እቴጌ ታይቱ

ገነት አየነ

ይቶፒያው ታሪክዳ ኬፍቲኒ አችስ ስም አቕስታንኩ ንግስትካዴስ እምፕላኽ:: ይቶፒያዴስ ፌያማ እሊው አሌምስ  ምሳላ ያኽጝስ ካሌ:: አጌራውሳ እንካኖ ጄግንቶ፣ ፖለቲካው ትቤብጊ እምፕልትስ እይስታ:: እንጚ ምንጊሱ ዝቤንዳ ኹን ፖለቲካዳ አሴቴፍጛቲኑ ወክትዳ እሺኾ ይቶፒያት አርቤና ጊዝዴስ ቤዴርታታ ፍንዳ አግስትጝስ  ካሊኹ:: እትጌ ታይቱ ብቱል ናሲ 12/1832 ም.አ ደብረታቦርዳ ካሜንስቲኾ:: እንፃኺታስ አይማኖትኩ ክንትካዋ ክንትጝስስታ ፊቲ ጊዝስ ብሽታንኩሳ ስይካ ግቢስታኑሳ ትቴ ሴግጝስስታ ጋያኪ  ግዙሳ  ኮንኬ ቱስቴስ ክንቴካ::

ቤተ ክኔቱሳስታ ቤተ ምንግስቱሳ ክንቴ ስርኩኔ ቤዴርካማ ያቑና:: ሌጌሱኒዴስ ፋሌንጋ አፂ ምኒሊክ ሸዋ አንኮበርዴስ እትጌታይቱ በጌምድርዴስ ታምትጜካማ ትዳሮ ጄሜሩና:: እትጌ ታይቱ ሜንችካ ማቤራዊ እንፅኽካስ አቕስታና:: እንዴስ ድምክናስኪላ ይቶፒያስ ፄውቱክ እንፅኽካዴስ ታሪክ አሌምስ ፃፋይኹ አድዋው ድልዳ ፄውቱኽ ቴግባርስ እሺኾ::

አድዋው ታሪክ ጁዋኒ ጅያኒ አብራ አሬቤንትስ እትጌ ታይቱኪላ አቕስቲ፤፤ እትጌ ታይቱ ውታድሪውሳ ትቤቦስታ ፖለቲካው ቴልኩዳ እሺኹ ልቕልቕቲስ ይቶፒያው ታሪክዳ ጛውሳ አሻሬ ፉሪፂኾ:: ይቶፒያው ፖለቲካዳ ጛው ቴሳትፉ እሳንስ ካንትስትኹስታ አጌራኻሱ ቺትጝፂዳ ኬፍቲኔ ፍሺ ፊትጝጚስ ካሉኑ ውቻሌውዳ ውልዳ እሺኾ::

ታሊያንዴስ ይቶፒያሾ ይንቱኽ አስሜምጚውሳ ውሎ ቻቤላላ ንጝስ ኬዌምጙና:: ታሊያንካኪላ ንጉሶ እንፅኺኒስ አምንፅጝስ ሞኬሩና:: ያኼስጉ ንጉስስታ ንግስታ አጌራውሳ ትክሞ ኔክፃውሳ አስሜምጜ ፄዋቲንኩ አኽⶓ አቕፁና:: እንጚ ውቻሌው አስሜምጚው ውልኪላ ፌሬስኾ:: እንጚ ውል ፊሬሳታ ኽሳንቲ ታምብ ዝኩት እትጌታይቱ እሺቲኾ::

“ውዳጅት እላኪያኽ ወሬምጃላ ንጝስ” ታሊያኑ እንፅኺኒ አንቶሊኒስኪላ አቕፅካ:: እንጚ ጊዛይ እትጌ ታይቱኪላ “ወሬሞ ካሊኒጊ እንጚ ሶኼታኻዳ ፂፒ” ንጝስ ጌሌፁና:: ዲብስጝ ይቪቺ ያኻውላስ ሼዎ ዋኻ ያኻማ ጄግንትስ ወሬምዳ ቤዴርካማ ሴሌፍስቱና::

አድዋኩ አርቤንካሊ አብራያኽጝስ እትጌታይቱ አድዋሾ ዜሚቹና:: እንጚ ዎሬምዳኪላ አትጌ ታይቱ ትቤባዌ ሴሎ ቴኬምስትጝስ አድዋው ዎሬምዳኪላ ታሊያኖ ድላ ፄውጝስ ካሌካ::

ሚንች ዝቤኑዊ ሜሳሪስ አችትጜካማ ይቶፒያዋ ዎሬርጝስ ይንቱንኩዊ ታሊያንካ ይቶፒያው ብቲዳ ወሬድ ንካማ ዊፅስቱና::

እትጌ ታይቱ ውቻሌውሳ ውሎ ፌሬስፅጝዴስ ዎሬምዳ ግንባርስ ዜሜችⶓ ኺስቴ አላፍትስ ፊትጝጝስ ካሊት ይቶፒያት ኹና አርቢናኪላ ያኹና::

እትጌ ታይቱ ቤተክኔትዴስ ምንግስት ጝናሳኺስቴ ፖለቲካው ቴሳትፍዴስ ማይቤራዌ ዝኩዊኔኺስቴ እሺኹ ጛው ቴሳትፉኪላ ናካ አሌምስ ኔፃኔትስ ምሳላ ታኹት አጌራ ዝኬታ ፄውጝስ ጚውታምብ ኬፍቲኒ እሺኾ::

እስጜ ታሪኮ ታክስጝስስታ ዜኬርጝስኪላ እቴጌ ታይቱዋ ካንትፃው አውልት ደብረታቦር ኬቴምዳ ጊቢስታማ ዳቔርስታ::