ቡንስ ኪሰስትኹ ዝኩዊኒ

ታደለ አጋጄ

ይቶፒያዳ ቹዋ ኢኮኖሚው ልግስስ ቴኬማንኩ ግብርኒኩ ምርትካዴስ ቡን እምፕሊያኽ:: ይቶፒያ አሌምዳ ቡኖ እሳንስ አሜሬታንኩ አጌርካዳ ሚዲብስቲ:: አጌራው ቹዋ ኢኮኖሚው ስር ያኹኽ ቡን ባርኾቼሱሳ ምንዛሬ አግፅጝስ ኬፍቲኒ ታምብ ዝኩኽያኽ::ያኼስጉ ቡኖ አሜሬታንትካ አሬሳቻንትካ ሊሊትጙንኩ ዙራሙርካዳ እሳንስ ቡኖ አሜሬቱኒውላ አጌራስ ፋይስታውሳ ላካ ሚፂ አግስታማጊ ጋቲው አኽⶓ ሊሊትጙንኩ ፅናትካ ካንትፃና::

ቡኑ ምርትዳ አሴሜርጙንኩ አሬሳቻንትካ ቡኖ ቱስቲስ አሜሬትጝስ ጛጛርትጛሱሳ ዝኩዊኔ ኬሽጝፅካ::ቡንስ ቴኬምስታንትካ ያኹንኩ  አሬሳቻንትካዴስ ኪስ ፈንታሁን አዳል  እምፕልያኽ::ጉዋንጊ ወረዳ ቻጃ ምቑዊ ኬቤሊዳ ዝኩዋንትካኽ:: ቡኖ አሜሬትጝሾ ቱኒዴሰ ሚንችካ አሜትካዋ ቼፍፅካ:: ሹኻ ፍሩሳ አኾ ግሽካማ ፍሽጝስ እምፕል ሄክታርዳ ቡኖ እሳንስ ሊሚፃና:: እንስኪላ ወረዳው ግብርኒው ፅፌት ጝናዴስ ሽልማቴ አግፅⶓ ዙሜካ::

ዙራሙሪ ቡንስ ማልጛ አሜቻውስታ አኹ ዲጊዳ አግስታው አኽጝታጊ ቡንስ ኬሽኹስ  ምርቶ አግፃንኩ አኽⶓ ዙሙንኩ ኪስ ፈንታሁን ግብርኒኩ ውማይቴንካው እርዳቲስ ኬሽኹስ ቴኬምስንታ አኽⶓ ዲብስካ::

ኪስ ፈንታሁን “ ምንግስት ቡኖ ሊሚፃን “ናውሳ ኩስጜ ቻቤልካማ ቡኖ አሜሬትጝዳ አሴሜርጜካ:: ቡኖ ዋይካማ አግፃኑ ጌንዜብስ ጄርካዋ ክንትፄካ:: ቻግኒዴስ  ብቴ ጄውጝስ ጝኖ ግቢትጝስ ቴርትⶓ ዙሜካ:: መኪና ቱዋቲው አኽጝስ አሜሬቱኑሳ ቡኖ ብቕልስስታ ድኾርስ ቻኒጝስ መኪና ቱዋውሳ ስፍሬኺስታ እንዜጝትጝፅጝስ ካፃና::

ቡንስ ቱስታዉሳ አንክባኬብጜ ፄውጝስ አሜት ቺፋ ኬሽኹሳ ምርቶ አሜሬታንኩ አኽⶓ ዙሙንኩ ኪስ ፈንታሁን ግብርኒኩ ውማይቴንካ ኬሽጙኽሳስታ አኾ ፋያቲው ቡኑሳ ቴክሎ አሜሬትካማ አሬሳቻንትካስ ታምፁኒጊ ኬሽኹሳ ትክሞ አግፅጝስ ካላንኩ አኽⶓኪላ ዙሜካ::

“እምፕል ማሊኪ ቡን 12 ብርዴስ ጃላ ዋይስታው አኽጝስ እሊው ግብርኒው ዜርፍዴስ ኽስኹስ ኬሻው አኽⶓ ቶኬምካማ ቡንስ ቱስታውሳ አንኬባኬብጚ ፄውስቱኒጊ ሚንቾ ትክሞ እያው አኽⶓ ጉሽካ:: እምፕል ኩንታሎ ቡኖ አሜሬትጝ እሊው  ምርትዴስ ኽሳው ትክሞ እያዊያኽ ኑንኩ ኪስ ፈንታሁን ጛውሳ ዴሶ እሊኩ አሬሳቻንትካስ  ቤንጝፅⶓ ዲብስካ::

አሜሬቱኑሳ ቡኖ  አሬኬብስትካማ ካፃሺንኩ ማቤርካ አሬኬብስትካማ ካፅካማጊ ጋቲዊያኽ ንካ::

እሊው ቡኑ ምርትዳ አሴሜርጙንኩ አዮ ጉዋጉሲ ወረዳ ሹኻ ጃቢሊ ኬቤሊው አሬሳቻንቲ አቶ ብርሃኑ እንዳለዉ ቡኑ ምርትዳ አሴሜርጙኒዴስ 20 አሜታዴስ ጃላ ያኻ:: ቡን ምርት ሚንቾ ትክሞ አያው አኽⶓ ራዲዮንዴስ ቹኒቱኑ ስሬትስ ቡኖ አሜሬትጝዳ ቱⶓ ዲብስካ:: ወረዳዳ ሹማቲ ቡኑ ፕሮጀክት ቲሪትጝጝ ዴሜካ ቡኑሳ ፌሎ ካፅካማ ቴኬላንታ ፄዋ::

ቡን እሊው ምርትዴስ ሚንቾ ትክሞ አያው አኽጝስታ  ናካዳ ዝኩኹ ዋይሚ ማልጛ ኬፍንኹ አኽጝስ እሊው ግብርኒው እንፅኺዴስ ኪቻ ቡንዳ አሴሜርጛንታ ፄውኹ አኽⶓ ዲብስካ::

ዙራሙሪስ ፌያማ ካሳውሳ አዮ ብኖ ቴኬምስትጝስ ቡኑሳ ፌሎ ፌልሳና:: አንኮ ውጋቢ ብቲዳ ቡኖ ቴኬልካ:: እንስኪላ ቡን ምርትስ ጛጛርትጛሱሳ ዝኩዊኔ ኬሽጝፄካ:: ጄርካዋ ክንትፄካ:: ክንትፁኒዴስ ፋሌንጋ ሊሊትጙኽ እንፅኺዉ ዜርፍዳ አሴሜርጛንታ ፄዌካ::

አቶ ብርሃኑ ሊሚፃኑ አንኮ ዉጋቢ ብቲዳ አሜት ቺፋ 30 ዴስ 35 ኩንታል ቡኖ አሜሬታንኩ አኽⶓ ዲብስካ:: ወረዳዳ ቲሪትጙኽ ቡኑ ማቢሪስ አሜሬታኑሳ ቡኖ አሬኬብፃሺና:: ያኼስጉ ናካዳ አሜሬቱኑሳ ቡኖ ማቤርካስ አሬኬብፅጝስ ሰላምሰታ ፄትቲው ችግር ፅንጋኻ አኽⶓ ዙሜካ::

አሬሳቻንቲ ብርሃኑ እሊኩ አሬሳቻንትካኪላ ጛዴስ ዴሶ ካፅካማ እሳንስ አሜሬታንኩ አሬሳቻንትካ ዝኩⶓ ቶኬምካማ ቡኖ ሌኬማንኩ እንፃኽስታንትካስ እንፅኺውሳ ድሎ ፌቴርⶓ ዙሜካ::

“ቡንታ ቴኬማ እሊው ዲብ ዝኮ ናታ ታክሳላ” ኑንኩ አሬሳቻንቲ ብርሃኑ ግብርኒኩ ውማይቴንካው እርዳቲ እንዴስ ቤዴራ እሺኹ ያኹኒውላ ናካ ኩፅኒ ግብርኒኩ ውማይቴንካው እርዳቲ ሰላሙስታ ፄትቲው ችግሩ ምክንያቲስ እርዳቲ እላኽ ኑኑ::

አቶ ብርሃኑ አሜትስ ቡንስ 250 ሻይዴስ 3 ሊኻ ሻይ ብሮ ኺስታ  አግፃንኩ አኽⶓ ዙሚጝስ ናካዳ አሜሬቱኑ 25 ኩንታል ቡኖ አሬኬብስታዉ ማቤሪ እላ አኽጝስ ጝንዳ ኬዜንካማ እንኩርⶓ ዲብስካ::

አዮ ጉዋጉሲ ወረዳው ግብርኒው ፅፌት ጝናዳ ትክልቲውስታ ኩፓኩፒው ኬቹ ጉሳንቲ አብዮት የሻነህ እን አሜትዳ ቡኖ ቴኬልፅጝስ 69 ሻይዴስ ጃላ ቡኑሳ ፌሎ ፌልስጝስ ልቕልቕቲዳ አግስታንኩ አኽⶓ ዙሜካ:: ችግኙ ጉትፕደ 199ሻይ ቡኑ ፌል ቴርትⶓ ጌሌፅጝስ አሬሳቻንትካስስታ ኬቤሊኩ ግብርኒኩ ውማይቴንካስ ስልታኔ እይⶓ ዙሜካ::

ወረዳታጊ ላጛ ቡንኩ ማቤርካ አግስታንኩ አኽⶓ ቶኬሙንኩ አቶ አብዮት አሬሳቻንትካ አሜሬቱኑሳ ቡኖ ወክትስ ዋይካማ ቴኬምስታንታ ያኻንታ ክልልዳ ፌቴርስትኹ ሰላሙስታ ፄትቲው ችግር ፅንጋኻ አኽⶓ ዙሜካ:: አሬሳቻንትካ  ጌፄንካሰ አሬኬብፅጝስ  ዳላው ጌንዜብስ ዋይካማጊ ጋቲው አኽⶓ ዲብስካ::

ናካዳ አሬሳቻንትካ አሜሬቱኑሳ ቡኖ አሬኬብፃንኩ ማቤርካ ይንታኑላ ይጉጝ  እን አሜት ቡን እሳንስ አሜሬትስታቲታ ፄዋው አኽⶓኪላ ጉሽካ::

አሬሳቻንትካ ፃንኩቶ ማንዱኽሳ ቡኖ አሜርትካማ ትንካኪስ እንኩርጝ ቱስቴ ኑንኩ አቶ አብዮት ጌቤሉ ታምትጜ ፌቴርስታታ ፋይስታንኩ አካልካሊ ዙሚትጜ ፄዌካማጊ አኽⶓ ዲብስካ::

እሊው ጉዋንጊ ወረዳው ትክልቲውስታ ኩፓኩፒው ኬቹ ጉሳንቲ ካሴ አዳመ ወረዳዳ ችግኙ ጉትፕ ዝኩጝ ሊሊትጙንኩ ኬቤልካዳ አሬሳቻንትካ እሊው ግብርኒው ዜርፍሊ ፃምርስጝስ እሳንስ  አሜሬትስታማጊ አኽⶓ ዙሜካ::

ወረዳታ  ፌዩንኩ ሹኻ አሜትካዳ 300 ኩንታል ቡኖ ማይኬላዊ ጌቤልስ  እንፃኽⶓ ቶኬምካማ አሬሳቻንትካ ፃንኩቶ ማንዱኽሳ ቡኖ አሜሬትካማጊ አግስታንኩ አኽⶓ ዙሜካ::

ቡኖ ትንካኪስ ኻግዳ ካግስካማ ፃንኩቶ ማንዱኽ ቡን ያኻታ አሬሳቻንትካስ ሼውቴ ፌቴርⶓ ዙሜካ:: እንዴስ ቤዴራ ሊሊትጙንኩ ፕሮጄክትካ 2 ሻይዴስ ጃላ ያኻንኩ አሬሳቻንትካስ ስልታኔ እይⶓ ዲብስካ:: ንⶓ ዴሜካ ሊሊትጙንኩ ምክንያትካስ ቡንዳ እርዳቴ ፄዋንኩ ፕሮጀክትካ እላ አኽⶓ ድኹዌካ::

ስጋዲ፣ ሰሜን ዲጊሪ፣ አንጉዋይ፣ ቻጃ ምቑዊ፣ ሉንፅ ዲጊሪ፣ ትሩብርሃን፣ ይማሊስታ ቢዝራካኒ ኬቤልካዳ አግስታንኩ ሊሊትጙንኩ አሬሳቻንትካ ቡኖ ሊሚፅካማጊ አኽⶓ ዲብስካ::

ቻጃምቑዊ ከቤሊዳ አሬሳቻንቲ ኪስ ፈንታሁን አዳል ሹኻ ፍሩሳ አኾ ግሽካማ እሳንስ ቡኖ ሊሚፃንኩ ይሴን አሬሳቻንቲያኽ ንካ::

ሊሊትጙንኩ ቡንኩ አይኔትካ አየሩ አኺኒታጊ አሬሳቻንትካስ ታምፅጝስ ፅሬቶ ፄዌካማጊ አኽⶓ ዙሜካ:: ቡንዳ ቑንዚ ኬሴትስታቲውሳ ፍሮ ግሻኒሳ ሹኻ አርፋዴስ ቤዴርካማ ግሻቲንኩ አኽጝስስታ ቡኖ ቴኬላኒስ ፋይፃውሳ ትንካኬ ፄዋኑላ ይጉጝሲያኽ ኑንኩ አቶ አብዮት ወረዳታ እን አሜትስ 379 ሻይ ቡን ስጋዲ ችግኙ ጉትፕዳ ቴርትⶓ ዙሜካ::