ሰለሞን ስንታየሁ
አማኻሪ ክልሉ ኩስጚ ጝና 6ንቲ ዙሪ 3ንቲ አሜቱ እንፅኺው ዝቤን 7ንቲ ሚዲቢኒ ጉባዮ ካስጝፅኾ።
አማኻሪ ክልሉ ኩስጚ ጝና 6ንቲ ዙሪ 3ንቲ አሜቱ እንፅኺው ዝቤን 7ንቲ ሚዲቢኒ ጉባዬ ስንብቶ ባርዳር ኬቴምዳ ካስጝፃ። ጉባዩሳ ብስፄ ዙሚትጜ ፄውንኩ ክልሉ ኩስጚ ጝናሱ ጉባይ ኽምባ ፋንቱ ተስፋዬ ኑኑውስታጊ ክልልታ ጌቴሙኹሳ ሰላሞ ቼሜትጝፅጝስ እጎ ኬቤርፅጙ እንፅኺስ ዋይምስቲ ኪሲ ሰላምዳ ይንታ አኽስ እሳ ይስጝፃማ ሲፍፅጝ ቱስቴ ንካ።
ችግራኻዳ አኽኑታ አኮሜችንኹ ልማቱ እንፅኽካስ ኪሴ አግናናጊ አኽጝስ ሲፋንኩ ጊዝካዳጊ ልማቱ ስታ ክርፂ ቺፅጝፂው ቴግባርካዋ ስታ ዊዳፊውሳ ሰላሞ ቼሜትጝፅጝስ ውላውሳ ቲቢቢርጜ ካሴው አኽⶓኽ ጉባይ ኽምባ ፋንቱ ተስፋዬ ዙሜካ። አድዋው ድሉሳ ታሪኮ ልማትስ ካቢጝ ቱስቴ ኑኑን ዊዛሩ ፋንቱ ክልሉሳ እዝቦ ውላቱዊ ልማትስ ቴኬምስታንንታ ፄውጝስ ኩስጚ ጝናሱ አባልካ አላፍቶ ፊትጝⶓ ካሴው ጊዝኻዳኽ አግስትናው ንካ።
አግልግሎቴ እይጝዳ ዝኩንኩ ዳንጉዌንካዋ፣ቱስታ ጋውሳ ቴኬምስታንቶ፣እዝብ ክቻዳ ጋቻዋ ፌቴርጝስ ልቕልቕ ናንኩ ፅንፌንካ አይልካዋ ካላካልጝጝስታ ክችስጝ ውላ ክልሉ እዝብዴስ ማንዲስታው አኽጝስ ጋያኪላ ኩስጚ ጝንካ እዝቡ ኾትካ አኽⶓ ሼውንጝስ ታምቦ ፊትጝ ዝኮ ንካ።
ጉባይዳ አግስትካማ ፌፄምፃንትካ ኾትካው 2016 ባጀት አሜቱ ኪንዲ አሜቱሳ ሪፖርቶ ዲግሱንኩ አማኻሪ ክልሉ ቺፅጝፂ ጛራ አረጋ ከበደ ክልሎ ቼሜትጝፅጝስ ምንግስቱሳ ታምቦ ፊትጝጙ ፅሬትስ ይስጝፃው ዋይሚ አግስታኽ ኑኑ። ክልልታ ሰሜኑ ወሬሙ እንኮኽስትዴስ ፋያሱ እዝባኻዳ ፅንፌንካ አይልካስ ካብስ ጋቻ ጁጝ ክልሎ ችግራኻ ሚፅጝዴስ ድምክና ሰላማውካ አቕዳ ኬፍቲኒ ይዎቱ፣አካሉስታ ንብሬቱ ድጙስትጝ ታምባታ አኽጝ ግልፄኽ። ፅንፌንካ አይልካስ ምንግስተትዴስ ዲጉኹሳ ኩስጜ፣ሰላሙስታ ይጉዊውሳ አቑዌ ቻቤላኑላ ይጉጝስ ድፂው ፂዊዳ ቱጝስ እዝቡሳ ሰላሞ አዌካማጊ አግስታና ንካ ቺፅጝፂ ጛራ።
ክልልታ ዋሊቲ አርፋኻዳ ሚፄ ኩፕፅጙ ቴግባር ዝኩኹሳ አኺኔ እንኮጚኒ ምስሊ ወክትሊ ካንትጝፅካማ ዲግስካ።2016ስ ሚዲቢኒዴስታ ኬቴሙ ልማትዴስ ትክላሊስ 71 ትኩሚ 65 ቢሊዮን ብሮስታ ቴሳስ 30ኺስታ ዴሜካ 35 ትኩሚ 36 ቢሊዮን ብሮ ኩፕፅጝስ አኬድስትⶓ ቺፅጝፂ ጛራ አረጋ ከበደ ዙሜካ።እንዴስ 17 ቢሊዮን 147 ሚሊዮን 596 ሻይ 671 ብር ኩፓኽ ንካ።አሜቱ ፌፄምጚ 23 ትኩሚ 93 ታፋ ያኹስ ቴሳስ 30ኺስተታ ዴሜካ 48 ትኩሚ 50 ታፋሳ ኩፕፅጝስ ካሊስታ ንካ። ፌይኹ ባጀት አሜትስ ምስሊ ወክትስ ኩፑኹዴስ 18 ቢሊዮን 012 ሚሊዮን 650 ሻይ 893 ብርሊ ካንትጛኒ 865 ሚሊዮን 054 ሻይ 222 ብሮ ዜርቕ ንⶓ ካንትፃኽ ኑኑ ቺፅጝፂ ጛራ ሪፖርትዳ።4 ትኩሚ 80 ታፋ ኔኬትⶓ ቶኬምካ።
እን ባጀት አሜቱ ኪንዲዳኪላ ኩፕፅጝ ቱስታው እሺኹዴስ 18 ቢሊዮን 208 ሚሊዮን 998 ሻይ 698 ብር ኩፓውሌስ ይጉⶓ ቶኬሙንኩ አቶ አረጋ እን አኽጝስ ካሉኹኪላ ጌቴሙኹ ፄትቲው ችግሩ ምክኒያቲስኽ ንካ።ሚፂ ኩፓውላ ይጉጝ እዝብ ካሴኩሳ ስርኩ ልማትካዋ ዋኽትጝፅጝስ ፅንጋኻ ያኻው አኽጝስ ውላጊ ሚፄ ኩፕፅጙሳ እንፅኼ ትኩትስ አኮሜቻንታ ታክስፅካ ቺፅጝፂ ጛራ ዲግሱኑ ሪፖርትዳ።
ቺፅጝፂ ጛራ ዲግሱኑሳ ሪፖርቶ ሲፋማ አማኻሪ ክልልታ ኬሴትስትኹ ፄትቲውስታ ሰላሙ ችግር ዊዳፊስ ኽይስታታ ኩስጚ ጝናሱ አባልካ ካሲካ።ኩስጚ ጝናሱ አባልካ ኩፂ ትኩትስ ጉሹንኩ ካስካ ክቻዴስ ፄትቲውስታ ሰላሙ ጉዳይ እምፕሌኽ።ናካ ሪፖርትዳ ዲጉኹ ስታ ኩክሪዳ ዝኩኹ ዲቭ ታምትጛላኬኽ ናኒስ አባልካ ጉሽካ። ጋያኪላ ዳድዳ አቒ ሬፍቴ፣ኪሚስቴ፣አጌትስቴ፣ትራንስፖርቱ ልቕልቕቲ ሚንችካ ዙራሙርካዳ ቲሬ፣ዝኩኒውላ ሜኬሪሴኽ እንዜጛኑ ናኒስ ካሲካ።እንዴስ ፌይኹስ ፄትቲውሳ ችግሮ ኽይጝስ ዋሳኺስታይ ፅንፌንካ እናናጊ ስሞ ይኑስ ዝኩናው?፣ኩስጚሾ ይንታንታ ፄውጝስ ዳማ ታክስስታ፣ሰላሙ ችግርስ እዝብ ምርኪስ ድጙስታታ ያኻማጊኽ ዋኒይ ክቼው፣ስሩ ልማትካው ዜርፍዳ ዳድ፤ሜብራቱ፣አኾቲስ ያኻንኩ ግንባትካ፣አኹ ችግር፣ ሚንችካ ጄሜርስትካማጊስታ ስሩ ካርጝ እንኩርስታማ ቲሪጙ ችግርካ ዝኩና ናኒስ ካሴካ።
ቺፅጝፂ ጛራ አረጋ ከበደ ኩስጚ ጝናሱ አባልካዴስ ጁንኩስ ኽይትጝፄ ዙርሜ እይካ::ትኩትስ ጁኹ ፄትቲውስታ ሰላሙ ችግር ያኹስ ቺፅጝፂ ጛራ “ ክልሉኪ ያኻ ፌድራል ምንግስቱ ወሺኒኪ ችግሮ ሰላምስ ይቤቺስ ይስታታ ፂኑኹ ፋይ ዝኮ” ናኒስ ዙሜካ::ክልሉ ምንግስት ችግርካ ሰላምስስታ ኩስጚስ ኽይስታንታ ክልሉ ኩስጚ ጝናስጊ ድምክኒስ ሰላሙሳ እቑዌ ፌያፌይጝፃሺኹ አኽⶓ ታክስፅካ::ያኽስጉ ሰላም እምፕል ዎጌኑ ፋይስ ይቤቺስ አግስታዉ ጋቲው አኽⶓ ቶኬምካ::
ፌድራሉ ምንግስትሊ ይጋሪስ ዙሚትጝጝስ ክልል ፌያፌይጝፁኹ ሰላሙ እቑዊስኪላ ምንግስት ሰላምስ ዝኩኹሳ ኩርፄንቶ ካንፅፃዌኽ ኑንኩ ቺፅጝፂ ጛራ ሰላሙ እቑዊ ድፂኩ አካልካስ ምሬቶ አግፃውስታ ሰላምስ እንፃኽስታማ ኪስስትጙሳ ድሎ እያዌኽ ንካ።
ጉባይዳኪላ ግብርኒው ዜርፍዳ ኽብፂውሳ ማዳባራ ዲግስጝዳ ጌቴማውሻውሳ ዲቦ ካንትኹስኪላ አባልካ ካሴ ጉሽካ።ክልሉ ግብርኒ ቢሩ አላፊ ድረስ ሰሃሉ(ዶ.ር) ኑኑውስታጊ ፌይኹ አሜትዳ ፌድራልዴስ ጄሜራማ ኽብፂው ማዳቢሪ አሬሳቻንትካስ ወክትስ ታምባውላ ይጉጝስ ማልጜ ቼጌርስትጝዴስ ፌይኹስ ምርትስታ ምርታምትዳ ኬፍቲኔ ምርቱሳ እንፂቶ ፌቴራኽ ኑኑ።
ያኽስጉ ምንግስት እንኮጛዴስ ክንቴ ካፅጝስ ኽብፂውሳ ማዳባሬ ጄውጙሳ ካስቶ ቤዴራማ ፄውጝስ ትክምቲ አርፊዳ ጄውስትኹ ማዳባሪ አጌራኻሾ ታምብጝ ምንጊዴስ ሊሊቲኽ ንካ።ክልልታኪላ ጄውጝስ ታክስስትኹ 8 ሚሊዮን ኩንታልዴስ ጃላ ያኽስጉ ላምቡ 2 ሚሊዮን 400 ሻይዴስ ጃላ ኩንታል ክልላ ታምባማ አሬሳቻንትካስ ቤንስታታ እምፕልቱ ማቤርካሾ ቱዋታ ፄውስታማጊኽ ንካ።ያኽስጉ ክልልታ ዝኩኹ ፄትቲው ችግር ማዳባሪ ወክትስ ታምባቲታ ፄዋማጊኽ ኑንኩ ዶክተር ድረስ ጋያኪላ ምስራክ ጎጃም፣ምራብ ጎጃምሾስታ አዊ ብሄረሰብሾ ታምፅጝስ ችግር ጌቴማኽ ንካ።
ጉላሌ ዜሮ ካንትኹስ ኽይትጝፄ እዩንኩ ዶክተር ድረስ 324 ሻይ ኩንታሎ ኩፕፅጝስ ታክስስታማ 38 ታፋ ያኻው አሬሳ ቻንትካስ ታምባታ ፅሬት ፄውስታማጊኽ ጋያኪላ ሹምቢው ጉላሊ ዜር ፃንኩፅስታማ አሌድስታኽ ንካ።
“ኽብፂው ማዳባሪ አሬሳቻንትካስ ወክትስ ታምባቲታ ፄውጝ ዝኩዊኒ ፍታናኻ ቱዋታ ፌሬድጜኽ” ኑንኩ ክልሉ ግብርኒ ቢሩ አላፊ ድረስ ሰሃሉ(ዶ.ር) ኩስጚ ጝናሱ አባልካኪላ ጛው ዙራሙሪሾ ማዳባሪ ወክትስ ታምባታ ሰላሞ ቼሜትጝፅጝሾዳ ጛውሳ አላፍቶ ፊትጛንታ ታክስፅካ።
አሊዳኪላ አማኻሪ ክልሉ ኩስጚ ጝና 6ንቲ ዙሪ 3ንቲ አሜቱ እንፅኺው ዝቤን 7ንቲ ሚዲቢኒ ጉባዳ ዳኝካውሳ ሹሜቶ ማራማራማ ፄዴክፃ።ክልሉ ትክላይ ፍርድ ጝናሱ ፕሬዝዳንት አብየ ካሳሁን ዳኝካውሳ ሹሜቶ ኩስጚ ጝናስ ዲግሱንኩ ክቻዴስ ላጛ ዞኑ ኬፍቴንካ ፍርድ ጝናሱ ዳኝካስታ 154 ወረዳው ፍርድ ጝናሱ ዳኝካ አግስታና።እንሱ ስሬትስ ምስራክ ጎጃሙ ዞኑ ኬፍቲኒ ፍርድ ጝናሱ ፕሬዝዳንት አቶ አባይ ጌታቸው ፋንታ ስታ ሰሜን ሸዋ ዞኑ ኬፍቲኒ ፍርድ ጝናሱ ፕሬዝዳንት አቶ ዮሃንስ ወንድሙ ደስታ ያኼካማ ሹሚስትካ።
154 ወረዳው ፍርድ ጝናሱ እርዳታንትካ ዳኝካው ስሙ ዝርዝር ኩስጚ ጝናሱ አባልካስ ዲጉኹ ያኹስ ዳኝካው ሹሜትዳ ኩስጚ ፄውስታ።154 ወረዳውዳኝካዴስ 55 ኩፂ ኹን ያኻኒስ እንኪላ ዳኝቱ ቴርትዳ ኹኑሳ ቴሳትፎ ካንትፃው አኽጝ ኩስጚዳ ጁዋ። 5 አንኮ አካሉ ዳንጉዊኒ ዝኩክጊ ዳኝትዳ ቱዋንታ ፄውስትⶓ ክልሉ ትክላይ ፍርድ ጝናሱ ፕሬዝዳንት አቶ አብየ ካሳሁንሾስ ጁዋ።
አሊዲዳኪላ ላጚጊ ኬፍቲኒ ፍርድ ጝናሱ ዳኝካውስታ 154 ወረድካኩ እርዳታንትካ ዳኝካው ሹሜት ዋኽ ድምፅስ ፄዴካማ ጉባይ አሌድስታ።
እሊውሾ ክልሉ ኩስጚ ጝና ፌድሬሽኑ ኩስጚ ጝናዴስ ዳንጉንኩ ክልሎ ዌኬላንኩ አባልካዋ እስካዊስ ጎሌላ።አማኻሪ ክልልዴስ ሊሊትጙንኩ ምክኒያትካስ ዳንጉንኩ አባልካዋ ቲኪጝስ ክልሉ ኩስጚ ጝና ቲኪስታንትካዋ ጎሌልጙ ስልታን ዝኩኹ አኽጝስ ጎሌላማ ፄዴክፃ።እንሱ ስሬትስ ቺፅጝፂ ጛራ አረጋ ከበደ፣ክልሉ ብልፅግኒ ፓርቲው ቻፊ ፅፌት ጝናሱ አላፊ አቶ ይርጋ ሲሳይ፣ክልሉ ብልፅግኒ ፓርቲው ቻፊ ፅፌት ጝናዳ አቺትጚ ዜርፋ አላፊ ፍስሃ ደሳለኝ፣ባርዳሩ ከንቲባ ጎሹ እንዳላማውስታ ምስራክ ጎጃም ዞኑ ቹዋ ቺፅጝፃንቲ አቶ ኑርልኝ ብርሃኑ ፌድሬሽን ኩስጚ ጝናሱ አባል አኻንታ ቶኬምስትካማ ላጛ ጌርካሳ እጄኹ ኩስጚ ጝናሱ ጉባይ አሌድስታ።