼ ፋይጝዴስ ኪቻ እንፅኼ ፌቴርካማ እንፃኽስትጝስ ዋይሚስታ ያኹንኩ ሚንችካ ዎታትካ አግስታና:: ጛጛርትጛሱሳ ዝኩዊኔ ኬሽጝፅጝዴስ ፌይካማ እሊኩስ እንፅኺውሳ ድሎ ፌቴርካ:: ናካስ አንቤብፅጝስ ፋኑኹኪላ ባርዳር ኬቴምዳ አምባሻ /ቱሼ ቱሻማ ዋይጝስ ዋይሚስታ ያኹኽ ዎታትሊስታ ጚቓሊ ስንሻው አበበ ፄውኹሳ እጂጜኽ ክርፂ ንባብ ያኽይምባ::

ስሞ አይ እስቴዉ?እንፃኺቱሳ ጊዞ ዋትጜይ ፊይፂኹ?

ስምኪ አብርሃም ወርክነህ እስቴ:: ካሜንስታታ ሌጌስኹ  ባንጂ ወረዳ ቢዲ ኪዳነ ምህረት እስታው ዙራሙሪዳኽ:: ጝንአቕሊ አቓታ ዋልታንቲ ቤኖኺስታ ክንቴ ሲፍጛ:: ዋልታንቲ ቤንዴስ ክንቴ ኬውጝፃታ ካሜንስታታ ሌጌስኹሳ ዙራሙሬ ባይፃታ እንጃቢሪ ኬቴምሾ ካስኾ:: እንጃቢሬ ካሳታ ቓንፄስታ ሙዞ ጊፅስⶓ ጄሜርኾ:: እንዴስ ፋሌንጋ ጝሺላ ቻግኒሾ ካስጝስ ልቓ አሜትካዋ እጂቱኻ:: ቻግኒዳ ልቓ ጊዝካዋ ፌይፁኒዴስ ፋሌንጋ ማልጛ እንካናው አፄብስ ዴዌላይኒ ባርዳርዳ ጉድ እንፅኺ ዝኩⶓ ድኹዋማ እያዋኪላ ባርዳርሾ ካስታ ኩስጝፅኾ::  አፄቡሳ ኩስጜ ቻቤላታ ባርዳርሾ አንቱኻ:: 2006 ም.አታ አሊዲዳ ይዴስ እንፃቲሊ ባርዳራ አንትናና ፅላ ዶርማዋ እምናና ቱሼ /አምባሻ/ እሊኩዴስ አሬኬብስትናናጊ ዋይⶓ ጄሜርንኾ:: እንስ ጄሜርንኹ እንፅኺስ አንኩዋስታ ፅካ ኩፕፅናናጊ ጛርቶ ካሊንኾ:: እሊኩዴስ አሬኬብስትናና እንፃኽስትናሽንኹሳ እኖጂ ቱሽናናጊ እሊኩስ ዋይⶓ ጄሜርንኾ:: እንስኪላ ሚንችካ ዴንቤንካዋ አፌርንኾ::

ዴንቤንካዋሳ ዋትጜይ እምቴኑ?

አባላምቲዳ እኖጂ እንፅኼ ጄሜርኑታ ሚንች ጌንዜብ እላ እሺኾ:: ዴንቤንካኪላ እንፅኼ ጄሜርኑስ እንፃኻሪታ ካንታሺና:: “እን ድሚስ ዋታ ፄውቴካማ እንፃኽስቴ ካሌኑ? አርቴን” ንካማጊ ሚንችካ አቕ እኖጂዴስ ቱሼ አሬኬብስትካማጊ ካፃና::

እኖጂኪላ እንፅኼ ይስጝፅናና ሲፍጝስ ዴንቤንካዋ ቱስቲስ እምናና እንፅኼ እሳንጝፅናናጊ ካንኾ:: እሊኩሳኪላ ኬፄርናና እንፃኽፅⶓ ጄሜርንኾ:: ያኼስጉ ሚንችካ ኬፄርናና እንፃኽፅኑኩ እንፃኽስታንትካ ምግባር ፅንታሱ ችግርስ ሚንቾውላ ሼውታ እንፃኽስታላ:: ላንጊጊ ጝርጃ አኽናና ማልጜ ቼጌርስትንኾ::

ትዳርሾሳ ዋኒ ትይኹ?

ይፂሊ አብራ እንፃኽስትኑስ ኬፄርናና እንፃኽፅናኩ እንፃኽስታንትካ ሼውታ እንፃኽስትናላ ናኒ ትዳሮ እሚጝስ ፋቱኻ:: ኹናዋ ሚፁስኪላ እንዳርማኪ ጌንዜብ እላ እሺኾ:: ላንጊጊ ናኼስካ ቱትጝንኾ:: እንፅኼ ይስናና እንፃኽስትጝስ ናካ ኬሻንቴ ዝኩዊኔ ዝኩኔ:: ናካ  ላንጊጊ እምፕልትስ እንፅኼ ጉድጛ እንፃኽስትናናጊ አግስትኔ::

ናካ ዝኩኹ እንፅኺው ልቕልቕቲ እንዳራይ ፄጌሬ?

እንዴስ ቤዴራ እንፅኻ ፄዉናና ጉድጛ እንፃኽስትናሽንኾ:: ናካ ኩፅኒ ሴላሙ ችግርስታ እቲኒ ኬቤርጝስ እንፅኺ ማልጜ ኔኬታ:: ምንጊ እንፃኽስትናሽንኹስታ አኻላ:: እቲኔ ጄውናና እንፃኽስትናኻ አኽጝስ ጌርክ ቺፋ ዋይሚ ዴሜካማጊ እንዴስ ፍና እንፃኽስትናሽንኹስታ ጋቲዉ:: እንዴስ ፍና ኩፂ ጉዶ ሚፄ አግፅናሽንኾ::ናካ ኩፂ እሌትስ እኖጂሱ ዝኩዊኒስጃጊ ሚንቾውላ ፊቲ አግስታላ::

እንፃኽስቴታ አግፂኹስ እንዳራይ ፄውቱኽ?

እንዴስ ቤዴራ እንፃኽስታታ ናካ ዝኩዋውሳ ጝኖ ግቢታ:: ኮሰበርዳኪላ ጝኖ ጄፓ:: ጄርካዋ ካሜናታ ጉድጛ ዝኩዌ::

እንዳ አችዳ ታምቤታ እርዳቱንኩ  ዝኩናማ?

አን እንስ አችስ ታምባታ እዬስ እርዳትኹ አይኪ አቒ እላ:: ይውስ ፅሬትስስታ ልፋትስ ጃላስታ ኩክራ ጊጛታ እንስ ታምፓ:: እዬስ ጌንዜቦኪ ያኻ እሊውሳ ዲቦ እያማ እንፅኼ ጄሜርፅኹ አይኪ አቒ እላ:: ናካ ጉድጛ  ይጛርትጛሱሳ ዝኩዊኔ ክችሳ::

እንፅኻ ጋቲታ ሚንችካ ዎታትካ ዝኩና:: እኒስ እንዳራይ ኩስጝፂ?

ሚንችካ ቱሼ ቱሽጝስ ቺትጛንኩ አፄብካ ዝኩና:: እኒጛሊ ታምትጝኔ:: ታምትጝንኹ ጊዝዳ አላሜ ባይፅካማ ፊጝ ናኻ ናኒ እንኪ ጉዳ ጋቲዊያኽ እናናጊ ኩስጝፅኔ::

እሊው አላሚሾ ካሳኒ ኩስጝፃታጊ እንፅኼ እንፃኽስትካማ ዝኩዋታ ፄፓ:: ዎታትካ ያኼካማ ያኻያሱ ስፍሪዳ አግስታንኩ ዝኩና:: ኩማሮ እንክራኩስታ እሊው አላሚሾ ቱዋንኩ ዎታትካስ እንፅኼ ይስካማ እንፃኽስታንታ ኩስጝፄ::

ዎታት አብርሃምቓሊ ፄውስትኹ እጂጚኪላ ሲፋውስታ ዲጋ::

ወታት አብርሃምቓኪላ ይስካማ እንፃኽስትጝስ ኪሴ አግⶓ ሲፋውስታ እንክርፄ::

ስም አይ እስቴው? አብርሃምሊሳ ዋትጜ ታምትጝትኹ?

ስምኪ ውበቴ ስሜነህ እስቴ:: ጝናአቕ እያዋ ክንቲዴስ ኬውጝፄካማ 2007  አብርሃምስ:: ባርዳርሾ አንቱኻ:: እንፅኼኪላ ጚሊ አኽናና እምፕልዳ እንፃኽስትኔ:: ኬውጝፅኹሳ ክንቴኪላ እንዳ አንቱኒዴስ ፋሌንጋ ፅካንቲ ቤኖኺስታ ዊትኾ:: ፅካንቲ ቤንዳ ዋይሚ ይንታያውላ ይጉዋኒ ጛርቱሳ ክንቴ ክንትጝስ ታክሱኒውላ እንሳ እንፅኼ እንፃኽስትⶓ ይስጝፃታ ሲፍኾ::

እንፅኼ ዋኒስታ ዋትጜይ እንፃኽስቴኑ?

እሊኩ እንፃኽስታንትካዋ ዴሜክጝስ አብርሃም ብኮ ብኩሴ አን ዴሜካ ኻርዴስ ዋልቲ ሳታዴስ ፋሌንጋ ቱሼ እንጂፄ:: ጉሪጛስ ኩፅኒ ቱሽንኹሳ ቱሼ ዙሬካማጊ አሬኬብፃና:: እንፃኽስትናና አግፅንኹሳ ጌንዜቦ ዴሜካ ኩቦ ድርብኔ:: አግፅናው ሚፂዴስ እሌትስ ያኻውሳ ቴኬምስትኑኒዴስ ፊታውሳ ዴሜካ ክብስኔ:: እንፃኽስትንኹ  ጌንዜብስኪላ ዝኩፄ ጝኖ ግቢትና:: እኖጂ ኬፄርናና እንፃኽፅናሽኑክኪላ ጛርቶ ካሌካማ እንፃኽስታንታ ፄውና::

ይንታውስሳ እንዳራ እንፃኽስትጝስ እክዶ እምቲካ?

ናካ እቲኒ ዋይሜ ዴሜካማጊ ካስጝስ እንፅኺ ማልጛ ኔኬታ:: እንዴስ ቤዴራ እንፃኽስትናሽንኹሳ ላካሳ እንፃኽስትናላ:: እንዴስ ፋሌንጋ እሊውሳ እንፅኼ ኪስናና እንፃኽስትጝስ እክዶ እምና:: ስይ ጝናሳ አኹኪ ዝቒ ጝናሳ ብስጝስ ታክስና::

እንፅኼ ፋያንኩ አቕስ እንዳራይ ኩስጝፂ?

አይኪ አቒ ጌንዜቦ አግፃው እንፅኺስ ያኼስጉ እንፅኼ ናኪጝ ቱስታላኽ:: ዋይስታማ  ሚፄ አግፅፃውሳ እንፅኼ ናኪጝ ፋይፃላኽ:: እንፅኼ ናካኑላስ ኩምኔጌርስ እንፃኽስቱኒ ሌጌሳቲው አቒ እላ::  እሊኩ አቑሳ እርዳቴ ፋይⶓ ባይካማ ጛሬ ካሌካማ እንፅኼ ናካኑላስ አላሚስ እንፃኽስትጝ ዝኮ::

አይኪ አቒ እንፅኼ እንፃኽስቱኒዴስ ጚጛርትጛስ ሼጌ ዝኩዊኒ ጉሴ:: እሊኩ አቕስኪላ እንካንስቴ:: እንፃኽስትጝ ማልጛ ኩዊያኽ:: እንፅኺ ውላስ ፋይፃንቲያኽ::