“ፍቶ ወክትስ አቲጝ”

ታደለ አጋጄ

ዋሺኒኪ ዲሞክራሲያዊ አጌርዳ አግስታው ፍቱ ቴርቱ ቹዋ አላሚስታ ግብ ምንግስቱስታ እዝቡ ሜብትስሰታ ትክምስ ቢዲሬ ስፍሬስታ ጊዞ እያማ እንፃኽስትጚያኽ:: እን እንፃኽስትጝጚኪላ አኮሜችስታው ፍቶ ቼሜትጝፅጝስያኽ:: ፍቶ አግፅጙ ሜብት አሌም አቡቖኺስታ  እግዳ ውላዳጊ ዴንጌግስታማ አግስታውያኽ::

አውሮፓው እዝቡ ቼፍታ ቴሳስ 10 ጌርክ 1948 ም.አሜትዳ ቴቤቤርጙንኩ ምንግስትካው ትክላሊ ጉባይዳ ፄዴክኹ አሌም አቡቑ ሜብትካው ጊሊፂው ቱንዚ ሶኼታዳ “ዋሼኒኪ አቒ እጋ ምንግስትስኪ ያኻ ዋሺኒኪ እግስ አቕስቶ አግፁኑሳ ሜብቶ ታሲጙ ቴግባር ፌፄምስትኹ ጊዛይ ስልታን ዝኩክ እግኩ ፍርድ ጝንካዋ ካንትኹስ ሜብቶ ኬቤርፅጝስ ካሌ” ንጝስ ዴንገጋማ አግስቴ::

ይቶፒያዳ ፌዴራልዳኪ ያኻ ክልልካዳ ዳኝኔቱ ስልታን ፍርድ ጝናሱ አኽጝ ዴንጌግስታ:: እንቲታኪላ ኢ ፌ ዲ ሪ ው እገ ምንግስት ቱንዚ 37ዳ ግልፅስ ዴንጌግስታማ አግስታውስታ “ዋሺኒኪ አቒ ፍርድስ  ዌሴንስትጝስ ቱስታው ጉዳይ ፍርድ ጝናስ አኹኪ እሊኩ እጐ ዳኚጙ ስልታን እይስትኹ አካልስ ዲግስጝስስታ ውሳኔ አኹኪ ፍርዶ አግፅጙ ሜብት ዝኮ” ኔ:: ድምክኒስኪላ ሲቢልኩስታ ፖለቲካው ሜብትካ አሌም አቡቑ ካልኪዳን /1966/ ቱንዚ 14 ዴሜካ አቕ ውላ ፍርድ ጝንካዳስታ ዳኛንኩ አካልካውላዳ ክችክቺስ ካንፅስትና:: ዲግኹ ወንጄልኪ ያኻ ፍታቤሩ ክስ ወሴንስታው ዋሺኒኪ አቒ እግስ ቲሪትጙኽ፣ ስልታን ዝኩኽ፣ ኔፃስታ ጊሊሊቲኒ ያኹኽ ዳኝኔቱ አካሉላ ዲግጝሰስታ እሊኩስ ወጌናቲው ግልፃ ያኹኽሳ ዳኝኔቶ አግፅጙ ሜብት ዝኮ ንጝስ ኢ ፌ ዲ ሪ ው ፍትህ ሚንስቴርዴስ አግፅንኹ ንባር ቶኬሜ::

እምፕልካ እምፕልካ አጌርካዳስታ ዙራሙርካዳ ፍቶ አግፅጙ ሜብትስታ ፍቱሳ ታምብስታንቶ እግ ፌኬዳውዴስ ጃላ እሊው እግዴስ ሴጋ ያኹኽ እንፃኽስትጝጚስ ቴኬምስታኒስ ካንትስቴ:: እምፕል አጌራኻዳ ዝኩኽሳ ፍቱሳ ታምብስታንቶ ቼሜትፅጝስ ሲፋንኩ ዳድካስ ሊኪጝስ ካሊስቴ:: እንጚኪላ ፍሺዴስ ይጉፅጝስ ታምብስታንቶ እሳንጝፅጝስ እንፃኽስታኒስስታ ዋሺኒኪ አቒ ዋሺኒኪ ዝኩዊኒው አኺኒዳ ያኻማ ክችክቼ ፍቶ አግፅጝስ ካላኒ ፍቱ ታምብስታንት ዝኩጝ ቼሜትጜ::

እኒ ሜብትካስታ ፍቶ አግፅጙ ኔፃኔት ዝኮኩስ አጌርዳ ናማኪ አማኻሪ ክልልዳ ሊሊትጙንኩ ዙራሙርካዳ ፌትርስትኹ ጋቻስ አቕ አግፅጝ ቱስታውሳስታ ካሲካማ ፍቶ አግፅጝስ እንቲታኪ ቤዴል አኹኪ ችግር ታምባኒ ክችክቼ ፍቶ አግፅጝስ ቼጌርስትካማጊ አኽጝ ማሊስቴ:: ሴላም ቼሜትጛያሱ ዙራሙሪዳ አግስታንኩ ፍርድ ጝንካ አኹኪ እግኩ ኾትካ አግልግሎቴ እይካማጊ ጋቲውያኽ:: አዊ ብሄረሰቡ ቺፅጝፂዳ ፍቶ እይጙሳ ካስቶ ካንትኹስስታ አቕ አግፅጝ ቱስታውሳ ላካስ ፍቶ አግፅካማጊ ጋቲው አኽⶓ ካንትኹስኪላ አዊ ብሄርሰቡ ቺፅጝፂው ፍርድ ጝናሱ አላፊ አየነ ታደለ አቕ አግፅጝ ቱስታውሳ ላካስ ፍቶ አግፅካማጊ ጋቲው አኽⶓ ጌሌፅካ:: ዲጊ ጊዝዴስ ናቴ ኬሴትስትኹ ጋቻው ምክንያቲስ አቕ ቱስቲስ ፍቶ አግፅጝስ ብሄረሰቡ ቺፅጝፂው አችስ አግስታንኩ ውላጊ ፍርድ ጝንካ አግልግሎቴ እይጙሳ እንፅኼ እንፃኺስትካማጊ ጋቲው አኽⶓ ጌሌፅካ::

አቶ አየነ ሴላሙ ችግርስ ፍቱሳ አግልግሎቴ እይጝስ እግኩ ውማይቴንካ እንፅኺው ኾትካሾ ካስካማ እንፃኽስታቲንታ ስጋት አኽⶓ ጉሽካ:: እንቲታኪ ቤዴልስትኾ ናው አካልስታ ቤዴልኾ እስታማ ክስ ታምብኹ አካል ኬፄሩ ጌርክስ ፍርድ ጝናዳ አግስታማ ፍርዶ አግፅጝስስታ ቤዴልሰትኾ ናው አካል ዲጋማ ክሶ ዲግስጝስ ቼጌርስትካማጊ አኽⶓ ጌሌፅካ::

አቕ ካሲኑ ካሲስ ፍርድ ጝና አኹኪ እጉ አካልሾ  ካስካማ ፍቶ አግፅጙ ሜብት ዝኮኩስ ሰላሙ ችግርስ አቑ ሜብት ታሲስታማጊ አኽⶓኪላ እርዳትፅካ::

ብሄረሰቡ ቺፅጝፂታጊ ፍርድ እይስታኩ ፍትኩ ኾትካ ሰላሙ ችግርስ አግልግሎቴ ቲሪፅጝስ 2016 ም.አሜቱ እሩብ አሜቱ እንፅኺው ፊፂምጚው ሪፖርት ፌይኹ አሜትሊ ካንትስታኒ   ዜርቕቲኒ አኽⶓ ፍርድ ጝናሱ አላፊ ጌሌፅካ::

ኬፍቲኒ ፍርድ ጝናዳስታ ወረዳ ቺፋ አግስታንኩ ፍርዶ እይፅካ ኾትካ ፍርድ ጝናዳ ውሳኒ እይሰታኒ ዎሴንስትኹሳ ውሳኔ ፌፄምፃንኩስታ ፍርድ ጝናሱሳ ውሳኔ ቼሜትጝፃንኩ ኬቤሊኩ ቴቤቤርጝፃንትካ አኹኪ ወረዳኩ ቴቤቤርጝፃንትካ አኽጝስ ኬቤሊዴስ ኬፍቲኒ ፍርድ ጝናሳኺስታ ዝኩኽ ቴርት ፄትቲው ችግርስ ካስጛማጊ ጋቲው አኽⶓኪላ ጉሽካ::