ታና በለስ ሽኩዋሩ ፋብሪኪ ምርቶ ቲሪፅጝ ጌሌፅስትኾ

ዘውዴ በካሉ

ታና በለስ ሽኩዋሩ ፋብሪኪ  አጌራኻዳ ጊዝዴስ ጊዞ  ባስጛማጊ ይንቱኹሳ ሽኩዋሩ ዲግስጝጚውሳ ችግሮ ኽይጝስ ካሌ እስታችኹኒ ምርቶ ቲሪፅጝ ጌሌፅስትኾ፡፡

ታና በለስ ሽኩዋሩ ፋብሪኪስስታ ሽንኮሩ ቓንፂው ልማትስ ጃዊ ወረዳዳ 50 ሻይ ሄክታር ብቲዴስ ጃላ 4 ሻይዴስ ጃላ አቕ ብቴ ባይፅካማ ጆንታ ያኽስቱኒዴስ 12 አሜቶ ቼፍፃ፡፡

ታና በለስ ሽኩዋሩ ፋብሪኪው ፕሮጄክት 2003 ም.አሜትዳ ጄሜሩስ ሹኻ ፋብሪክካዋ ጊቢትጝስ አኬድስቱኒኪላ ሊሊትጙንኩ ምክንያትካስ እምፕሎ ፋብሪኬ ይቢቼ ጊቢስትⶓ ንባርካ ቶኬማና፡፡

ታና በለስ ሽኩዋር ፋብሪኪው ቹዋ ስራአስኪያጅ አቶ አበበ ይሁኔ ይቶፒያው ፕሬስ አችትስ ጌሌፁኑውስታጊ፤ ፋብሪኪ ስካዊስ ቲሪትጙኽስታ ዋኾ አክሞ ቴኬምስታማ ምርቶስታ ምርታምቶ ዴሜክጝስ አኬድስታማ እንፅኺሾ ቱኽ ያኹኒኪላ ሽኮሮ አሜሬታማጊ ጋቲው አኽⶓ ዙሜካ፡፡

ታና በለስ ሽኩዋሩ ፋብሪኪ ሽኮሮ አሜሬትጝስ ቹዋ ቹዋ ችግርካኪላ ኤሌክትሪኩሳ አይሎ አግፃሺኹ ኩንዝላ ሀይድሮ ኤሌክትሪኩ አይሉ ፍልቕፂ እምፕል አሜትዴስስታ ኪንዲዴስ ጃላ አቤሌሽስታማ እንፅኼ ቲሪፅጙ ምክንያትስ ኤሌክትሪክ አይሉ ዲግስጝጚው ችግር ታምብጝስታ ማሽኖ ዲግስጙ ችግርስ እንፅኺ ቲሪⶓ አቶ አበበ ጌሌፅካ፡፡

ታና በለስ ሽኩዋሩ ፋብሪካኻዳ እን አሜትስ ዋልቲ ሻይ 33 ሄክታር ብቲዳ ሾንኮሩሳ ቓንፄ አሜሬትጝስ፤183 ሻይ ኩንታል ሽኮሩሳ ምርቶ አግፅጝስ አኬድስትⶓ ጉሽንኩ አቶ አበበ ጌቴምኹ ችግሩ ምክንያትስ ዳርኪ ሽኮሩ ምርት አሜሬትስታያሱ አኽⶓ አቕፄካ፡፡

ኤሌክትሪኩሳ አይሎ ዲግስⶓስታ ግብአቱ ማሽኑ ችግርስ ሽኮሮ አሜሬትⶓ ኬውጝፅኹ ታና በለስ ሽኩዋሩ ፋብሪኪ ሽኮሩሳ ምርቶስታ ምርታምቶ ይጉፅጝዴስ ድምክና ፋብሪካኻዳ እንፃኽስታንኩ እንፃኽስታንትካስ ደሞዜ ኬይጝ እሊው ኽሳንቲ ችግር አኽⶓ አቶ አበበ ጌሌፅካ፡፡

ፋብሪኪ ዝኩኹሳ ችግሮ ኽይጝስስታ እንፅኺሾ ቱጝስ ይቶፒያ ኤሌክትሪክ አይልዴስ መብራቱ አይል ዲጋያታ ካሴማጊ አኽⶓ አቕፁንኩ አቶ አበበ፤ ፋብሪኪዳ ካንትስታውሳ ማሽኑስታ ግብአቱ እንፂጙሳ ችግሮ ኽይጝስ ይቶፒያው ልማቱ ባንክዴስ ጉሼ ካሲካማጊ አኽⶓ ዙሜካ፡፡ ታና በለስ ሽኮሩ ፋብሪኪዳ እንፃኽስታንኩ ሚንችካ ኢንቨስትመንትኩ እንፅኽካ ዝኩንኩ ያኻኒስ፣ ፋብሪኪ ዙራሙሪኩ እምፕልታቕስ እንፅኺውሳ ድሎ ፌቴራውስታ ይኮኖሚውሳ ልግስኔ አግጝስ እንፃኽስታው አኽⶓ አቶ አበበ አቕፄካ፡፡

ታና በለስ ሽኩዋሩ ፋብሪኪ ጌርክስ 12 ሻይ ቶን ሽኮሩሳ ምርቶ አሜሬትጙ አክም ዝኩኹ አኽⶓ ጉሽንኩ አቶ አበበ አንኩዋ አሜታኻዳ 24 ሻይ ዋልቲ ሊኻ ሄክታርዴስ ጃላ ብቲ ሽኮሩ ቓንፂውሳ ምርቶ አሜሬትጝስ ፋብሪኪ ዝኩኹሳ ዋኾ አክሞ ቴኬምስትጝስ አኬድስትⶓ ዙሜካ፡፡ ፋብሪኪ ናካ 1500 ቲሬንቲስታ 1600 ዴስ ጃላ ጊዞ ኺስታ እንፃኽስታንኩ እንፃኽስታንትካ ዝኩንኩ ያኻኒስ፤ ችግር ኽይስታማ እንፅኼ ጄሜሩኒጊ እንዴስ ፍና እሺኹዴስ ላጛ ታፋ ያኻውሳ እንፅኺውሳ ድሎ ፌቴራው አኽⶓ አቶ አበበ ጌሌፅካ፡፡

ታና በለስ ሽኩዋሩ ፋብሪኪ ቲሪትጙኒዴስ 12 አሜትዴስ ጃላ ያኹኒኪላ ቼፍ እምፕል ታና በለስ ሽኮሩ ፋብሪኪ 15 ጌርኩሳ ሙኪሪውሳ ምርቱሳ ጊዞ አሌዳማ ግንቦት 29 ጌርክ 2013 ም.አሜትዳ ዳቔርስትⶓ ሊሊትጙንኩ ንባርኩ ፍንካዴስ  አግስትኹ ንባር ቶኬሜ፡፡   ፋብሪኪ አባላምቴ ቼፍ እምፕል ታና በለስ ሽኮሩ ፋብሪኪ 15 ጌርኩሳ ሙኪሪውሳ ምርቱሳ ጊዞ አሌዳማ ዳቔርስቱስ ጌርክስ 12 ሻይ ቶን ሽኩዋር አሜሬትጝስ ካላው ያኹስ፤ አሜትስ 2 ሚሊዮን 372 ሻይ ቶን ሽኮሮ አሜሬትጙ አክም ዝኮው አኽⶓስታ ጌርክስ 160 ሻይ ቶንዴስ ጃላሽኩዋሩሳ ቓንፄ ፍቻው አኽጝ ጌሌፅስታ፡፡

ታና በለስ ቼፍ እምፕል  ሽኩዋሩ ፋብሪኪ ዳቔርስቱስ ኢፌድሪ ትክላይ ሚኒስትር አብይ አህመድ ዶ/ር፣ አቶ ደመከ መኮንን፣ ቤዴራንታ እማይታ ዝናሽ ታያቸው፣ ቤዴራሱ አማኻሪ ክልሉ ምንግስት ፕሬዚዳንት አገኘሁ ተሻገር፣ ሲዳማ ብሄራዊ ክልላዊ ምንግስት ፕሪዝዳንት አቶ ደስታ ሴዳሞ፣ አጌርኩ ኬፍቴንካ እንፅኺኩ አላፍካ፣ ሽኮሩ ኮርፖሬሽኑ አመራርካስታ አባላትካ እንቲታኪ እቑዊ  ፄውስታይኩ ሌንጌድካ አግስቴካ፡፡ ታና በለስ ቼፍ እምፕል ሽኩዋሩ ፋብሪካ ሚንችካ ችግርካዋ ፌያማ ዳቔርስትጝ ሚንችካው ዴስቲ እሺኹ አኽጝ ጌሌፅስታ፡፡

ይካቲት 30 ጌርክ 2015 ም.አሜትዳኪላ ታና በለስ ሽኩዋሩ ፋብሪኪ ፉቼ ሽኮሮ አሜሬትጝ አቕስቴ፡፡ ያኼስጉ ናካ ጌቴምኹ ኤሌክትሪኩ ችግር ስጋታ ያኻሺኾ፡፡ ፋብሪካ ፍንሾስ ዊዳፊ እንፅኼ አኮሜችጝስ ታና በለስ ኤሌክትሪኩሳ አይሎ  ፍልቕፃው ሰብሰቴሽኑ እንፅኼ ቲሪፅጝ ፅንጋኻ አኽጝስ ካላው አኽⶓ ፋብሪኪው ንባርካዴሰ ካፅጝስ ፍና ዜጌባ፡፡