ቭላድ ሚር ፑቲን

ታደለ አጋጄ

ሩሲያው ፕሬዝዳንት ቭላድሚር ፑቲን አንኮቲ ጊዝስ ስልታንዳ እጂጝስ ዊፅካ። እንስኪላ አውሮፓዊያንካ ዝቤን ቼፋ 2030ዋ ኺስታ ዋልቲ አሜትካዋ ሩሲያ ቺፅጝፃንኩ አኽጝ አቕስታ።

ጉላሌ ዊፁኒዴስ ፋሌንጋ ፄውኑ ዙሚትጚስ ጛው ስልታንዳ እጂጝ “ሩሲያ ይሴናስታ ዋይሚስታ ያኹኽ ዳድስ ሌጌስታታ ካሊፃቲያኽ” ንካ፡፡ ጎሌላንትካውሳ ሊኽዴስ 87 ታፋሳ አግፅጝስ ድሉሳ ክብረ ዎሴኖ ኬሽጝፅጝስ ካሌካ። እንዴስ ቤዴራ ዊፁኑ ሊኽዴስ 76.6 ታፋሳ ድምፆ አግፅጝስ እሺኾ። ፑቲን ዊፁኑ ጉላሊ ልኺትጛንትካ እላቲኑዳ፣ክሬምሊን ቤተ ምንግስት ሩሲያውሳ ፖላቲካ፣ ሚንቻ ታምትጝፅካስታ ጉላሌ ይስጝፄካማ ቼፍጝጛኑ አኺኒዳ ያኼካማኽ። ሚንችካ ምራባዊያንካኩ ጉሳንትካ ጉላሊ ኔፃስታ ፍታዊ ያኻያሱ ንጝስ አዌጌዝካ። እኒጛ ክቻዴስ ዩክሬኑ ፕሬዝዳንት ቮሎድሚር ዜሌንስኪ “ስልታንስ ሴኬሩንኩ እንጃ እላናንቲ” እንቲታኪ ስልታኑሳ ዝቤኖ ሌጌፅጝስ እንፃኽስታቲኑ ትንኩል እላ” ናኒስ ዙሜካ። 71 አሚቲ ፑቲን አውሮፓዊያንካው 1999 አሊዲዳ እሺኾ ስልታንሾ ይንቱኑ። ጆሴፍ ስታሊንዴስ ፋሌንጋ ሩሲያ ሚንችካ አሜትካስ ቺፅጝፅጝስ ካሌካ።

ፑቲን ጉላሊዴስ ፋሌንጋ እዩኑ ጋዚቲው ጊሊፂዳ ዩክሬንዳ ካስጝፃኑ ዉታድሪውሳ ዝማቼ ይስጝፄካማ ሲፋንኩ አኽⶓ ቼሜትጝፄካ። ሩሲያ ዩክሬንዳ ፌፄምትኹሳ ውራሬ ሲፋማ ምራባዊያንካ ሚንቾ ማይኬቦ ድርብካ። ያኼስጉ ሩሲያ ማንዲስቲኹስታ ያኺትዬስ አውሮፓዳ አሬኽትስ ምታኒ አብቶ ሚዚጊብፄታጊ አኽጝ ሚንችካ ምታኒ አብቱ ውማይቴኖ ኪንክፃ። “አጌራው አብቱ ምታኒ ጉድ አኺኒስ ልቕልቓማጊ አግስቴ። አጌራውሳ አብቱሳ ምታኔ ሌጌፃማጊ አግስትጝ ጎሌልስታንታ ፄዋ “ኑስ ቢቢሲው ሩሲያው ዜጌባንቲ አሌክሲ ካልምኮቭ እርዳትፃና። ሩሲያው ምታኒ አብት ኔኬቴ ንካማ ሚንችካ ማንዱኒውላ እንግልቢችስ ሊኽዴስ 2.6 አብት ሌጌስⶓ አሌማ አቡቑ ጌንዜቡ ኾት (አይኤምኤፍ) ንባር ካንትፄ። አጌራዳ ምታኒ አብቱ ሜቴን ሌጌሳማጊ ዝኩኹ 300 ቢሊዮን ዶላሩ ንብሬት አጌድስትⶓ ዴሜካማ ሚንችካ ምራባዊያንካ ማይኬቦ ድርቡኑ አኺኒዳኽ። ያኼስጉ እኒጛ ማይኬብካ ውላ አሌሙ ቤንዳ አግስታንኩ አጌርካዳ ቴግባርዳ እሺያ። እንኪላ ሩሲያ ቻይናሊ፣ ህንድሊስታ ብራዚልሊ ኔፃኔትስ ጌቤልትጝታታ ካሊፃ። እንቲታኪላ ሩሲያኩ ዎሌን አጌርካ ካዛኪስታንስታ አርሜንያ ምራባዊያንካውሳ ማይኬቦ ፌይጝስ ዳዶ ፋያካማጊ አግስታና። “ሩሲያ ኽሳንቲ ምታኒ አብት ዝኩቲያኽ። ሩሲያውሳ አብቶ ዜሬቕፅጝስ ሚንችካ አሜትካ ካፃው ማይኬብ ፋይፄ። ናካዳ እንታኮው ዲብ እላኽ” ናኒስ ካልምኮቭ ጌሌፃ።

“ሩሲያ ሼኬቶ ባርኾቼሾ እንፃኽጝስ ጌንዜቦ አግፂ አኽጝስኪ ፋታውሳጊ ዋይጝስ ኔፃኽ”ኑስ ጋዚቲኒ ዲብሳ። ብብራንቲው(ነዳጁ) ማይኬብ ስምስ ድርቡኑዊያኽ። አጌራ ዋይታታጊ ዝኪኹ ፍትሬቱሳ ጋዞ፣ አሬ፣ ኒኩሌሩሳ ነዳጆ ቹዋስ ጄዋንኩ አውሮፓኩ እምፕልቱ አጌርካዳ እንዳርማኪ ማይኬብ እንኩርስታያኽ” ኔ። አክኽካው ዋይሚ ቤዴራሱሊ ካንትጛኒ ሲዛ እፅፎ ኽስቶ ካንትፁኒውላ ሳሴርስ አግስትጝ ኽስኹስ ቴኬማው አኽⶓ ዶ/ር ሹልማን እርዳትፃና። ሩሲያ ሲዚ አሜታዴስ ቤዴራ ፄውትኹ እዝቡ ውሳኒስ እጋ ምንግስት ኬሽጛታ ፄውታ። እን እጋ ምንግስቱ ኬሽጚዳ ፑቲን ላጛ ድምክንካ ዋልቲ አሜትካስ ስልታንዳ እጄታ ፌኬዳይካ። እንዴስ ፋሌንጋ ፑቲን 83 አሚቲ ያኻና። “ትሮቴ ፋውሳ ፄጌራላ። ስልታንዳ ዝኮስኩኒስ ክርካማ ጜዋ ፄጌራውሳ አቔ ቲኪጚያኽ” ናና ዶ/ር ሹልማን።ያኻማኪላ እን አኽጝስ ካላቲው አኽⶓ ጌሌፅካማ “ሩሲያው ምንግስቱ ቴርት ዎሌጃማጊስታ ቴርቶ ጉሳማጊ ዝኩኽ አቒ ኽስኹስ ይስኹ አኹኪ ዎታት ያኻማ ካሳውላ ይጉጝስ ውላው አሬጌግጝ እምፕል አቒዳ ትኩትኹያኽ። እንኪላ ኑሮ ዝኩጝስ ካሊስታላ” ንካ።