ሰላም ቼሜትጝፅጙ እንፅኺ

ታደለ አጋጄ

አማኻሪ ክልልዳ ፌይኹ አምሊ አርፊዴስ ጄሜርኹ ሰላሙስታ ፄትቲው ችግር ክልሉ ማይቤራዊውስታ ኢኮኖሚው ልቕልቕቲዳ ኬፍቲኔ ቻኒስቶ ታምፃማጊ አግስቴ።

ፌዴራሉ ምንግስት ዋልቲ አርፋ እጄው እምቢትኹ ጊዙሳ አዋጆ አዌጅጝስ ዶንጌትካማ ልቕልቕናንኩ አይልካዳ እጎ ኬቤርፅጙሳ እርምጄ ካፃማጊ ያኹኒውላ ሰላሙ አኺኒ ኩፅኒ ጊዝቺፋ ባሳማጊ አግስቴ። ፌይኹ አምሊ አርፊዳ አዌጅስትኹ እምቢትንኹ ጊዙ አዋጅ አሌድስትጞ ሲፋማ እዝቡ ዎኬልስታንትካው ኩስጚ ጝና ድምክኒ ሲዚ አርፍካዋ እጄታ ፄዴክፅጝ ታክስስታዊያኽ።

አማኻሪ ክልሉ ምንግስት ሊሊትጙንኩ ጊዝካዳ ፍሽኹ ጊሊፂስ ክልሉ ሰላሙ ፄትቲው አኺኒ ጉድ አችዳ አግስታው አኽጞ ጌሌፃማጊ አግስቴ። ፌይኹ ሶኼትዳ አማኻሪ ክልልዳ አግስታንኩ 15 ኬቴምካ እዝባዊ ኩስጝጚው ሜድሬኽ ካስጛ። ኩስጝጚውሳ ሜዴሬኾ ጉሱንኩ ብልፅግኒ ፓርቲው እንፅኼ ፌፄምፃንትካ ያኻኒስ ኩስጝጚዳ አሴቴፍጙንኩ እምፕልታቕኩ ቤንካ ሊሊትጙንኩሳ ካስካዋ ጉሽካማጊ አግስታና።

እሳንስ ጁንኩ ካስካዴስ ዴሜካ ክልሉ ሰላሙስታ ፄትቲው ጉዳይ እሺኾ። ምንግስት ዶንጌትካማ ልቕልቓንኩሊ ሰላሙ ኩስጚስ ችግሮ ኽያታ ካሲካ። ክልሉ ምንግስት ዶንጌትካማ ልቕልቓንኩ አይልካስ ሰላሙሳ እቑዌ ፌያፌይጝፅኹ ስሬትስ ሚንችካ አይልካ ሰላሙሳ እቑዌ ቻቤልካማ ሰላምስ ችግሮ ኽይጝስ ፋዮ ካንትፅካ። አዊ ብሄረሰቡ ቺፅጝፂዳ ሴዛ ወራድካዳ ዶንጌትካማ ልቕልቓንኩ አይልኩ እምፕልታቕዳ ዜርፋ ሚንቺ ቤዴሎ ታምፅካማጊ አግስታና።

አመራርካዋ ኩጝ፣ዳዶ ልምጝ፣እምፕልታቖ ኩጝ፣ዝኩፂ ጝኖ ሌግስ ድጝፅጝ፣ማኪና ቲሪፃማ ዜሬፍጝ፣ትክላሊስ እምፕልታቑ ልቕልቕቲ ቲሬታ ፄውጝስ ድኽትስ ታምባንታ ፄውጝ እምፕልታቕ ኬፍቲኒ ችግራኻዳ ቱዋንታ ፄውስታ። ዩዮ ጉዋጉሲ ወረዳዳ ናኪኒ ዎክታዊ ሰላሙሳ አኺኔ ካንታውስኪላ አዮ ጉዋጉሲ ዋራዳው ኮሙኒኬሽኑ ፅፌት ጝና አላፊሊስታ ዋራዳው ሰላሙስታ ፄትቲው ፅፌት ጝናሱ አላፊሊ ስልኪስ እጂጜ ፄውና። አቶ ዳሳለው ስማቸው አዮ ጉዋጉሲ ወረዳው ምንግስት ኮሙኒኬሽኑ ፅፌት ጝናሱ አላፊያኽ። አቶ ዳሳላው ዙሙኑውስታ ፅንፌንካ አይልካ ወረዳዳ ሚንቾ ቤዴሎ ታምፅካ። ወረዳውሳ ቢሮ ዱንፅካማ ዜሬፍካ፣አምቢሊ ኬቤሊኩ ዝኩዋንትካዳ ጝኖ ሌጌስ ድጙፅካ፤ አቖ ኩዌካ። አቶ ደሳላው እንታኮውሳ ችግሮ ታምፅካማጊ አግስታንኩ አይልካዳ እምፕልታቕ ምንግስቱ ኬምፕዳ አኽጝስ ድሳንታ ፄዌካማጊ አኽⶓ ዙሜካ። ወረዳዳ ፄውስትኹ ኩስጝጚው ሜድሬኽዳ እምፕልታቕ እንዴስ ቤዴራ ታምብኹ ችግር ካቢስታታ አቺትጜካማ ዙራሙሬ ማንዳንታሰታ ምንግስቱ ኬምፕዳ አኽጝስ እርዳቴ ፄዋንታ፣ ፅንፌንካ አይልካ ድፅጝስ አሬባሬብጜ ፄዋንታ ኩስጝጜ ፄውⶓ ዙሜካ።

ይስጙኽ እጎ ኬቤርፅጙ ዝማቺ ካስጛማጊ አኽⶓ ቶኬሙንኩ አቶ ዳሳለዉ ሚንችካ ኬቤልካ ፅንፌንካ አይልካዴስ ኔፃ ፍሽጝስ ጉድ ሰላሙ አኺኒ ፌቴርስታማጊያኽ ንካ። ልቓ ኬቤልካዳ ልቓልቓንኩ አይልካ ምንግስትስ ታፎ እያንታ ዙራሙሪኩ እምፕልታቕ፣ አጌር ሹማጌልካሊስታ አይማኖትኩ ታብልሊ እንቲታኪ ፄትቲኩ አይልካሊ ቱትጚዳ ታምⶓ ዙሜካ። ፅንፌንካ አይልካ ምንግስቱሳ ሰላሙሳ እቑዌ ቻቤላቲንኩ ያኹኒጊ ኩፂ እርምጂ ካፅስታው አኽⶓ ጌሌፅካ። አቶ ዳሳለው እንዴስ ዱንትኹ ቢሩ ፄጌንስታማ ምንግስቱ እንፅኺ ጄሜሬስታ፣ ፌንኬልጙንኩ እምፕልታቕ እሺኑ ዙራሙሪሾ ዙራንታ ፄውጝስ እንፃኽስትናናጊ አግስትኔ ንካ።

እንዴስ ቤዴራ ታምብኹ ችግርስ እምፕልታቕዳ ኬፍቲኒ አችስ ሞራል ጉዲስትⶓ ዙሙንኩ አቶ ዳሳለው ታምብኹ ችግርስ እምፕልታ እሺኑ ዙራሙሪዴስ ፌኔኬልጚ፣ ክንታንትካ ክንቴ ክንታቲንታ ፄውስትጝ፣ ካሜናንታ አኪም ጝናዳ ካታታ ካሜናቲታ ዳድ ልምትጝ፣ ዜሬፍጝ፣ ጛስጛዋ ኩትጚ፣ ምንግስቱ እንፅኺ እንፃኽስታቲታ ፄውስትጝስታ ግብርኒኩ ውማይቴንካ አሬሳቻንትካ እርዳቴ ፄዋቲንታ ትክላሊ እምፕልታቑ ልግስኒ አግርግራ ያኻማ ቱዋንታ ኬፍቲኒ አችስ ችግር ታምባማጊ አኽⶓ ዙሜካ።

ፌኔኬልጛሺንኩ እሺኑ ዙራሙሪሾ ዙራንታ ፄውስታማጊ አኽⶓ ቶኬሙንኩ አቶ ዳሳለው ሹኻ ኬቤልካዳ ፅንፌንካ አይልካ ዝኩⶓ ዙሜካ። ሚንችካ ክንቲ ጝንካ ክንታንትካዋ ክንትፄካማጊ አኽጝኪላ ዙሜካ። ችሌ፣ ሶሪትስታ ሺንዲ ውምብርማሊ ዎሊኒ ኬቤሊዳ እሳንስ ፅንፌንካ አግስታኑ ዙራሙሪ አኽጝስ እምፕልታቕ ምንግስትሊ እምፕልትስ  ድሳንታ ፄውስትጝ ቱስታዊያኽ ንካ። አዮ ጉዋጉሲ ወረዳ እንዴስ ቤዴራ እሺኹ ሰላሙ ችግርዴስ ፋማ ናካዳ ጉድ ሰላሙስታ ፄትቲው አኺኒ ዝኩⶓ ዙሙንኩ ዴሜካ አዮ ጉዋጉሲ ወረዳው ሰላሙስታ ዴክቱ አላፊ አቶ ቦጋለ ገረማውያኽ።

እንዴስ ፍና ፅንፌንካ አይልካስ እምስታሺንኩ ሹኻ ኬቤልካ ኔፃ ፍሽⶓ ዙሜካ። ዋራዳው ፄትቲኩ አይልካ እይስትኹሳ ግዳጆ ቱስቲስ ፊትጜካማጊያኽ ኑንኩ አቶ ገረማው እምፕልታቕ፣ አጌር ሹማጌልካ፣ አይማኑትኩ ታብሊ ዝኩኑዳ ሰላም ክንትፅጝስ ድኬ ድኪ ንጝስ ኬፍቲኔ እንፅኼ እንፃኽስትጝስ አድጉያስታ ኢናባሪ ኬቤሊዳ ዶንጌቱንኩ አይልካ ሰላሙሳ እቑዌ ቻቤላንታ ጉድ ልቕልቕቲ ፄውስታማጊ አኽⶓኪላ ዙሜካ። ፌይኹዳ ፄትቲኩ አይልካ ስልታኔ ካፅካማ ኬሻንቲ አኺኒዳ አግስታንኩ አኽⶓ ዙሙንኩ አቶ ቦጋለ አጌር ሹማጌልካስታ አይማኑትኩ ታብል ውኖ ዙሜካማ ውኖ ፌሬዱኒጊ ውንሱ ሰላም ይንታዊያኽ ንካ። ግባት አሬሳቻንካስ ዎክትስ ታምባታኪላ ፄትቲኩ አይልካ ጛውሳ አላፍቶ ፊትጛንኩ አኽⶓ ጌሌፅካ። ፄትቲውስታ ሰላሙ ዙሪዳ ፄውስታንኩ ኩስጚው ሜንድሬኽካ ዙራሙርካዋ ምንጊሱ ሰላምሾ ዙራንታ ፄዌካማጌኽ ኑንኩ ዴሜካ አዊ ቤረሰቡ ቺፅጝፂው ሰላሙስታ ዴክቱ ሜምሪው አላፊ አቶ ጌታቸው ቢሻዊያኽ።

ኩስጚ ሰላሞ ቼሜትጝፅጝስ ዝከኹሳ ታምቦ፣ ዊዳፊውሳ ሰላሞ አግጝስ ፄውስታንኩ ልቕልቕትካዋስታ እሊኩ ፄትቲውስታ ሰላሙ እንፅኺሊ እምትጙኹስ ቺፅጝፂውሳ ናኪኔ አኩዋሞ ካንትኹስ ሰላሙስታ ዴክቱ ሜምሪው አላፊ አቶ ጌታቸው ቢሻውሊ ስልኪስ ጌሌፁኑውስታጊ ኬሴትስታውሻንኩ ሰላሙስታ ፄትቲው ችግርካው ዙሪዳ ጉዳይ ካንታኩ ሊሊትጙንኩ እምፕልታቑ ቤንካሊ ኩስጚ ፄውስትጝ ሰላሞ ቼሜትጝፅጝስ ዝኩኹ ታምብ ኬፍቲኔኽ ንካ። ወክትኪላ “ሰላም ይዌኽ፤እያሴኽ ቴኬማው” ንጝስ አላፍቶ ካፅካማ እንፃኽስታንኩ አካልካሊ ኩስጜ ካሴው አኽጝስ ዞንታ ዝኩንኩ ወረድካዳጊ እዝቡ ኩስጚ ካስጛታ እንፅኽካ አኮሜችስትካማጊ አኽⶓ ዙሜካ።

ጋያኪላ አዩ ጉዋጉሲ፣ዚጋሚ ወረድካዳ፣ እንጃቢሪ ኬቴምዳ፣ ጃዊ፣  ፈንድካስታ ቻግኒ ኬቴምካዳ ሊሊትጙንኪ እምፕልታቑ ቤንካሊ እሳን ኩስጚ ፄውስታኽ ኑኑ አቶ ጌታቸው። እንዴስ ድምክና ፖለቲካውስታ ፄትቲው አመራርሊ ሰላሙስታ ፄትቴ ቼሜትጝፅጙ ዙሪዳ እሳን ኩስጜ ፄውስታኽ ንካ።እንስኪላ ቺፅጝፂታ ካንፅስታው ኪሲ ይንታማጌኽ።

ፍንሾስኪላ ኪሲ ሲፋው እስታማ አምንስቴኽ ኑኑ። ናካ ዝኩንኩ ውላጊ ችግርካ ኽይስታንታ እናና እንፅኽካዋ አኮሜችናናጊ አኽጝስ ዲጊስ ውላ ዲብ ምንጊ እሺኹሾ ዙሬ ናታ ታክሳኽ ንካ። ፄውስታውሻው ኩስጚ አይማኖትኩሳ ታብሎ፣ አጌር ሹማጌሎ፣ ወታትካዋ ኹኖስታ ጝርጃዋ ዴሜክኹ አኽጝ ሰላምስ ኬፍቲኔ ታምቦ ፊትጛንኩ አካልካሊ ፄውስታውሻው አኽጝስ ኪሴ አግጝዴስ ፌይኹስ ካብስ ጋቻ ጁዋቲታ ኬፍቲኔ ታምቦ ፊትጛንኩኽ ኑንኩ ሜምሪው አላፊ ፄውሴታንኩ ሜድሬኽካዳጊ እኒ አካልካ ጛው ዙራሙሪስ አላፍቶ ካፅካማጊ አኽⶓ ዙሜካ። እምፕልታቕ ታምትጚ ዝኩንኩ ወሌንሊ ወላሊጊ እንዴስ ቤዴራ እሺኹዴስ ታምትጚዴስ ኬፍ ንኹሳ ሰላሙስታ ዴክቱሳ እንፅኼ እንፃኽስትጝስ ይጋሪስ ሰላሞ ኬቤርፅጙ አላፍት ዝኩክ አኽⶓ ሜምሪታጊ ታክስፅጝስ ፋቴ ናኒስ እንፅኼንቶ ፌያፌይጝፄካ።