አዴሮ ቻቤሉንኩ ክንታንትካ

ዘውዴ በካሉ

ክንቲው ዜርፍዳ ትኩቶ እይጝስስታ ክንቲውሳ ፃንኩቶ ማንዲፅጝስ ክንታንትካኪ ያኻ ክንትፃንትካ ክንቲው ፍኖታ ካርቴ ሲፍካማ እንፃኽስትጝስ ክንቲው ቴርት ኬሽጛማጊ ይንታ::  ጋያኪ 12ንቲ ቤኑሳ አጌር አቡቑሳ ፍታኔ ፌቴንስትካማ ክርፄ ዋይሜ ሜዜጌብፃንታ ትኩት እይስታ:: ፌይንኩ ሹኻስታ ሴዛ አሜትካዴስ ጉሽፃማ ዩኒቨርስቴ ሚፅፂ ፍታኒ ኽሳንትካ ክንቲኩ ኾትካዳ እይስትጝ ሲፋማ ክንቲው ፃንኩትስ ኽሳንቲ ፍሺ ፄዌ:: ያኼስጉ እምፕል እምፕል ኩሚቺ ክንታንቲዴስ ይጐ ሚንቺትስ ክንታንትካ ዩኒቨርስቲሾ ሚፅፄ ዋይሜ ሜዜጌብፅካማጊ ጋቲውያኽ:: ክልላኻዳ 2015 ም.አሜታሱ ክንቲው ዝቤንዳ 12ንቲ አጌር አቡቑሳ ፍታኔ ፌቴንስቱንኩ 214 ሻይዴስ ጃላ ያኻንኩ ክንታንትካ ያኹኒኪላ 500ስታ እንዴስ ጃላ ዋይሜ ሜዜጌብፁንኩ ዴሜካ ልቓ አኽⶓ ንባርካ ቶኬማና::

እንቲታኪ አዊ ብሄረሰቡ ቺፅጝፂዳ 2015 ም.አሜትዳ 12ንቲ ቤኑሳ አጌር አቡቑሳ ፍታኔ ፌቴንስቱንኩ 13 ሻይ 787 ክንታንትካዴስ 696 ክንታንትካ ይቢችካ ዩኒቨርስቲሾ ሚፅፄ ዋይሜ ሜዜጌብፅⶓ ብሄረሰቡ ቺፅጝፂው ክንቲው ሜምሪዴስ አግስትኹ ንባር ቶኬሜ:: አዊ ብሄረሰቡ ቺፅጝፂታጊ አኬድስትኹሳ ላካ ያኻውላስ ይጉኒኪላ 2014 ም.አሜትሊ ክንትስታኒ 2015 ምሬት አሜታሱ ክንታንትካው  ኬሽኹያኽ:: አዊ ብሄረሰቡ ቺፅጝፂዳ አግስታንኩ 41 ኬፍቴንካ ክንቲ  ጝንካዴስ እምፕል እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝናኽ::  እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝና 2016 ም.አዳ ዩኒቨርስቲሾ ካሳንኩ ክንታንትካስ አባላምቲ ጊዝስ አዴሩሳ ዋንቼ እይጙሳ ቴርቶ ካንትኹስ ፁኁፍ ቴርስና ክርፂ ንባብ::

2015 ም.አሜትስ ዩኒቨርስቴ ቱፄ ፍታኔ ፌቴንስቱንኩ 12ንቲ ቤኑ ክንታንትካ ክቻዴስ ዩኒቨርስቲሾ ቱፂውሳ ዋይሜ ሜዜጌብፁንኩ ክንተንትካ ሊኽዴስ ሹኻ ታፋ አኽⶓ ንባርካ ካንትፃና::

እንጚኪላ ሚንችካዋ ኪንክፅኹስታ ክንቲው ቴርትዳ ይሴን እንፅኺ ፋይፃው አኽⶓ ካንትፃማ ፌያ::  2015 ምሬት አሜትዳ 485 ክንታንትካዋ ፌቴንፃማ 47 ክንታንትካዋ ዩኒቨርስቲሾ ሚፅፅጝስ ካሉኽ እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝና ዩኒቨርስቲውሳ ቱፄ ዋይሜ ሜዜጌብፁንኩሳ ክንታንትካዋ ክንትፃንትካስታ ቹዋ ታብል አግስቱኑዳ ዩኒቨርስቲሾ ሲፋ::

እንጚ ቴርትዳ  ዩኒቨርስቲሾ ቱፄ ዋይሜ ሜዜጌብፁንኩ ክንታንትካስ ክንቲ ጝና  ዴስ ንጝስስታ ክንታኑ ክንቲው ዜርፍዳ ክርፄ ዋይሜ ሜዜጌብፅካማ ክንቲ ጝናሳ፣ ዙራሙሬ ናማኪ አጌሮ እቑፃንታ አዴሩሳ ዋንቼ እያ:: እኒ ክንታንትካ አዴር ጛጂ ይቢቺዳ ይጉዋቲታ ሲፋንኩ ክንታንትካስ ንጝኪ 2016 ምርት አሜትዳ ዩኒቨርስቲውሳ ሚፅፄ አጌር አቡቑሳ ፍታኔ ፌቴንስታንኩ ክንታንትካስ ቻቤሉኑሳ አዴሮ አሬኬብፅካ::

ክንታንታ ክድስት አየነው እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝናሱ ፍትሬቱ ሳይንሱ ክንታንታ ታኹስ 2015 ም.አሜቱ አጌር አቡቑሳ ፍታኔ ፌቴንስቴታ 484 ዋይሜ ሜዜጌብፄ:: ሚዚጊብፂኹ ዋይሚስኪላ ዴስቴና አኽⶓ ጊሊፄ:: ክንታንታ ክድስት እንሳ ዋይሜ ሜዜጌብፅጝስ ጛውኪ ያኻ አፄብካው እንቲታኪ ቹዋ ታብሉ ፍሺ ኬፍቲኒ አኽⶓ ድኹታ:: 2014 ም.አሜትዳ ፌቴንስቱንኩ ክንታንትካዴስ ዴስ ካፅጝስ ኬሽኹሳ ዋይሜ ሜዜጌብፅጝስ ፕሮግራምስ ፂኒስታሽቲት አኽⶓኪላ ድኹታ::

ክንታንታ ክድስት ኬሽኹሳ ዋይሜ ሜዜጌብፅጝስ ክንታንትካ አላሚዳ ትኩትጝ ፋይፃው አኽⶓ ዲብስታታ ፍንቴንካ ክንታንትካዋ ካንትጝስ ኬሽኹስ እንፃኽስትጝስ ጁትጝጝ ጃጊ ቴስፌ ኬውጝ ቱስታቲው አኽⶓ እንክርፄ:: ይንታውስ 12ንቲ ቤኑሳ ፍታኔ ፌቴንስታንኩ ክንታንትካኪላ ፌይኹ አሜትዳ ዩኒቨርስቲሾ ሚፅፄ ዋይሜ ሜዜጌብፁንኩ ክንታንትካ ልቓኽ ንካማ ቴስፌ አቲጝዴስ ፌካማ እክድስ አንቤባንታ፣ አፄብካሊ እርዳትጛንታ፣ ግልፃ ያኻያሱሳ ክንታንትካዋኪ ያኻ ክንትፃንትካዋ ካሲካማ እርዳትስታንታ ኩስጝፄ::

ክንታንትካ ጉድጛ ቴርቱኒጊ ውላ ካሊስታው አኽⶓ ሼው ንጝ ቱስታው አኽⶓኪላ ክንታንታ ክድስት ድኹታ::

እሊው እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝናሱ  ክንታንቲ አብነት አንዱአለም 2015 ም.አሜቱሳ 12ንቲ ቤኑሳ አጌር አቡቑሳ ፍታኔ ፌቴንስታማ 533 ዋይሜ ሜዜጌብፃማ:: እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝናዳ 2015 ም.አሜቱሳ አጌር አቡቑሳ ፍታኔ ፌቴንስቱንኩ 485 ክንታንትካዴስ 47 ክንታንቲ ይቢቺ ክርፄ ዋይሜ ሜዜጌብፅጝ ዜሬቕቲኒ አኽⶓ ዙማ::

ክንታንትካ ክርፄ ዋይሜ ሜዜጌብፃንታ ክንቲ ጝና እክዶ እሜማ ክንታንትካ ፕሮግራምስ ፂኒሳንታ፣ ክንታንትካ አፄብካሊ እርዳትጛንታ፣ ክንትፃንትካ እርዳታንኩሳ ካስካዋስታ ሜፃፍካዋ ቴኬምስትካማ ክንታንትካስ ክንቴ እያንታ፣ እንቲታኪ ቹዋ ታብል ክንታንትካዋ እርዳታንታስታ ፋይፃውሳጊ ዋኽትጝፃንታ ክንቲጝና ጋማጋማማ ዋይሚ ክርፂ ያኻታ እንፃኽስትⶓ እንክርፃ::

ክንታንቲ አብዮት 2016 ም.አሜትዳ አጌር አቡቑሳ ፍታኔ ፌቴንስታንኩ ክንታንትካ ይስካማ አንቤብጝስ 600ዴስ ጃላ ዋይሜ ሜዜጌብፃንታ ካንቴ እያ:: ክንቲ ጝና እይኹሳ አዴሮ ቻቤላማ ፍንሾስ ኪላ ዝኩኽ ክንቲው ዜርፍዳጊ ኬሽኹሳ እንፅኼ እንፃኽስትጝስ ኩርፂኒ አኽⶓ ዙማ:: እይስትኹ አዴሩ ዋንቺ ይንታው ክምንትስ ፌያፌይጛታ 2016 ም.አሜትዳ ፌቴንስታንኩ ክንታንትካስ አዴሩሳ ዋንቼ አሬኬብፁንኩ አኽⶓኪላ ድኹዋ::

ክንታንትካ ቴስፌ ኬዋኑላስ አላሚስስታ  እክድስ ጉስስትጝስ እንዴስ ጃላ ዋይሜ ሜዜጌብፅጝ ካሊስታው አኽⶓ ክንታንቲ አብዮት ዙማ:: እንዴስ ፍና ፌቴንስትካማ ዋይሜ ያጌካያስኩሳ ክንታንትካዋ  ካንትⶓ ባይካማ ጛው አላሚስ ይሴካማ ፂኒሳንታስታ ክርፄ ዋይሜ ሜዜጌብፃንታ ካንቴ እያ::

አዊ ብሄረሰቡ ቺፅጝፂዳ እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝናሱ ጛራ አቶ ትላሁን ከበደ ጌሌፁኑስታጊ 2015 ም.አሜትዳ 12ንቲ ቤኑሳ አጌር አቡቑሳ ፍታኔ ካፁንኩ ክንታንትካዴስ ዩኒቨርስቴ ሚፅፄ ዋይሜ ሜዜጌብፁንኩ ክንታንትካ ሊኽዴስ 9 ትኩሚ 8 ታፋ አኽⶓ ጌሌፅካ:: ሜዜጌብስትኹ  ዋይሚ አጌርታጊ ካንትስታኒ ጉድ ያኹኒኪላ ክንቲ ጝናስታ ካንትስታኒ እክድዴስ ኩክራ አኽⶓ ዙሜካ::

2015 ም.አሜትዳ 12ንቲ ቤኑሳ አጌር አቡቑሳ ፍታኔ ፌቴንስትካማ ዩኒቨርስቴ ሚፅፄ ዋይሜ ሜዜጌብፁንኩሳ ክንታንትካዋ ቹዋ ታብልስታ ክንቲ ጝናስኩ አካልካ አግስቱኑዳ ሲፍጙ ቴርት ካስጙኽ አኽⶓ አቶ ትላሁን ጌሌፅካ:: ሲፍጙ ቴርትዳኪላ ክንታንትካስ አዴሩ ዋንቺ እይስትⶓ እርዳትፅካ:: ዩኒቨርስቲሾ ቱዋንኩ ክንታንትካ ጛጂስ እይስትኹሳ አዴሮ ሲፋንኩ ክንታንትካስስታ ክንቲ ጝናስ አሬኬብፅⶓ ድኹንኩ አቶ ትላሁን ውላጊ አላፍቶ ፊትጛታስታ ኬሽኹ እንፅኺስ ጁትጛታ ፄዋው አኽⶓ ጌሌፅካ::

ፌይኹ አሜትዳ ሜዜጌብስትኹ ዜሬቕቲኒ ዋይሚ ይንታው አሜትስኪላ ካቢስታቲታ ይሴን እንፅኺ አኮሜችስታማጊ አኽⶓ ክንቲ ጝናሱ ጛሪ ጌሌፅካ:: እንፃኽስታውሻው እንፅኺ ፌይኹ አሜትዳ ኬሻንቴ ዋይሜ ሜዜጌብፁንኩ ክንታንትካ ካሱኑዳጊ ክንቲው ኾትዳ ክርፄ ዋይሜ ሜዜጌብፃንታስታ አጌሮ እቑፃንታ እርዳታው አኽⶓ ዙሜካ:: ክንታንትካ ጛጂስ እይስትኹሳ አዴሩሳ ዋንቾ ይንታውዳ ፌቴንስታንኩስ አዴሩሳ ዋንቼ እይጝ፤ ፌይኹ አሜትዳ ዜሬቕቲኒ ዋይሚ ሜዜጌብስቱክ ክንቲው አይኔትካዳ ግባቶ ዋኽትጝፅጝስ ሊሊቲ እርዳቲስ ኬሽጝፅጝስ እርዳታው አኽⶓ ጌሌፅካ::

ዞኑ አችታጊ አግስታንኩ 41 ክንቲ ጝንካዴስ እንጃቢሪ ትክላሊስታ ኬፍቲኒ ሜሴናዱ ላጛንቲ አች ክንቲ ጝና ሹኻንቴ አቾ እሚⶓ ጌሌፁንኩ አቶ ትላሁን ፍንሾስ ዳንጉዌንካዋ ዋኽትጝፅጝስ ኪሲስ ቲጋንኩ አኽⶓ ዙሜካ::