ጄግንንት ጄግንሳውሳ ፊዬ:: ጋያኪ ጄግኔ ጉሳንቴ ፃያያሱ እዝብ ኩፕፃንታ ጋቲታ ቤቴንስትኹ ሞሬፅ ንጚያኽ:: አኽጝስኪላ እምፕል እዝብስ ዋታኪ ፄዋማ ጄግኔ ካሜንጝ፤ ካሜናማኪ ሌጌፅጝ አይላዋ ፋይፄ:: እን ያኻኒኪ ጉሳንቲስታ ጉስስታው እዝብ ላጛሼውታኑላ አምንጜካማ እንዜጛና:: ችግር ይንታኒኪ እምፕልታ ኽይጝስ ሼውዴስ ኩስጛና::
እን አጌራዳኪላ ዝቤንዴስ ዝቤኖ አጌራዋ ሴጝፁኑውስታ እንክምንትስ አሬኬብፅጝስ ቢኩኑ እንቹ እንታሊ ጄግንካዋ ካሜንካማ ሌጌፅካማጊያኽ:: ናካ ኩፅኒ እምፕልታቕ ፍሽፂ እላቲው ችግራኻዳኽ አግስታው:: ጄግንካዋ ፃሚፅጝስ እንፃኽታውሳ ፄጌራው ሚንቺያኽ:: ጄግንስጝ ይጉዋማ ዲብጊ ፃንጌኽታ:: እዝብጊ ቑንዳስታ:: አማኻሪ ክልል ሜንች ችግርዳ እታ::
ይጋ! አማኻሪ ክልል ችግራኻዳ ቱዋማ፣ አጌራዋ ኬሌቫሺኹ አራሽ ሚፄ ፍሽፄ አታማ፣ ጊፂኒ ሼውስታ እንዜጛማ ጊፅስጝስ ቼጌርስታማ፣ ክንታንትካ ክንቴ ኬውጝፄካማ ዋሌንስ ዝኩዋና:: እዝቦ አጌሌጌልጝስ ዎንቤርዳ እንጅኩንኩ አቕ እጐ ኬብርፅጝስ ግርቦ አቴካማ እዝቦ ማንዲጝ ይጉዋማ ጛጛርትጛሳኪላ ማንዲⶓ ካላኑውላ ይጉጝ እሳንስ ካንትስታሺኹ ውኒያኽ::
ፄትቲኩ አካልካ ክርካ ላኼንትካማ አካሎ ዳንጉዌካማ ልቡስ ልቡ ዴክ ኬሽጛካማጊ ይንትጝስ ካላ:: ያኻችኽስጉ እንሳ ክችስጝስ እንዴስ ጌና ኪላ ሚንቾ እንፅኼ ፋያው ቴግባርያኽ:: እዝብ ጌዴፋያሱ ቺፅጝፃንቲ እንዳራኪ ፄዋ ካላላኽ:: እንጚሱ ጉሽፂሲያኽ ጄግኔ ካሜናካላቲው እዝብ ድስጝ ዳዳሳ እሚኹዊያኽ እስታው::
እማኻሪ ክልልዳ ኬሴትስትኹ ጋቻ እሻማ እግ ኬብርስታታስታ አጌራ እሊኩ ሌጌሱንኩ አጌርካታ ታኻታ ጄግንካዋ ጄግንስጝ ፋይፃንቲያኽ:: ዶንጌትካማ ጋቻዳ ቱዌካሺንኩ ሊሊቲ አይልኩ አባልካ ዴክሾ ዙርካማ ቤዴሉኑሳ እዝቦ ካሲጝስ ካሎ ቱንኩ አኽጝስ ጄግንካኽ:: እኒ ጄግንካዋ ጄግንስጝ ዴሜካ ውላዴስ ማንዲስቴ:: ጄግንካዋ ኬቤርፅንስ!