ማዳባሬ አሬሳቻንትካስ ታምፅጝስ ፅሬት ፄውስታማጊ አኽጝ ጌሌፅስትኾ

ታደለ አጋጄ

አማኻሪ ክልልዳ ፌይኹ አሜቱ ምርቱ ዝቤንዳ ግባቱ እንፂት ፌቴርኹ  ምርቱስታ ምርታምት እንፂቱ ችግርስ ምክንያቲ ያኽጝዴስ ፌያማ ክልልዳ ክርፂ ቺፅጝፂውሳ ችግሮ ፌቴራማ እሺኹ አኽⶓ ትክትሊ ቺፅጝፂ ማሬግስ ጌፄር ልማት ዜርፉ ቴቤቤርጝፃንቲስታ ግብርኒው ቢሩ አላፊ ዶ/ር ድረስ ሳህሉ ዙሜካ::

ዶክተር ድረስ እዩኑ ጊሊፂስ እምስትኹ ምርቱ ዝቤንዳ 8 ሚሊዮን 57 ሻይ ኩንታልዴስ ጃላ ኽብፂው ማዳባሬ ጄው ፌፄምስታማ ቤዴራማ እንዜጝትጝፅⶓ ጄሜሩኒውላ ክልላኻዳ ዶንጌትካማ ልቕልቕናንኩ ፅንፌንካስታ ዜሬፋንትካው ኬች ፌፄማው እጋፊ ቴግባርስ አሬሳቻንትካስ ዳላው ሜቴንስ ታምፅጝስ ካሊስታያ ንካ:: እንኪላ ክልሉ እዝብስ ኬፍቲኔ ቻኒስቶ ፌቴርኹ አኽⶓ ጌሌፅካ:

አማኻሪ እዝቡ ስምስ ልቕልቓንኩስታ አማኻሪው እዝብስ ቡንክትጝናኻ ናው አካል ግብርኒው ግባት አሬሳቻንትካስ ታምባቲታ ፅንጋኻ አኽጝ ጛርቱ ትክሞ አግፅጝስ ፄውስታማጊያኽ ኑንኩ ዶክተር ድረስ እዝብኪላ እጋፍካዋ ቡንክትጝጝ   ቱስቴ ንካ::

ፖላቲካው ሊሊት ዝኩኒውላ ችግርካዋ ሴሌቴንኹ ዳድስ ኽይጝስ ካሊፃው አኺኒ ዝኮስኩስ ዶንጌትጝስ ልማቱ ልቕልቕቴ ፅንጋኽፅጝ ቹዋ  ችግር አኽጝስ ክቺጝ ቱስታው አኽⶓኪላ ጌሌፅካ::

ክልላኻሾ ቱዋውስታ ዎዳብዳ ኬዜንስታማ እንኩርስትኹ 5ሊኻ ሻይ ኩንታልዴስ ጃላ ኽብፂው ማዳባሪ ዝኩⶓ ቶኬሙንኩ ዶ/ር ድረስ ወክትስ አሬሳቻንትካስ ታምባታ ቲቢቢርጚስ እንፃኽስትጝስታ ሰላሞ ማንዲፅጝስ  ትኩትስ እንፃኽስታው ጉዳዬኽ ንካ::

ዜሬፋንቲ ኬች ዳድዳ እንዜጝትጝጛማጊ ዝኩኽሳ፣ ማቤርካው ሜጋዝንዳ እንኩርስትኹሳስታ አሬሳቻንትካስ እይስታው እሺኹሳ ኽብፂው ማዳባሪ ዜሬፍስትኹ  አኽⶓ ቶኬሙንኩ ዶክተር ድረስ 114 ሚሊዮን ብርዴስ ጃላ ጌንዜቦ ፍሻው ግብርኒው ግባት ፅንፌንካው አይልካስ ዜሬፍስታ ንካ::

አዊ ብሄረሰቡ ቺፅጝፂዳ አግስታው አድማስ ውላቱዊ አሬሳቻንትካው እምፕልቱ ማቢሪው ዩኒየኑ ስራስኪያጅ መሰረት ወርኬ 3 ሊኻ ሻይዴስ ጃላ ኽብፂው ማዳባሪ ማይኬላዊ ሜካዚንሾ ታምብⶓ ዙሜካ::

2016/17 ምርት ዝቤንዳ አድማስ ዩኒየን አሬሳቻንትካስ አኬድኹ ኽብፂው ማዳባሪ 824 ሻይ 363 ኩንታል ያኹስ 303 ሻይ 824 ኩንታል ኽብፂው ማዳባሪ ማይኬላዊ ሜካዚንሾ ታምብⶓ ዲብስካ:: እንዴስኪላ 39 ሻይ 737 ኩንታል አሬሳቻንትካው እምፕልቱ ማቤርካሾ ታምባኽ ንካ::

ወክታዊ ፄትቲው ችግር ወክትስስታ ፋይስታው ጊዝስ ታምፅጝስ ፅንጋኻ ያኹኒላ አድማስ ዩኔየን ሜካዚንሾ ታምብኹ ኩፂ አሬሳቻንትካስ ታምባታ ፄውጝስ ፅሬት ፄውስታማጊያኽ ንካ አቶ መስረት::

“ንⶓ ግባቱ እንፂት ጌቴማላኽ:: እንኮጛ ኩፂ እን ጉዝማ 218 ሻይ ኩንታል ማዳባሬ ሚፅጝስ አኬድስታማ ሜካዚንሾ ቱጝስ ካሊስትኹ ኩፂ 50ሻይ ኩንታል ይቢቺያኽ” ንካ::

አድማስ ዩኒየን ማዳባሬ ወክትስ ታምባታ ፄውጝስኪላ ማኪና ሜዳባማ እንዜጝትጝፃማጊ አኽⶓ ዙሜካ::

አሬሳቻንቲ ምትኩ አምሳሉ ዚጋሚ ወረዳዳ ግምርና ዋግሳት ኬቤሊው ዝኩዋንትካኽ:: እንኮጛ ግባቱ እንፂትስ ግብርኒው እንፅኺዳ ቻኒስቶ ታምፅⶓ ዙሜካማ ንⶓ ኩፂ ኽብፂው ማዳባሪ ወረዳሾ ታምባማጊ አኽⶓ ዙሜካ:: ላንቡሳኺስታ ኩፂ አሬሳቻንትካስ ታምባያላኽ ኑኑ:: ግብርኒኩ ውማይቴንካስ ፋያኑሳ ኽብፂውሳ ማዳባሬ  እክዶ እምፅⶓ ዙሜካ:: አሬሳቻንቲ ምትኩ 25 ኩንታል ኽብፂውሳ ማዳባሬ ፋያው አኽⶓ ቶኬምካማ ናካኪላ ያኹኒ ዳላው ኽብፂው ማዳባሪ አሬሳቻንትካስ ታምብጝዳ ስጋት ዝኩⶓ ዙሜካ::

እሊው አንኪሺ ጉዋጉሲ ወረዳ ማንጃ ቱንኪሺ ኬቤሊው አሬሳቻንቲ ይርጋ ሰለሞን ኽብፂው ማዳባሪ ማቤርካሾ ቱዋማጊ አኽⶓ ዙሜካማ ላንቡሳኺስታ ኩፂ አሬሳቻንትካስ እይስታያላ ንካ::

እንዴስ ቤዴራ ሊሊትጙንኩ ችግርካስ ታምባውላ ይጉኒውላ ንⶓ ኩፂ ዳላው ግባት እይስታው እስታማ ማሲው እሳንትታ እክዶ ሚፅⶓ ዙሜካ:: አሬሳቻንቲ ይርጋ ችኹ እርሺስ 5 ኩንታል ማዳባሬ ፋያው አኽⶓ ዙሜካማ እንኮጛ ኬሴትስትኹ ችግር ኬሴትስታቲታ ፄውጝ ቱስቴ ንካ::

ምንግስት አሬሳቻንትካስ ኽብፂውሳ ማዳባሬ ወክትስ ዲግስጝ ዝኮ ኑንኩ አሬሳቻንቲ ማቤርካዳ ዝኩኽ ችግርኪላ ክቺጝ ቱስታው ጉዳዬኽ ንካ::