አገው ፌሬስቴንካውሳ ባሎ ኬቤርፅጝስ ቤዴራ ቴርት አሌድስትጝ ጌሌፅስትኾ

ታደለ አጋጄ

84 አሜቱሳ ድሜ ቼፍፅኹ አገው ፌሬስቴንካው ማቢሪው ባል አሜት ቺፋ ትር 23 ጌርክስ ኬቤርስቴ። አገው ፌሬስቴንካው ማቢሪ 1932 ም.አታሱ አሊዲዳ 25-30ኺስታ ያኻንኩ አባልካስ ቲሪትጙኽስታ ዙሚስቴ።

ይቶፒያ ዎሬርጛ ይንትኹሳ ፋሺስት ታሊያኖ አድዋው ካንካዳ ጊዮርጊሱሳ ታቦቶ ቡዌካማ ፊሪሲስ ሴብትጜካማ ዊፁኒዴስ ፋሌንጋ ፌሬስካውሳስታ አርቤንካውሳ ውሌቴ ዜኬርጝስ ቲሪትጙኽ ማቢሪ አኽⶓ አገው ፌሬስቴንካው ማቢሪው ጉሳንቲ አሊኪ ትላዬ አየናው ዙሜካ።

ፌሬስቴንካው ማቢሪ እምፕልታቑሳ ማይቤራዊዉ  ታምትጜ ይስጝፅጝስ ኬፍቴኔ ፍሼ ፄዌ። ፌሬስቴንኩ ማቢሪኩ አባልካ ጌውስጙኽሳ አሬክጝፃና፣ ዳዴኻውሳ ኪፃና፣ ክርኹሳ ዴዋና፣ ቼጌርስትኹሳ እርዳታና። ዋሺኔኪ ማይቤዊው ዝኩዊኒ ማቢሪስ አኮሜችስታው አኽጝ ዴሜካ አሜት ቺፋ አባልካው ቼፍ ዴሜካማጊ ይንታታ ፄዋ።

ናካዳ አገው ፌሬስቴንካው ማቢሪ 62ሻይ 202 ጃላ አባልካ ታምብካ።

ፊሪሲስታ አዊው እዝብ አጉሌልጛቲንኩ እምፕል ሳንቲምኩ ላጛ ፍንካኽ ኑንኩ ማቢሪው ቹዋ ጉሳንቲ አሊኪ ትላዬ አዊው እዝብ ዋሺኔኬ እንፅኼ እንፃኽስታው ፊሪሲስ አኽⶓ ዙሜካ። ፊሪሲ እርሺስ፣ ቻኒጝስ፣ ሴንቲስ፣ ኻስስ፣ ቑንዳስትኹሳ አኬምፅጝስ፣ ኪዲጝስ፣ ጋሌብጝስ፣ ታቡቶ አጄብጝስስታ ፄጌርጙንኩሳ ቴግባርካ አኮሜችጝስ አጌላጌሌ። ዋሺኔኪ እንፅኺ ፊሪሲስ እንፃኽስስታው አኽጝስ አዊው እዝብስታ ፊሪሲ አጉሌልጛቲንኩ አኽⶓ አሊኪ ትላዬ ዙሜካ።

84ንቲ ጊዝስ ኬቤርስታውሳ አገው ፌሬስቴንካውሳ ማቢሪውሳ ባሎ ኬቤርፅጝስ ሊሊትጙንኩ ቤዴራ ቴርትኩ  እንፅኽካ እንፃኽስትካማጊ አግስታና። ባል ኬሽኹ አኺኒስ ኬቤርስታታ ሊሊትጙንኩ ኮሚቴ ቲሪትጛማ ኬፍቲኔ ፅሬቶ ፄውጝስ እንፃኽስቴካማጊ አግስታንኩ አኽⶓኪላ ዙሜካ።

ባል ትር 23 ኬቤርስትጝዴስ ቤዴራ ወረዳ ቺፋ ፌሬስቴንካው ባል ኬቤርስታው አኽⶓ ቶኬሙንኩ አሊኪ ትላዬ ፓናሉ ኩስጚስታ ፄጌርጙንኩ ቴርትካስ ኬቤርስታው አኽⶓ ዙሜካ።

ፌዩንኩ አሜታካስ አገው ፌሬስቴንካው ማቢሪው ባል ብሩኽ አኺኒስ ኬቤርስታታ እንጃቢሪ ዩንበርሲቲ ኬፍቲኔ ታምቦ ፊትጛ። ንጙዊኔ ባሎ ዩንበርስቲሊ እምፕልትስ ኬቤርፅጝስ ዙሜትጜካማጊ አኽⶓ ጌሌፅካ።

አገው ፌሬስቴንካው ማቢሪ ፆቴ ጎሌላቲው፣ 18 አሜታዴስ ጃላ ያኹኽጊ አባላ አኽጝስ ካላው ማቢሪ አኽⶓ ቶኬምካማ ኹን ፌሬስቴንካጊ ሊሊትጙንኩሳ ትርኢትካ ካንፃኑ ባል አኽጝ ዙሜካ። ባልታዋ ፌሬስቴንካ ሊሊትጙንኩ ትርኢትካዋ ካንትፃኑ ባል አኽⶓኪላ ዙሜካ።

አገው ፌሬስቴንካው ማቢሪው ባል ይቶፒያው ማኺቲ ያኻማ አጌር አቡቑ አችስ ሜዜጌብስታ። ዩኒስኮዳ ሜዜጌብፅጝስ ዴሜካ ቴሮ ማንዳማጊ አግስታው አኽⶓ ዙሜካ። “አገው ፌሬስቴንካው ማቢሪ እዝቡ ማቢሪያኽ።ውላ አሴቴፍጛኑስታ ዋሺኒኪ ፖላቲካዴስ ኔፃ ያኹኽ እዝቡ ማቢሪ አኽጝታጊ አገው ፌሬስቴንካውሳ ማቢሪውሳ ባሎ ኬቤርፅጝስ ትር 23 እንጃቢሪ ኬቴምዳ አግስቴካማ ባሎ ኬቤርፅጝስ ካላና” ናኒስ እቑዌ ፌያፌይጝፄካ አሊኪ ትላዬ።