ጛርጊው ምርትስ ኪስስትኹ ዝኩዊኒ

ታደለ አጋጄ

ይቶፒያው ፅኻራው አብቱ ኤጀንሲዴስ አግስትኹ ንባር ካንትፃውስታጊ አጌራዳ ሹኻ ሊኻ ዝቤንዳ ንጉስ ኢዛናው ዝቤንዳ ጄሜራማ ፅኻራዋ ስኹፅጙ እንፅኺ አቕስቱስ እጂኹ አኽጝ ጌሌፅስቴ::

ክምንትዴስ ክምንቶ ፌያፌይጙስ እጂኹ ባይላዊ ዳድስ ፅኻራዋ ስኹፅጙ ሴል ውማይቴንካው እርዳቲ ዴሜክስታውላስ ጛርጊ አሜርትስታማ ጌቤልስ ዲጉስ እጄ:: ያኼስጉ እን ዜርፍዳ አሴሜርጙንኩስ ቴኬምስታንታ ፄውጝሰ ምንግስት ባይላዊ አንኪሚዴስ ዝቤናዊ አንኪሚሾ ኪስስታ ፄውስታ::

ዝቤናዌ አንኪሚ ጛርጊው ምርቱሳ ፃንኩቶ ማንዲፅጝስስታ ሚንቾ ጛርጌ አሜሬትጝ ይቢቺ ያኻውላስ ጛርጊዉ ኬውስትጝስ ታምብⶓስታ ታምባውላ ይጉⶓ ካንትፃዊያኽ::

ባይላዋ አንኪሜ ቴኬምስታንኩ ፅኻራዋ እሩብፃንትካ አግፃኑ ጛርጊው ምርት ማልጛ እንፁኽያኽ:: አሜትስ እምፕል ባይላዊ አንኪሚዴስ አንኮዴስ ዋልታ ኪሎ ግራም ጛርጊ ይቢቺ አግስታውስታ ንባር ካንትፄ:: እሊውሾስ ዴሜካ እምፕል ዝቤናዊ አንኪሚዴስ 15ዴስ 40 ኪሎ ግራሞ  ጛርጊ አግስታዉ አኽⶓ ኤጀንሲው ንባር ቶኬሜ::

ኩሉስታ ዴሬኹ ዙራሙርካዳ ፅኻራዋ ጐርዳ እሩብፅጙ እንፅኼ እንፃኽስስታማጊ አግስታው ግብርኒው ዜርፍያኽ:: አሜትስ ኪንዲ ሚሊዮን ቶን ሴም አሜሬትስታው አኽጝኪላ ጌሌፅስቴ:: ናካሱ ወክትዳ አጌራዳ አሜሬትስታው ጛርጊው ምርቱ ሜቴን ሊኽዴስ ሹኻ ታፋዴስ ጃላ ኽሳቲው አኽⶓኽ ኤጀንሲው ንባር ካንትፃዉ:: ያኼስጉ ጛርጊው ምርትስ አሴሜርጜካማ ኬሽኹሳ ጛርጊውሳ ምርቶ አሜሬትጝስ ጌቤልስ ዲግስጝስ ጛጛርትጛሱሳ ዝኩዊኔ ኬሽጝፁንኩ ሚንችካ አሬሳቻንትካ ዝኩና::

አውጚው ራዲዮንሊ እጂጜ ፄውንኩ አዮ ጉዋጉሲ ወረዳው ሹኻ ሹማቲ ኬቤሊው አሬሳቻንትካ ፅኻራዋ እሩብፅጝስ ቴኬምስታንታ አኽⶓ ዙሜካ::

ፅኻራዋ እሩብፅጝሰ ኬሽኹሳ ዝኩዊኔ ኬሽጝፁንኩ አሬሳቻንትካ ክቻዴስ እምፕል አቶ ወርክነህ ጋሺ አግስታና:: አቶ ወርክነህ ፄውኑ እጂጚስ ፅኻራዋ እሩብፅⶓ ዴስ እንዴስ ቤዴራ ጄሜርካማ እንፃኽስታኒስ እጂⶓ ድኹዌካ:: ምንግስት አቺትጝፃማ እንፅኺሾ ሚፁኒዴስ ፋሌንጋ ኩፂ እሳንስ እንፃኽስትካማጊ አግስታና:: ሊሊትጙኽ አይኔት አንኪሚዳ ፅኻራዋ ፅኹፅካ::

አሬሳቻንቲ ወርክነህ “ፅኻራ ማታን ናላ፤ አኾ ይፃን፣ ስዩ ሴይፃን ናላ፣ ሚንቾ ምግቦ ፋያላ፣ ቱስቲ አንኬባኬብጜ ፄውኑኒ ሚንቾ ትክሞ እይጝስ ካሌት ንፍስታኽ” ናኒስ ፅኻራዋ እሩብፅጙሳ ትክሞ ዙሜካ::

አሬሳቻንቲ ወርክነህ ሹኻ አሜታዴስ ቤዴራ ምንግስት ኬቤሊስ አቺትጝፃማ ፅኻራዋ ክላስተርስ እሩብፅጙ እንፅኼ እሊኩ አሬሳቻንትካሊ አኽጝስ እንፃኽስትካማ ኬሽኹሳ ትክሞ አግፅⶓ ዙሜካ::

ፅኻራዴስ አግፃኑ ምርትስ ቤራዋ ጄዌካ፤ ብቴ ፄሜድስትካማ አሬሳና፤ እንስኪላ ጚጛርትጛሱሳ ዝኩዊኔ ኬሽጝፄካ:: 80 ዚንጐ ኮርኮሩስ ጝኖ ግቢቴካማ ዝኩዋና:: ፅኻራዋ እሩብፅጝ ቴኬምስታንታ ፄዉⶓኽ ዙሙኑ::

ፅኻራዋ ትንካኪስ እሚጝ ፋይፃው አኽⶓ ጌሌፅካማ እንዳርማኪ ኬሴት ታምባቲታ ዴሜካ ቲቢቢርጚስ እንፃኽስትጝ ፋይፃው አኽⶓ ዙሜካ:: ፅኻራዋ እሩብፅጝስ ታምብኹ ኬሴት እላቲው አኽⶓ ዙሙንኩ አሬሳቻንቲ ፅኻራ ትንካኪስ እምስቴውላ ቲጉኒ ጉዳቶ ታምፄት አኽⶓኪላ ዙሜካ::

አሬሳቻንቲ ወርክነህ ፅኻራስ ያኻውሳ ቴክሎ ጎርዳ ቴኬልካ:: ፅኻራስ ፋይፃውሳ ዲቦጊ ዋኽትጝፄካ:: ሊሊትጙኽ አይኔት አቢቢውሳ ቴክሎ ዜሬካ:: ፅኻራስ ፋይፃው ዲብጊ ዋኽትጛኒ ኬሻንቲ ጛርጊው ምርት አግስታው አኽⶓ ቶኬምካ::

አሬሳቻንቲ እንዴስ ፍና 2 ሊኻ ኪሎ ግራም ጛርጊውሳ ምርቶ አግፃሺካ:: ንⶓ ኩፂ እሪ ሚንቹኽ ጊዝ ያኻማ 150 ኪሎ ግራም ጛርጌ አሜሬትⶓ ዙሜካ:: አሜሬቱኑ ጛርጊው ምርትዴስ ኪንዴ ዋይጝስ ካሉንኩ አኽⶓ ዙሙንኩ አሬሳቻንቲ ፅኻራዋ ስኹፃኑ 42 አንኪሚዴስ 150 ኪሎ ግራም ጛርጌ አሜሬትካ::

ግብርኒኩ ውማይቴንካ ውማዩሳ እርዳቴ ፄዋንኩ አኽⶓ ዙሙንኩ አቶ ወርክነህ ፅኻራው ምርትስ ኬቴምዳ ጝኖ ጄውጝስ እክድ ዝኩⶓኪላ ድኹዌካ::

ፅኻራዋ ሼሬሬንትዴስስታ እጚዴስ ማንዲጝስ፣ ሶኼትዴስ ላጚኒ አንቺጝ፣ ውሴ ኔኔሳማ እጜ ዲጋቲታ ፄውጝስ፣  ወክትዳ ዴሜካ አኾ ጌልዳ ፄዋማ እንኩርጝስ ፅኻራስ ፄዋኑሳ አንኬባንኬብጜ እርዳትፅካ::

እሊው ሹኻ ሹማቲ ኬቤሊው አሬሳቻንቲ ደሳለው ባንቲሁን ፅኻራዋ ስኹፅⶓ (እሩብፅⶓ) ሞይሼ እስታው ፕሮጀክቱ እርዳቲስ ሹኻ አሜታዴስ ቤዴራ ጄሜርካማ  አቺትጝጝስ እንፃኽስቴካማጊ አግስታንኩ አኽⶓ ዙሜካ::

አቶ ደሳለው ፕሮጀክት ፄውኹ እርዳቲስ ናካዳ 35ዴስ ጃላ ፅኻራ ዝኩⶓ ዙሜካ::

ፕሮጀክት እያው ስልታኒስ፣ አክኽካው  ውማይቴንካው እርዳቲስ ፅኻራስ ኬሽኹስ ቴኬምሰታንታ አኽⶓ ዙሜካ::

አቶ ደሳላው እንዴስ ቤዴራ 80 ኪሎ ግራም ጛርጌ አግፁንኩ አኽⶓ ቶኬምካማ ናካዳ ፅኻራዋ እሩብፅጙ እንፅኺ ማልጛ ፍሽፃው ዜርፍ አኽⶓኪላ ጉሽካ::

እሊኩ ፅኻራዋ እሩብፃቲንኩ አሬሳቻንትካኪላ ፅኻራዋ እሩብፅጙ እንፅኺሾ ቱኒጊ ኬሽኹስ ቴኬምታንታ ያኹንኩ አኽⶓ አሬሳቻንቲ ደሳለው ዙሜካ::

ሹኻ ሹማቲ ኬቤሊው ግብርኒው ፅፌትጝናሱ እንሴስካው አብቱ ልማቱ ውማይቲኒ ብርሃኑ ግርማው ኬቤሊታ ፅኻራዋ ባይሉ ዳድሰ እንፃኽስታሺንኩ አሬሳቻንትካ ሞይሽ ፕሮጀክት ስልታኒውስታ አክኽካው እርዳቴ ፄውጝስ ፅኻራዋ አሬሳቻንትካ ይስጙኽስ እሩብፃንታ እርዳትኹ አኽⶓ ዙሜካ::

ፕሮጀክት እያው እርዳቲስ ፅኻራዋ ዝቤናዊ ያኹኽ ዳድሰ እሩብፅካማ ቴኬምስታንታ ፄውⶓ እንክርፅካ::

ፕሮጀክት 2012ዳ ጄሜራማ ኬቤሊዳ እርዳቴ ፄውⶓ ጄሜሩኒዴስ አሬሳቻንትካ ኬሽኹስ እንፃኽስትካማ ጛርጌ ዋይጝስ ጛጛርትጛሱሳ ዝኩዊኔ ኬሽጝፁንኩ አኽⶓ ዙሜካ::

ፅኻራዋ እሩብፅጝ እሊኩ ግብርኒኩ ዜርፍካዴስ  ፆቴ ጎሌላቲው፣ ሚንች ግርቦ ካሴቲው፣ እሳን እንፃኽፄ ስፍሬ ካሴቲውስታ አክማ ጋቲንኩ እንፃኽስትጝስ ካላኑ ሳሴር እንፅኺው ዜርፍ አኽⶓ ጌሌፁንኩ ግብርኒው ውማይቲኒ  እሊኩኪላ እን እንፅኺው ዜርፍሾ ቱኒጊ ዲጊሰ ሚንቾ ኪሴ ካንትፅጝሰ ካላዉ አኽⶓ ዙሜካ::

ሹኻ ሹማቲ ኬቤሊዳ 50ዴስ 60ኺስታ አቺትጜካማ እንፃኽስታንኩ አሬሳቻንትካ ዝኩⶓ ቶኬሙንኩ ውማይቲኒ እምፕል አቒ ሊኻ ፅካዴስ ጃላ ፅኻራ ዌና ጛርት አቕ ዝኩⶓ  ዙሜካ:: እንስኪላ እምፕል ሻይ 4 ሊኻዴስ ጃላ ኪሎ ግራሞ  ጛርጌ አሜሬትጝስ ካላንኩ አኽⶓ ዲብስካ::

እንዴስ ቤዴራ እን እንፅኺስ ሚንቾ ቴኬምስትካማ እሺካያሱ እንፅኺ ዜርፍ አኽⶓ ቶኬምካማ እሊኩ አሬሳቻንትካኪላ እን እንፅኺሾ ቱኒጊ ዲጊስ ኪሴ ካንትፅጝስ ካላንኩ አኽⶓ ዙሜካ::

ፅኻራዋ እሩብፅጝስ ቼጌርፃው ዲብዴስ እምፕል ሴብልዳ ፄውስታው አሪሚው እጁ ፅኻራዋ ኩዋው አኽጝ ቺጊርፂ አኽⶓ ቶኬምካማ እንስኪላ ምንግስትኪ ያኻ ጛርት አቕ እንሳ ችግሮ ኽይጝስ ልቕልቕቴ ፄውጝ ቱስታው አኽⶓ ጌሌፅካ::

አዮ ጉዋጉሲ ወረዳዉ ግብርኒው ፅፌት ጝናዳ እንሴስካው አብቱ ልማቱ አላፋ አለሚቱ ካሳሁን ወረዳዳ ቤዴራ እሺኹ ፅኻራዋ እሩብፅጙ እንፅኺ ዝቤናዊሾ ኪስስትጝ ወረዳዳ አግስታንኩ ፅኻራዋ እሩብፃንትካ ሚንች ጛርጊውሳ ምርቶ አሜሬትጝስ ኬሽኹስ ቴኬምስታንትካ አኽⶓ ዙሜካ::

ባይሉ ዳድስ እንፃኽስታሺኹስታ ዜኔግስትጝዳ እሺኹ እንፅኺው ዜርፍ ናካዳ ዝቤናዊ ዳድስ እንፃኽስታንታ ፄውጝስ አሬሳቻንትካ ኬሽኹስ ትክሞ አግፄካማጊ አኽⶓ ዙሜካ::

ሴብልዳ ፄውስታው አሪሜ ድፃውሳ እጆ አሬሳቻንትካ ፅኻራ ትይኒዴስሰታ ፅኻራ ፋያውላ ፄዋንታ አሬሳቻንትካ ሼውቴ ፌቴርⶓኪላ ዙሜካ::

አይሲቲ ሞይሾ ፕሮጀክት 2012 ም.አ ጄሜራማ አሬሳቻንትካስ ስልታኔ እይጝስስታ ዝቤናዊ ዳድስ እንፃኽስታንታ ፄውጝስ እምፕል አሬሳቻንቲ 4 ሊኻ ኪሎ ግራሞ ኺስታ ጛርጌ አሜሬታንታ ፄውስትⶓ ዙሜካ ::

ወረዳዳ 3 ሻይዴስ ጃላ ዝቤናዊ አንኪሚ አሬሳቻንትካስ እይስታታ ፄውስትⶓ ቶኬምካማ::አዮ ጉዋጉሲ ወረዳዉ አይሲቲ ሞይሽ ፕሮጀክት ቴክኒካል አሲስታንታ ሻሺቱ ከፋለ ፕሮጀክት ወረዳዳ አግስታንኩ ፅኻራዋ እሩብፃንኩ ጛርት አቕስ እርዳቴ ፄዋማጊ አግስታው አኽⶓ ዙሜካ::

ፅኻራዋ እሚጝዴስ ጄሜራማ፣ ፅኻራዋ ቤንጝፅⶓኺስታ ስልታኔ እይጝዴስ ድምክና አክኽካውሳ እርዳቴ ፄውⶓኪላ ዙሜካ::

አሬሳቻንትካ ጛርጊው ምርትስ ኬሽኹስ ቴኬምስታንታ እንፃኽስትካማጊ አግስታንኩ አኽⶓ ዙሜካ:: ሴላሙ ችግርስ እንፅኼ ቲሪፅካያስኩ አኽⶓኪላ ዲብስካ::

አሬሳቻንትካ ጛርጌ ፃንኩትስ እሚንታስታ ጛርጌ አሬኬብስታንኩስ ታምትጝፅጙሳ እንፅኼ እንፃኽስታንኩ አኽⶓኪላ ጌሌፅካ::