“አሴሳንቴ አቱኽ ሴንቲ”

ታደለ አጋጄ

ይቶፒያዳ ዲጊ ጊዝዴስ ናቴ ባስጛማጊ ይንትኹ ጋቻ አቒው ይዎት ድሳታ፣ አብትስታ ንብሬት ዎዴማታስታ እምፕልታቕ እሺኑ ዙራሙሪዴስ ፌኔኬልጛንታ ፄዋማጊ አግስቴ::

ሚንችካ አሜትካስ ኬቤቤርጜካማስታ ቱትጜካማ እሺንኩ እምፕልታቖ  ብሄሩ ፖለቲካስ  እምፕልታቕ ጛስጛዋ ታራታርጜካማ ዝኩዋንታ ብሄርስ፣ ኮንኪስ፣ እምኔትስስታ ፄጌርጙንኩስ ቤንጝፄካማጊ እምፕልታቖ ባስኹ ችግራኻዳ ሚፅጝስ ሰላም ዝኩዋቲታ ፄዌካ::

ጋቺትጚው ቹዋ ጉሽፂ እምፕልታቕ ክቻዴስ ፌቴርስትኹ ያኺትየስ ስልታኑ እንጉ ሴኬርፁኩ ፖለቲካኩ አቑ ችግር አኽጝ ሚንችካዴስ ቤፍትኹ ጋቲዊያኽ::

ናካ ካንትስታማጊስታ ዴስስታማጊ ይንትኹ ስልታኑ አግፅፂ ዳድታ ካንትስታውኪላ እምፕልታቖ እምፕልታቕሊ ጋቺትጝፅጝስ፣ ብሄርስ፣ ኮንኪስስታ እምኔትስ እምፕልታቕስ አጀንዴ እይጝስ ድጙትጛታስታ ጌውስጛታ ፄውጚያኽ::

አሳብስ አሳቦ ኬዌምጝስ ኬሻንቴስታ ሚንችካ ሲፋኑሳ አሳቦ እሚጝስ ዲሞክራሲው ዳድስ ድምፅስ ኽስካማ ስልታኖ እሚⶓ አቱንኩ ፖላቲካኩ ጌፄን አቑሳ ይዎቶ ድፅጝስ፣ ፌኔኬልጝፅጝስስታ አብቶስታ ንብሬቶ ዜሬፍጝስ ፄውስታው ፅሬት አጌር ባስኹ ችግራኻዳ ቱዋታ ፄዌካማጊያኽ::

ፌዩንኩ አሜትካዳ እንታኮው ችግርስ እሺኑ ዙራሙሪዴስ ፌኔኬልጜካማ ላጛ አሜታዴስ ጃላ ቻግኒ ኬቴምዳ አግስታንኩ ፌኔኬልጛንትካ አዊ ብሄረሰቡ ቺፅጝፂ ምንግስት ኮምኒኬሽንስ እርዳታውሳ አቴካማ ችግርዳ እቲⶓ ዙሜካ::

ኦሮሚያ ክልልዴስ ፌኔኬልጜካማ ቻግኒ ኬቴምዳ ዝኩንኩ እምፕልታቕ ክቻዴስ ዊዛሩ ህድጃ ኡመር እምፕልካኽ::

ዎለጋ ዙራሙሪ ኡመሩ ወረዳዳ ኬሴትስትኹ ሰላሙስታ ፄትቲው ችግርስ ፌኔኬልጜካማ ላጛ አሜትዴስ ጃላ ቻግኒ ኬቴምዳ ዝኩዊኔ ፄውⶓ ዙሜካ::

ዊዛሩ ህድጃ ዙሙኑውስታ ናካዳ ኹዋኑሳስታ ዝቓኑሳ አቴካ:: ክራይቴካማ ዝኩዋኑ ጝንስ ኪራዩ ኬያኑ ጌንዜብ ድሳ:: ቑንዳስታኒ አኬምስታኑ ጌንዜብ ድሳማ ባስኹ ችግራኻዳ ቱⶓ ድኹዌካ:: እንታኮው ችግራኻዳ ዝኩንኩ ፌኔኬልጛንትካዋ ምንግስት አምቢታማ እሺኑ ዙራሙሪሾ ዙርፃታ ካሲካ::

እንዴስ ቤዴራ እርዳቲ ምንግስትስ ዲጋሺኹ አኽⶓ ድኹንኩ ዊዛሩ ህድጃ እርዳቲ እንግራ ጄሜራያታኪላ ካሲካ::

እሊው ኦሮሚያ ክልል ኡሙራ ወረዳዴስ ፌኔኬልጜካማ ቻግኒ ኬቴምዳ ዝኩንኩ እምፕልታቕ ክቻዴስ አቶ ሁሴን አብዲሳ ፌኔኬልጜካማ ይንቱኒዴስ 3 አሜታዴስ ጃላ አኽⶓ ቶኬምካማ ጛኪላ ማልጛ ባስኹ ችግራኻዳ አግስታንኩ አኽⶓ ዙሜካ::

ምንግስት ዊዳፊስ ፄትቲውሳ ችግሮ ኽይጝስ ቤዴራ እሺኑ ስፍሪሾ ዙርፃታ ካሲንኩ ፌኔኬልጛንትካ ታፍዳ እሚኑ ጌንዜብ ድኻማ ወባው ወረርሽኝስታ እሊኩ ፌያፌይጛንትካ ቑንዝካዋ አኬምስትጝስ ማልጛ ቼጌርስትⶓ እርዳትፅካ::

ቻግኒ ኬቴምኩ እምፕልታቕ ፌኔኬልጛንትካዋ አይኔትስስታ ጌንዜብስ ፄዋኑ እርዳቲ ዳላቲው አኽጝስ ምንግስት እንዴስ ቤዴራ እያሺኹሳ እርዳቴ እያታኪላ ካሲካ::

ፌኔኬልጛንትካ ናካዳ ዛኽሊ ናቒካማ እዝብ እርዳታማ እሺⶓ ቶኬምካማ ምንግስት ካሊስታው ዳድስጊ እሺኑ ስፍሪሾ ዙርፃታ ካሲካ::

እሊው ፌኔኬልጛንትካ ክቻዴስ ጋሻው አቤና ፌኔኬልጜካማ ቻግኔ ይንቱኒዴስ እምፕል አሜትስታ ኪንዴ እጂⶓ ጌሌፅካማ ናካዳ እርዳታውሳ አቴካማ ምርኪስ ጉዲስትⶓስታ ቑንዚስ እምስትካማ አኬምስታኑሳ አቴካማ ዝኩⶓ እርዳትፅካ::

እሺኑ ዙራሙሪዴስ አብትስታ ንብሬት ድሳማ ንፍስ ፊትስⶓ ጌሌፁንኩ አቶ ጋሻው ቼጌርስቱንኩሳ እሊኩሳ አቖ እርዳታሺንኩ ናካዳ እርዳቴ ቻቤላንትካ አኽⶓ ዙሜካ::

ቻግኒ ኬቴሙ አዳጊ ካላካልጚውሰታ ምግቡ ዋስትኒው ዎኬልሰታንቲ ውማይቲኒ አቶ ዮሱፍ ሁሴን ቻግኒ ኬቴሙ ቺፅጝፂዳ 2013 ም.አታዴስ ጄሜርካማ ኦሮሚያ ክልልዴስ ፌኔኬልጜካማ ይንቱንኩ 2ሻይ 4 ሊኻዴስ ጃላ ፌኔኬልጛንትካ ቻግኒ ኬቴምዳ አግስታንኩ አኽⶓ ዙሜካ::

ፌኔኬልጛንትካ አኽⶓ ንባሮ ክችክቺስ ቼሜትጝፁኒዴስ ፋሌንጋ አጉዊዴስ ይንታውሳ እርዳቴ ፌኔኬልጛንትካስ ታምፃኒስ እጂⶓ ቶኬምካማ ናካ ኩፂ ወክታዊ ፄትቲው ችግርስ ጉንቤት አርፊዴስ ጄሜራማ እርዳቴ ኬውጝⶓ ዙሜካ::

ቻግኒ ኬቴም ጊዝቺፋ ፌኔኬልጛንትካው ቼፍ ዴሜካማጊ አኽⶓ ዙሙንኩ አቶ ዮሱፍ ምንግስት 2013 ም.አሜታስስታ 2014 ም.አታስ  እርዳቲ ፌኔኬልጛንትካስ እይስቱስ እጂⶓ ጉሽካ::

ፌኔኬልጛንትካ ዳላው ሜቴንስ አብትስታ ንብሬት እላቲንኩ አኽጝ ወባዋስታ  እሊኩ ፌያፌይጛንትካ ቑንዝካዋ አኬምስትጝስ ቼጌርስትካማጊ አግስታንኩ አኽⶓኪላ አቶ ዩሱፍ ጌሌፅካ::

እርዳቲ ቱስታው ዳድስ ዲጋማጊ ጋቲው አኽጝስ ፋይስታው አካልጊ ፌኔኬልጛንትካ እሺኑ ዙራሙሪሾ ካሲኒምባኺስታ እርዳቴ ፄዋንታኪላ አቶ ዩሱፍ እንፅኼንቶ ፌያፌይጝፄካ::

ፌኔኬልጛንትካ ናካ ዝኩዋኑ ስፍሪ እንኩዊኒ አኽጝስ ወባውስታ እሊኩ ቑንዝካ ኬሴትስትካማጊ አኽⶓ ቶኬምካማ ናካኪላ ማልጛ ባስኹ ችግራኻዳ አኽⶓ ዙሜካ::

ቻግኒ ኬቴሙ ቺፅጝፂው ትክትሊ ከንቲባስታ ክንቲው ፅፌት ጝናሱ አላፊ አቶ ይበልታል ሰይድ ጛሾስ ቻግኒ ኬቴሙ ቺፅጝፂ እምፕልታቕዳስታ ፌኔኬልጛንትካዳ ወባውሰታ እሊው ወረርሽኝ ቑንዚስ ጉዳት ታምባቲታ ሲፍጜካማ አኽⶓ ቶኬምካ::

ኦሮሚያ ክልልዴስ ፌኔኬልጜካማ ቻግኒ ኬቴምዳ ዝኩዋንኩ ፌኔኬልጛንትካ እሊኩ ኬቴምኩ ዝኩዋንትካታጊ ፍትሬቱ አዲጊስ ያኻ እሊው ችግርስ ጉዳት ታምባስኩኒጃ ምርኪው ምክንያቲስ ጉዲሱቱንኩ ፌኔኬልጛንትካ እላቲንኩ አኽⶓ ቼሜትጝፅና ንካ::

ቻግኒ ኬቴምኩ ዝኩዋንትካ ፌኔኬልጛንትካዋ አችቺፋ ዝኩኹ አዳጌ ካላካልጝጙስታ ምግቡ ዋስትኒው ኾትካው ቴሳትፍስ እርዳቲ ፄውስታማጊ አኽⶓ ትክትሊ ክንቲባ ዙሜካ::

አዊ ብሄረሰቡ ቺፅጝፂው አዲጌ ካላካልጝጙስታ ምግቡ ዋስትኒው ፅፌት ጝናሱ በዴራ ቲንኪክፂው ውማይቲኒ አቶ ደመከ በሪሁን ጌሌፁኑውስታ ብሄረሰቡ ቺፅጝፂታ ሊሊትጙንኩ ጊዝካስ ፌኔኬልጜካማ ይንቱንኩ እምፕልታቑ ቼፍ 34 ሻይ 7 ሊኻዴስ ጃላ እምፕልታቕ ዝኩⶓ ቶኬምካማ ፌኔኬልጛንትካ ዛኽ ዝሜድካሊ ናቒካማስታ ኬቴምዳ ጝኖ ክራይቴካማ ዝኩዋንኩ አኽⶓ ጌሌፅካ::

ብሄረሰቡ ቺፅጝፂታ ውላ ወረድካዴስ ኬቴሙ ቺፅጝፅካዳ ፌኔኬልጛንትካ አግስታንኩ አኽⶓ ዙሙንኩ አቶ ደመከ ፌኔኬልጛንትካ ዝኩዋኑ ካምፕ እላቲው አኽⶓኪላ ዙሜካ::

ምንግስት 2013 ም.አታዴስ ጄሜራማ ፌኔኬልጛንትካ ምግቡ እርዳቲ ፄውስቱስ እጂⶓ ቶኬምካማ ዲጊ ጊዝዴስ ናቴ ኩፂ ወክታዊ ክልሉ ፄትቲው ችግርስ እርዳቲ ቲሪⶓኪላ ጌሌፅካማ ፌኔኬልጛንትካዳ ታምባው ችግርስ ጉዳት ታምባማጊ አኽⶓኪላ እርዳትፅካ::

ሊሊትጙንኩ ዙራሙርካዴስ ፌኔኬልጜካማ ይንቱንኩ እምፕልታቕ ሊሊትጙንኩ አጌራኩ ዙራሙርካዳ ኬሴትስታው ጋቻስ ቲሬውላስጊ ፌኔኬልጚ ሲፌ:: እን ችግርስ ምንግስት ዊዳፌ ኽዬ እይጝስ ጉዳይ ትኩታኩ አካልካሊ እምፕልትስ እንፃኽስትጝ ቱስቴ:: ፌኔኬልጛንትካስ ያኻውሳ እርዳቴ አሌማ አቡቕ እርዳታንትካ አችትካሊ ቴቤቤርጝስ እርዳቲ እምቢታማ ታምባታ ፄውጝ ፋይፄ::

ፌኔኬልጙንኩሳ እሺኑ ዙራሙሪሾ ዙራንታ ፄውጝ ዴሜካ ምንግስትዴስ ማንዲስታው ዊዳፊ ኽይቲያኽ::