ካሜንጝዴስ ቤዴራ

ዘውዴ በካሉ

እምፕላ አቓ ሼርት ጊዛይ ቲንዌናሳ ጄሮ ካሜንጝስ እክምኒውሳ አገልግሎቴ አግፅጝ ፋይፄ::

እን ጊዛይ ቲን ዌና ሼርት እናው 9ዴስ 10 አርፌ እጄው ያኹስ ቹዋስኪ ያኻ ጄርስ ፋይፃንቲ ጊዝያኽ:: ዋሼናኪ ኹና ሼርት ማሊስትኹዴስ ጄሜርታታ ቤዴራሱሳ እክምኒውሳ ሲፋሲፍጜ ፄውጝ ቱስቴ:: ካሜንጝዴስ ቤዴራ አክምኒውሳ ሲፋሲፍጜ ወክትስ ጄሜርጝስ ቲንዌና ቹዋ ፌቴርጝ ናው ጉሳንቲ እንፅኼንትስ ሼውቲውሳ ፕሮግራሞ እያማጊ አኽⶓ ቲኑ ሚኒስትርዴስ ፉኽ አግፅንኹ ንቫር ቶኬሜ:: ሼርት ጊዛይ ፄውስታው ሼርቱ ሲፋሲፍጜስታ እንክካቢ ቹዋውሳስታ ጄሩሳ ቲኖ ማንዲጝስስታ ሼርትሊ እምትጙንኩ ቲኑ ችግርካ ኬሴትስታንቲታ ቴኬሜ:: እንስ ቹትካውስ ክምንትዴስ ጃላ ሲፋሲፍጜ ካንትኹስ አውጚው ቴርት ቤናሊ እንጃቢሪ ትክላሊ ሆስፒታልዳ ቹትካውሳ ማይፄኒስስታ ሼርቱ ሲፋሲፍጛው ዶ/ር አምሳሉ ትሩነህሊ ፄዉስትኹሳ እጄጜኽ::

ቺርቤዋ፡- ስሞ አቕትጝፃን?

አቶ አምሳሉ፡- ዶ/ር አምሳሉ ትሩነህ እንጃቢሪ ትክላሊ ሆስፒታልዳ ቹትካው ማይፄኖስታ ሼርቶ ሲፋሲፍጚው አኪም

ቺርቤዋ፡- እምፕላ ቹዋ ሼርⶓ እንጉስቴኒ ያኻ ሼርቱኒዴሰ ፋሌንጋ ወታኮውሳ እክምኒውሳ ሲፋሲፍጜ ፄውጝ ቱስቴ?

አቶ አምሳሉ፡- እምፕላ ኹና ሼርⶓ ታክስታኒ አራኹና እክምኒው ኾትሾ ካስካማ ሼርት ፌቴርስትጝዴስ ፍና ፄውጝ ቱስታውሳ ኩስጜ አግፅጝ ፋይፄ:: እን አጌራዳ ዴስስታያሱ ያኹኒኪላ ፅንስ ፌቴርስቱኒዴስ ፋሌንጋ ሜጌብስትጝ ቱስታው ምግብ፣ ፄውስትጝ ቱስታውሳ ትንካኬ ቤዴራ ኩስጜ አግፅጝ ፋይፄ::

ሼርት አቕስቱኒዴስ ፋሌንጋ ቑንዚው እንኮኽስት ዝኩዋኒ ይንታኑዴስ ሼርጝዴስ ፍና ቤዴራማ እክምኔ አግፅጝ ፋይፄ::

ቺርቤዋ፡- ቹዋው እንኪ ማንዲስታታ፣ ቲንዌና ጄርኪ ካሜንስታታ እክምኒዴስ ሲፋሲፍጜ ዋሺኒ ጊዝዳ ጄሜርጝ ፋይፄ?

አቶ አምሳሉ፡- ሼርጝዴስ ፍና እክምኒውሳ አግልግሎቴስታ ውማይቲኒውሳ ኩስጜ አግፅጝ ጉዲያኽ:: እንዴስ ይጉኒጊ ሼርት ዝኩⶓ ማሊኒዴስ ጄሜርታታ እምፕላ ቹዋ እክምኒውሳ ሲፋሲፍጜ ፄውጝ ፋይፄ:: ኬቴም ዙራሙሪዳ ዝኩንኩ ያኹኒጊ ቲኑ ኾትዳ ሼርት ዝኩⶓ ማሊኒጊ አልትራሳውንድስኪ ያኻ ቻኺስ እንቲታኪ ብሪስ ማራማርስቴታ ሹኻ አርፋዴስ ፍንዳ ማሊጝ ፋይፄ::

ፅንሶ ፌቴርስቱስ ማይፄንዴስ ሴጋኪ ያኻ ማይፄናኻዳ ሼርስትጝስ ካሌ:: ማይፄንዴስ ሴጋ ሼርስትኹ ፅንስ ቲናጋው ፅንስ አኽጝስ ቹዋዋ ጉዲጝስ ካሌ:: ሼርት ጊዛይ እምፕልስታ እንዴስ ጃላ አኽጝስ ካላው አኽጝስ አባላምቴ እክምኒውሳ አግልግሎቴ አግፅጝ ፋይፄ:: እምፕላ ኹና አርፊው ብሪ ይንታውሳ ጊዞ ማሊያስቲ ታኹኒጊስታ ዋሺኒ ሶኼትዳ  አኹኪ አርፊዳ ፅንስ ፌቴርስትⶓ ማላቲት ታኹኒኪ ፅንስ ፌትርስትኹሳ አርፊ ማሊጝስስታ ካሜንስታውሳ ጌርኮ ማሊጝስ ፅንሱሳ ሲፋሲፍጜ ፄውጝ ፋይፄ::

ቺርቤዋ፡- ፅንስ ማይፄንዴስ ሴጋ ፌቴርስቱኒጊ እምፕላ ቹዋ ዳራ ፄውጝ ቱስቴ?

አቶ አምሳሉ፡- እምፕላ ኹናዳ ፅንስ ማይፄንዴስ ሴጋ ፌቴርስቱኒጊ ሚንቾ ጊዞ እጄላ:: ሹኻ አርፋዴስ ጃላ እጄቲው አኽጝስ ፅንሶ ፌቴርስታው ማይፄኑ ቱቡዳ ንጝኪ አንኩላል እንዜጛውዳ ዳድዳ አኽጝስ ፌሬሳማ ብሪ ክቤኒ ቹዋ ቑንዚስ ፂኪስቴ:: እንጚ ክቺጝስ ካላው ቲኑ ኾትዳ ኦፕሬሽንስ አኹኪ ቔድፃማ አኬምጝስያኽ::

ቺርቤዋ፡- ሼርት ጊዛይ ብሪ ክቢጝ ኬሴትስታው ዋሺኒ ድሚው አችዳ ዝኩንኩ አቕዳይ?

አቶ አምሳሉ፡- ውላ ሼርትጊ ሲፋሲፍጜ ፋይፃውስታ:: አሌሙ ቲኑ አችት ካንታማ እምፕላ ቹዋ ካሜንትምባኺስታ ሱኺቲኒ ሲፋሲፍጜ ፄውጝ ፋይፃውስታ ቶኬማ:: ሼርቶ ማሊታ አኪምኾ ካስጝዴስ ካሜንስትምኺስታ ኬፄሩሳ ሲፋሲፍጜ ፄውቴ:: ሼርት ላጛስ ቤንስቴ:: ቲንዌና ክችክቺስ ካሳውሻውስታ ችግርዳ ዝኩኽ ሼርትያኽ:: ችግርዳ ዝኩኹ ሼርት እስታው ሼርት ብሪውሳ ቪንኬ ዴሜካው ያኹኒጊ፣ እምፕላ ቹዋ እንዴስ ፍና ቔድፃማ አኪምሾ እክምኒስ ካሜንቱት ታኹኒጊ፣ ሼርት ላጜታ አርፊዴስ ጄሜራማ ማይፄንዴስ ጃላሰ ይንቱኒጊ፣ ማይፄንስ አኹት ዲብ ክቢኒጊ፣ ሶኼትዴስ ላጛኒ አልትር ሳውንድስ ካንትስትጝስ ጌርክ ታምብባኺስታ ሲፋሲፍጜ ፄውስቴ::

ቺርቤዋ፡- ሼርት ጊዛይ ብሪ ክቢስ  ካንትስታው ምልኻት ዳማጚይ?

አቶ አምሳሉ፡- አምፕላ ቹዋ ሲፋሲፍጜ ፄውቱስ ድኹስታው ዲብ ዝኮ:: ማይፄንስ ብሪ እንዜጝ ንጝኪ ፅንስ ዝኮኩስ፣ አንጉ ስርዴስ ጌምጝናማ ሴባማ ፊኹዌ ፊኹፃላ ናው ቑንዚ ዝኩኒጊ፣ እል እምፕሎ አቔ ሹኻ ሴዛ ፄዋማ ካንትፁኒጊ፣ ልኩ ታፋ እንቓሩኒጊ፣ ማይፄንስ አኹት ክቢኒጊ፣ ፅንስ ልቓልቕ ናቲው ያኹኒጊ ፅንስ ችግርዳ አኽⶓ ማሌካማ እክምኒው ኾትሾ ካስንታስታ ውማይቲኒስ ድኹዋንታ ያኽስቴ:: ብሪ ክቢጝስ ላጛ ዲብካ ዝኩና::

ላጛታ አርፊዴስ ጃላስታ ላጚቲ አርፋዴስ ኩክሪኽ:: ላጚቲ አርፋዴስ ኩክራ ሼርት ዝኮኩስ ብሪ ማይፄንስ ጌሙኒጊ ሼርት ጌማማጊ ዳኽት እስቴ:: ላጚቲ አርፋዴስ ጃላ ያኹኒጊ ዴሜካ ዴስስ አቕ እንግርቴና ናንቲ ፅንሱ ጛሪዴስ ቤዴራማ ማይፄኑ ቤርዳ ይንታማ ያኻኩኒጊ ድሚ ኬፍማጊ ካሳኒ ብሪ ክቢጝስ ካሌ:: እሊው ዴሜካ ሼራ ቹዋ አቲኒ እንግርቴናስታ ማይፃን ባይፅጛኒ ሼርት ላጜቲ አርፋ ያኹኒዴስ ፋሌንጋ ብሪ ክቢጝስ ካሌ:: አቲⶓ አክሞ ጉዳቶ ታምፃው ያኹኒ ዴሜካ ፅንስ ጉዲስትጝስ ካላው አኽጝስ ቹዋ ጉዲስታቲታ አክምኒው ኾትሾ ካሳማ አግልግሎቴ አግፅጝ ፋይፄ::

ቺርቤዋ፡- እምፕላ ቹዋ ቲንዌና ጄር ካሜንስታስታ ቹዋ ቲን ማንዲስታታ ዳር ፄውጝ ዝኮ?

አቶ አምሳሉ፡- እምፕላ ቹዋ ጄሩሳኪ ያኻ ጚውሳ ቲኖ ማንዲጝስ እንፁኒ ሹኺኒ አልትራሳውንድስ ካንትስትጝ ፋይፄ:: አባላምቴኪ ሼርቱታ ፅንሱሳ እንኩሬስታ ዴክቶ ቼሜትጝፅጝስ፣ ላጛንቲኪ ፅንሶ አንኩዋ አርፋ ዋኻኒ፣ ሹኻንቲ ዴሜካ ሼርት ሲስቲ አርፋ ዋኹስ ሴስታንቲ አረፊ ጄሜርጝዴስ ፍና አልትራሳውንድስ ካንትስትጝ ፋይፄ::

እምፕል እምፕል ፅንስ ፌቴርስቱስ ቲና ጋቲው ፅንስ ፌቴርስትጝስ ካሌ:: አንኮሊዳ፣ ይውዳ፣ ታፍልኩዳ ችግር ዝኩኽ ፅንስ ካሜንስታማ ቴኬማቲው ያኹኒጊ ምርማሪስ ቼሜትጛማ ፅንሶ ሌጌሳውላስ ይጉፅጝስ ካሊስታው አኽጝስ ቤዴራማ እክምኒውሳ ሲፋሲፍጜ ፄውጝ ፋይፄ:: ቹትካ ሼርጝዴስ ቤዴራ እክምኒውሳ አግልግሎቲ አግፃንታ፣ ሼርቱ ምልኻት ካንትስታኒ ንጝኪ ብስቒ  ልኽልኽፅጝ፣ ዴሬፅጝ፣ ምግቡ ፋያ ኔኬትጝ ካንትስታኒስታ ጌርኮ ማላቲንኩ አቕ ፅንሶ አልትራውንድስ ካንትስትካማ ጌርኮ ማሊጝስ ካላንታ እንፅኼንቶ ፌያፌይጝፄ:: ኽታዌንካ ቹትካውሳ ባይሎ ሲፋማ ጝንዳ ካሜንጝ ሲፋሲፍጜ ፄዋውላስ እጂጝ ጄርዳኪ ያኻ ቹዋዳ ችግሮ ታምፃው አኽጝስ ዲጊዳ አግስታው ቲኑ ኾትሾ ካሳማ አግልግሎቴ አግፅጝስስታ ሲፋሲፍጜ ፄውጝስ ቲን ዌናስ ጄሮስታ ቲንዌና ቹዋ ማንዲጝስ ካሊስቴ::