ስንዳይ ልማቱ ፅንጋኺ

ታደለ አጋጄ

ይቶፒያ ፌዩንኩ አሜትካዳ ሊሊቴ ትኩቶ እይጝስ እንፃኽስቴታጊ አግስቴው አኾቲው ስንዳዩ ልማት ምግቡሳ ዋስትኔ ቼሜትጝፅጝዴስ ፌያማ ባርኾቼሾ እንፃኽጝስ ክርፄ ዋይሜ ሚዚጊብፄታጊ አግስቲ::

አዊ ብሄረሰቡ ቺፅጝፂ ሊሊትጙንኩ ዙራሙርካዳ ሴብልስ አሜቻውስታ ሊሙኽሳ ብቴ እንቲታኪ ብቲ ብታስ ክቤንኩሳ ብንካዋ ቴኬምስትጝስ ችኹ ዎክትዴስ አሬሳቻንትካ አሜሬታኑ ሴብልዴስ ኪቻ አኾቲስ ሊሚፃኑ ስንዳዩ ምርት ኬሽኹስ ቴኬምስታንታ ፄዋማጊ አግስቴ::

አሬሳቻንትካኪላ ምንግስት እይኹሳ ሊሊቴ ትኩቶ እርዳትስትጝስ ስንዳዮ ክላስተር ሊሚፃማ ቴኬምስትጝስ ኬሽኹሳ ዝኩዊኔ ጉስጝስ፣ ጛጛርትጛዴስ ፊቲስካማ ጌቤልስ ዲግስⶓኺስታ ይስካማ እንፃኽስታና::

ባርኾቼው አጌርካውሳ እርዳቴ ቻቤልጝዴስ ኪቻ እሳን እርሺው ብቲዳ ሊሊትጙንኩ ቴክኖሎጅካ ቴኬምስትጝስ ስንዳዮ አኾቲስ ሊሚፅጝዳ አሴሜርጙንኩ አሬሳቻንትካ ቴኬምስታንታ ያኼካማጊ አግስታና::

ፌዩንኩ አሜትካዳ እንፃኽስቱንኩ ሳኑ አኾቲው እንፅኺስ ጉዶ ፊፂምጜ ካንትፅኹ አዊ ብሄረሰቡ ቺፅጝፂ ፌዴራሉ ምንግስትዴስ ሽልማቴ አግፅጝ ታክስስታዊያኽ:: ንጙዊኒ አሜትዳ ኩፅኒ ክልልታ ፌቴርስትኹ ሰላሙስታ ፄትቲው ችግር ግብርኒው እንፅኺዳ ቻኒስቶ ታምፃ::

ግባት ወክትስ ዲጋውላ ይጉጝ ዴሜካ አሬሳቻንትካ ሳኑ አኾቲው ልማትስ ሊሚፅጝዳ ቼጌርፅⶓ ሊሊትጙንኩ ወረድካዴስ አውጚ ቴሌብጅንስ ካንቴ ታምፁንኩ አሬሳቻንትካ ዙሜካ::

ጉዋንጊ ወረዳ ሰሜን ዲጊሪ ኬቤሊው አሬሳቻንቲ የኔው ማናምኖ ታምፁኑ ካንቲስ ትክምቲ አርፊዴስ ጄሜርካማ ስንዳዮ አኾቲስ ሊሚፅⶓ ዙሜካ:: አሬሱኑ እርሺው ብቲዳ ጊፂኒዴስ ግባቶ ጄዌካማ ስንዳዮ ዜሬካ::

ኬቤሊኩ አሬሳቻንትካ እንዴስ ቤዴራ ስንዳዮ ክላስተርስ ሊሚፅጙ ዴስ እላቲኩ እሺⶓ ቶኬሙንኩ አሬሳቻንቲ  እንኮጛ ምንግስት ጌዴድፃማ ዜርፃኒ ኬሽኹ ስንዳይ ዋግⶓ ዙሜካ::  አሬሳቻንትካ ንⶓ ግባት ዲጋውላ ይጉዋኒ ጊፂኒዴስ ሾሜትጝስ ዜርⶓ ዲብስካ:: ዜርስትኹ ስንዳይ ጉድ አኺኒዳ አግስታው አኽⶓ ዙሙንኩ አሬሳቻንቲ ኬሽኹሳ ምርቶ አግፅጝስ ቴስፌ እንኩርⶓ ድኹዌካ::

ግባቱሳ ችግሮ ኽይጝስ ኮምፖስቶ ቴርሴካማ ልቓ ብቲዳ ፄውⶓ ዙሙንኩ አሬሳቻንቲ የኔው ኮምፖስት ሚንች ብቲዳ ያኻውላ ይጉኒውላ ኮምፖስትስ ዜርስትኹ ኬሽኹሳ ምርቶ ዋግፅጝስ ካላው አኽⶓ ዙሜካ::

ይንታውስኪላ ስንዳዮ ጉሽናና ሹምቤ ዜርጝስ ቴርትና ኑንኩ አሬሳቻንቲ ግባት ወክትስ ዲጋያታ ካሲካ::

እሊው አንኪሺ ጉዋጉሲ ወረዳዳ ማንጃ ቱንኪሺ ኬቤሊው አሬሳቻንቲ ኬስ ምህረት ቢረሳው ዙሙኑውስታ ስንዳዮ አኾቲስ ሊሚፁኑዳ ቑንዚ ኬሴትስታማ ቴኬምስታኑላ ይጉⶓ ዙሜካ:: እንኮጛ ክላስተርስ ዜርጝስ ኬሽኹሳ ስንዳዩሳ ምርቶ አግፅⶓ እንክርፁንኩ አሬሳቻንቲ ጉድጛ ያኻማ ዋጉኒዴስ ፋሌንጋ ምርት ትክሞ እያውላስ ይጉⶓ ድኹዌካ:: ናካዳ ስንዳይ ኬሴርፅኹ ብቲዳ እሊውሳ ሴብሎ ዜርጝስ ቴርትⶓ ዙሜካ:: አሬሳቻንትካ ሊፌካማ ዜሩኑ ሴብል ትክሞ እያታ ምንግስት ምርት ዜሮስታ ግባቶ ዎክትስ ዲግሳያታኽ ካሲኑ::

ሰሜን ዲጊሪ ኬቤሊው ግብርኒው ውማይቲኒ አቶ ተካልኝ አሰፋው ኬቤሊታ አኾቲስ ስንዳዮ ሊሚፅጝዳ ኬሽኹ ልቕልቕቲ ዝኩⶓ ዙሜካ::

እንኮጛ አሬሳቻንትካስ ምንግስት ግባቶ ኔፃስ ዲግሳማ 177 ሄክታርዴስ ጃላ ብቲዳ ሊሚፅጝስ ኬሽኹ ትክም አግስትⶓ ጌሌፅካ:: ንⶓ ኩፅኒ ሴብል ጉድጛ ዋጉኒውላ ምንግስት ግባቶ ዲግሳውላ ይጉጝስ ምርትዳ እንፂት ፌቴሬ ናው ስጋት ዝኩⶓ ጌሌፅካ::

ኬቤሊዳ ውላ ዙራሙርካዳ ስንዳይ ዋጋቲው አኽⶓ ዙሙንኩ ግብርኒው ውማይቲኒ እንኮጛ አሬሳቻንትካ ስንዳዮ ዜሬካማ ኬሽኹሳ ምርቶ አግፄካያሱ ዙራሙርዳ ኩፅኒ እሊውሳ ሴብሎ ሊሚፃንታ ፄውስትⶓ እንክርፄካ::

አኾቲስ ስንዳዮ ዜሩኑ ትክምቲ አርፊዳ  ግባት ዲጋውላ ይጉኒውላ ናኪኒ ጊዝዳ ኩፅኒ ግባቶ ቱዋማጊ አኽⶓኪላ ግብርኒው ውማይቲኒ ድኹዌካ::

ስንዳይ ዋጋቲው ዙራሙሪዳ ዴሜካ አሬሳቻንትካ ዱኒዜ ዜርጝስ ታክስⶓ ቶኬምካማ ሚንቺትስ አሬሳቻንትካ  ስንዳዮ ዜርጝስ ኬሽኹሳ ምርቶ አግፄካማ ቴኬምስታንታ  አኽⶓ ጌሌፅካ::

አዊ ብሄረሰቡ ቺፅጝፂው ግብርኒው ሜምሪው አላፊ ዶ/ር ታደሰ አስፋው  ብሄረሰቡ ቺፅጝፂ አኾቲስ ስንዳዮ ሊሚፅጝዳ እንዴስ ቤዴራ ካንትፅኹ ጉድ ፌፄምጚስ ፌዴራልዴስ ሽልማቴ አግፅⶓ ቶኬምካማ ንጙዊኒ ዎክትዳ ኩፅኒ ክልልታ ፌቴርስትኹ ሰላሙስታ ፄትቲውሳ ችግሮ ግብርኒው እንፅኽዳ ኬፍቲኔ ቻኒስቶ ታምፅⶓ ጌሌፅካ::

እን አሜትዳ ስንዳዮ አኾቲስ ሊሚፅጝስ ፅሬቶ ፄውኒውላ ሰላሙስታ ፄትቲው ችግር፣ ግባት ዎክትስ ዲጋውላ ይጉጝስ፣ ጉላሊ ዜር ወክትስ አሬሳቻንትካስ ታምባውላ ይጉጝ ፌይኹ  አሜትዳ እሺኹ ጉድ ፌፄምጚዴስ ኪንዲስ ኔኬትⶓ ዙሜካ:: እን ያኹኒውላ አሬሳቻንትካ ግባቱሳ ችግሮ ኽይጝስ ፍትሬቱሳ ማዳባሬ ቴኬምስትጝስ ዜሮ ዜራንታ ፄውስታኽ ንካ::

ፄትቲው ችግር ዝኩንክ ወረድካዳ ስልኪስ ዴዌልካማ ውማዩሳ እርዳቴ እይⶓ ቶኬሙንኩ ግብርኒው ሜምሪው አላፊ አኾቲው ስንዳይስ ግብአቱ እንፂቱ ኬሴትስቱኒውላ ናካ ኩፅኒ ዳላው ግባት አሬሳቻንትካስ ታምባማጊያኽ ንካ::

እን አሜትዳ 10 ሻይ 206 ሄክታር ብቲ አኾቲ ስንዳይስ ሾፌንስታ ንካ:: አሬሳቻንትካ ኬሽኹሳ ምርቶ አግፃንታኪላ እርዳቴ ፄውናናጊያኽ ኑኑ::

ጉልሊ ዜር አሬሳቻንትካስ ታምባውላ ይጉዋኒ አሬሳቻንትካ ዜሩኑ ዜር ኩፅኒ ዋጉኒዴስ ፋሌንጋ ቑንዚ ኬስትስታታ ፄውስትኹ አኽⶓ ዙሜካ::

አንኪሺ ወረዳዳ ኬስትስትኹኪላ ጉላሊ ዜር አሬሳቻንትካ ታምባውላ ይጉዋማኽ ኑንኩ ግብርኒው ሜምሪው አላፊ ቑንዚ ኬስትስትኹ ዙራሙሪስ ውማይቴንካ እንፃኽጝስ ፅናት ፄውስታማ እጆ አሬቻንታ ፄውስታ ንካ::

ብሄረሰቡ ቺፅጝፂታ ጉዋጉሲ ሽኩዳድ፣ ዳንግሊ ወረዳ፣ ፋግቲ ለኮማ ወረዳስታ ጃዊ ወረድካዳ ሰላሙስታ ፄትቲው ችግርስ ግብርኒኩ ውማይቴንካ ቱዌካማ እርዳቴ ፄውጝስ ቼጌርስትⶓ ጌሌፁንኩ ዶ/ር ታደሰ  እሊኩ ወረድካዳ ኩፅኒ አሬሳቻንትካስ እርዳቲ ፄውስታማጊ አግስታው አኽⶓ ዙሜካ::

ትክምቲ አርፊዳ ስንዳዮ አኾቲስ ሊሚፃንኩ አሬሳቻንትካስ እንዳርማኪ ግባት ዲጋያሱ አኽⶓ ዙሙንኩ ዶ/ር ታደሰ አሬሳቻንትካ ጌቤልዴስ ሾሜትካማ ዜራንታ ፄውስትⶓ ዙሜካ:: ናካ ኩፅኒ ግባቶ አሬሳቻንትካስ ዲጋማጊያኽ ኑኑ::

ሰላም እላቲው ወረድካዳ እጎ ኬቤርፅጙ እንፅኺ ካፅስታማ ሰላም ይንታዉላስጊ ግብርኒኩ ውማይቴንካ ቱዌካማ እንፃኽስትጝስ ቼጌርስታንኩ አኽⶓ ቶኬምካማ ሰላሙ ችግር ዝኩኽ ወረድካዳ ግባቶ አሬሳቻንትካስ ታምፅጝስ ግብርኒው ሚንስቴር ወረዳ ቺፋ ጊፂኒስ እያማ አሬሳቻንትካስ ታምፃንታ ፄውስታማጊያኽ ንካ::