ኬርትዴስ ክንትንስ!

ፌይኹ አፍሪካው ታሪክዳ ሩዋንዳው ኹቱስታ ቱትሲ እስታንኩ ብሄርካ ክቻዳ ዜርስ ጁኽ ጋቻስ አጌራዳ  እምፕል ጌርክስ 100ሻይ አቒ ክርጝ ታሪክስ ዜኔግስታቲው ፅፄቱ ቴግባር ፌፄምስታ::

እን ታሪኩ ጉሽፂ ኪላ ሩዋንዳዋ ይቤቼ ጉሻማ ፌይጝስ ያኻውላ ይቶፒያዳ ናካ ናካ ፌፄምስታማጊ ዝኩኽ ችግር እንዴስ ሊሊታ ጋቲዊያኽ::

ጋያኪ ፌይጙንኩ ላጛስታ ሹኻ አሜትካዴስ ናቴ ክልል ቤንጝፅኩ ብሄርካስታ ዜር፣ አይማኖት ጁዋማጊ ይቶፒያውያንካዋ ዊድጝፃው ችግር እዝብ ዙራሙሪ ቺፋ ስካዩሳ ታምቦ ኬሜሳታ ፄዋ:: እስጜ ችግሮ ኽይጝስኪላ ምንግስት ሊሊትጙንኩ ክልልካዳ እምቢትንኹሳ አዋጆ ፍሽጝስኪላ ስላሞ አቲጝስ ጁዋንኩ ችግርካዋ አሬጌግጝፃማጊ አግስቴ::

እምቢትንኹ አዋጁ እንኩርስትጝ፣ ዙራሙሪ ቺፋ ፄውስታንኩ ኩስጝጚዳ ኽይስትካያሱ ችግርካኪላ ቻ እሼማጊ አቒውሳ ይወቶ ድፅጝስታ ንብሬቶ ዌዴምፅጝ /ድፅጝ/ ሲፋታ ያኻ::

ምንግስትኪላ እስጜ ሼው ንጝስ ክልሉ አችስኪ ያኻ ፌዴራሉ አችስ ሴላሙሳ እቑዌ ፄዋማጊ አግስቴ:: ክልሉ ድንቤሩ ወሴንስ፣ ዝኩዊኒው ክብርናቲስ፣ ምንግስት ዝኩዊኒዳ ኪሴ ያጋያ ንካማ ሊሊትጙንኩ ጉዳይካስ ማቔችካማ ካዌና ቱንኩ ወጌንካስኪላ ምንግስት ካሴ አምኽጚስ ኽይጝስ እቑዊ ዲግሳማጊ አግስቴ::

እስጜ እቑዌ ቻቤልካማ ልቓ ዶንጌቱንኩ ወጌንካ ዙሩንኩ ያኹኒውላ ልቓ ኩፂ ጝሺኪላ እቑዌ ቻቤልካማ ዙርካያ:: ናካ ኪላ ምንግስቱስታ ፋኑው ወሬሙ ስምስኪላ ብሄረሰቡ ቺፅጝፂዳ ኪላ ብሄሩ ጋቻስ  ሚንች ችግር ታምባታ ፄዋማጊያኽ::

ጋያኪ ሰላም ድሳኒ እምፕልታቕ ጛው ዙራሙሪዳ ፌኔኬልጜካማጊ አንትጝ ዴሜካ አይጛስታ አይጛዴስ አይጛ ሶሪያስታ የመንዴስ ካንትኹ ታሪክ ያኻ::

እን አይስ ቴኬሜ?፣ አዋሳ ለጌፄ? እናኒ ዴሜካ ዙርሜ አቱኽ ካሲያኽ:: ምስራክስ ደቡብስ፣ ሰሜን ምራብስ ፅሌ ፄጌራማ ጁዋማጊ ዝኩኽ ወሬምኪላ ይቶፒያኩሳ ጃርካዋ ጛስጛዋ ሌጋ ያኻማ ኹዋማጊያኽ:: እዝብኪላ ቱዋማ ፊጝስ፣ አፌቴራማ ጉሬሮ ልምጝሰ ሰላሞ አኹታ ፃንቑንታ ማጊያኽ::

እዝብ ዲግሳው ካሲስኪላ ምንግስት ዙርሜ እይጝስ አጌራዌ ኩስጝጜ፣ ሰላሙሳ ካውንስሎ፣ ካይጝጚውሳ ፍቶ ቴርስጝስ ቤዴልስትኾ ናው አካልጊ እድሎ አግፃታ እቑዋ ፄዋማጊያኽ::

እስጜ እድሎ ቴኬምስታማ ይቶፒያውሳ ሰላሞ፣ እዝቡሳ ዴክቶ ማንዲጝ ዴሜካ ዋሺኒኪ ካሴ ዲግሳው አካሉኪ ያኻ ምንግስቱ አላፍት አኽጝ ቱስቴ:: ምንግስትኪ ያኻ ካሲ ዝኮናንኩ፣ አካልካጊ እምኽጜስ ዲግጜከማ ችግሮ ኽይጝስ ፌይኹ ኬርትዴስ ክንትጝ ቱስቴ!::