“ ጋቻዴስ ፊቲስናው ፊቲ እላኽ”

ታደለ አጋጄ

አማኻሪ ክልልዳ ኬሴትስትኹ ጋቻስ እምፕልታቕዳ ፖላቲካው ኢኮኖሚውስታ ማይቤራዊ ቻኒስቶ ታምፃማጊ አግስቴ:: ብሄረሰቡ ቺፅጝፂዉ ሊሊትጙንኩ ወረድካዳ ፅንፊኒ ኬቹ ልቕልቕቲስ ክንታንትካ ክንቲዴስ ሴጋ ያኼካ:: እምፕል ስፍሪዴስ እሊው ስፍሪሾ እንዜጛማ  እንፃኽስታቲታ ፄውስታ:: ሚንችካ እምፕልታቕ ዝኩፂ ጝንዴስ ፌኔኬልጜካ ::  አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለውሊ ወክታዊ ሰላሙስታ ፄትቲው አኺኒዳ ፄውስትኹሳ ናካስ አንቤብፅጝስ ፋኑኻ::

ቺርቤዋ፡- ሰላሙስታ ፄትቲው ችግሩ ምክኒያቲስ ፌኔኬልጙንኩሳ እምፕልታቖ ዙርፃማ ቲሪትጝጝፅጝስ እንፃኽስስትኹ እንፅኺ እንዳራይ ፄጌሬ?

አቶ ቴዎድሮስ፡- እምፕልታቕ ፌኔኬልጛንታ ፄውኹ ችግር እንዳርማይ? ናውሳ ቱስቲስ ካንትኑኒዴስ ፋሌንጋ ፌኔኬልጙንኩሳ ዙርፅጝስ ካሊስታው:: ሊሊትጙንኩ ይቶፒያው ቤንዳ ዝኩኽ ችግርታ ብሄረሰቡ ቺፅጝፂዳኪላ ፅንፌንቱ ልቕልቕቲ ፌቴርኹ ችግር ዝኮ::

ሚንችካ አቕ ጛው ዙራሙሪዴስ ፌኔኬልጜካ:: ፌኔኬልጙንኩሳ እምፕልታቖ እሺኑ ዙራሙሪሾ ዙርፅጝስ ኮሚቴ እቺትጛማ፣ እክድ አኬድስታማ ጌርክ ቺፋ ትኩቶ እይናና እንፃኽስትናናጊያኽ:: እንኮጛ ጄሜርካማኽ እምፕልታቕ ፌኔኬልጝⶓ ጄሜርኑ:: እንዴስ ጊዝዴስ ናቴ ፌኔኬልጝጚ እሳናማጊ ይንታ:: ፅንፌንቱ ልቕልቕቲው ችግር እንግራ ችግሮ ባስጝፃማጊ ዝኮ:: ፌኔኬልጙንኩሳ እምፕልታቖ እሺኑ ስፍሪሾ ዙርፅጝዴስ ቤዴራ ኩፂ ፌኔኬልጛንታ ፄውኹ እንዳርማይ? ናውሳ ጉድጛ ካንትኑኒዴስ ፋሌንጋኽ እንፅኺሾ ቱንኹ:: አዊው እዝብ እምፕልትስ ኬቤቤርጛማስታ ቴቤቤርጛማ ዝኮው እዝብዳ እንዳርማይ ፌቴርስትኹ? ችግሮ ፌቴራንኩ አካልካ ምክኒያታ ፄዌካማ ፌቴራኑ ችግሩ ጉሽፂ ዲብ እንዳርማይ? ናውሳ ቱስቲስ  እምፕልታቕሊ ኩስጝናና፣ ፌኔኬልጙንኩ እዝብካሊ እንዳርማይ ኬሻው? ናውዳ ዙሚትጝናና እንፅኼ ጄሜርና:: ፌኔኬልጙንኩሳ ዙርፃማ እሺኑ ስፍሪሾ ዙርፅጝዴስ ፍና እምፕልታቕዳ ታክስጝጚዉሳ ካንቴ ክችሳንታ ፄውጚያኽ::

እምፕልትስ  ቴቤቤርጛማስታ ኬቤቤርጛማ ዝኩጝ እምፕልታቕዳ እሺኹጉ እኖጂ እምፕልታቕስ ክንትፅናው ጋቲውያኽ:: እዝብ እኖጂስ ክንትፄ:: እን አኽጝስ እሺኹሳ ዲቦ ዋታ ያኻኒይ እዝብ ጛስጛዋ ችግርዳ ቱዋኑ? ችግሮ ፌቴራንትካስ ምክኒያታ ያኻኑ ዋታያኻኒይ? እምፕልቱ እንዝጚዳ ችግሮ ፌቴራንኩሳ እምፕልታቖ ዋትጛይ ካላካልጝጝስ ካሊስታው? ናው ዲብዳ ኩስጝኑኒዴሰ ፋሌንጋ ፌኔኬልጙንኩሳ ዙርፅⶓ ጄሜርንኾ:: ችግሮ  ቱስታዉ ዳድስ ካንትናና ክችስናውላስ እንግራ ፌኔኬልጝጝ ይጉዋቲው አኽጝስ እሺኹሳ ዲቦ ሹማጌልካሊስታ አይማኖትኩ ታብልሊ እንቲታኪ  ፌኔኬልጛንትካዋ ቲሪትጝፃንቲ ኮሚቴ  ጌርክ ቺፋ ኩስጝጜ ፄዌካማጊ እምፕልታቕሊ እሳኖ ኩስጜ ካስጝፁንዴስ ፋሌንጋ እንፅኺሾ ቱስታ::

እምፕልካ እምፕልካ ዙራሙርካዳ ፌኔኬልጛንትካ ዙሩኑ አኺኒ ዝኮ:: ችግርካ ኩፂ ድሳላ:: ጝን ድጙስትኹ ፣ አሪ ድጙስትኹ፣ አብትስታ ንብሬት ዎዴምኹ ዝኮ:: እን ችግር ዝኮማውላ ያኹኒ ፌኔኬልጛንትካ እምፕልታቕ ቱዌካማ እርሼ  አሬሳኑላ ይጉኒ ባስኹ ዲብ ታምቤ:: ፌኔኬልጛንትካ ካላኑውስጊ እርሺውሳ እንፅኼ ጄሜራንታ ግባቶ ጉሺስ ዲጋታ ፄውና::

እምፕልታቕ  ዴሜካ ኩስጝጜካማጊ እሺኹሳ ችግር ዜኔጋታ፣ፌይኹሳ ዲቦ ታክሳማጊ ክርጛቲንታስታ እምፕልትስ ዝኮዋንታ ፄውናናኽ እንፅኼ ጄሜርንኹ:: አዮ ጉዋጉሲ ወረዳሾስ ዝኩኹ ዲብ ማልጛ ሼጊ:: ዚጋሚ ወረዳዳ ኩፂ ይጉዋው ዲብ ዝኮ:: ሶሪቱ እምፕልታቕ ቱⶓ ጄሜርካ:: ጉዋኻዳ ማልጛ እንፅኼ ፋያው ዲብ ዝኮ:: እምፕልታቕ እንኮጛኪላ ዙርናና ቱናና ካብስ ፌኔኬልጝንኾ ናካኪላ ያኹኒ እንታኮው ዲብ ፌቴርስታቲታ ዙራሙሪዳ ጉድ ሰላምስታ ፄትቲ አኺኒ ዝኩጝ ፋይፄ ናኑሳ ካሴ ካሴና::

አምቢሊዳ ሰላሙስታ ፄትቲውሳ አኺኒ ማንዳውሳ አይሎ ቲሪትጝፅና:: ጉዋኻዳኪላ ፄትቲዉሳ አይሎ ቲሪትጝፅና:: እንዴስ ጃላ አይል ዴሜክስታታ ፋያንኩ ፌኔኬልጙንኩ እምፕልታቕ ዝኩና:: ቹዋ ዲብ ኩፂ እዝብ ጛስጛዋ ቱትጝጚስ፣ እምፕልትስ ቴቤቤርጛማ ዝኩጝ ፋይፃው አኽጝስ እምፕልታቑ ታክስጝጚዳ እንፃኽስስታው ዲብ ፋይፄ::  ጃዊ ወረዳዳ ፌኔኬልጛትካዋ ዙርፅጝስ ዙራሙሬ ፅንፌንካዴስ ፃንኩፅጝ ፋይፄ::ናካ ትኩቶ እይናና እንፃኽስትናው እንጚዳኽ:: ፌኔኬልጙንኩሳ ዙራሙሬ ፃንኩፅናውላ እሺኑሾ ዙርፅናኻ አኽኑኒጊ ካብስ ችግር ፌቴርስትጝ ይጉዋላ:: ዋኽስ ዋኾ ሰላሞ ቼሜትጝፅጙ እንፅኺዳ እንፃኽስትናናጊ አግስትኔ::

ቺርቤዋ፡- ብሄረሰቡ ቺፅጝዳ አግስታንኩ ሊሊትጙንኩ ብሄርካስታ ብሄረሰብካ እምፕልትስ ቱትጜካማስታ ካሊትጜካማ ዝኩዋንታስታ ኬሽጙኽ ሰላም ይንታታ  ፄውጝስ ዋታኮው እንፅኺ እንፃኽስስታ?

አቶ ቴዎድሮስ፡- እምፕልታቕዳ እንፃኽስትጝ ዝኩኹ ቹዋ ዲብ ታክስጝጚዳኽ:: እምፕልታ ዝኩⶓ አመራር እዝብስ ክንትፃው ጋቲዊያኽ:: እዝብ እኖጂስ ክንትፄጉ:: እሺኹ ጋማ፤ ሴጙኽ ጋማ፤ አጌርታ ናማኪ ክልልታ ፌቴርስትኹሳ ችግሮ ምክኒያታ ፄዋማ ብሄረሰቡ ቺፅጝፂዳ ዝኩዋንኩ ብሄር ብሄረሰብካዳ እምፕል እምፕል ችግር ፌቴርስታታ ፋያንኩ አካልካ ፌቴሩኑ ፅንፌንት ልቕልቕቲስ ልቓ ጊዝካሱላ ያኹኒ ችግርዳ ቱዋናጉ፣ ቻ ቻዴስ ቻ እዝብ እዝብዳ ጁዋላኽ:: እምፕል እዝብ እሊው እዝብስ ጚፄኽ:: እኖጂ እንሳ ዲቦ እምናና እምፕልታቕስ ሚንቾ ሜድሬኾ ፌቴርናና ኩስጝና::

እምፕልትስ ዝኩጝዳ ጉዲስታው እዝብ እላ:: እንዴስ ቤዴራ እሺኹሳ እምፕልትስ ዝኩዊኔ ሲፍፅጝስ እናናኽ እዝብሊ ቱትጝናና እንፃኽስትናው:: እዝብ ማልጛ ዴጌፉኹ ዲብ እምፕልትስ ዝኩዊኒውሳ ትክሞ ኽምቢዴስ ፌይኹስ አመራርካ ቴግባርስ እንፃኽስታን ንካማኽ እኖጂስ ድኹዋኑ:: “እሺኹሳ ዲቦኪላ ያኹኒ ይክር ይጉዌስ እንስጉ” እናናጊ እምፕልትስ ዝኩናው ፌይኹሳ ዲቦ ታክስናናጊ ካናኽ አኽኑኒ ዲብ እሳናማጊጃሊ ኔኬታማጊ ካሳላኽ ናውሳ ካንቴ እይካማጊያኽ እዝብኪላ  ::

ቺርቤዋ፡- ብሄረሰቡ ቺፅጝፂዳ ፋይስታው ሰላም ይንታቲታ ፅንጋኻ ያኹኽ ዲብ እንዳርማይ?

አቶ ቴዎድሮስ፡- አባላምቲዳ ሰላም ይንታቲታ ፅንጋኻ ያኹኽ ዲብ እንዳርማይ ናውሳ አሳቦ እይጝዴስ ፍና እዝቡሳ ፋዮ እርዳትስትጝ  ዝኮ::  እኖጂ ጉስናው  እዝብ እንዳራይ ፋያዉ? እናኒ “እምፕልቶኽ” :: ውላ ወረዳዳ እዝቡሳ ሜድሬኾ ፌቴርና:: እዝብ አመራርስ ዲብሳኑ ዲብ “እሽንኹስታ ሴጝንኹስታ ዝኩንስ” ናና:: “እምፕሎ ጎሌልትካማ እምፕሎ ሼኬንኪ አዴራ” ንካ::  ቹዋ ፅንጋኺ ዲብ እዝቡሳ ፋዮ ፋያቲዊያኽ፤ እሊው ፅንጋኺ ዲብ እላኽ:: እዝብ ናው “እምፕልትስ እንካንጝናና ዝኩንስ ፤እንዜጝንስ” ናውያኽ:: ብሄረሰቡ ቺፅጝፂው እዝቡ ሜብት ዝኮ:: እሊው አቒውሳ ሜብቶ ኬቤርፅጝ ዝኮ:: አቒ አቒታ ካንትስትጝ ፋይፄ:: አቒ ጐሌልስትጝ ፋይፃላ::

አቔ ዜርስ፣ ኮንኪስ፣ ብሄርሰ፣ ክንቲው አችስ ጐሌልⶓ ፋይፃላ:: ውላ ክችክቺስ ካንትጝ ዝኮ ናውስ እንፃኽስትናናጊያኽ:: እኖጂስ ፅንጋኻ ያኹኽ ዲብ እናና ሺሽንኹ እዝቡሳ ፋዮ ፋያቲው አቒ ይቢቺያኽ::

ፌዴራሉ ምንግስት ያኻ ክልሉ ምንግስት ዶንጌትካማ ልቕልቕናንኩሳ ሰላሙሳ እቑዌ ካቢትጝፃማ ዲግሳ:: ብሄረሰቡ ቺፅጝፂዳ ሰላሞ አዌካንኩ ዎጌንካስ ብሄረሰቡ ቺፅጝፂታ ዲጉኽ እቑዊ ዝኮማ?

ብሄረሰቡ ቺፅጝፂዳ ዝኩንኩ እዝብካ እምፕልትስ ዝኩጝ ፋይፄ:: አውጜ ካላው ዝኮ:: አውጜ ካላቲው ዝኮ:: አዊ ዝኮ:: አማኻሪ ዝኮ:: ሽናሺ፣ ኦሮሙስታ ጉሙዝ ዝኮ:: እሊኩጊ ዝኩዋና:: እኒጛጊ ጚስጜዋ ካሊትጛማ እምፕልትስ እንዜጛታ ፋይስቴ:: ዶንጌትካማ ፉንኩሳ አዋን ንጝስ እምፕልትጝ ፋይፄ:: “እምፕልት አክምያኽ፤ እምፕልት አይሊያኽ”:: እምፕልትናና ጁኑኒ ዋዴስኪ ይንትኹስ ዶንጌትኹሳ አይሎ ካላካልጝጝስ ካሊስቴ:: ናካኪላ ያኹኒ ካላካልጝናናጊያኽ:: ናካኪላ እምፕልዳ ቲሪጝ ፋይፄ:: እኑስ እኖ እምፕልታ ቲሪናቲታ ፄዋውሳ ዲቦ ጌውጝ ዝኮ:: ሰላሞ አሚጝስ እኑስ እኑዳ ዝኩኽ እምፕልትጝ ኽሳንቲ ዲብያኽ:: ዶንጌትካማ ካዌና ፉንኩ አካልካ ፌዴራሉ ምንግስትኪላ ስላሙሳ እቑ ዌ ዲግስና::

ክልልኪላ እቑዌ ዲግሳ:: ብሄረሰቡ ቺፅጝፂዳ ሹማጌልካስታ አይማኖትኩሳ ታብሎ እምናና እንፅኼ ጄሜርና:: ሚንችካ ዶንጌትካማ ፉንኩ አይልካ ዙርካ:: ሰላማዊ ዳድስ ይንታኒ ሰላማዊ ዝኩዊኔ ሲፋንታ ክንትፃማ እዝብሊ ዝኩዋንታ ፄውጝ ፋይፄ:: እን እኖጂዴስ ማንዲስቴ:: ካቢትጝፅናናጊ ሰላሙሳ እቑዌ ዲግስጝ ፋይፄ:: ክልልታ ሰላሙ ኮሚቴ ቲሪትጛማ ዶንጌትካማ ፋንኩሳ እቑዊ ፄውስታማጊ ዙራንታ ፋይስታው አኽጝስ ቹዋ እንፅኺ ፄውናና እምና::

ቺርቤዋ፡- ብሄረሰቡ ቺፅጝፂ ዎሌን ከልልካሊ እምፕልትስ ዝኩጝስ ናካዳ ዝኩኹ ታምትጚ እንዳርማይ?

አቶ ቴዎድሮስ፡- እኖጂስ ዎሌንካ ቤንሻንጉል ጉሙዝሊስታ ኦሮሚያ ክልሊ ዎልትኔ:: ቤንሻንጉል ክልሊ እንዴስ ቤዴራ እሺኹሳ ችግሮ ኩስጝናና ሰላም ይንታታ ፄውና::  ችግር ፌቴርስታኒ ስርዴስ ስርዴስ ድፅጝ ቹዋ ዲብያኽ:: እዝብ ጛስጛዋ ታምትጛማ ችግሮ ኽያታ ፄውስቴ:: ትክላሊስ ካንትስታኒ ዎሌንሊ ሼጊ ታምትጚ ዝኮ::

ቺርቤዋ፡- ናካዳ ዜርፍጝ፣ አቖ ኩጝ፣ ዳዴኽስታ ፄጌርጙንኩ ዲብካ እሳንጛማጊ አግስቴ:: እንታኮውሳ ዲብ ይጉፅጝስ እንፃኽስታማጊ ዝኩኽ ዲብሳ እንዳርማይ?

አቶ ቴዎድሮስ፡- ብሄረሰቡ ቺፅጝፂታ ፅንፌንካዴስ ኔፃ ፉኹሳ ኬቴሞስታ ኬቤልካ እንቲታኪላ ኔፃ ፌካያስኩሳ ኬቤልካዋ ሺሽና:: ናካዳ ማልጛ ዎንጄል ኬሴትስታማጊ ዝኩኹ ኩፂ ኔፃ ፍኹዳ ስፍርካዳኽ:: ኔፃ ፌካያስኩ ኬቴምካዳስታ ኬቤልካዳ አጌሩ ካላካልጝጚው ሴራዊቲ ስምሪቶ ካፃማ ኔፃ ፍሽጝስ እንፃኽስስታማጊ አግስቴ:: 84 ኬቤልካዳ ኔፃ ፄውስታ:: ማልጛ ችግር ያኹኽ ዲብ ኔፃ ያኹኽ ስፍሪዳ አቺትጛማ ዜሬፍጝ፣ አቔ ኩጝ፣ አቔ አጌትጝ ዝኮ::ናካ አቒ ክሚታ አጌትስታማ ዋይስታው ጊዝዳ ታምና:: እንታኮው ችግር ብሄረሰቡ ቺፅጝፂውሳ እዝቦ ማልጛ ችግርዳኽ ሚፃው:: እንሳ ችግሮ ቱስታው ዳድስ ካላካልጝጝ ፋይፄ እናና እዝብሊ ቱትጝና:: ዶንጌትካማ ፉንኩሳ ዙራንታ ፄውጙሳ እንፅኼ እንፃኽስትናናጊያኽ:: አቺትጛማ ፍኹ አይል ዝኮ:: ቻግኔ፣ ጉዋንጌ፣ እንጃቢሬ ፄጌርጛንኩ ኬቴምካዳ አቔ ኩጝ፣ ዘሬፍጝስታ ፄጌርጙንኩ ዎንጄልካ ፌፄምስታና:: እንታኮው ዲብ ፌፄምስታው ላጛ ምክኒያትካሲያኽ:: እምፕል ምክኒያት እንፃኽስታማ ኹⶓ አቱኹ ዳዳኼ፤ ዜሬፌ:: እሊው ምክኒያት ዴሜካ እንታኮውሳ ፂዌ ፌፄማው እዝቦ ችግርዳ ሚፅጝሲያኽ:: እሊኩ ብሄረሰብካ ዝኩዋኑ ኬቴምዳ  ጋቻዋ ፌቴርጝስ ፄውስታው ልቕልቕቲ ዝኮ:: እንሳ ካላካልጝጝስ እንፃኽስትናናጊያኽ:: እምፕልታቕ ዴሜካ እንታኮውሳ ዎንጄሎ ካላካልጝስ ምንግስትሊ እምፕልትስ እንፃኽስትጝ ፋይፄ:: ጋቻዴስ አግስታው ዳማኪ ፊቲ እላኬኽ::

ቺርቤዋ፡- አሜሴጌንኔ::

አቶ ቴዋድሮስ፡- አንኪላ አሜሴጌናኽ