ሰላም ሰላሙ ዳራዳርጚስ

ታደለ አጋጄ

“ሰላም ውላስ ውላ ሰላምስ” ናው ጉሲ እንፅኼንትስ አማኻሪ ክልልዳ ኬሴትስትኹ ሰላሙ ችግርስ ኽይቲውሳ አሳቦ ያጋና እሰትካማ ጐሌልስቱንኩ እምፕልታቕኩ ቤንካሊ ሴኒ 17/2016 ም.አታዴስ 18/2016 ም.አታሳ ኺስታ ላጛ ጌርካሱ ጉባኢ ባርዳር ኬቴምዳ ካስጛ::

ጉባኢዳኪላ ዋሺኒኪ አችስ ዋዳኪ ስፍሪዳ ዋሺኒኪ ዳራዳርጝፃንቲስ ላንጝጊ ሴብትጛንኩ አይልካ ንጝኪ ምንግስቱ አይልስታ  ዶንጌትካማ ሴብትጛንኩ አካልካ ዊዳፊ ቴኩሶ ቲሪፅጝስ ዙሚትጜስታ ዳራዳርጜ ፄዋንታ ጉባኢዳ ዎሴንትጝስ እንሳ ካስጝፅጝስ 15 አባልካ ዝኩኑ ሰላሙ ካውንስል ጐሌልስታ::

ጎሌልስትኹ ሰላሙ ካውንስል ኩስጝጜ ፄውስ እጂኒዴ ስፋሌንጋ ሴኒ 22/2016 ም.አታ ጊሊፄ ፍሻ:: ጊሊፂዳኪላ አማኻሪ ክልሉ እዝብዳ እን ዝቤንዳ ፌቴርስትጝ ቱስታቲው ጋቻ ኬሴትስታማ ኢኮኖሚው፣ ፖላቲካውስታ ማይቤሪዊ ቻኒስቶ ታምፅኹ አኽⶓ ሰላሙ ካውንስል ጊሊፂዳ ቶኬማ:: ክልልዳ ኬሴትስትኹ ጋቻ አጌራዋ ጉዳትስስታ ባስኹ ድኽትሾ ካፃማጊ አኽጝ ጌሌፅስታ::

ሰላሙ ካውንስል ጋቻው ጁፂ ምክኒያት ናማ ጌሌፅኹሳ አማኻሪ ክልሉ እዝብ ሚንችካ ጊዝካስ ጉሻሺኩ ካስካስ ዙርሚ አይስታውላ ይጉጝስ፣ ካሲ ዙርሜ አግፃው ዳድ ግልፅስ እንኩርስታውላ ይጉጝ አኽⶓ ጊሊፂዳ ቶኬምስታ::

ዛቢትጙኽሳ ትርክቶ ክችስጝ፣ እጋ ምንግስቶ ኬሽጝፅጝ፣ ድንቤሩስታ አይቱ ካሲ፣ ፍታዊ ያኹኽ ዳድስ ኢኮኖሚው ቴኬምስስንትስታ እሊዉ ክልልካዳ ዝኩዋንኩ አማኻሪ እዝቡ ጉዳይ እንቲታኪ ሊሊትጙንኩ አጌራኩ ቤንካዳ ሰላማውካ እዝብካዳ ታምባው ክርጝስታ ፌኔኬልጚ ካሲስታንቶ ሴፌንፃውላስ ይጉጝ ሚንችካ አሜትካስ እዝብ ቡንክትጜ ፄውስ እጂⶓ ሰላሙ ካውንስል ጌሌፃ::

ናካዳ ሚንችካ ክልሉ ዙራሙርካዳ ካስጛማጊ ዝኩኹ ሴብትጚስ 12ዴስ 13 ቢሊዮን ብርስ ጋሚስታው እዝቡ አብትስታ ንብሬት ዎዴማ፤ ሰላማውካ እምፕልታቕ ክርካ፤ 3 ትኩሚ 6 ሚሊዮንዴስ ጃላ ስራስሪ ክንቲዴስ ሴጋ አኽⶓ ሰላሙ ካውንስል ጌሌፃ:: ኢኮኖሚው ልቕልቕቲ ማልጛ ጉዲስታ:: ጛርቱስታ ምንግስትኩ ኾትካ እዝብ ስፍሪዴስ ስፍሬ ልቕልቒጚስ  አገልግሎቴ አግፃታቲታ ፄውስታ:: እኒ ችግርካስ ኽይቲ እስትኹኪላ  ዊፃንቲ እላቲው ጛስጛው ዎሬም አኽጝስ ዙሚትጚስስታ ዳራዳርጚስ ችግር ኽይስታታ እስታማ ጉባኢዳ ዎሰንስትⶓ ሰላሙ ካውንስል አቕፃ::

ሰላሙ ካውንስል ላንጝጊ አይልካ እዝቡሳ ችግሮ እርዳትስትጝስ ዊፃንቲስታ ዊፅስታንቲ እላቲው ሴብትጚዴስ ኪቻ ውላዋ ዊፃንታ ፄዋውሳ ዳራዳርጚውሳ ሜርሆ ሲፍጝስ እዝቡሳ አጃንዴ ዙሚትጚስስታ ዳራዳርጚስ ኩርፄንካ ያኻንታ ካሴ::

እን ሳኪትጙኽ ያኻታ ፖላቲካኩ ፓርትካስ፣ ምሁራንካስ፣ ማይቤራዊ ሚድያው ጁትጝፃንትካስ፣ አማኻሪ ክልሉ እዝብስስታ እሊው አጌሩ ቤንዳ አግስታንኩ እዝብካስ እንቲታኪ ባርኾቼዳ ዝኩዋንኩ ይቶፒያንካስ ላንጝጊ ዎጌንካ ዙሚትጚስስታ ዳራዳርጚስ ችግሮ ኽያንታ ታምቦጊ ፊትጝጛንታ ሰላሙ ካዉንስል እቑዌ ፌያፌይጝፃ::

ሰላም ውላው አኽጝስ አችቺፋ እቑዊ ፄውስታይኩ አካልካ ዲጋንታስታ  ሰላሞ ይጋሪ ቼሜትጛታ እቑዊ ፄውስታ::

አማኻሪ ክልልዳ ዶንጌቱንኩ አይልካ ሰላሙ ካውንስሉሳ እቑዌ ቻቤልጝ ቱስቴ ኑንኩ ዴሜካ ኢቲቪስ ካንቴ ታምፁንኩ ባርዳር ኬቴምኩ ዝኩዋንትካኽ::

አጌራዊ ሰላሙ ኮሚቴ አባል ሳምሶን እስጢፋኖስ (ዶ/ር) ሰላሙ እቑዊ እን ወክትዳ ፄውስትጝስ ፋይፅኹ ቹዋ ምክንያት ክልልዳ ሚንች ጉዳት ታምብኹ አኽጝስ፣ አይልስ ቡንክትጝጝ ፋይስታውሳ ሜፍቴ አግጝስ ካሊስታያሱ አኽጝስ እንቲታኪ አማኻሪው እዝብ እሊኩ እዝብካታ ጄግንካ እዝብካ አኽጝስ ዎሬምስ ይንታው ሰላምዴስ  ኪቻ ዳራዳጚ ፋይፃዉ  አኽⶓ ኢቲቪስ ካንቴ እይካ::