ሹምቢው አንኬባኬብጚ

ታደለ አጋጄ

አሌሙ ምግቡስታ እርሺው አችት /ፋኦ ፍሽኹ ንባር ካንትፃውስታ አሌምዴስ ቹዋስ አሜሬትስታንኩ ሴብልኩ አይኔትካዴስ ሾፌናዉ ብቲው ሜቴንስ ካንትስታኒ ሹምቢው ምርት ሩዝዴስስታ ስንዳይዴስ ሲፋማ ሹኻንቲ አችዳ አግስቴ:: ያኼስጉ ሹምቢ እያው ምርቱ ሚንቺትታ ኩፂ አባላምቲ አችዳ አግስታው አኽⶓ ንባርካ ቶኬማና::

ይቶፒያ ሹምቢው ምርትስ ምስራክ አፍሪካኩ አጌርካዴስ አባላምቲ አችዳ አግስቴት ታኹስ አፍሪካዴስ ዴሜካ ደቡብ አፍሪካዴስ ሲፍታታ ላጛንቲ አችዳ አግሰቲ::

ሹምቢ እን አጌራዳ ሊሊትጙንኩ ክልልካዳ እሳንስ አሜሬትስታው ሴብሊያኽ:: አሬሳቻንትካ ኬሽኹሳ ሹምቢውሳ ምርቶ አግፃንታ ሊሊትጙንኩ ግብርኒዉ ምርምሪው ማይኬልካ ሲዚፅካ አሜትካዴስ ጃላ ሊሊትጙንኩ ሹምቢው ምርምሪው ማይኬልካዳ ሊሊትጙንኩ ምርምሪኩ እንፅኽካ እንፃኽስትካማጊ አግስታና:: አሜት ቺፋ ችኹ ወክትዳ አሬሳቻንትካ ግብርኒው ምርትዳ እሳንስ አሜሬታኑ ሹምቢው ሴብሉ አንኬባኬብጜ ካንታውስ ዚጋሚ ወረዳ ጉንጋስታዲኺ ኬቤሊው አሬሳቻንትካሊ ፄውንኹሳ እጂጜ ናካስ አንቤብፅጝስ ፋኑኻ::

አሬሳቻንቲ ሀብታሙ ደሳለው ጉንጋስታ ዲኺ ኬቤሊው ዝኩዋንትካኽ:: ሹኻ ውጋቢ ብቲዳ ሹምቢውሳ ሴብሎ ዜሬካ:: እንስኪላ እምፕሎ ኩንታሎ ግባቶ ቴኬምስትካ:: ናካ ዜርስትኹ ሹምቢው ሴብል ጉድ አኺኒዳ አግስታው አኽⶓ ቶኬሙንኩ አሬሳቻንቲ ሀብታሙ ዜሩኑሳ ሹምቤ አባላምቴ ዙሬ ሻኺⶓ አሌድካ:: “እምፕልካ እምፕልካ አሬሳቻንትካ ኩፂ ላጛንቲ ዙሬ ሻኺⶓ ጄሜርካ” ኑንኩ አሬሳቻንቲ ሀብታሙ እምፕላንቲ ዙሪ ሹምቤ ሻኩኒዴስ ፋሌንጋ ዩሪያ ማዳባሬ ፄውጝስ ቴርትⶓ ዲብስካ::

ሹምቤ ዜራኑ ወክትዳ ፋይፃውሳ አቓ ግብሬ ማዳባሬ አግፄካማ ዜሮ ዜርካ:: ናካዳ ኩፂ ሻኪስትኹ ሹምቢዳ ዩሪያ ማዳባሬ ፄውⶓ ፋያና:: ያኼስጉ ፋያኑሳ ዩሪያ ማዳባሬ አቲⶓ ድኹዌካ::

ዜሩኑ ሹምቢ ማልጛ ዴስፃው ዳድስ ዋጋ ኑንኩ አሬሳቻንቲ ሀብታሙ አሬሳቻንትካ ሚንቺትስ ሹምቢውሳ ሴብሎ ዜራኑ ኬሽኹስ ምርቶ እያው  አኽⶓ ዲብስካ:: ሹምቢው ምርት ኬሽኹሳ ምርቶ እይጝስ ጉድጛ አንኬባኬብጜ ፄዌካማጊ አግስታንኩ አኽⶓኪላ ዲብስካ::

ግብርኒው ውማይቴንካ እንፃኽስታን ንካማ እንፃኽፁኑሳ ኮምፖስቶ ቴርስካማ ሻኪስትኹ ሹምቢዳ ፄውጝስ ቴርትⶓ ዙሙንኩ አሬሳቻንቲ ዩሪያው ማዳባሪው እንፂት ጌቴማኒ  ክምካውሳ ፍጌ ዴሜካ አኽⶓ ዙሜካ::

አሬሳቻንቲ ሀብታሙ ዜሩኑ ሹምቢዴስ 25 ኩንታል ሹምቢውሳ ምርት አግፅጝስ እንፃኽስታና:: ናካዳ ዳጉፄ ዜራኑ ብቲዳ እርሼ አሬሴካማጊ አግስታንኩ አኽⶓ ቶኬምካ::

ሹምቤ አንኬባኬብጝዳ አክም እላቲንኩ እምፕልታቕኩ ቤንካስ እርዳቴ ፄውⶓ ቶኬምካማ ሹምቢው ሴብል ኬሽኹሳ ምርቶ እያታ ቱስቲስ አንኬባኬብጝ ፋይፃው አኽⶓ ጌሌፅካ::

እሊው ጉንጋና ዲኺ ኬቤሊው አሬሳቻንቲ ገድፋው ቦጋለ ሹምቤ ዛንጌርስ ዜርካማ ጉድ  አችዳ አግስታው አኽⶓ ዙሜካ::

አሬሳቻንቲ ገድፈውኪላ አባላምቲ ዙሪ ሹምቤ ሻኺⶓ አሌድካ:: ሹምቤ ዜራኑ ወክትዳ አሬሳቻንትካስ ማልጛ ፋይስታንቲ ያኹኽስ ሊሙ ሹምቢውሳ ምርቶ ዜሮ አግፅጝስ ካሊካያስኩ አኽⶓ ቶኬምካ:: አኽጝስኪላ ሊሙ ጉልሊ ዜር ድሳኒ እሊውሳ ሹምቢውሳ ዜሮ ዜርጝስ ጌዴድስትካ:: ኬሽኹሳ ምርቶ እያው ሊሙ ጉልሊሊ ዜር አኽⶓ ቶኬሙንኩ አሬሳቻንቲ ገድፈው  ዎክትዳ ፋያኑሳ ግባቶ አግፅⶓ ዙሜካ::

ሲዚ ሄክታር ብቲዳኪላ ሹምቤ ዜርካ:: ላጛ ኩንታላሳ ግባቶ ቴኬምስትካ:: ዜሩኑ ሹምቢዴስ  25 ዴስ 30 ኩንታሎኺስታ ምርቶ አግፅጝስ እክዶ እሚⶓ ድኹዌካ::

ሹምቢው አንኬባኬብጚ ቺጊርፂ ጋቲዊያኽ ኑንኩ አሬሳቻንቲ ግብርኒው ውማይቴንካውሳ ኩስጜ ቻቤልካማ ጉድጛ አንኬባኬብካማጊ አኽⶓ ዙሜካ::

ሹምቤ ሻካኒስ እምፕልካ እምፕልካ አሬሳቻንትካ ጌንዜብስ ጄዋካማ ሻኪፃንኩ አኽⶓ ቶኬሙንኩ አሬሳቻንቲ ገድፈው ውቢሪስ እንፃኽስታንኩ አሬሳቻንትካ ዝኩካ  ንካ::

ሹምቢው ዜር ዜርስቱስ ዳላውሳ አቓ ግብሬ ማዳባሬ አግፅⶓ ዲብሱንኩ አሬሳቻንቲ እንኮጛዴስ ኪቻ ኬሽኹሳ ምርቶ አግፅጝስ ፅሬቶ ፄዌካማጊ አኽⶓ እርዳትፅካ:: አሪሚ ኾቲታ ጉድጛ አንኬባኬብጝስ ኬሽኹሳ ምርቶ አግፅጝስ እንፃኽስትካማጊ አኽⶓ ዙሜካ::

ግብርኒኩ ውማይቴንካ አሬሳቻንትካስ ኩስጜ ቤንጝፄካማጊያኽ ኑንኩ አሬሳቻንቲ ገድፈው ሹምቤ ዎክትስ ሻካማ አንኬባንኬብጝስ ኬሽኹሳ ምርቶ አግፅጝስ እንፃኽስትናናጊያኽ ንካ::

አሜት ቺፋ ኬሴትስትታው ሹምቢው ቑንዚ ዝኮ ኑንኩ አሬሳቻንቲ ቑንዚ ኬሴትስታው ጉዝማ ግብርኒኩ ውማይቴንካ እጆ ዲግሳያንታ ካሲካ:: ሹምቢዳ ቑንዚ ኬሴትስታማ ጉዳቶ ታምፃቲታ ሲፋሲፍጜ ፄዌካማጊ አኽⶓ ዙሜካ::

ዚጋሚ ወረዳዳ ጉንጋስታ ዲኺ ኬቤሊው ሴብል ልማቱ ውማይቴና አያልነሽ አንተነህ ኬቤሊታ ዜርስትኹ ሹምቢው ዜር ጉድ አኺኒዳ አግስታው አኽⶓ ዙሜካ:: ጉንጋስታ ዲኺ ኬቤሊዳ 525 ሄክታር ብቲ ሹምቢው ሴብልስ ሾፌንስትⶓ ጌሌፅካ::

ንጙዊኒ ዎክትዳ ምርት ዜር ያኻ ግባት ዎክትስ አሬሳቻንትካስ ዲጋማ ዜርስትⶓ ዙሙንኩ ግብርኒው ውማይቴና ውላ አሬሳቻንትካስ ዳላውሳ ግባቶ ታምፅⶓ ዲብስካ::

አሬሳቻንትካ “ሊሙ” እስታውሳ ጉልሌ ዜሮ ፋያንኩ ያኹኒውላ ኬቤሊታ ዲጉኹ 25 ኩንታል አኽጝስ እንፂት ዝኩⶓ ዲብስካ::

ኬቤሊዳ ጉድጛ ዋጋው ዙራሙሪስ ሊሙሳ ጉልሌ ዜሮ ቤንጝፅጝስ ካሊስታ ንካ:: ዎታትካስ ዩሪያው ማዳባሪ እንፂት ዝኩኒውላ ዎትትካስጊ ግባቶ ታምፅናናጊያኽ ንካ::

ብቲዴስ ሴጋስታ ኩክራ ኮምፖስቶ ቴርሳንታ ፄውጝስ ኬሽኹሳ ሹምቢውሳ ምርቶ እያታ ፄውስታማጊ አግስቴ ንካ::

ኬቤሊዳ 12 ስፍርካዳ በርሚ ኮምፖስት ቴርስስትኹ አኽⶓ ቶኬሙንኩ ግብርኒው ውማይቴና ናካዳ ዳጉፂው እርሺ አሬስስታማጊ አግስታው አኽⶓ ጌሌፅካ::

ዜርስትኹ ሹምቢዳ ቑንዚ ኬሴትስታቲታ ካንትናናጊያኽ ኑንኩ ግብርኒው ውማይቴና ላጛ አሬሳቻንትካው ብቲዳ ቑንዚ ኬሴትስትⶓ ዙሜካ::

አሬሳቻንትካ እጁ ዲግምባ ኺስታ ባይላዊ ዳድስ ካላካልጛንታ ክንትፅናናጊያኽ ንካ::

ወረዳው ግብርኒው ፅፌት ጝናስ ሹምቢዳ ቑንዚ ኬሴትስትⶓ ድኹና ንካ::

ዚጋሚ ወረዳ ግብርኒው ፅፌት ጝናዳ ሴብሉ ልማቱ ኬቹ ጉሳንቲ መኰነን አድማሱ ወረዳታጊ 13 ሻይ 363 ሄክታር ብቲ ሹምቢው ሴብልስ ሾፌንስትኹ አኽⶓ ዙሜካ::

ፌዩንኩ ላጛ አሜትካዳ ግባቱ ችግርስ ምርቶስታ ምርታምቶ ዴሜክጝስ ካሊስታያሱ አኽⶓ ቶኬምካማ ንጙዊኒ አሜትዳ ኩፂ ግባትኪ ያኻ ምርት ዜር ወክትስ ዲጋማ አሬሳቻንትካ ዴሴካማ ዜርⶓ ጌሌፅካ::

እሪ እንግርታማ አሉኒውላ ናካዳ ዜርስትኹ ሹምቢው ሴብል ጉዶ አኺኒዳ አግስታው አኽⶓ ዙሜካ:: አሬሳቻንትካ ዜሩኑ ሹምቢውሳ ሴብል ጉድ አኺኒስ አንኬባኬብካማጊ አኽⶓ ቶኬሙንኩ አቶ መኰነን እምፕላንቲ ዙሪ ሻኺⶓ አሌድካማ ሹምቤ ሌጌፃውሳ ዩሪያ ማዳባሬ ፄውⶓ ጄሜርካኽ ንካ::

ሌጌስጝስ ፋያው ጊዝዳ ንጝኪ ዜርስ ቱኒዴስ 35-40 ጌርካዳ ዩሪያ ዴሜክጝ ፋይፃው አኽጝታጊ ዎክትስ ዩሪያ ፄዋካማጊያኽ ኑኑ::

አሬሳቻንትካ እንፂት ዝኮ ናኑ ካሲስ ወረዳዳ ኬቤሊዴስ ኬቤሊሾ ቤንጝፅጝዳ ዳንጉኒ ዝኩኒጃ ንጙኒ ዎክትዳ ግባቱ ችግር እላቲው አኽⶓ ዙሜካ::

ሹምቢዳ አሜት ቺፋ ኬሴትስታው ቑንዚ ንⶓኪላ ፌያፌያማ እምፕልካ እምፕልካ ኬቤልካዳ ቑንዜ ኬሴትⶓ ቶኬሙንኩ አቶ መኰነን አሬሳቻንቲ ሹምቢዳ ኬሴትስትኹሳ ቑንዜ ባይላዊ ያኹኽ ዳድስ ካላካልጛንታ ፄውጝ ቱስቴ ንካ:: እንዴስ ድምክና እጆ ጄዌካማ ፄውጝ ፋይፄኪላ ንካ::

ሹምቢ እሺኹዳ ሹምቢ ዜርስታኒ ቑንዚ ኬሴትስታዊያኽ ኑንኩ አቶ መኰነን  ብቴ ኪስጝፄካማ ዜራኒስታ ሳኑዳ እርሼ ጉድጛ አሬሳኒ ቑንዚ ድስጝስ ካላው አኽⶓ ጌሌፅካ::

ወረዳታጊ 1ሻይ 190 ሄክታር ብቲዳ ቑንዚ ኬሴትስትⶓ ቶኬምካ::

ቑንዚ ኬሴትስትኹ ብቲዳ ታፍስ እፄ ሌኬምጝስ ካላካልጝጝስ ካሊስታው አኽⶓ ዲብስካ::

ባይሉ ዳድስ ካላካልጝጝስ ካሊስታቲ ያኹኒ ኩፂ እጆ ጄዌካማ ቴኬምስትጝ ቱስቴ ንካ::