ሰላም ኹንስስታ ስራስሪሰ

ዘውዴ በካሉ

አቒ ሰላምስ ፋማ ሰላምስ ቱጝስ፣ ጌርክ ቺፋሱሳ ልቕልቕቴ አኮሜችጝስ ኽሳንቲስታ ቹዋ ፋይፃንቲ ሰላምያኽ:: አጌራዳ ሰላም አታኒ አቒውዳ ይዎትዳ፣ ንብሬትዳ፣ ማይቤራዊዳስታ ይኮኖሚዳ ቻኒስቶ ታምፄ:: አቒያስ ይጉዋማ ካዌኑ ንሴሲስ ሰላም ፋይፄ:: ሰላም ቼሜትጛኒ ኹንስታ ስራስሪዳ ታምባው ቻኒስት ሳሴርቴ::

እምፕላ አጌራዳ ጋቻ ፌቴርስታኒ ስራስሪውዳ አንኩዋሊዳስታ ሼው ፅንታዳ ታምባው ቤዴል ልቓ ጋቲውያኽ:: ጋያኪ ኹን ሰላም አታኒ ሼራ አቓ ሳትስ እክምኒውሳ አግልግሎቴ አግፅጝስ፣ ካሜናንታ ቹዋ ጄርካዋ አንኬባኬባማ ሌጌፅጝስ ቼጌርፄ:: ሰላም ኹንስስታ ሰሪስሪስ ዋትጛይ ፋይፃው ናውሳ ካንትኹስ አውጚው ቴርትቤናሊ ፄውኑሳ እጂጜ ናካስ አንቤብፅጝስ ፋኑኻ::

ቺርቤዋ፡- ስሞስታ ዝኪኑሳ ዙራሙሬ አቕትጝፃን ?

ስሞኪ  ዊ/ሮ አስናከች ዘላለም እስቴ:: አንኪሺ ጉዋጉሲ ወረዳት ዝኩዋንታኽ::

ቺርቤዋ፡- ክልልታጊ ኬሴትስታማጊ ዝኩኹ ሰላሞ አቲጙ ችግር ኹንዳ ታምፃማጊ ዝኩኽ ችግር እዳራይ ፄጌሬ?

ዊ/ሮ አስናከች፡ ናካ አጌራው አችስ ናማኪ ክልልዳስታ ዙራሙሬ ቺፋ ፌቴርስትኹ ሰላሞ አቲጙ ችግር አጌራው ይኮኖሚዳስታ ማይቤራዊ ልቕልቕቲዳ ቻኒስቶ ታምፄ:: እን ፄትቲው ችግርስ አይሎ ፂኪስታንኩስታ ቤዴል ታምባው አባላምቲዳኪ ኹንዳ ሲፋማ ዴሜካ ስራስሪዳኽ:: አጌራዳ ሰላም አታኒ እምፕላ ካሜናንታ ቹዋ ሼራ ጌርክ ታምባማ ምፃዳ እምስቲኒ እክምኒው ኾትሾ ካሳማ አግልግሎቴ አግፅጝስ ካላላ:: እምፕል ችግሪኒ አኹኪ ቑንዳስቲኒ እክምኔ አግፅጝስ ካላላ:: እክምኒውሳ አግልግሎቴ አቲጝስ   ሚንችካ ቹትካው ይዎት ፌዬ:: ስራስሪ ቑንዳስታኒ አኪምፅጝስ ቼጌርታና:: ቻ አጌሮ አሬኬብስታው ስራስሪስታ ወተት ዎሬሙ ምክንያትስ ጉዲስትካማጊ፤ ሼው ፅንታው ቤዴል ታምባማጊ፣ ቱስታ ጋቲው ስፍሪዳ እሺካማጊያኽ:: ምንግስት ዊዳፌ ሴላሞ ቼሜትጝፃማ ቹትካስታ ስራስሪስ ፋይፃውሳጊ አግልግሎቴ አግፅጝ ቱስቴ::

እምፕላ ቹዋ ጝኑ አላፍት ዝኩት አኽጝስ ጌቤላ ካታታ ጌቤልቴታ ዙርጝስ ስጋት ዝኮ:: ካፂኹሳ ሌቤቶ ዋይጝስስታ ጄውጝስ ካላላ:: ጌቤላ ካታታ ሰላምስ ጝንሾ ዙርፅጝስ፤ ይዎቶ ፊትስጝስ ጌቤልቴውላስ ዙርቴ:: ሰላማ ጋቲታ ልማት፣ ክንቲ፣ ዋሺኒኪ ልቕልቕቲ አኮሜችስትጝስ ካሊስታላኽ:: ሰላሙ አቲጙ ችግርስ  ሼራ ኹና ካሜንታው ጌርክ ታምባኒ አምላንሶ አቲጙ ችግርስስታ ፍያውሳ ዳዶ አቴታ ይዎት  /ክቴ:: ቲኑ ኾትሾ ታምብⶓ አቲጝስ ይዎቶ አቱንኩ ሚንችካኽ::

ቺርቤዋ፡-ዊዳፊ ሰላም ቼሜትጛታ ኹኑ ፍሺ ዋሳ ላካይ?

ዊ/ሮ አስናከች፡- ኹና እንፃኽስቲኹ ጝን ፌሬስላኽ:: ጄርካስኪ ጜራስኪ  ዎሬም እይስኪ ቴኬማላኽ:: ቴኬማቲው (ድፂ) ስፍሪዳ እሽፃው አፄብሊ እሼቲታ ኩስጝፂ:: ኹን ሰላሞ ያግጝስ ኽሳንቲ ፍሼ ዝኮ:: ብሽታንዳኪ ያኻ ሊሊትጙንኩ ጉፕትካዳ ሚንችካ ኹን ሰላሞ ቼሜትጝፅጝስ ሰላሞ ክንትፃና:: ሰላማ ጋቲታ ዜርስትኹሳ አሊቤ ኩፕፅጝስ፣ ምግቦ ቴርሳማ ሜጌብስትጝስ፣ ኩክልንኹሳ ስጙጝስ ካሊስታላኽ:: ጋቻዋ ባስጝፃንኩ ዲብካዴስ ክብስስትንስ ንካማ ዲብሳና:: ጄርካ አፄብካሊ ውታኺዳ እሺካማ አብኖ ያጋኒ እን ቴኬማላኪያኽ እናናጊ ኩስጝፅኔ::

ጋቻ አጌራዳ ታምፃው ቻኒስት ሚንቺያኽ:: ጝንዳሳ ታምፃው ቻኒስት ዝኮማ? ዋትጛይ እንሳ ችግሮ ፊትጝታኑ?

ዊ/ሮ አስናከች፡- አጌራው አችስ ፌትርስትኹ ጋቻ ኹንዳስታ ስራስሪዳ ይቢቺ ያኻውላስ ጝንዳኪላ ችግሮ ታምፄ:: ጄርካኪ ያኻ ጝኑ አቒ ውታኺዳ እሺካማ ሰላሞ አዌካውሳ አብኖ ያጋካማ ጝንዳ ዲብሳኒ እንሳ ዲቦ ዲብሴን፤ ሰላሞ ቼሜትጝፅጝጉ ጋቻዋ ባስጝፅጝ እላኬኽ:: እን ጌርክ ፌይምባ ኺስታ አብንዴስ ክብስስታንታ ኩስጝፄ::

እን አጌራዳ ካንትስታማጊ ዝኩኽ ሰላሙ ችግር ኹንዳስታ ስራስሪዳ ታምፃው ቻኒስት ዋሳላካ አኽⶓ ጝርጃ ዋትጛይ ካንታን ናውሳ አዊ ብሄረሰቡ ቺፅጝፂዳ ግብርኒው ውማይቲኒ አቶ ነጋ መከተኪላ ስልኪስ ካንቴ እይካ::

ቺርቤዋ፡-ሰላሞ አቲጙ አኺኒ ኹንዳሰታ ሰራስሪዳ ዳራ ቻኒስቶ ታምፃማጊ?

አቶ ነጋ፡- ሰላም አቲጝ ኹንዳሰታ ሰራሰሪዳ ቻንስቶ ታምፅጝ ማሊስቴ:: ዙሪሙሪ ቺፋ ዝኩኽ ጋቻ ክንታንትካ ክንቲው ጊቢቲዳ አግሰታቲንታ፣ ስራስሪ ሰላምስ አፄብካሊ ውታኺዳ እሼቲንታ ያኽስታ:: ኹን ጄርካዋ አንኬባከብጝስ፣ ጝኖ ቺፅጝፅጝስ ቼጌርፄ::

ቺርቤዋ፡-አጌራዳ ሰላም አቲጝ ኹንዳስታ ሰራስሪዳ ቤዴሎ ታምፄ ኒካማ  ታክሳናማ?

አቶ ነጋ፡- ሰላም እላ ያኹኒጊ ግብርኒው፣ ጊፁ፣ ማይቤራዊ ልቕልቕቲ እላኪያኽ:: ኹንዳሰታ ሰራስሪዳ ኽሳንቲ ቻኒስት ታምባው አኽⶓ ዴሜካ ጝርጃ ሼውእኔ:: ጝርጃ ችግሮ ካላካልጚስ ካላና:: ኹን ኩፂ ጄርካዋስታ ጝኖ አንኬባኬብጙ አላፍት ዝኩክ አኽጝስ ችግራኻዳ ያኻካማ አላፍቶ ፊትጝጝስስታ ችግሮ ካላካልጝስ  ቼጌርስታና:: ሰላም እምፕል ዎጌኑ ይቢቺ ጋቲውያኽ:: ሰላም ውላስጊ ፋይፃንቲያኽ:: ጋቻ  ኽይስታው ኩስጝጚስ አኽጝስ ጋቻዴስ ፋማ ኩስጝጜ ይስጝፅጝ ፋይፄ::

ኹንዳስታ ስራስሪዳ ዎሬሙ ምክንያትስ ታምባው ቻኒስት ሚንቺያኽ:: አዊ ብሄረሰቡ ቺፅጝፂዳ ኹንስታ ስራስሪው ሜምሪው አላፈ ዊ/ሮ አምባነሽ ሰሜነህ ጋቻ ታምፃማጊ ዝኩኽሳ ቻኒስቶ ዙሜካ::

አጌርታ ናማኪ ክልልታ ፌቴርስታማጊ ዝኩኽ ሰላሙ አኺኒ ኹንዳሰታ ሰሪሰሪዳ ታምፃው ቻኒስት ዋሳ ላካይ?

ዊ/ሮ አምባነሽ፡- ናካ ዎሬሙ ምክንያቲስ  ኹንዳስታ ስራስሪዳ ታምባማጊ ዝኩኽ  ቻኒስት  ባሴ:: ጋቻ ባስጛማ ይንታኒ ጊጛማ  ይጉጙ አክም ኹንዳስታ ስራስሪዳ ካንትስታኒ ልቓኽ::

ዎሬም ባስጛማጊ ይንታኒ ስፍሪዴስ ስፍሪሾ ጝኖ ባያማ ሴዳድስትጝ ካንትስቴ:: ፌይንኩ አሜትካዳ ሰሜኑ  ዎሬምዳ ካንትጝሰ ካሊንኹስታጊ ስዴት ጊዛይ አካሉ፣ ሼውፅንታውስታ አንኮሊው ቤዴል ታምባው ኹንዳስታ ስራስሪዳኽ:: ዎሬሙ ምክንያትስ ዴፌርስቱንኩ ኹንኪላ ዝኩና:: ናካ ዝኩኽ ሰላሙ አኺኒስ ውላዋ ዙራሙሬ እንዜጛማ ንባሮ አግፅጝስ ካሊስታውላስ ይጉኒኪላ ታምብኹ (አግፅንኹ) ንባርታጊ 20 ኹናኹና ዴፌርስትካ:: እን ልቓኽ:: እንዴስ ጃላ ቻኒስት ታምቡክ ኹን ዝኩና::

ቺርቤዋ፡- ሰላሞ ቼሜትጝፅጝስ ኹን ዳራ ፄውጝ ቱስቴ? ኹኑ ፍሼ ዋሳላካይ?

ዊ/ሮ አምባነሽ፡- ሰላሞ ቼሜትጝፅጝስ ኹኑ ፍሼ ጉዋል ንኹያኽ:: ኹንዳ ሜሊ ዝኮ:: ጄርካኪ ያኻ ጛራ ፋስታ ቱስ ሰላሞ ዲብስታት፣ እሺኑሳስታ እንፃኽስቱኑሳ ይስጝፄትስታ ባስጝፄት ኹናኽ:: ሰላሙሳ ፋይፃንቶ ውላዴስጊ ኪቻ ኹን ማሌካ:: እሺኑሳስታ ቹኑሳ ሲፍጝታታ ዋዳይ እሽቲኹ? አሊይ እሽቲኹ? ዳሪይ እንፃኽስቲኹ? ኔታጊ ሲፋሲፍጝስ ጝኑሳ ሰላሞ ቼሜትጝፂ:: ጝኑ ሰላም ቼሜትጛኒ  ዙራሙሪው ሴላም፣ አጌሩ ሰላም ቼሜትጜ:: ኹን ሰላምስ ዝኩኹ ታምብ ኬፍቲኒያኽ::

ቺርቤዋ፡- ዊዳፌ ሰላሞ ቼሜትጝፅጝስ አዴስ ዳርማ ማንዲስቴ?

ዊ/ሮ አምባነሽ፡ ዊዳፊ ሰላሞ ያግጝስ ውላጊ አቕ ሰላሞ ሴቤክጝ ፋይፄ:: ጋቻዋ ባስጝፃው አቒ አኽጝስ ሰላሞ ቼሜትጝፃውኪላ አቒያኽ::

አጌር ሾማጌልካኪ፣ አይማኖትኩ ታብልኪ፣ ኹንኪ ሰላሞ አግጝስ ታምቦ ፊትጝጝ ቱስቴ:: እዝብ ምንግስትሊ አኽጝስ ሰላሞ ያግጝ ማንዲስቴ::

ቺርቤዋ፡- ሰላሞ አቲⶓ ምክንያትስ ሼውፅንታው ቻኒስት ቤዴል ታምቡክስ ኹንስ ዳራ እርዳቴ ፄውትካማጊ?

ዊ/ሮ አምባነሽ፡- ሼውፅንታው ቤዴል ታምቡክሳ ኹኖ ንባሮ ኩፕፅጙሳ እንፅኼ ኹኑስታ ስራስሪው ሜምሪው አችስ ፂኒስስቴ:: ቤዴል ታምቡክሳ፣ ዴፌርስቱንኩሳ ኹኖ እክምኒውሳ አግልግሎቴ አግፃንታ እንፃኽስቴ:: ሰላሙ ችግርስ እንፃኽስትጝ ቱስታውሳ ላካሳ እንፃኽስትናናጊ ጋቲውያኽ:: ብሄረሰቡ ቺፅጝፂሊ አኽጝስ ፍንሾስኪላ እንዴስ ጃላ እንፃኽስትጝስ ጁትጝኔ::

ሰላም ኹንስስታ ስራስሪስ ፋይፃው አኽⶓ ንባሮ /ካንቴ እይንኩ አቕ ኑኑውስታጊ ሴላም ዋይሚስ ሊኪስታላኽ:: ብሄረሰቡ ቺፅጝፂው አችስ ዎሬሙ ምክንያትስ 20ዴስ ጃላ ኹን ዴፌርስትጝ ጋያኪ ዴፌርስትጝዴስ (ፂኪስታንትካ) አኽጝዴስ ድምክና ሼው ፅንታስስታ ቑንዚስ ፂኪሳንትካ ፄዌ:: ስራስሪዳኪላ አንኩዋሊውሳ ቤዴሎ ታምፃማ ፌዬ:: ሰላም ውላስጊ ፋይፃንቲ አኽⶓ እርዳትስናና ሰላምስ ዜቦ ቲሪጝ ፋይፄ::