አትሌት ፅጌ ዱጉማ ወርኩሳ ሜዳሊያዋ አግፂኾ

ዘውዴ በካሉ

ትንታጋ ጊጛንታ አትሌት ፅጌ ዱጉማ 800 ሜትሩ ጊጚዳ ወርኩሳ ሜዳሊያዋ አግፄ:: አትሌት ፅጌ ዱጉማ ቤንሻንጉል ጉሙዝ ክልል ካማሽዴስ አግስቲት ፃርካ አልማዛኪላ ናና:: ይቶፒያዳ አበላምቴ ወርኩሳ ሜዳሊያዋ፣ አሌሙ ጝናኻሱ አትሌትክስ ሻምፒዮናዳ እንቲታኪ ሰኮትላንድ ግለስኮዳ አግፄ:: አትሌት ፅጌ ዱጉማ ግለስኮደ ካስጙኽ 19ንቲ አለሙ ጝናኻሱ ሻምፒዮና ኹንስ 800 ሜትሩ አሊዲ ልኺትጚዳ ዊፃንታ ታኻ:: ሻምፒዮናዳ ኹኑ 800 ሜትሩ ልኺትጚዳ 2ሳታ፡01 ደኪካ ፡9ዐ ሴኮንድ ያኹኽ ሳትስ  ታምብጝስ ወርኩሳ ሜዳሊያዋ አግፅጝስ ካሌ::

አትሌት ፅጌ ዱጉማ ይቶፒያዴስ ፊቴታ እሊኩ አሌምኩ አጌርካዳ ካስጛንኩ አጌርካዳ ልኺትጜ ዊፅጝስ አጌራውሳ ባንዲራዋ እሊኩ አጌርካዴስ ኬፍ ናማ አውሌባሌብስቴታ ፄውታ::

አትሌት ፅጌ ዱጉማ እንፃኺታስ ታይካ ፍይልካዋ ማንዲስ ጊጜ፣ ኩታ እንክራዋስታ ሊሊትጙንኩ ስፖርትኩ ልቕልቕትካዋ ፄውታሽቲት አኽጝ ማሊስታ::

ጝንዴስ አሌዳ ጄራኽ:: ጝን አቕ እንፃኻኒ ያኻስ፣ እቑዌኒ አቤት ኔት፤ ዙራሙሪኩ ማቤር አቕስ እንካንስቶ አግፂት አኽጝስ ስፖርትስ ዝኩኽ እንካንዴስ ጁኽስ ሊሊትጙንኩ ስፖርትኩ ልቕልቕትካዳ ዴስጝታታ ፄውጝስ ወረዳዳ፣ ዞንዳስታ ክልልዳ ካስጛንኩ ሊሊትጙንኩ ስፖርትካው ልኺትጝካዳ አሴቴፍጝታታ ፄውⶓኪላ ዲብስስቴ::

አትሌት ፅጌ ዱጉማ 2005 ም.አ አሰላ  ኬቴምዳ አግስታው ትሩነሽ ዲባባው ስፖርቱ አካዳሚዳ ጎሊልስቴታ ሊሊትጙንኩ ልኺትጝካዳ ክርፄ ዋይሜ ሚዚጊብፄ:: 200ደስ 400 ሜትሮ ጊጜ ጄሜርታ:: እሊው ዴሜካ ይቶፒያ ንግድ ባንክዳ 200ዴስ 400 ሜትሮ ጊጝታታ ኬሽጙኽሳ ዋይሜ ሜዜጌብፅጝስ  ኬፍ ንኹዳ ዴሜካ 800ዳ ስታ 1200 ሜትርዳ ልኺትጝጝስ ሚንችካ ችግርካ ዝኩኒኪላ ሚንች ፅሬትዴስ ፋሌንጋ ቤልጂየም፣ ሰርቢያ፣ ፈረንሳይዳስታ እሊኩ አሌም አጌርካዳ ካስጛንኩ ልኺትጝካዳ ዊፄ:: ፈረንሳይዳ ካስጙኽ 2024 ፓሪስ ኦሎምፒክዳ ኬሻንቲ ዋይሚስ ማንዲስታንኩ አትሌትካ ክቻዴስ አትሌት ፅጌ ዱጉማ እምፕላኽ::